ຜົນກອງປະຊຸມລັດຖະບານ ເພື່ອປຶກສາຫາລືການແກ້ໄຂໄພພິບັດນໍ້າຖ້ວມ ໃນທົ່ວປະເທດ ປີ 2019

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນອັງຄານ, 17 ກ.ຍ 2019 14:00

​                 
ດ້ວຍຄວາມເປັນຫ່ວງເປັນໄຍ ແລະ ຮັບຜິດຊອບສູງ ຕໍ່ຊີວິດ ແລະ ຊັບສິນ ຂອງປະຊາຊົນບັນດາເຜົ່າ, ລັດຖະບານ ໄດ້ດຳເນີນກອງປະຊຸມ ປຶກສາຫາລື ການແກ້ໄຂໄພພິ ບັດນໍ້າຖ້ວມ ໂດຍສະເພາະ ພາກກາງ ແລະ ພາກໃຕ້ ໃນຕອນເຊົ້າ ວັນທີ 5 ກັນຍາ 2019 ແລະ ກອງປະຊຸມປຶກສາຫາລື ກ່ຽວກັບ ສະພາບໄພພິບັດນໍ້າຖ້ວມ ຄັ້ງທີ 2 ໄດ້ໄຂຂຶ້ນ ຢ່າງເປັນທາງການ ໃນຕອນເຊົ້າ ຂອງວັນທີ 16 ກັນຍາ 2019 ທີ່ ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານ ຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ, ມີບັນດາຮອງນາຍົກລັດຖະມົນຕີ, ສະມາຊິກລັດຖະບານ ເຂົ້າຮ່ວມຢ່າງພ້ອມພຽງ.
ກອງປະຊຸມຄັ້ງນີ້ ໄດ້ຮັບຟັງການລາຍງານ ແລະ ປະກອບຄຳເຫັນ ກ່ຽວກັບຜົນກະທົບ ຈາກໄພພິບັດ ທີ່ເກີດຂຶ້ນໃນທົ່ວປະເທດ ປີ 2019 ຈາກບັນດາຂະແໜງການ ທີ່ກ່ຽວຂ້ອງ, ຊຶ່ງກອງປະຊຸມ ໄດ້ຕີລາຄາວ່າ: ນັບຕັ້ງແຕ່ເດືອນ ມັງກອນ ຫາ ກັນຍາ 2019 ນີ້, ໄດ້ເກີດໄພພິບັດນໍ້າຖ້ວມ, ລົມພະຍຸພັດ, ຟ້າຜ່າ, ດິນເຈື່ອນ, ໄຟໄໝ້ ແລະ ສັດຕູພືດທໍາລາຍຜົນລະປູກ ຢູ່ 13 ແຂວງ ອັນໄດ້ສົ່ງຜົນກະທົບໂດຍກົງຕໍ່ປະຊາຊົນ ໃນ 112 ເມືອງ, 2.072 ບ້ານ, 179.068 ຄອບຄົວ, 579.299 ຄົນ, ຍິງ 56.636 ຄົນ, ເສຍຊີວິດ 28 ຄົນ ແລະ  ສູນຫາຍ 7 ຄົນ. 
ສະເພາະໄພພິບັດ ນໍ້າຖ້ວມທີ່ເກີດຂຶ້ນ ໃນທ້າຍເດືອນສິງຫາ ຫາ ຕົ້ນເດືອນກັນຍາ 2019 ລວມມີ 6 ແຂວງ ຄື: ແຂວງຄໍາມ່ວນ, ສະຫວັນນະເຂດ, ສາລະວັນ, ເຊກອງ, ຈໍາປາສັກ ແລະ ແຂວງອັດຕະປື, ສົ່ງຜົນກະທົບໂດຍກົງຕໍ່ປະຊາຊົນ ໃນ 47 ເມືອງ, 1.655 ບ້ານ, 169.916 ຄອບຄົວ, 546.099 ຄົນ, ຍິງ 39.310 ຄົນ, ເສຍຊີວິດ 18 ຄົນ (ແຂວງສະຫວັນນະເຂດ 3 ຄົນ, ສາລະວັນ 3 ຄົນ, ອັດຕະປື 4 ຄົນ ແລະ ແຂວງຈໍາປາສັກ 8 ຄົນ, ສູນຫາຍ 1 ຄົນ ແຂວງຈໍາປາສັກ). ປະຊາຊົນທີ່ຖືກຍົກຍ້າຍມີ 10.163 ຄອບຄົວ, 39.506 ຄົນ, ຍິງ 10.920 ຄົນ.
ຜົນກະທົບ ຈາກໄພນໍ້າຖ້ວມໃນປີ 2019 ແມ່ນໜັກໜ່ວງ ໂດຍສະເພາະແມ່ນ ຢູ່ບັນດາແຂວງພາກກາງ ແລະ ພາກໃຕ້ ຖ້ວມໜັກ ໃນຮອບ 40 ກວ່າປີ, ຊຶ່ງເຮັດໃຫ້ມີຜົນກະທົບ ເປັນບໍລິເວນກວ້າງ  ແລະ ເສຍຫາຍ ທາງດ້ານຊິວິດ, ຊັບສິນ, ພື້ນຖານໂຄງລ່າງ ແລະ ພື້ນຖານການຜະລິດ ຢ່າງໜັກໜ່ວງ. ຕໍ່ໜ້າສະພາບການດັ່ງກ່າວ, ລັດຖະບານ ກໍ່ໄດ້ເອົາໃຈໃສ່ຊີ້ນໍາ ຢ່າງໃກ້ຊິດ ແລະ ບັນດາກະຊວງທີ່ກ່ຽວຂ້ອງ, ກຳລັງ ປກຊ-ປກສ, ບັນດາແຂວງ ແລະ ອົງການຊ່ວຍຫຼືອສັງຄົມຕ່າງໆ ກໍ່ໄດ້ສຸມທຸກກຳລັງແຮງ, ພາຫະນະ ແລະ ວັດຖຸອຸປະກອນ ເຂົ້າໄປຊ່ວຍເຫຼືອປະຊາຊົນ ທີ່ໄດ້ຮັບຜົນກະທົບ ຢ່າງທັນການ, ຊຶ່ງສາມາດ ຫຼຸດຜ່ອນຄວາມເສຍຫາຍ ທາງດ້ານຊີວິດ ແລະ ຊັບສິນ ໄດ້ດີສົມຄວນ. ແຕ່ກໍ່ໄດ້ພົບກັບອຸປະສັກຕ່າງໆນາໆ ຫຼາຍປະການ.
II. ສຳລັບທິດທາງແກ້ໄຂ ໃນຕໍ່ໜ້າ ແລະ ພາຍຫຼັງນ້ຳຫຼຸດ ກອງປະຊຸມໄດ້ຊີ້ນຳ ໃຫ້ບັນດາຂະແໜງການ ແລະ ທ້ອງຖິ່ນ ຈັດຕັ້ງປະຕິບັດ ດັ່ງນີ້:
1. ໃຫ້ຄະນະຮັບຜິດຊອບ ແກ້ໄຂໄພພິບັດ ຢູ່ແຕ່ລະແຂວງ ສົມທົບກັບ ຄະນະກຳ ມະການປ້ອງກັນ ແລະ ຄວບຄຸມໄພພິບັດແຫ່ງຊາດ ສືບຕໍ່ຈັດຕັ້ງຊີ້ນຳຢ່າງໃກ້ຊິດ ການແກ້ໄຂ ແລະ ຊ່ວຍເຫຼືອປະຊາຊົນ ທີ່ຍັງຢູ່ທີ່ພັກຊົ່ວຄາວ, ຮັບປະກັນໃຫ້ມີເຂົ້າກິນ, ນ້ຳດື່ມ-ນ້ຳໃຊ້ສະອາດ, ບໍ່ໃຫ້ເກີດພະຍາດລະບາດ, ໃຫ້ມີຄວາມສະຫງົບ, ໃຫ້ມີການຈັດຕັ້ງ-ມີຫົວໜ້າຄະນະ ເພື່ອຊີ້ນຳຢ່າງໃກ້ຊິດ. ພ້ອມກັນນີ້ ໃຫ້ສືບຕໍ່ປຸກລະດົມ ທົ່ວສັງຄົມ ເພື່ອສືບຕໍ່ ຊ່ວຍເຫຼືອປະຊາຊົນ ທີ່ໄດ້ຮັບຜົນກະທົບ (ແນວລາວສ້າງຊາດ, ສະຫະພັນນັກຮົບເກົ່າ, 3 ອົງການຈັດຕັ້ງມະຫາຊົນ ແລະ ອົງການຈັດຕັ້ງທາງສັງຄົມອື່ນໆ).
2. ໃຫ້ສຸມທຸກກຳລັງ (ທະຫານ, ຕຳຫຼວດ ແລະ ທຸກພາກສ່ວນ) ລວມທັງ ພາຫະນະ (ລົດດັບເພິງ, ເຮືອ,...) ພ້ອມທັງ ມີການຈັດຕັ້ງຊີ້ນຳລະອຽດ ເພື່ອສຸມໃສ່ຊ່ວຍເຫຼືອ ປະຊາຊົນ ໃນການຍົກຍ້າຍ ຈາກທີ່ພັກຊົ່ວຄາວກັບຄືນ ໄປບ້ານເຮືອນຂອງຕົນ. ພ້ອມທັງ ເອົາເຄື່ອງຂອງຊ່ວຍເຫຼືອ ທີ່ໄດ້ຮັບບໍລິຈາກ ໃຫ້ໄປຮອດໄປເຖິງປະຊາຊົນ ຢ່າງແທ້ຈິງ. ພ້ອມດຽວກັນນີ້, ໃຫ້ແຕ່ລະຂະແໜງການ ແລະ ທ້ອງຖິ່ນ ຕ້ອງສຸມໃສ່ວຽກງານແກ້ໄຂໄພພິບັດ ເປັນວຽກຈຸດໜັກ, ສຳຄັນ ມີການວາງແຜນ ແລະ ມີຜູ້ຊີິ້ນຳໃນການຈັດຕັ້ງປະຕິບັດ ຕົວຈິງ.
3. ໃຫ້ຂະແໜງການ ແລະ ທ້ອງຖິ່ນ ກະກຽມຟື້ນຟູການຜະລິດ ພາຍຫຼັງນ້ຳລົງ ເພື່ອເຮັດໃຫ້ການ ຜະລິດເຂົ້າສູ່ສະພາບປົກກະຕິ ແນໃສ່ຮັບປະກັນ ດ້ານສະບຽງອາຫານ ໂດຍສະເພາະ ການຈັດສັນແນວພັນ, ປັດໄຈການຜະລິດ, ພາຫະນະການຜະລິດ ແລະ ອື່ນໆ ໃຫ້ທັນການ.
4. ໃຫ້ເອົາໃຈໃສ່ປັບປຸງພື້ນຖານໂຄງລ່າງ ໂດຍສະເພາະ ສ້ອມແປງເສັ້ນທາງ ໃຫ້ສາມາດໄປ-ມາ ໄດ້, ສ້ອມແປງໂຮງຮຽນ, ໂຮງໝໍ, ສຸກສາລາ ໃຫ້ສາມາດເປີດນຳໃຊ້ໄດ້.  
5. ໃຫ້ກະຊວງການເງິນ ຮີບຮ້ອນຄົ້ນຄວ້າ ແລະ ກະກຽມ ດ້ານງົບປະມານ ເພື່ອແກ້ໄຂໄພພິບັດດັ່ງກ່າວ ດ້ວຍການນຳໃຊ້ເງິນທີ່ມີ (ເງິນແຮ, ເງິນສະສົມ, ເງິນບໍລິຈາກ ແລະ ເງິນກອງທຶນຕ່າງໆ ຢູ່ກະຊວງແຮງງານ ແລະ ສະຫວັດດີການສັງຄົມ) ລວມທັງ ຄັງແຮເຂົ້າ, ຄັງແຮນ້ຳມັນ... ແລ້ວສະເໜີລັດຖະບານ ພິຈາລະນາຕົກລົງໂດຍໄວ. ພ້ອມນີ້, ໃຫ້ປຸກລະດົມທົ່ວສັງຄົມ ປະກອບສ່ວນຊ່ວຍເຫຼືອຜູ້ປະສົບໄພຕື່ມ. 
6. ໃຫ້ສູນບັນຊາການແກ້ໄຂໄພພິບັດ ຢູ່ຂັ້ນສູນກາງ ແລະ ທ້ອງຖິ່ນ ມີການປະສານງານກັນວ່ອງໄວ, ຄ່ອງຕົວ ສາມາດແກ້ໄຂບັນຫາໄດ້ ຢ່າງທັນການ. 
7. ໃຫ້ກຳລັງປ້ອງກັນຊາດ-ປ້ອງກັນຄວາມສະຫງົບ ສືບຕໍ່ເປັນກຳລັງຕົ້ນຕໍ ໃນການຊ່ວຍເຫຼືອປະຊາຊົນ ທີ່ໄດ້ຮັບຜົນກະທົບ.  ສຳລັບງົບປະມານ ໃນການເຄື່ອນໄຫວ ໃຫ້ຄົ້ນຄວ້າຂຶ້ນແຜນສະເໜີ ລັດຖະບານ ເພື່ອພິຈາລະນາຕົກລົງ. 
8. ໃຫ້ເອົາໃຈໃສ່ຄຸ້ມຄອງລາຄາສິນຄ້າ, ອັດຕາແລກປ່ຽນ, ອັດຕາເງິນເຟີ້ ແລະ ຕ້ອງເຮັດຢ່າງແທດຕົວຈິງ  ໂດຍມີການລົງໄປຕິດຕາມກວດກາຕົວຈິງ ຢູ່ທ້ອງຖິ່ນຕ່າງໆ. 
9. ໃຫ້ພາກສ່ວນກ່ຽວຂ້ອງ ຄົ້ນຄວ້າລະອຽດ ກ່ຽວກັບ ການຍົກເວັ້ນພາສີ-ອາກອນ, ຫຼຸດອັດຕາຄ່າໄຟຟ້າ, ນະໂຍບາຍດ້ານສິນເຊື່ອ, ປັດໄຈການຜະລິດ ແລະ ອື່ນໆ ແລ້ວສະ  ເໜີລັດຖະບານພິຈາລະນາຕົກລົງ.  
10. ໃຫ້ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເອົາໃຈໃສ່ລົງຕິດຕາມ ແລະ ລາຍງານສະພາບຕົວຈິງ ການແກ້ໄຂບັນຫາ ໄພພິບັດໃນຄັ້ງນີ້ ເພື່ອໃຫ້ສັງຄົມ ໄດ້ຮັບຊາບຂໍ້ມູນທີ່ຖືກຕ້ອງ ຢ່າງລະອຽດ, ຈະແຈ້ງ ແລະ ທັນການ.  ທັງເປັນການປຸກລະດົມ, ເຕົ້າໂຮມຄວາມສາມັກຄີ ທົ່ວສັງຄົມ ແລະ ສຶກສາອົບຮົມການເມືອງແນວຄິດ ໃຫ້ປະຊາຊົນ. ພ້ອມກັນນັ້ນ, ໃຫ້ເອົາໃຈໃສ່ ຕິດຕາມ ແລະ ແກ້ໄຂການອອກຂ່າວ ທີ່ບໍ່ມີມູນຄວາມຈິງ, ໃສ່ຮ້າຍປ້າຍສີ ແລະ ອື່ນໆ ຂອງບຸກຄົນ, ສື່ສັງຄົມອອນລາຍ ຈຳນວນໜຶ່ງ ຢ່າງທັນການ.
11. ໃຫ້ກະຊວງຊັບພະຍາກອນທຳມະຊາດ ແລະ ສິີ່ງແວດລ້ອມ ສືບຕໍ່ຕິດຕາມ ແລະ ແຈ້ງເຕືອນສະພາບ ດິນຟ້າອາກາດ ໃນແຕ່ລະວັນ ພ້ອມທັງ ແນະນຳ ແລະ ໃຫ້ຄວາມຮູ້ແກ່ປະຊາຊົນ ເພື່ອກະກຽມ ແລະ ປ້ອງກັນ.
12. ໃຫ້ຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດ ສົມທົບກັບ ຂະແໜງການ ແລະ ທ້ອງຖິ່ນ ເພື່ອແກ້ໄຂໄພພິບັດທົ່ວປະເທດ ໃນປີ 2019 ນີ້ ໃຫ້ກັບຄືນສູ່ສະພາບປົກກະຕິໂດຍໄວ. ສຳລັບຄະນະກຳມະການສະເພະກິດ ແກ້ໄຂໄພພິບັດລະດັບຊາດ ແມ່ນໃຫ້ສຸມໃສ່ແກ້ໄຂບັນຫາຜົນກະທົບໄພພິບັດ ຢູ່ເມືອງສະໜາມໄຊ, ແຂວງ ອັດຕະປື.
​13. ສືບຕໍ່ຮຽກຮ້ອງທຸກພາກສ່ວນ ທົ່ວສັງຄົມ ໃຫ້ຮ່ວມແຮງ-ຮ່ວມໃຈກັນ, ປຸກລະ ດົມການຊ່ວຍເຫລືອ, ການຮ່ວມມື ທັງຈາກພາຍໃນ ແລະ ຕ່າງປະເທດ.​
ທັງໝົດ ທີ່ກ່າວມາຂ້າງເທິງນີ້ ແມ່ນຜົນກອງປະຊຸມລັດຖະບານ ຮີບດ່ວນສະເພາະ ປຶກສາຫາລືການແກ້ໄຂ ສະພາບໄພພິບັດ ທີ່ໄດ້ເກີດຂຶ້ນປີ 2019 ທີ່ຜ່ານມາ. ​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ