ຜົນກອງປະຊຸມລັດຖະບານສະໄໝສາມັນ ປະຈໍາເດືອນສິງຫາ 2019

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພະຫັດ, 22 ສ.ຫ 2019 12:00


​​​​​​​ກອງປະຊຸມລັດຖະບານສະໄໝສາມັນ ປະຈໍາເດືອນສິງຫາ 2019 ໄດ້ໄຂຂຶ້ນຢ່າງເປັນທາງການ ໃນວັນທີ 20 ແລະ ປິດລົງໃນຕອນເຊົ້າວັນທີ 22 ສິງຫາ ທີ່ ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ, ມີບັນດາທ່ານຮອງນາຍົກລັດຖະມົນຕີ ແລະ ສະມາຊິກລັດຖະບານ ພ້ອມດ້ວຍແຂກທີ່ຖືກເຊີນ ເຂົ້າຮ່ວມຢ່າງພ້ອມພຽງ. 
I. ກອງປະຊຸມຄັ້ງນີ້ ໄດ້ພ້ອມກັນສຸມໃສ່ປຶກສາຫາລື, ປະກອບຄໍາຄິດຄໍາເຫັນ ແລະ ພິຈາລະນາຮັບຮອງເອົາ 9 ເອກະ ສານສໍາຄັນ ຄື:
1. ຮ່າງກົດໝາຍ ວ່າດ້ວຍການຊົດເຊີຍຄ່າເສຍຫາຍຈາກລັດ (ສ້າງໃໝ່)
2. ຮ່າງກົດໝາຍ ວ່າດ້ວຍການລົ້ມລະລາຍຂອງວິສາຫະກິດ (ສະບັບປັບປຸງ).
3. ຮ່າງກົດໝາຍ ວ່າດ້ວຍຮູບເງົາ (ສ້າງໃໝ່).
4. ຮ່າງກົດໝາຍ ວ່າດ້ວຍຫຼັກຊັບ (ສະບັບປັບປຸງ).
5. ຮ່າງກົດໝາຍ ວ່າດ້ວຍຄວາມສະເໝີພາບ ຍິງ-ຊາຍ (ສ້າງໃໝ່).
6. ຮ່າງດໍາລັດ ວ່າດ້ວຍການປິດບໍ່ແຮ່ ພາຍຫຼັງການຂຸດຄົ້ນ.
7. ຮ່າງດໍາລັດ ວ່າດ້ວຍການຄຸ້ມຄອງທຸລະກິດຍານພາຫະນະທາງບົກ.
8. ແຜນພັດທະນາແບບກວມລວມເຂດພູພຽງບໍລະເວນ.
9. ບົດລາຍງານກ່ຽວກັບ ສະພາບພົ້ນເດັ່ນທາງດ້ານເສດຖະກິດ-ການເງິນ, ເງິນຕາ ແລະ ມາດຕະການແກ້ໄຂ; ທິດທາງແຜນງົບປະມານ ປີ 2020. 
II. ຜົນຂອງການປຶກສາຫາລື ແລະ ພິຈາລະນາ ມີດັ່ງນີ້: 
- ຕໍ່ບັນດາຮ່າງກົດໝາຍ, ກອງປະຊຸມ ໄດ້ປະກອບຄໍາຄິດຄໍາເຫັນຢ່າງເລິກເຊິ່ງ, ດ້ວຍຄວາມຮັບຜິດຊອບສູງ ແລະ ໄດ້ເຫັນດີດ້ານຫຼັກການ ຮັບຮອງ 4 ຮ່າງກົດໝາຍ ຄື: ຮ່າງກົດໝາຍ ວ່າດ້ວຍການລົ້ມລະລາຍ ຂອງວິສາຫະກິດ, ຮ່າງກົດໝາຍວ່າດ້ວຍຮູບເງົາ, ຮ່າງ ກົດໝາຍວ່າດ້ວຍຫຼັກຊັບ ແລະ ຮ່າງກົດໝາຍວ່າດ້ວຍ ຄວາມສະເໝີພາບ ຍິງ-ຊາຍ, ພ້ອມນີ້ ໄດ້ຊີ້ນໍາໃຫ້ກະຊວງທີ່ກ່ຽວຂ້ອງ ນໍາໄປປັບປຸງຕື່ມ ຕາມການປະກອບຄໍາເຫັນ ຂອງສະມາຊິກລັດຖະບານ ເປັນຕົ້ນ ຊື່ຂອງກົດໝາຍ, ບາງເນື້ອໃນ, ປະໂຫຍກ, ຄໍາສັບຕ່າງໆ  ທີ່ກໍານົດໃນບາງໝວດ, ບາງມາດຕາ ແລະ ອື່ນໆ ເພື່ອເຮັດໃຫ້ຮ່າງກົດໝາຍດັ່ງກ່າວ ມີເນື້ອໃນເລິກເຊິ່ງ, ຄົບຖ້ວນ, ຊັດເຈນ, ຈະແຈ້ງ, ຮັດກຸມ ແລະ ສອດຄ່ອງກັບສະພາບການຕົວຈິງ. ພາຍຫຼັງປັບປຸງແລ້ວ ໃຫ້ນຳສະເໜີສະພາແຫ່ງຊາດ ເພື່ຶອພິຈາລະນານຳເຂົ້າ ຜ່ານກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ VIII ໃນເດືອນພະຈິກ 2019 ທີ່ຈະມາເຖິງນີ້. ສຳລັບຮ່າງກົດໝາຍ ວ່າດ້ວຍການຊົດເຊີຍ ຄວາມ​ເສຍຫາຍຈາກລັດ, ກອງປະຊຸມ ໄດ້ມີທິດຊີ້ນຳໃຫ້ກະຊວງຍຸຕິທຳ ສົມທົບກັບກະຊວງກ່ຽວຂ້ອງ ນຳໄປປັບປຸງຕື່ມ ຕາມການປະກອບຄຳເຫັນຂອງສະມາຊິກລັດຖະບານ ໂດຍສະເພາະ ຊື່ ແລະ ເນື້ອໃນ ຂອງກົດໝາຍ ພ້ອມທັງ ກວດເບິ່ງເນື້ອໃນຂອງກົດໝາຍກ່ຽວຂ້ອງອື່ນໆ ທີ່ໄດ້ປະກາດໃຊ້ແລ້ວ, ຫຼັງຈາກນັ້ນ ໃຫ້ນຳໄປທາບທາມຄຳຄິດເຫັນ ຈາກບັນດາຂະແໜງການ, ອົງການຂັ້ນສູນກາງ ແລະ ທ້ອງຖິ່ນ ຕື່ມອີກ ຈຶ່ງນໍາສະເໜີຜ່ານກອງປະຊຸມລັດຖະບານ ຄັ້ງຕໍ່ໄປ.   
- ກອງປະຊຸມ ໄດ້ພິຈາລະນາ ແລະ ເຫັນດີຮັບຮອງເອົາຮ່າງດໍາລັດວ່າດ້ວຍ ການປິດບໍ່ແຮ່ ພາຍຫຼັງສິ້ນສຸດການຂຸດຄົ້ນ. ກອງປະຊຸມ ໄດ້ເຫັນດີດ້ານຫຼັກການ ຮັບຮອງເອົາຮ່າງດຳລັດສະບັບດັ່ງກ່າວ ແລະ ໄດ້ຊີ້ນໍາໃຫ້ກະຊວງພະລັງງານ ແລະ ບໍ່ແຮ່ ສົມທົບກັບພາກສ່ວນທີ່ກ່ຽວຂ້ອງ ປັບປຸງຕື່ມຕາມການປະກອບຄໍາເຫັນ ຂອງສະມາຊິກລັດຖະບານ ເປັນຕົ້ນ ບາງເນື້ອໃນຂອງບາງມາດຕາ ໃຫ້ຄົບ ຖ້ວນ, ລະອຽດ, ຈະແຈ້ງ, ຮັດກຸມ, ແທດຕົວຈິງກັບແຕ່ລະປະເພດແຮ່ ໂດຍສະເພາະ ທີ່ກ່ຽວຂ້ອງກັບແຜນການປິດບໍ່ແຮ່, ມາດຕະຖານການປິດບໍ່ແຮ່, ການຟື້ນຟູທາງກາຍະພາບ ແລະ ເຄມີ, ການບູລະນະຟື້ນຟູສິ່ງແວດ ລ້ອມທໍາມະຊາດ ແລະ ສັງຄົມ, ການຄໍ້າປະກັນການປິດບໍ່ແຮ່, ການກຳນົດເວລາດຳເນີນການປິດບໍ່, ການກຳນົດຄະນະກຳມະການ ຮັບຜິດຊອບວຽກງານປິດບໍ່ແຮ່, ມາດຕະການຕໍ່ການລະເມີດ ແລະ ອື່ນໆ. ພາຍຫຼັງປັບປຸງສໍາເລັດແລ້ວ ໃຫ້ສົມທົບກັບ ຫ້ອງວ່າການສໍານັກງານນາຍົກລັດຖະມົນຕີ  ກວດກາຮຽບຮຽງຄືນ ແລ້ວສະເໜີທ່ານນາຍົກລັດຖະມົນຕີ ລົງລາຍເຊັນ ປະກາດໃຊ້ ຢ່າງເປັນທາງການ.
- ກອງປະຊຸມ ໄດ້ພິຈາລະນາ ແລະ ເຫັນດີດ້ານຫຼັກການຮັບຮອງເອົາຮ່າງດໍາລັດ ວ່າດ້ວຍການຄຸ້ມຄອງທຸລະກິດ ຍານພາຫະນະທາງບົກ, ໂດຍໄດ້ຊີ້ນໍາໃຫ້ກະຊວງ ອຸດສາຫະກໍາ ແລະ ການຄ້າ ນໍາໄປປັບປຸງຕື່ມ ຕາມການປະກອບຄໍາເຫັນ ຂອງສະມາຊິກລັດຖະບານ ເປັນຕົ້ນ ປັບປຸງຄືນບາງເນື້ອໃນ, ບາງມາດຕາ ໃຫ້ລະອຽດ, ຈະແຈ້ງ, ຄົບຖ້ວນ, ຮັດກຸມ ແລະ ສາມາດປະຕິບັດໄດ້ ຢ່າງມີປະສິດທິຜົນ ໂດຍສະເພາະ ການກຳນົດຈຳນວນ, ປະເພດ, ມາດຖານ, ເຕັກນິກ ແລະ ສິ້້ນສ່ວນ ຍານພາຫະນະທາງບົກ ທີ່ສາມາດນຳເຂົ້າ ແລະ ຊົມໃຊ້ໄດ້; ການສ້າງຕັ້ງ ແລະ ການດໍາເນີນທຸລະກິດ ຍານພາຫະນະທາງບົກ; ສິດ ແລະ ພັນທະ ຂອງຜູ້ດໍາເນີນທຸລະກິດຍານພາຫະນະ; ສະມາຄົມອຸດສາຫະກໍາຍານພາຫະນະ; ການສົ່ງເສີມ, ການກຳນົດສິດ, ພັນທະ ແລະ ຂໍ້ຫ້າມ ຕໍ່ຜູ້ນຳເຂົ້າ ແລະ ສົ່ງອອກ, ການກຳນົດພາກສ່ວນອະນຸຍາດນຳເຂົ້າ, ຄຸ້ມຄອງ ແລະ ກວດກາ; ມາດຕະການຕໍ່ຜູ້ລະເມີດ. ພາຍຫຼັງປັບປຸງສໍາເລັດແລ້ວ, ໃຫ້ພາກສ່ວນກ່ຽວຂ້ອງ ສົມທົບກັບ ຫ້ອງວ່າການສໍານັກງານນາຍົກລັດຖະມົນຕີ  ກວດກາຮຽບຮຽງຄືນ ແລ້ວສະເໜີຂໍທິດຊີ້ນຳ ຈາກບັນດາທ່ານຮອງນາຍົກລັດຖະມົນຕີ ກ່ອນຈະນຳສົ່ງ ໃຫ້ທ່ານນາຍົກລັດຖະມົນຕີ ເພື່ອລົງລາຍເຊັນ ປະກາດໃຊ້ເປັນທາງການ.
- ຕໍ່ກັບບົດລາຍງານ ກ່ຽວກັບການປັບປຸງແຜນພັດທະນາ ແບບກວມລວມເຂດພູພຽງບໍລະເວນ, ກອງປະຊຸມ ໄດ້ເຫັນດີດ້ານຫຼັກການ ຮັບຮອງເອົາແຜນດັ່ງກ່າວ ແລະ ເພື່ອຮັບປະກັນເປັນແຜນທີ່ສາມາດຈັດຕັ້ງປະຕິບັດໄດ້ ກອງປະຊຸມ ໄດ້ຊີ້ນໍາໃຫ້ສະຖາບັນຄົ້ນຄວ້ າເສດຖະກິດແຫ່ງຊາດ ປັບປຸງຕື່ມຕາມການປະກອບ ຄໍາຄິດຄໍາເຫັນ ຂອງສະມາຊິກລັດຖະບານ ເປັນຕົ້ນ ແຜນພັດທະນາດັ່ງກ່າວ ຕ້ອງໃຫ້ກົມກືນກັບທຳມະຊາດ ຂອງເຂດພູພຽງບໍລິເວນ ແລະ ຮັບປະກັນບໍ່ໃຫ້ທຳລາຍທຳມະຊາດ, ການພັດທະນາໃຫ້ເນັ້ນໃສ່ກະສິກຳແບບນິເວດ, ປູກພືດປອດສານພິດ, ອຸດສາຫະປຸງແຕ່ງກະສິກຳສະອາດ, ການທ່ອງທ່ຽວ ທຳມະຊາດ  ແລະ ການທ່ອງທ່ຽວ ຕິດພັນກັບການເຮັດກະສິກຳ, ການພັດທະນາອະສັງຫາລິມະຊັບ, ສົ່ງເສີມການປູກກາເຟ. ພ້ອມກັນນີ້ ໃຫ້ກວດກາ, ໃຈ້ແຍກ ແລະ ກຳນົດດິນຂອງລັດ ທີ່ສາມາດພັດທະນາໄດ້ໂລດ ແລະ ໃຫ້ມີການອອກແບບລະອຽດ; ການປຸກສ້າງເຮືອນຊານ ໃຫ້ຮັກຮັກສາລັກສະນະຊາດ, ເຜົ່າ, ໃຫ້ດຶງດູດ ແລະ ສົ່ງເສີມໃຫ້ພາກທຸລະກິດ ທັງພາຍໃນ ແລະ ຕ່າງປະເທດ ເຂົ້າມາລົງທຶນໃນເຂດພູພຽງພໍລິເວນ. ຫ້າມເດັດຂາດ ບໍ່ໃຫ້ຂຸດບໍ່ແຮ່ ຢູ່ເຂດດັ່ງກ່າວ; ສໍາລັບການຄຸ້ມຄອງ ໃຫ້ຈັດຕັ້ງກະທັດຮັດ ເຮັດໃຫ້ທ້ອງຖິ່ນທີ່ກ່ຽວຂ້ອງມີສ່ວນຮ່ວມ. ຫຼັງຈາກປັບປຸງແລ້ວ ໃຫ້ນຳມາຜ່ານນາຍົກ-ບັນດາຮອງນາຍົກ ກ່ອນສະເໜີກົມການເມືອງພິຈາລະນາ ອີກເທື່ອໜຶ່ງ.  
- ບົດລາຍງານ ກ່ຽວກັບ ສະພາບພົ້ນເດັ່ນ ທາງດ້ານເສດຖະກິດ, ການເງິນ ແລະ ເງິນຕາ ແລະ ມາດຕະການແກ້ໄຂ. ກອງປະຊຸມ ເຫັນດີດ້ານຫຼັການ ຮັບຮອງເອົາບົດລາຍງານດັ່ງກ່າວ ພ້ອມທັງ ຊີ້ນໍາໃຫ້ກະຊວງການເງິນ ສົມທົບກັບກະຊວງ, ອົງການປັບປຸງຕື່ມ.
III. ວຽກງານ ຈຸດສຸມໃນເດືອນກັນຍາ 2019 ລັດຖະບານ ຈະສຸມໃສ່  ດັ່ງນີ້:
- ຂົງເຂດປ້ອງກັນຊາດ-ປ້ອງກັນຄວາມສະຫງົບ: ເອົາໃຈໃສ່ຮັບປະກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍ ຂອງສັງຄົມ, ຕິດຕາມ ແລະ ແກ້ໄຂບັນຫາຕ່າງໆ ຢູ່ຕາມຊາຍແດນ, ເພີ່ມທະວີການສະກັດກັ້ນ ແລະ ແກ້ໄຂ ປະກົດການຫຍໍ້ທໍ້ໃນສັງຄົມ ເປັນຕົ້ນ ການກໍ່ອາດສະຍາກໍາ ທຸກຮູບແບບ ລວມທັງ ການເຄື່ອນໄຫວທີ່ຕິດພັນກັບບັນຫາຢາເສບຕິດ, ອຸປະຕິເຫດຕາມທ້ອງຖະໜົນ…
- ຂົງເຂດເສດຖະກິດ: ເອົາໃຈໃສ່ຊຸກຍູ້ການຜະລິດ, ທຸລະກິດ ເປັນຕົ້ນ ການຜະລິດກະສິກໍາ; ເອົາໃຈໃສ່ຄຸ້ມຄອງການນໍາເຂົ້າສິນຄ້າ ໃຫ້ສອດຄ່ອງຕາມກົດໝາຍ ແລະ ລະບຽບການ ຕິດພັນກັບການສົ່ງເສີມການຜະລິດພາຍໃນ ໃຫ້ແຂງແຮງ; ຊຸກຍູ້ການຊົມໃຊ້ພາຍໃນ ແລະ ປຸກລະດົມສົ່ງເສີມການປະຢັດມັດທະຍັດ; ກະກຽມສະໜັບສະໜູນ ແລະ ຊ່ວຍເຫຼືອທາງດ້ານເຕັກນິກວິຊາການ ແລະ ແນວພັນ ເພື່ອໃຫ້ປະຊາຊົນ ທີ່ໄດ້ຮັບຜົນກະທົບ ຈາກໄພນໍ້າຖ້ວມ ໃຫ້ສາມາດຟື້ນຟູການຜະລິດ ແລະ ດຳລົງຊີວິດປົກກະຕິ; ສືບຕໍ່ຄຸ້ມຄອງອັດຕາແລກປ່ຽນ ແລະ ມີວິທີບໍລິຫານການດຸນດ່ຽງ ໃນການແຊກແຊງອັດຕາແລກປ່ຽນ, ຄຸ້ມຄອງບັນດາທະນາຄານທຸລະກິດ; ສືບຕໍ່ສຸມໃສ່ການເກັບລາຍຮັບ ແລະ ປະຕິບັດລາຍຈ່າຍງົບປະມານໃນໄຕມາດທີ 3 ໃຫ້ໄດ້ຕາມແຜນທີ່ໄດ້ກໍານົດໄວ້ ໂດຍເຂັ້ມງວດ-ເຂັ້ມງານ ໃນການຈັດຕັ້ງປະຕິບັດ ບັນດາມາດຕະການທີ່ໄດ້ກຳນົດແລ້ວ; ເພີ່ມທະວີການ ເຝົ້າລະວັງ, ສະກັດກັ້ນ ແລະ ແກ້ໄຂການລະບາດຂອງພະຍາດອະຫິວາໝູອາຟຣິກາ ໃນຂອບເຂດທົ່ວປະເທດ ແລະ ເມື່ອພົບການຕິດເຊື້ອ ໃຫ້ຮີບຮ້ອນທໍາລາຍຖິ້ມທັນທີ; ສືບຕໍ່ປ້ອງກັນ ແລະ ແກ້ໄຂ ສັດຕູພືດ ເປັນຕົ້ນ ຕັກແຕນກິນສາລີ ແລະ ບົ້ງທໍາລາຍຜົນລະປູກ ຂອງປະຊາຊົນ ໃນຂອບເຂດທົ່ວປະເທດ; ເອົາໃຈໃສ່ການບໍລິຫານຈັດການນໍ້າອອກຈາກບັນດາເຂື່ອນໄຟຟ້າ ແຕ່ຫົວທີ ເພື່ອຮັບປະກັນການປ່ອຍນ້ຳ ບໍ່ໃຫ້ສົ່ງຜົນກະທົບ ຕໍ່ປະຊາຊົນ; ຮີບຮ້ອນປັບປຸງຮ່າງດຳລັດ SME ແລະ ສ້າງນິຕິກຳ ເພື່ອຄຸ້ມຄອງກອງທຶນ  SME ໃຫ້ສຳເລັດໂດຍໄວ ເພື່ອໃຫ້ສາມາດປະກາດໃຊ້ ແລະ ເປັນເຄື່ອງມືຊຸກຍູ້-ສົ່ງເສີມການເຄື່ອນໄຫວຂອງ SME ໃຫ້ມີຄວາມຟົດຟື້ນ ແລະ ປະກອບສ່ວນເຂົ້າໃນການຂະຫຍາຍຕົວຂອງເສດຖະກິດ.
- ຂົງເຂດວັດທະນະທໍາ, ສັງຄົມ ແລະ ສິ່ງແວດລ້ອມ: ເພີ່ມທະວີຕິດຕາມ, ເຝົ້າລະວັງ ແລະ ແກ້ໄຂບັນຫາການລະບາດ ຂອງພະຍາດໄຂ້ຍຸງລາຍ (ໄຂ້ເລືອດອອກ) ພ້ອມເອົາໃຈໃສ່ກຳຈັດແຫຼ່ງເພາະພັນຂອງຍຸງລາຍ ໂດຍໃຫ້ຖືເປັນໜ້າທີ່ຂອງທຸກຄົນໃນສັງຄົມ; ຕິດຕາມ ແລະ ເຝົ້າລະວັງສະພາບການປ່ຽນແປງດິນຟ້າອາກາດ ຢ່າງເປັນປົກກະຕິ ແລະ ມີການແຈ້ງເຕືອນ ແລະ ແນະນໍາປະຊາຊົນ ໃນເຂດທີ່ມີຄວາມສ່ຽງ; ເອົາໃຈໃສ່ກະກຽມການເປີດສົກຮຽນໃໝ່ ໃຫ້ມີບັນຍາກາດ ແລະ ມີເນື້ອໃນ ໂດຍສ້າງກິດຈະກໍາ ເພື່ອເປັນແຮງຈູງໃຈໃຫ້ນັກຮຽນ-ນັກສຶກສາ ມີຄວາມກະຕື້ລືລົ້ນ ແລະ ເອົາໃຈໃສ່ຕໍ່ການຮໍ່າຮຽນ ຢ່າງເໝາະສົມ; ເອົາໃຈໃສ່ໂຄສະນາການທ່ອງທ່ຽວ ໃຫ້ຫຼາຍຂຶ້ນ ພ້ອມທັງ ປັບປຸງຂອດຂັ້ນທີ່ສ້າງຄວາມຫຍຸ້ງຍາກ ໃຫ້ນັກທ່ອງທ່ຽວ; 
- ຂົງເຂດຄຸ້ມຄອງລັດ ແລະ ຍຸຕິທໍາ:  ຮີບຮ້ອນປັບປຸງ ແລະ ຮຽບຮຽງຄືນ ບັນດາຮ່າງກົດໝາຍ ທີ່ກອງປະຊຸມລັດຖະບານ ສະໄໝສາມັນປະຈໍາເດືອນສິງຫາ ໄດ້ຮັບຮອງແລ້ວ ໃຫ້ສໍາເລັດໂດຍໄວ ແລະ ທັນສົ່ງໃຫ້ສະພາແຫ່ງຊາດ ຕາມກໍານົດເວລາກ່ອນ 60 ວັນ; ສືບຕໍ່ປັບປຸງການບໍລິການລັດ ບົນຈິດໃຈບໍລິການ ແລະ ຮັບໃຊ້ປະຊາຊົນ ແລະ ແກ້ໄຂການສະເໜີ ຂອງປະຊາຊົນ ແລະ ສັງຄົມ ຜ່ານສາຍດ່ວນ ຂອງລັດຖະບານ, ຂະແໜງການຕ່າງໆ ແລະ ສື່ຕ່າງໆ ຕາມພາລະບົດບາດຂອງຕົນ; ເອົາໃຈໃສ່ຈັດຕັ້ງປະຕິບັດຄໍາຕັດສິນຂອງສານ ທີ່ມີຜົນສັກສິດທາງດ້ານກົດໝາຍ ໃຫ້ເຂັ້ມງວດ ແລະ ສັກສິດ, ແກ້ໄຂຂໍ້ຂັດແຍ່ງຕ່າງໆ ທາງສັງຄົມ ບົນພື້ນຖານຄວາມສະເໝີພາບ ຕໍ່ໜ້າກົດໝາຍ. 
- ວຽກງານໃນຂົງເຂດຕ່າງປະເທດ:  ສືບຕໍ່ຕິດຕາມສະພາບການພາກພື້ນ ແລະ ສາກົນ ຢ່າງໃກ້ຊິດ ໂດຍສະເພາະ ບັນຫາທີ່ອາດມີຜົນກະທົບໂດຍກົງ ຫຼື ໂດຍທາງອ້ອມ ຕໍ່ການພັດທະນາເສດຖະກິດ-ສັງຄົມ ຂອງປະເທດເຮົາ; ກະກຽມການຕ້ອນຮັບຜູ້ນໍາສູງສຸດຂອງຕ່າງປະເທດ ທີ່ຈະເດີນທາງມາຢ້ຽມຢາມ ສປປ ລາວ ທາງລັດຖະກິດ ໃນທ້າຍເດືອນກັນຍາ ນີ້ ໃຫ້ມີເນື້ອໃນຮັດກຸມ, ຄົບຖ້ວນ ແລະ ຮັບປະກັນຄວາມປອດໄພ. 

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ