ຜົນກອງປະຊຸມລັດຖະບານ ສະໄໝສາມັນປະຈຳເດືອນເມສາ 2020

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພະຫັດ, 23 ມ.ສ 2020 20:00


​​​​​ກອງປະຊຸມລັດຖະບານ ສະໄໝສາມັນ ປະຈຳເດືອນເມສາ 2020 ໄດ້ໄຂຂຶ້ນໃນຕອນເຊົ້າ ແລະ ປິດລົງໃນຕອນແລງ ຂອງວັນທີ 23 ເມສາ 2020 ໂດຍເປັນກອງປະຊຸມທາງໄກ (Video Conference), ພາຍໃຕ້ການເປັນປະທານ ຂອງທ່ານ ທອງລຸນ ສີສຸລິດ, ນາຍົກລັດຖະມົນຕີ; ມີບັນດາທ່ານຮອງນາຍົກລັດຖະມົນຕີ, ສະມາຊິກລັດຖະບານ ພ້ອມດ້ວຍ ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດ ຂອງພະຍາດໂຄວິດ-19 ແລະ ຄະນະສະເພາະກິດ ຮັບຜິດຊອບຕິດຕາມຜົນກະທົບ, ຜັນຂະຫຍາຍນະໂຍບາຍ ແລະ ມາດຕະການຫຼຸດຜ່ອນຜົນກະທົບ ການແຜ່ລະບາດຂອງພະຍາດໂຄວິດ-19 ເຂົ້າຮ່ວມຢ່າງພ້ອມພຽງ.

​​​​​ກອງປະຊຸມຄັ້ງນີ້ ລັດຖະບານໄດ້ຄົ້ນຄວ້າ, ພິຈາລະນາ ແລະ ປະກອບຄຳເຫັນ ຕໍ່ບົດລາຍງານ: 1.​ ຄວາມຄືບໜ້າ ແລະ ຜົນການຈັດຕັ້ງປະຕິບັດຄຳສັ່ງ ຂອງນາຍົກລັດຖະມົນຕີ ສະບັບເລກທີ 06/ນຍ, ລົງວັນທີ 29 ມີນາ 2020 ວ່າດ້ວຍການເພີ່ມທະວີມາດຕະການສະກັດກັ້ນ, ກັນການລະບາດ, ຄວບຄຸມ ແລະ ການກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19 ທັງຕິດພັນກັບ ວຽກງານປ້ອງກັນຄວາມສະຫງົບ ແລະ ວຽກງານການຕ່າງປະເທດ; 2. ບົດລາຍງານ ຄວາມຄືບໜ້າການຈັດຕັ້ງປະຕິບັດ ການແກ້ໄຂຜົນກະທົບ ແລະ ຜັນຂະຫຍາຍນະໂຍບາຍ, ມາດຕະການ ເພື່ອຫຼຸດຜ່ອນຜົນກະທົບ ຈາກການລະບາດຂອງພະຍາດໂຄວິດ-19 ຕໍ່ເສດຖະກິດຂອງລາວ; ມາດຕະການໃນຕໍ່ໜ້າ ເພື່ອຮັບມືການລະບາດຂອງພະຍາດ.
​​​​​ຜ່ານການພິຈາລະນາ ແລະ ປະກອບຄຳເຫັນ, ກອງປະຊຸມ ໄດ້ສະແດງຄວາມຊົມເຊີຍຄະນະສະເພາະກິດ ທັງ 2 ຄະນະ, ບັນດາຂະແໜງການທີ່ກ່ຽວຂ້ອງ, ນະຄອນຫຼວງວຽງຈັນ ແລະ ບັນດາແຂວງ ໃນຂອບເຂດທົ່ວປະເທດ ໄດ້ເອົາໃຈໃສ່ ແລະ ສຸມທຸກກຳລັງ ເຂົ້າໃນການຈັດຕັ້ງປະຕິບັດຄຳສັ່ງ  ຢ່າງເຂັ້ມຂຸ້ນ ແລະ ມີປະສິດທິຜົນດີ, ທຸກພາກສ່ວນໃນສັງຄົມ ໄດ້ເຂົ້າຮ່ວມ ແລະ ຮັບຜິດຊອບ ຕາມພາລະບົດບາດຂອງຕົນເອງ, ສ້າງໄດ້ຂະບວນການທີ່ເປັນຮູບປະທໍາຢ່າງແທ້ຈິງ ຈຶ່ງສາມາດຄວບຄຸມການລະບາດ ໂດຍບໍ່ມີຜູ້ຕິດເຊື້ອເພີ່ມອີກ ຊຶ່ງເປັນມື້ທີ່ 11 ຕິດຕໍ່ກັນ.
​​​​​ເຖິງແນວໃດກໍ່ຕາມ ພວກເຮົາກໍ່ບໍ່ທັນອຸ່ນອ່ຽນໃຈໄດ້ເທື່ອ ເພາະການລະບາດຂອງພະຍາດ ຢູ່ບັນດາປະເທດຕ່າງໃນໂລກ ແລະ ພາກພື້ນ ຍັງສືບຕໍ່ມີຄວາມຮຸນແຮງ, ມີຜູ້ຕິດເຊື້ອ ແລະ ເສຍຊິວິດເພີ່ມຂື້ນ ເປັນຈຳນວນຫຼວງຫຼາຍໃນທຸກໆຊົ່ວໂມງ. ສຳລັບປະເທດພວກເຮົາ ກໍຍັງຈະມີຄວາມສ່ຽງ ແລະ ສິ່ງທ້າທາຍຈໍານວນບໍ່ໜ້ອຍ, ແຮງງານລາວ ທີ່ກັບຄືນມາແລ້ວ ເຖິງວ່າສ່ວນຫຼາຍ ໄດ້ຄົບໄລຍະເວລາກັກກັນ ແລະ ກັບບ້ານແລ້ວ, ແຕ່ກໍຍັງມີແຮງງານຈຳນວນໜື່ງ ທີ່ຈະສືບຕໍ່ເຂົ້າມາຕື່ມໃນແຕ່ລະວັນ, ຊຶ່ງຈະຕ້ອງໄດ້ສືບຕໍ່ເອົາໃຈໃສ່ເປັນພິເສດ ໃນການກັກກັນ ເພາະວ່າ COVID-19 ແມ່ນພະຍາດນຳເຂົ້າ ແລະ ເວລານີ້ປະເທດອ້ອມຂ້າງ ພວມມີການລະບາດຫຼາຍກວ່າ ໄລຍະກ່ອນໜ້ານີ້, ເຊິ່ງໃນນີ້ ບາງປະເທດ ແມ່ນເປັນການລະບາດຮອບທີ 2. 
​​​​​ໂດຍອີງໃສ່ການລາຍງານ ຂອງຄະນະສະເພາະກິດທັງສອງຄະນະ ແລະ ການປະກອບຄຳເຫັນ ຂອງສະມາຊິກລັດຖະບານ, ທ່ານນາຍົກລັດຖະມົນຕີ ໄດ້ມີຄຳເຫັນ ເນັ້ນຕື່ມບາງບັນຫາ ດັ່ງນີ້: 
​​​​​1. ເປົ້າໝາຍໃນຕໍ່ໜ້າ: 
​​​​​1) ຕ້ອງປົກປ້ອງຊີວິດ ແລະ ສຸຂະພາບຂອງປະຊາຊົນ, ຮັບປະກັນບໍ່ໃຫ້ມີການລະບາດ ຂອງພະຍາດອອກສູ່ວົງກວ້າງ ແລະ ພະຍາຍາມໃຫ້ຮັກສາຈຳນວນຜູ້ຕິດເຊື້ອໃນ 19 ຄົນນີ້ເທົ່ານັ້ນ, ພ້ອມທັງ ພະຍາຍາມປິ່ນປົວຜູ້ຕິດເຊື້ອແລ້ວໃຫ້ຫາຍດີ. 
​​​​​2) ຫຼຸດຜ່ອນຜົນກະທົບ ຂອງການລະບາດພະຍາດດັ່ງກ່າວ ຕໍ່ເສດຖະກິດ-ສັງ ຄົມຂອງລາວ ໃຫ້ໜ້ອຍທີ່ສຸດເທົ່າທີ່ຈະເຮັດໄດ້. 
​​​​​3) ຕ້ອງຮັບປະກັນຄວາມສະຫງົບ, ຄວາມປອດໄພ, ຄວາມເປັນລະບຽບ ຮຽບຮ້ອຍຂອງສັງຄົມ ແລະ ຄວາມໝັ້ນຄົງຂອງຊາດ. 
​​​​​2. ກ່ຽວກັບມາດຕະການປ້ອງກັນ, ຄວບຄຸມ ແລະ ຮັບມື ການລະບາດ COVID-19:
​​​​​1) ໃຫ້ສືບຕໍ່ເຂັ້ມງວດໃນການປະຕິບັດຄຳສັ່ງ ເລກທີ 06/ນຍ, ແຈ້ງການ ຫຼື ຄຳແນະນຳ ຂອງຄະນະສະເພາະກິດ ແລະ ຂະແໜງການທີ່ກ່ຽວຂ້ອງ ຈົນຮອດວັນທີ 3 ພຶດສະພາ 2020 ຕາມທີ່ລັດຖະບານໄດ້ຕົກລົງ, ໃນນີ້ ໃຫ້ເພີ່ມຄວາມເຂັ້ມງວດ ໃນການປະຕິບັດມາດຕະການຈໍານວນໜື່ງ ຍັງບໍ່ທັນປະຕິບັດໄດ້ດີເທົ່າທີ່ຄວນ  ແລະ ຍັງມີລັກສະນະຖືເບົາ ນັບແຕ່ວັນທີ 20 ເມສາ ມານີ້ ເປັນຕົ້ນ: 
​​​​​2) ໃຫ້ສືບຕໍ່ເອົາໃຈໃສ່ຄຸ້ມຄອງ ຄົນທີ່ຈະມາຈາກຕ່າງປະເທດໃນຕໍ່ໜ້າ ໂດຍສະເພາະ ແຮງງານລາວ ທີ່ຈະກັບມາຈາກປະເທດໃກ້ຄຽງ ທີ່ຈະສືບຕໍ່ເຂົ້າມາ  ແລະ ຊ່ຽວຊານບັນດາໂຄງການ ແມ່ນໃຫ້ມີການກັກກັນ ຢູ່ສູນ ແລະ ກວດຫາເຊື້ອພະຍາດກ່ອນ. ຖ້າຜົນກວດອອກມາ ເປັນບວກ (ມີເຊື້ອ) ໃຫ້ສົ່ງເຂົ້າໂຮງໝໍ ເພື່ອຮັບການປິ່ນປົວທັນທີ, ຖ້າຜົນກວດອອກມາເປັນລົບ (ບໍ່ມີເຊື້ອພະຍາດ) ໃຫ້ສືບຕໍ່ກັກກັນຕົວ ແລະ ຕິດຕາມອາການ ຈົນຄົບ 14 ວັນ, ຫ້າມເດັດຂາດ ບໍ່ໃຫ້ກັກກັນຕົວຢູ່ເຮືອນ.
​​​​​3) ໃຫ້ຄະນະສະເພາະກິດ ແລະ ບັນດາຂະແໜງການທີ່ກ່ຽວຂ້ອງ ເອົາໃຈໃສ່ເປັນພິເສດຕໍ່ວຽກງານຈຳນວນໜື່ງທີ່ຜ່ານມາ ຍັງມີຄວາມເຂົ້າໃຈທີ່ບໍ່ເປັນເອກະພາບກັນ ຊຶ່ງບາງທ້ອງຖິ່ນ ໄດ້ກຳນົດເງື່ອນໄຂສະເພາະຂອງຕົນ ໂດຍບໍ່ທັນສອດຄ່ອງກັບ ເນື້ອໃນຈິດໃຈຄຳສັ່ງ 06/ນຍ ໃນການຈັດຕັ້ງປະຕິບັດຕົວຈິງ ເປັນຕົ້ນ: 
​​​​​- ບາງທ້ອງຖິ່ນ ຍັງມີການຈຳກັດ ແລະ ສ້າງຄວາມຫຍຸ້ງຍາກ ໃຫ້ປະຊາຊົນໄປທຳການຜະລິດ, ໄປນາ, ໄປສວນ ແລະ ໄປທໍາມາຫາກິນ, ຊຶ່ງໃນຄຳສັ່ງ ເລກທີ 06/ນຍ ແມ່ນບໍ່ໄດ້ຫ້າມ.
​​​​​- ການອອກນິຕິກຳຜັນຂະຫຍາຍ ຫຼື ແນະນໍາ ຂອງບາງຂະແໜງການ ແລະ ທ້ອງຖິ່ນ ເຫັນວ່າມີກໍລະນີ ຂັດກັບເນື້ອໃນຈິດໃຈຂອງຄໍາສັ່ງ 06/ນຍ. 
​​​​​- ຍັງມີການໂຄສະນາເຜີຍແຜ່ຂໍ້ມູນຂ່າວສານ ທີ່ບໍ່ມີມູນຄວາມຈິງ, ຂ່າວລວງ, ຂ່າວລື, ຂ່າວອະກຸສົນ ແລະ ຂ່າວປັ່ນປ່ວນ.
​​​​​4) ໃຫ້ຄະນະສະເພາະກິດ ຄົ້ນຄວ້າ ແລະ ກຳນົດວ່າ ເຂດໃດເປັນເຂດທີ່ມີຄວາມສ່ຽງສູງ, ເຂດໃດເປັນເຂດທີ່ມີຄວາມສ່ຽງໜ້ອຍ ແລະ ເຂດໃດບໍ່ມີຄວາມສ່ຽງ (ເຂດແດງ, ເຂດເຫຼືອງ ແລະ ເຂດຂຽວ) ພ້ອມທັງ ກຳນົດແຈ້ງວ່າມາດຕະການປ້ອງກັນ ແລະ ຄວບຄຸມ ໃນແຕ່ລະເຂດ ຕ້ອງເຮັດແນວໃດ, ເຂດທີ່ມີຄວາມ ສ່ຽງໜ້ອຍ ແລະ ບໍ່ມີຄວາມສ່ຽງ ຈະຜ່ອນຜັນໃນການປະຕິບັດບັນດາມາດຕະການປ້ອງກັນ ແລະ ຄວບຄຸມຄືແນວໃດ?, ຈາກນັ້ນອອກຄຳແນະນໍາ ໃຫ້ບັນດາທ້ອງຖິ່ນ ແລະ ພາກສ່ວນກ່ຽວຂ້ອງ ຈັດຕັ້ງປະຕິບັດ.
​​​​​5) ໃຫ້ກະຊວງຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວ: ເພີ່ມທະວີການໂຄສະນາເຜີຍແຜ່ໃຫ້ປະຊາ ຊົນເອົາໃຈໃສ່ ແລະ ມີສະຕິໃນການປ້ອງກັນຕົນເອງ ເພື່ອບໍ່ໃຫ້ມີຄວາມສ່ຽງໃນການຕິດເຊື້ອ ຕາມການແນະນໍາຂອງຄະນະສະເພາະກິດ ເປັນຕົ້ນ ມາດຕະການນໍາໃຊ້ຜ້າປິດປາກ-ດັງ, ມາດຕະການລ້າງມືດ້ວຍນໍ້າຢາລ້າງມື, ມາດຕະການຮັກສາໄລຍະຫ່າງ, ມາດຕະການຮັກສາຄວາມສະອາດໃນການກິນຢູ່;  ວາງແຜນໃນ ການປັບປຸງຟື້ນຟູການທ່ອງທ່ຽວ ແລະ ການບໍລິການ ໃນໄລຍະສັ້ນ, ກາງ ແລະ ຍາວ.
​​​​​6) ໃຫ້ກະຊວງປ້ອງກັນຄວາມສະຫງົບ, ກະຊວງປ້ອງກັນປະເທດ ແລະ ອົການປົກຄອງທ້ອງຖິ່ນ ເອົາໃຈໃສ່ສະກັດກັ້ນແກ້ໄຂການລະເມີດຄຳສັ່ງ, ນິຕິກຳຕ່າງໆ ໃນການຕ້ານ COVID-19 ແລະ ບັນດາປະກົດການຫຍໍ້ທໍ້ ໃນສັງຄົມ ໃຫ້ເຂັ້ມງວດ ແລະ ສັກສິດຕື່ມ.
​​​​​3. ກ່ຽວກັບຄວາມຄືບໜ້າ ໃນການຈັດຕັ້ງປະຕິບັດຂໍ້ຕົກລົງ 31/ນຍ ເພື່ອຫຼຸດຜ່ອນຜົນກະທົບ ຈາກການລະບາດ ຂອງພະຍາດ COVID-19 ຕໍ່ເສດຖະກິດ-ສັງຄົມ: 
​​​​​1) ໃຫ້ຄະນະສະເພາະກິດຕາມຂໍ້ຕົກລົງ 32/ນຍ ສືບຕໍ່ຊຸກຍູ້ ແລະ ຕິດຕາມການຈັດຕັ້ງປະຕິບັດບັນດານະໂຍບາຍ ແລະ ມາດຕະການ ທີ່ໄດ້ກຳນົດໃນຂໍ້ຕົກ ລົງ 31/ນຍ ໃຫ້ສຳເລັດ ແລະ ປະກົດຜົນເປັນຈິງ, ໃນພາກປະຕິບັດຕົວ ຈິງຖ້າມີບັນຫາໃດຫຍຸ້ງຍາກ ກໍໃຫ້ສຸມໃສ່ແກ້ໄຂໃຫ້ທະລຸລ່ວງ ເພື່ອຊ່ວຍຫຼຸດຜ່ອນຜົນກະທົບຕໍ່ພາກທຸລະກິດ.
​​​​​2) ໃຫ້ຄະນະສະເພາະກິດ ທັງສອງຄະນະ ຮີບຮ້ອນສົມທົບກັນແຕ່ງຄະນະວິຊາການໄປກວດກາບັນດາກິດຈະການ, ໂຄງການ, ໂຮງຈັກໂຮງງານ ທີ່ໄດ້ສະເໜີມາວ່າມີຄວາມຈຳເປັນໃນການສືບຕໍ່ເຄື່ອນໄຫວ ແລະ ດຳເນີນທຸລະກິດ ໂດຍເຮັດເປັນຫຼາຍຄະນະ, ຖ້າກິດຈະການ ຫຼື ໂຄງການໃດ ສາມາດປະຕິບັດຕາມເງື່ອນໄຂ ແລະ ມາດຖານທີ່ຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ Covid-19 ຕາມຂໍ້ຕົກລົງ 31/ສພກ ກໍສາມາດອະນຸຍາດໄດ້, ແຕ່ຕ້ອງມີການຄຸ້ມຄອງ ແລະ ຕິດຕາມຢ່າງໃກ້ຊິດ. ສໍາລັບກິດຈະກໍາ ຫຼື ໂຄງການ ທີ່ຂື້ນກັບຄວາມຮັບຜິດຊອບ ຂອງບັນດາແຂວງ ກໍຄວນມອບໃຫ້ຄະນະສະເພາະກິດຂອງແຂວງ ລົງກວດກາ ໂດຍອີງໃສ່ຄຳແນະນໍາ ຂອງຄະນະສະເພາະກິດຂັ້ນສູນກາງ.
​​​​​3) ໃຫ້ກະຊວງໂຍທາທິການ ແລະ ຂົນສົ່ງ ຮີບຮ້ອນສົມທົບກັບພາກສ່ວນກ່ຽວຂ້ອງ ແລະ ທ້ອງຖິ່ນ ແກ້ໄຂບັນດາອຸປະສັກໃນການຂົນສົ່ງ-ຈໍລະຈອນສິນຄ້າຢູ່ພາຍໃນປະເທດ ແລະ ຢູ່ຕາມດ່ານຊາຍແດນ, ໃຫ້ຄົ້ນຄວ້າຫຼາຍວິທີແກ້ໄຂແບບປະສົມປະສານກັນ ຕາມສະພາບຕົວຈິງ ຂອງແຕ່ລະບ່ອນ ເຮັດແນວໃດ ບໍ່ໃຫ້ສິນຄ້າອັ່ງອໍ ແລະ ເໜົ່າເສຍ ຍ້ອນອຸປະສັກໃນການຂົນສົ່ງ ເດັດຂາດ, ຄຽງຄູ່ກັນນັ້ນ ກໍຕ້ອງຮັບປະກັນບໍ່ໃຫ້ມີຄວາມສ່ຽງໃນການຕິດເຊື້ອ. 
​​​​​4) ສຳລັບການປະຕິບັດນະໂຍບາຍ ຕໍ່ແຮງງານທີ່ໄດ້ເຂົ້າໃນລະບົບປະກັນສັງຄົມ ໃຫ້ປະຕິບັດຕາມລະບຽບກົດໝາຍ, ສໍາລັບແຮງງານທີ່ຢູ່ນອກລະບົບ ມອບໃຫ້ກະຊວງແຮງງານ ແລະ ສະຫວັດດີ ການສັງຄົມ ນຳໄປຄົ້ນຄວ້າລະອຽດ ແລ້ວມາລາຍງານຕໍ່ກອງປະຊຸມນາຍົກ-ຮອງນາຍົກລັດຖະມົນຕີ.
​​​​​5) ໃຫ້ກະຊວງກະສິກຳ ແລະ ປ່າໄມ້ ສົມທົບກັບອຳນາດການປົກຄອງທ້ອງຖິ່ນທຸກຂັ້ນ ມີວິທີແນະນໍາໃຫ້ປະຊາຊົນເພີ່ມພຸນຜະລິດຜົນ ໂດຍສະເພາະ ການປູກ ແລະ ການລ້ຽງສັດ ກຸ້ມຕົນເອງ.
​​​​​6) ໃຫ້ກະຊວງຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວ ສ້າງແຜນປັບປຸງສະຖານທີ່ທ່ອງທ່ຽວ ແລະ ການບໍລິການ ຂອງບັນດາທຸລະກິດປິ່ນອ້ອມ ເພື່ອຈັດຕັ້ງປະຕິບັດພາຍຫລັງວັນທີ 03 ພຶດສະພາ ເພື່ອກຽມຄວາມພ້ອມເປີດການທ່ອງທ່ຽວ ເມື່ອການລະບາດຂອງພະຍາດ ຢຸດເຊົາ.
​​​​​7) ສຳລັບການສະເໜີ ຂໍຫຼຸດອັດຕາອາກອນມູນຄ່າເພີ່ມ ໄຟຟ້າ ແລະ ນໍ້າປະປານັ້ນ ເນື່ອງຈາກຈະມີຜົນກະທົບຕໍ່ການເກັບລາຍຮັບຫຼາຍສົມຄວນ ຈຶ່ງເຫັນວ່າບໍ່ທັນຕົກລົງໄດ້ເທື່ອ, ໃຫ້ໄປຄົ້ນຄວ້ານະໂຍບາຍດ້ານອື່ນໆແທນ.
​​​​​8) ໃຫ້ກະຊວງການເງິນ ເປັນໃຈກາງປະສານສົມທົບກັບພາກສ່ວນກ່ຽວຂ້ອງ ປຶກສາຫາລືກັບສະຖາບັນການເງິນສາກົນ ແລະ ບັນດາປະເທດ G20 ກ່ຽວກັບການເລື່ອນຫນີ້ຕາມນະໂຍບາຍ ຂອງກອງປະຊຸມ ກຸ່ມ G20. ພ້ອມກັນນັ້ນ ກໍໃຫ້ສະເໜີຂໍເງິນກູ້ດອກເບ້ຍຕໍ່າບ້ວງໃໝ່ ເພື່ອມາຟື້ນຟູຜົນກະທົບ ຈາກການລະບາດຂອງພະຍາດ Covid-19.
​​​​​9) ໃຫ້ຄະນະສະເພາະກິດ ສືບຕໍ່ຄົ້ນຄວ້າບັນດາຂໍ້ສະເໜີໃໝ່ເພີ່ມເຕີມ ຂອງພາກທຸລະກິດ ໃຫ້ລະອຽດ ໂດຍສະເພາະ ບັນດານະໂຍບາຍດ້ານການເງິນ, ທະນາຄານ ກໍຄືບັນດານະໂຍບາຍ ເພື່ອສົ່ງເສີມການຜະລິດກະສິກຳເປັນສິນຄ້າ. ພ້ອມກັນນັ້ນ ກໍໃຫ້ຄົ້ນຄວ້າມາດຕະການຟື້ນຟູເສດຖະກິດ ໃນໄລຍະສັ້ນ, ໄລຍະກາງ ແລະ ໄລຍະຍາວ  ພາຍຫຼັງການລະບາດຂອງພະຍາດ Covid-19 ຢຸດຕິລົງ, ແລ້ວສະເໜີລັດຖະບານ ພິຈາລະນາ.
​​​​​10) ມອບໃຫ້ຫ້ອງວ່າການສໍານັກງານນາຍົກລັດຖະມົນຕີ ເປັນໃຈກາງສົມທົບກັບຄະນະສະເພາະກິດ ທັງສອງຄະນະ ແລະ ຂະແໜງການກ່ຽວຂ້ອງ ສັງລວມ ແລະ ຮຽບຮຽງ ຕາມການປະກອບຄໍາຂອງສະມາຊິກລັດຖະບານ ເພື່ອອອກເປັນມະຕິຂອງລັດຖະບານ ແລະ ແຈ້ງການ ຜົນກອງປະຊຸມລັດຖະບານ ໃນຄັ້ງນີ້  ເພື່ອເປັນບ່ອນອີງໃຫ້ຄະນະສະເພາະກິດ, ຂະແໜງການ ແລະ ທ້ອງຖິ່ນ ຈັດຕັ້ງປະຕິບັດ.
​​​​​​ໃນຕອນທ້າຍ, ກອງປະຊຸມລັດຖະບານຄັ້ງນີ້ ໄດ້ຮຽກຮ້ອງໄປຍັງປະຊາຊົນບັນດາເຜົ່າ, ຊາວຕ່າງດ້າວ, ຜູ້ບໍ່ມີສັນຊາດ, ນັກທຸລະກິດ ທັງພາກລັດ ແລະ ເອກະຊົນ, ພະນັກງານ-ລັດຖະກອນ, ກຳມະກອນ ແລະ ນັກຮຽນຮູ້ປັນຍາຊົນ ທຸກຖ້ວນໜ້າ ຈົ່ງເຊີດຊູນ້ຳໃຈເປັນເຈົ້າຂອງປະເທດຊາດ ສູງກວ່າເວລາໃດໝົດ, ສືບຕໍ່ຕັ້ງໜ້າເຂົ້າຮ່ວມ ປະຕິບັດບັນດາມາດຕະການທີ່ລັດຖະບານວາງອອກ ຕື່ມອີກ 10 ວັນ ດ້ວຍຄວາມຕື່ນຕົວ ແລະ ເປັນເຈົ້າການສູງ ເພື່ອເຮັດໃຫ້ການປ້ອງກັນ, ສະກັດກັ້ນພະຍາດ ໂຄວິດ-19 ຄັ້ງນີ້ ໄດ້ຮັບໄຊຊະນະ. ຂໍໃຫ້ສື່ມວນຊົນທຸກປະເພດ ລວມທັງ ສື່ອອນລາຍຕ່າງໆ ຈົ່ງຍົກສູງນ້ຳໃຈຮັກຊາດ, ຮັບໃຊ້ປະຊາຊົນບັນດາເຜົ່າ ອອກຂ່າວ, ໃຫ້ຂໍ້ມູນຂ່າວສານຕ່າງໆ ໃຫ້ຖືກຕ້ອງກັບຄວາມເປັນຈິງ ແລະ ເປັນຜົນປະໂຫຍດສູງສຸດ ໃຫ້ແກ່ຊາດ ແລະ ປະຊາຊົນ, ຫຼີກເວັ້ນການອອກຂ່າວ, ໃຫ້ຂໍ້ມູນເທັດ ທີ່ຈະສ້າງຄວາມປັ່ນປ່ວນ ແລະ ເປັນຜົນກະທົບດ້ານລົບ ຕໍ່ຈິດໃຈ, ຄວາມສະຫງົບ ແລະ ຄວາມເປັນລະບຽບຮຽບຮ້ອຍ, ຄວາມປອດໄພ ຂອງສັງຄົມ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ