ລັດຖະບານ ຮຽກຮ້ອງໃຫ້ປະຕິບັດ 6 ມາດຕະການເພີ່ມເຕີມ ແກ້ໄຂການແຜ່ລະບາດຂອງໂຄວິດ 19

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພຸດ, 25 ມິ.ນ 2020 18:00

​​
​​​​ໃນວັນທີ 25 ມີນາ 2020 ທີ່ສໍານັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ພ້ອມຄະນະສະເພາະກິດແກ້ໄຂການແຜ່ລະບາດຂອງພະຍາດໂຄວິດ 19 ໄດ້ຖະແຫຼງຂ່າວຕໍ່ສື່ມວນຊົນ ກ່ຽວກັບການລະບາດຂອງເຊື້ອພະຍາດໂຄວິດ-19 ທີ່ໄດ້ມີການກວດພົບເຫັນມີຜູ້ຕິດເຊື້ອ 2 ຄົນ ໃນລາວ, ໃນນີ້ ທ່ານນາຍົກລັດຖະມົນຕີ ໄດ້ກ່າວວ່າ: ປະຈຸບັນ ສະພາບການແຜ່ລະບາດ ຂອງເຊື້ອພະຍາດ COVID-19 ໃນຫຼາຍປະເທດເປັນວົງກວ້າງ, ປະເທດລາວ ກໍ່ມີຜູ້ຕິດເຊື້ອແລ້ວ 2 ຄົນ, ໄດ້ມີການຫຼັ່ງໄຫຼຂອງແຮງງານລາວ ເຂົ້າມາຈາກຕ່າງປະເທດ ເປັນຈຳນວນຫຼວງຫຼາຍ, ບັນດາແຂວງ ກໍໄດ້ມີມາດຕະການຮັບມື. ແຕ່ພວກເຮົາ ບໍ່ສາມາດຄວບຄຸມຕາມຫຼັກການລະບຽບການໄດ້. ພະຍາດອາດແຜ່ຂະຫຍາຍ ບໍ່ສະເພາະແຕ່ທີ່ຕິດພັນກັບ 2 ຄົນ ແຕ່ອາດມີຫຼາຍກວ່ານັ້ນ. ສະນັ້ນ ນັບແຕ່ນີ້ຕໍ່ໄປ ຍ້ອນພວກເຮົາກຳລັງຢູ່ໃນສະຖານະການທີ່ຫຼໍ່ແຫຼມ, ພວກເຮົາ ຕ້ອງໄດ້ປະຕິບັດບັນດາມາດຕະການທີ່ລັດຖະບານວາງອອກຢ່າງເຂັ້ມງວດກວ່າເກົ່າ ແລະ ຮຽກຮ້ອງໃຫ້ປະຕິບັດບັນດາມາດຕະການເພີ່ມເຕີມ ທີ່ເຂັ້ມງວດຕື່ມ ຄື: 
​​​​1. ໃຫ້ຜູ້ທີ່ມາຈາກຕ່າງປະເທດ ກັກຕົວເອງຢູ່ເຮືອນຂອງຕົນ ຫຼື ບ້ານທີ່ໄດ້ຖືກສົ່ງໄປນັ້ນ ເປັນເວລາ 14 ວັນ, ຖ້າມີອາການຜິດປົກກະຕິ ໃຫ້ລາຍງານແພດ ທັນທີ, ແພດຈະດຳເນີນມາດຕະການ ສົ່ງໄປກວດ, ໄປກັກຕົວ ຫຼື ຖ້າພົບວ່າຕິດເຊື້ອ ຈະນຳໄປປິ່ນປົວຢູ່ໂຮງໝໍຢ່າງທັນການ ເພື່ອຮັບປະກັນບໍ່ໃຫ້ແຜ່ເຊື້ອໃຫ້ຄົນອື່ນ. ມອບໃຫ້ອຳນາດການປົກຄອງ, ຄະນະພັກຂອງບ້ານ ຮັບຜິດຊອບໂດຍກົງ ໂດຍປຸກລະດົມທຸກກຳລັງແຮງຂອງອົງການຈັດຕັ້ງມະຫາຊົນ, ກອງຫຼອນບ້ານ ເພື່ອຄຸ້ມຄອງໃຫ້ເປັນລະບຽບ, 
​​​​2. ໃຫ້ປະຕິບັດຫຼັກການປ້ອງກັນຕົວເອງຕາມທີ່ແພດ ໄດ້ແນະນຳ (ລ້າງມືໃຫ້ສະອາດດ້ວຍຢາຂ້າເຊື້ອ, ໃສ່ຜ້າອັດ ປາກອັດດັງ ແລະ ຫຼັກການອະນາໄມອື່ນໆ) ໃຫ້ເຂັ້ມງວດ, ແລະ ໃຫ້ມີການກວດກາ. ລັດຖະບານ ໄດ້ຈັດທີມແພດໄປຫາແຕ່ລະບ້ານແຕ່ລະເມືອງແລ້ວ.
​​​​3. ໃຫ້ທຸກພາກສ່ວນ ທັງສູນກາງ ແລະ ທ້ອງຖິ່ນ ຄົ້ນຄວ້າພາຍໃນກ່ຽວກັບການເຄື່ອນໄຫວປະຕິບັດວຽກງານ ຂອງສຳນັກງານ-ອົງການຕົນ, ຢຸດຕິການປະຊຸມໃຫ້ປຶກສາຫາລືຜ່ານທາງໂທລະສັບ ຫຼື ຜ່ານລະບົບອອນລາຍ, ເຮັດວຽກ ໃຫ້ມີໄລຍະຫ່າງຈາກກັນ, ຖ້າມີຄວາມສາມາດເຮັດວຽກທາງໄກຢູ່ເຮືອນ (ເຮັດວຽກຜ່ານອອນລາຍ) ກໍ່ໃຫ້ເຮັດວຽກ ຢູ່ເຮືອນ, ບໍ່ໃຫ້ມີການຊຸມນຸມ ຫຼື ຈັດກອງປະຊຸມໃນໄລຍະນີ້. ສຳລັບການຈັດງານດອງ, ງານບຸນປະເພນີຕ່າງໆ ໄດ້ຫ້າມແລ້ວ, ສ່ວນງານສົບ ກໍ່ຄວນຈຳກັດທີ່ສຸດ. ນອກຈາກນັ້ນ ການເດີນທາງລະຫວ່າງ ເມືອງຕໍ່ເມືອງ, ບ້ານຕໍ່ບ້ານ, ສຳນັກງານອົງການ ກໍ່ຂໍໃຫ້ຫຼຸດຜ່ອນ. 
​​​​4. ຖ້າພົບເຫັນມີອາການຜິດປົກກະຕິ ໃຫ້ແຈ້ງຕໍ່ແພດ ຫຼື ອາສາສະມັກບ້ານໂດຍໄວ ແລ້ວແພດຈະເຂົ້າໄປກວດ ແລະ ໃຫ້ການຊ່ວຍເຫຼືອ.
​​​​5. ໃຫ້ຄະນະສະເພາະກິດອອກຂໍ້ກຳນົດຕື່ມອີກໃຫ້ເປັນອັນລະອຽດໂດຍແຈ້ງໃຫ້ທຸກພາກສ່ວນ, ທຸກຄົນໃນສັງຄົມຈັດຕັ້ງປະຕິບັດຢ່າງເຄັ່ງຄັດ ເພື່ອປົກປັກຮັກສາສຸຂະພາບ ແລະ ຊີວິດຂອງປະຊາຊົນເຮົາທຸກຖ້ວນໜ້າ ແລະ ບໍ່ໃຫ້ພະຍາດໂຄວິດ 19 ແຜ່ລາມອອກໄປ. ທຸກພາກສ່ວນໃນສັງຄົມ ຂໍໃຫ້ປະຕິບັດຢ່າງເຄັ່ງຄັດ. ສະພາບປະຈຸບັນບໍ່ປົກກະຕິ, ພວກເຮົາຢູ່ໃນສະພາບສຸກເສີນ. ຖ້າສະຖານະການຂະຫຍາຍຕົວໄປແນວດ, ລັດຖະບານຈະເບິ່ງສະພາບຕົວຈິງອາດມີການອອກມາດຕະການເຄັ່ງຄັດກວ່ານີ້ຕື່ມອີກເພື່ອສູ້ກັບ ໂຄວິດ 19. ພວກເຮົາຈະບໍ່ປ່ອຍໃຫ້ມີຜູ້ລະເມີດລະບຽບກົດໝາຍ ແລະ ມາດຕະການຕ່າງໆ. ໃນໄລຍະທີ່ຢຸດພັກຮຽນ, ໃຫ້ພໍ່ແມ່ຜູ້ປົກຄອງເອົາໃຈໃສ່ຄຸ້ມຄອງລູກຫຼານ, ນັກຮຽນ, ນັກສຶກສາທີ່ຢູ່ບ້ານ ໃຫ້ດີ. ລັດຖະບານຈະໄດ້ເບິ່ງກ່ຽວກັບໂຮງຈັກໂຮງງານຕື່ມ, ຖ້າມີການລະບາດ ຈະມີມາດຕະການຕື່ມອີກ.
​​​​6. ພວກເຮົາຕ້ອງມີສະຕິ, ຂໍໃຫ້ປະຊາຊົນມີຄວາມທຸ່ນທ່ຽງ, ບໍ່ແຕກຕື່ນບໍ່ວິຕົກກັນວົນຈົນເກີນໄປ ແລະ ບໍ່ໃຫ້ ປະໝາດ, ພວກເຮົາ ຈະສູ້ກັບ ພະຍາດໂຄວິດ 19 ນີ້ໃຫ້ໄດ້. ສໍາຄັນແມ່ນພວກເຮົາໝົດທຸກຄົນພາຍໃນຊາດ ຕ້ອງຮ່ວມແຮງຮ່ວມໃຈກັນ ຕໍ່ສູ້ກັບສິ່ງທີ່ເກີດຂຶ້ນ, ພວກເຮົາຈະປິ່ນປົວໃຫ້ໄດ້ ເພາະເຮົາມີບົດຮຽນຈາກປະເທດເພື່ອນມິດ ແລະ ຈະຮ່ວມມືກັບບັນດາປະເທດເພື່ອນມິດ ຊຶ່ງມີຄວາມຍິນດີໃຫ້ການຮ່ວມມືກັບພວກເຮົາ ເພື່ອຜ່ານຜ່າວິກິດນີ້.
​​​​​ໃນຕອນທ້າຍ, ທ່ານ ນາຍົກລັດຖະມົນຕີ ຍັງໄດ້ມີຄຳເຫັນຕໍ່ຄຳຖາມຂອງສື່ມວນຊົນ ເປັນຕົ້ນ ມາດຕະການ ຕໍ່ຜູ້ທີ່ອອກຂ່າວທີ່ບໍ່ມີຄວາມຈິງ ຫຼື ປ່ອຍຂ່າວລືຈະຖືກດຳເນີນມາດຕະການທາງກົດໝາຍ ຢ່າງເຂັ້ມງວດ; ການກຽມ ຄວາມພ້ອມໃນກໍລະນີມີການລະບາດຫຼາຍ ຊຶ່ງລັດຖະບານກໍ່ໄດ້ກຽມຮັບມືຢ່າງສຸດຄວາມສາມາດ, ການພົວພັນຮ່ວມມືກັບປະເທດເພື່ອນມິດ ແລະ ການຊ່ວຍເຫຼືອຈຳນວນໜຶ່ງ ໄດ້ສົ່ງມາແລ້ວ,  ນອກຈາກນີ້ ລັດຖະບານພວມດຳເນີນການປຶກສາຫາລື ເພື່ອຊ່ວຍເຫຼືອຜູ້ທີ່ໄດ້ຮັບຜົນກະທົບທາງດ້ານເສດຖະກິດຂອງເຊື້ອໄວລັດ ໂຄວິດ 19 ໂດຍຈະພິຈາລະນາຊ່ວຍເຫຼືອຫຼາຍດ້ານ ແລະ ຈະປະກາດໃນໄວໆນີ້.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ