ຜົນກອງປະຊຸມລັດຖະບານເປີດກວ້າງ ຄັ້ງທີ II ປີ 2019

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພຸດ, 22 ມ.ກ 2020 12:00

​ກອງປະຊຸມລັດຖະບານເປີດກວ້າງ ຄັ້ງທີ່ II ປີ 2019 ໄດ້ໄຂຂຶ້ນໃນວັນທີ 19 ແລະ ປິດລົງໃນວັນທີ 20 ​​ທັນວາ 2019 ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ; ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ, ນາຍົກລັດຖະມົນຕີ; ໂດຍມີບັນດາທ່ານຮອງນາຍົກລັດຖະມົນຕີ, ສະມາຊິກລັດຖະບານ, ເຈົ້າຄອງນະຄອນຫຼວງວຽງຈັນ, ເຈົ້າແຂວງທົ່ວປະເທດ, ຜູ້ຕາງໜ້າອົງການຈັດຕັ້ງພັກ, ສະພາແຫ່ງຊາດ, ສານປະຊາຊົນສູງສຸດ, ອົງການໄອຍະການປະຊາຊົນສູງສຸດ, ສູນກາງແນວລາວສ້າງຊາດ, ສະຫະພັນນັກຮົບເກົ່າແຫ່ງຊາດ, ອົງການຈັດຕັ້ງມະຫາຊົນຂັ້ນສູນກາງ ພ້ອມດ້ວຍແຂກຖືກເຊີນ ເຂົ້າຮ່ວມຢ່າງພ້ອມພຽງ.
                         ​​ກອງປະຊຸມລັດຖະບານເປີດກວ້າງ ຄັ້ງນີ້ ໄດ້ພ້ອມກັນ ຄົ້ນຄວ້າ, ປຶກສາຫາລື ແລະ ພິຈາລະນາ 7 ເອກະສານສໍາຄັນ ຄື:
1). ກອງປະຊຸມ ​ໄດ້ຮັບຟັງການເຜີຍແຜ່ ການຈັດຕັ້ງປະຕິບັດມະຕິ ຂອງກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ VIII ແລະ ພິຈາລະນາ ຮ່າງດໍາລັດວ່າດ້ວຍ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ ແລະ ແຜນງົບປະມານແຫ່ງລັດ ປະຈໍາປີ 2020. ກອງປະຊຸມ ໄດ້ຊີ້ນໍາໃຫ້ພາກສ່ວນທີ່ກ່ຽວຂ້ອງ ນໍາໄປປັບປຸງຕາມການປະກອບຄໍາເຫັນຂອງສະມາຊິກລັດຖະບານ, ເຈົ້າຄອງນະຄອນຫຼວງວຽງຈັນ ແລະ ບັນດາທ່ານເຈົ້າແຂວງ ເພື່ອໃຫ້ດໍາລັດດັ່ງກ່າວ ມີເນື້ອໃນສອດຄ່ອງກັບ ມະຕິຂອງກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ, ກະທັດຮັດ, ເຂົ້າໃຈງ່າຍ ແລະ ແທດເໝາະກັບສະພາບຕົວຈິງ ແລະ ເພື່ອໃຫ້ແຕ່ລະຂະແໜງການ ນໍາໄປຈັດຕັ້ງຜັນຂະຫຍາຍໃຫ້ເປັນແຜນການ, ໂຄງການລະອຽດຂອງຕົນ ແລະ ໃຫ້ສາມາດຈັດຕັ້ງປະຕິບັດໄດ້ ເລີ່ມແຕ່ເດືອນມັງກອນ ປີ 2020 ເປັນຕົ້ນໄປ.
2). ກອງປະຊຸມ ໄດ້ຮັບຟັງການລາຍງານກ່ຽວກັບ ການແກ້ໄຂໄພພິບັດທາງທໍາມະຊາດ ໃນຂອບເຂດທົ່ວປະເທດ ປີ 2019 ແລະ ມາດຕະການຮັບມືໃນຕໍ່ໜ້າ. ກອງປະຊຸມ ໄດ້ຊີ້ນໍາໃຫ້ເອົາໃຈໃສ່ໃນການຈັດສັນງົບປະມານ ຈາກທຸກແຫຼ່ງທີ່ມີ ສຳລັບແກ້ໄຂໄພພິບັດ ແລະ ໃຫ້ສາມາດນໍາໃຊ້ໄດ້ຢ່າງທັນການ. ພ້ອມກັນນີ້, ໃຫ້ບັນດາຂະແໜງການ ແລະ ທ້ອງຖິ່ນ ກະກຽມ ແລະ ຂຶ້ນແຜນງົບປະມານແກ້ໄຂໄພພິບັດ ໃຫ້ຖືກຕ້ອງ ແລະ ສອດຄ່ອງກັບຕົວຈິງ ເພື່ອຮັບປະກັນ ການນຳໃຊ້ງົບປະມານທີ່ມີຈຳກັດ ຢ່າງມີປະສິດທິຜົນ.
3). ກອງປະຊຸມ ໄດ້ຮັບຟັງການລາຍງານ ຄວາມຄືບໜ້າການສົ່ງເສີມການຜະລິດເປັນສິນຄ້າ, ການຄໍ້າປະກັນສະບຽງອາຫານ, ການຊົມໃຊ້ຜະລິດຕະພັນທີ່ຜະລິດພາຍໃນ ແລະ ການຄຸ້ມຄອງນໍາເຂົ້າສິນຄ້າອຸປະໂພກ-ບໍລິໂພກ, ເຊິ່ງໄດ້ມີການທົດລອງຈັດຕັ້ງປະຕິບັດ ຢູ່ນະຄອນຫຼວງວຽງຈັນ. ກອງປະຊຸມ ເຫັນດີມອບໃຫ້ຄະນະສະເພາະກິດ ຂັ້ນສູນກາງ ສົມທົບກັບນະຄອນຫຼວງວຽງຈັນ ສືບຕໍ່ຈັດຕັ້ງປະຕິ ບັດໂຄງການທົດລອງ ດັ່ງກ່າວ, ລວມທັງ ບັນດາກະຊວງກ່ຽວຂ້ອງ ໃຫ້ການຮ່ວມມື ແລະ ປະຕິບັດຕາມພາລະບົດບາດຂອງຕົນ ເພື່ອຮັບປະກັນໃຫ້ໂຄງການໄດ້ຮັບການຈັດຕັ້ງປະຕິບັດ ສຳເລັດຕາມແຜນທີ່ວາງໄວ້. ພ້ອມກັນນີ້, ກອງປະຊຸມ ໄດ້ຊີ້ນຳໃຫ້ບັນດາແຂວງ ແຕ່ງຕັ້ງຄະນະສະເພາະກິດ ຂອງແຂວງຕົນ ເພື່ອດຳເນີນການຊຸກຍູ້ສົ່ງເສີມການຜະລິດຂອງປະຊາຊົນ ໃຫ້ໄດ້ຮັບຜົນດີ ເພື່ອກ້າວໄປສູ່ການຫຼຸດຜ່ອນການນໍາເຂົ້າສິນຄ້າຈາກຕ່າງປະເທດ. ຄຽງຄູ່ກັນນັ້ນ, ມອບໃຫ້ຄະນະສະເພາະກິດຂັ້ນສູນກາງ ຊີ້ນຳການຈັດຕັ້ງປະຕິບັດຢູ່ແຕ່ລະແຂວງ ໂດຍອີງໃສ່ບົດຮຽນທີ່ຖອດຖອນໄດ້ ຈາກໂຄງການທົດລອງ.
4). ກອງປະຊຸມ ໄດ້ຮັບຟັງການລາຍງານຜົນການກວດກາ ບັນດາໂຄງການເຊົ່າ-ສໍາປະທານທີ່ດິນລັດ ໃນຂອບເຂດທົ່ວປະເທດ ຈຳນວນ 438 ໂຄງການ ເຊິ່ງໄດ້ກວດກາສຳເລັດ ແລະ ໄດ້ດຳເນີນການສະຫຼຸບຖອດຖອນບົດຮຽນແລ້ວ. ກອງປະຊຸມ ເຫັນດີມອບໃຫ້ຄະນະສະເພາະກິດ ສືບຕໍ່ດໍາເນີນການກວດກາໃນຂອບເຂດທົ່ວປະເທດ ແລະ ສືບຕໍ່ແກ້ໄຂ  ເພື່ອເຮັດໃຫ້ບັນຫາການເຊົ່າ-ສຳປະທານທີ່ດິນລັດ ທີ່ບໍ່ຖືກຕ້ອງ ໃຫ້ຫຼຸດລົງເທື່ອລະກ້າວ ເຊິ່ງການແກ້ໄຂ ຕ້ອງໄດ້ເຮັດເປັນແຕ່ລະກໍລະນີ ໂດຍສອດຄ່ອງກັບກົດໝາຍ ແລະ ລະບຽບການ. ພ້ອມນີ້ ໄດ້ຊີ້ນຳໃຫ້ອໍານາດການປົກຄອງທ້ອງຖິ່ນ ເອົາໃຈໃສ່ໃນການຕິດຕາມກວດກາ ແລະ ແກ້ໄຂບັນດັ່ງກ່າວໃຫ້ທັນການ, ບໍ່ແກ່ຍາວ ແລະ ໄດ້ຮັບຜົນດີ.
5). ກອງປະຊຸມ ໄດ້ຮັບຟັງການລາຍງານ ຄວາມຄືບໜ້າການສົ່ງເສີມ ການພັດທະນາຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ຂະໜາດກາງ. ກອງປະຊຸມ ໄດ້ຊີ້ນໍາໃຫ້ເລັ່ງລັດຈັດຕັ້ງປະຕິບັດດໍາລັດ ວ່າດ້ວຍການສົ່ງເສີມ ວິສາຫະກິດຂະໜາດນ້ອຍ ແລະ ຂະໜາດກາງ, ໃນນັ້ນກອງທຶນສົ່ງເສີມວິສາຫະກິດ ຕ້ອງໄດ້ປະສານສົມທົບກັບບັນດາທະນາຄານທຸລະກິດ ແລະ ພາກສ່ວນອື່ນໆ ເພື່ອຮັບປະກັນໃຫ້ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ຂະໜາດກາງ ສາມາດເຂົ້າເຖິງແຫຼ່ງທຶນ ໄດ້ໄວ ແລະ ນໍາໃຊ້ເຂົ້າໃນການຜະລິດ, ທຸລະກິດ ຢ່າງມີປະສິດທິຜົນ. ພ້ອມກັນນັ້ນໃຫ້ເອົາໃຈໃສ່ໃນຄຸ້ມຄອງ ແລະ ມີການຕິດຕາມກວດກາການຈັດຕັ້ງປະຕິບັດ ໃຫ້ດີ.
6). ກອງປະຊຸມ ໄດ້ພິຈາລະນາຮ່າງຄໍາສັ່ງຂອງນາຍົກລັດຖະມົນຕີ ວ່າດ້ວຍການປັບປຸງການບໍລິການລົງທຶນປະຕູດຽວ.  ກອງປະຊຸມ ໄດ້ຊີ້ນໍາໃຫ້ກະຊວງ ແຜນການ ແລະ ການລົງທຶນ ສົມທົບກັບລັດຖະມົນຕີ ປະຈຳສຳນັກງານນາຍົກລັດຖະມົນຕີ ປັບປຸງຮ່າງຄຳສັ່ງດັ່ງກ່າວຕື່ມ ຕາມການປະກອບຄຳເຫັນ ຂອງສະມາຊິກລັດຖະບານ, ເຈົ້າຄອງນະຄອນຫຼວງວຽງຈັນ, ບັນດາທ່ານເຈົ້າແຂວງ ແລະ ຜູ້ເຂົ້າ ຮ່ວມກອງປະຊຸມ. ພາຍຫຼັງປັບປຸງສຳເລັດ ໃຫ້ນຳສະເໜີຕໍ່ບັນດາທ່ານຮອງນາຍົກລັດຖະມົນຕີ ມີຄຳເຫັນກ່ອນສະເໜີທ່ານນາຍົກລັດຖະມົນຕີ ລົງນາມປະກາດໃຊ້.
7). ກອງປະຊຸມ ໄດ້ຮັບຟັງການລາຍງານກ່ຽວກັບ ການແບ່ງຕົວເລກລັດຖະກອນໃໝ່ ປີ 2020 ໃຫ້ບັນດາກະຊວງ, ອົງການຈັດຕັ້ງຂັ້ນສູນກາງ ແລະ ທ້ອງຖິ່ນ ຈຳນວນ 2.000 ຄົນ ຕາມມະຕິຂອງສະພາແຫ່ງຊາດ ໄດ້ຮັບຮອງ ໂດຍຈະຈັດສັນໃຫ້ຂົງເຂດສຶກສາ, ສາທາ, ແຂວງ ແລະ ເມືອງ ເປັນສ່ວນໃຫຍ່. ສຳລັບການສັບຊ້ອນບັນຈຸ ໃຫ້ຜ່ານການສອບເສັງ ຕາມຫລັກການ ແລະ ຂັ້ນຕອນຢ່າງເຂັ້ມງວດ ບົນພື້ນຖານຄວາມຮູ້ ຄວາມສາມາດ ສອດຄ່ອງກັບມາດຕະຖານຕຳແໜ່ງງານວ່າງ, ຫ້າມຮັບເອົາພະນັກງານອາສາສະມັກ, ພະນັກງານຕາມສັນຍາ ເຂົ້າເປັນລັດຖະກອນ ໂດຍບໍ່ຜ່ານການສອບເສັງ. ພ້ອມກັນນີ້, ກອງປະຊຸມ ໄດ້ຊີ້ນຳໃຫ້ບັນດາການນຳ ຂອງຂະແໜງການ ແລະ ທ້ອງຖິ່ນ ເອົາໃຈໃສ່ຕິດຕາມຊີ້ນຳ ໃນການສອບເສັງລັດຖະກອນ ໃຫ້ມີຄວາມໂປ່ງໃສ, ສະເໝີພາບ ແລະ ຍຸຕິທຳ.
ເພື່ອຈັດຕັ້ງປະຕິບັດທິດຊີ້ນຳ ຂອງກອງປະຊຸມລັດຖະບານເປີດກວ້າງ ຄັ້ງທີ II ປີ 2019 ໃຫ້ມີປະສິດທິຜົນ, ກອງປະຊຸມ ມອບໃຫ້ຫ້ອງວ່າການສໍານັກງານນາຍົກລັດຖະມົນຕີ ຮຽບຮຽງເປັນມະຕິຂອງກອງປະຊຸມ ເພື່ອເປັນບ່ອນອີງໃຫ້ແກ່ການຈັດຕັ້ງປະຕິບັດ. ຖ້າເຫັນວ່າບັນຫາໃດ ມີຄວາມຈໍາເປັນຕ້ອງອອກເປັນຄໍາສັ່ງ, ຂໍ້ຕົກລົງ ຫຼື ແຈ້ງການຕື່ມອີກ ກໍ່ໃຫ້ຮ່າງເປັນນິຕິກໍາລະອຽດ ເພື່ອໃຫ້ລັດຖະບານພິຈາລະນາຕົກລົງ. ພ້ອມກັນນີ້, ກໍ່ໄດ້ມອບໃຫ້ສະມາຊິກລັດຖະບານ, ເຈົ້າຄອງນະຄອນຫຼວງວຽງຈັນ ແລະ ບັນດາທ່ານເຈົ້າແຂວງ ຈົ່ງນໍາເອົາເນື້ອໃນຈິດໃຈທີ່ໄດ້ຕົກລົງເປັນເອກະພາບ ໃນກອງປະຊຸມຄັ້ງນີ້ ລວມທັງ ວຽກງານຈຸດສຸມ ທີ່ໄດ້ກໍານົດໄວ້ໃນດໍາລັດວ່າດ້ວຍ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ສໍາລັບປີ 2020 ໄປຈັດຕັ້ງປະຕິບັດ ໃຫ້ມີປະສິດທິຜົນ, ພ້ອມທັງ ສະຫຼຸບລາຍງານຜົນການຈັດຕັ້ງປະຕິບັດ ໃຫ້ຫ້ອງວ່າການສຳນັກງານນາຍົກລັດຖະມົນຕີ ພາຍໃນວັນທີ 15 ຂອງທຸກໆເດືອນ.​
                                  
​​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ