ຜົນກອງປະຊຸມລັດຖະບານ ສະໄໝສາມັນປະຈໍາເດືອນ ທັນວາ 2018

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນພຸດ, 26 ທ.ວ 2018 14:00

 

ກອງປະຊຸມລັດຖະບານ ສະໄໝສາມັນ ປະຈໍາເດືອນ ທັນວາ 2018 ໄດ້ດໍາເນີນເປັນເວລາສອງວັນເຕັມ ຄື: 24-25 ທັນວາ 2018, ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ, ໂດຍມີບັນດາທ່ານຮອງນາຍົກລັດຖະມົນຕີ ແລະ ສະມາຊິກລັດຖະບານ ເຂົ້າຮ່ວມຢ່າງພ້ອມພຽງ.
ກອງປະຊຸມ ຄັ້ງນີ້ ໄດ້ພ້ອມກັນສຸມໃສ່ພິຈາລະນາ, ປະກອບຄໍາເຫັນເຂົ້າໃສ່ 6 ເອກະສານສໍາຄັນ ດັ່ງນີ້:
1. ບົດລາຍງານກ່ຽວກັບສະພາບພົ້ນເດັ່ນ ຂອງການເຄື່ອນໄຫວວຽກງານການຕ່າງປະເທດ ຂອງລັດຖະບານ ປະຈຳປີ 2018 ແລະ ທິດທາງແຜນການ ສຳລັບປີ 2019.
2. ບົດລາຍງານການຕີລາຄາ ກ່ຽວກັບສະພາບການເຂົ້າຮ່ວມ, ລາຍງານ ແລະ ຕອບຄຳຊັກຖາມຂອງລັດຖະບານ ຕໍ່ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊູດທີ VIII
3. ບົດລາຍງານກ່ຽວກັບການວາງແຜນ ແລະ ດໍາເນີນວຽກງານຟື້ນຟູຫຼັງໄພພິບັດ ໃນຂອບເຂດທົ່ວປະເທດປີ 2018.
4. ບົດລາຍງານກ່ຽວກັບ ຜົນການຈັດຕັ້ງປະຕິບັດຄໍາສັ່ງ ສະບັບເລກທີ 15/ນຍ ແລະ ສະພາບການດຳເນີນທຸລະກິດໄມ້ຢູ່ ສປປ ລາວ.
5. ບົດລາຍງານກ່ຽວກັບ ການສະຫຼຸບຕີລາຄາການຈັດຕັ້ງປະຕິບັດປີ ທ່ອງທ່ຽວລາວ 2018 ແລະ ແຜນ ການເປີດປີທ່ອງທ່ຽວ ລາວ-ຈີນ 2019.
6. ຮ່າງດຳລັດ ວ່າດ້ວຍແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ປະຈຳປີ 2019.
- ຕໍ່ກັບບົດລາຍງານກ່ຽວກັບສະພາບພົ້ນເດັ່ນ ຂອງການເຄື່ອນໄຫວວຽກງານການຕ່າງປະເທດຂອງລັດຖະບານ ປະຈຳປີ 2018 ແລະ ທິດທາງແຜນການ ສຳລັບປີ 2019, ກອງປະຊຸມ ໄດ້ຊີ້ນໍາໃຫ້ທຸກພາກສ່ວນທີ່ກ່ຽວ ຂ້ອງສືບຕໍ່ເອົາໃຈໃສ່ຕິດຕາມ ສະພາບການປ່ຽນແປງຂອງພາກພື້ນ ແລະ ສາກົນ ຢ່າງໃກ້ສິດ.
- ຕໍ່ກັບບົດລາຍງານການວາງແຜນ ແລະ ດໍາເນີນວຽກງານຟື້ນຟູໄພພິບັດ ໃນຂອບເຂດທົ່ວປະເທດ, ກອງປະຊຸມ ໄດ້ຊີ້ນໍາໃຫ້ພາກສ່ວນທີ່ກ່ຽວຂ້ອງ ສືບຕໍ່ເອົາໃຈໃສ່ຮີບຮ້ອນຈັດສັນທີ່ພັກຊົ່ວຄາວ ໃຫ້ຜູ້ທີ່ໄດ້ຮັບຜົນກະທົບ ຢູ່ທີ່ເມືອງສະໜາມໄຊ ໃຫ້ສໍາເລັດຕາມສັນຍາ ທີ່ໄດ້ຕົກລົງກັນ. ພ້ອມດຽວກັນນີ້, ກໍ່ໃຫ້ດໍາເນີນການອອກແບບທີ່ພັກເຊົາຖາວອນ ແລະ ກໍານົດເນື້ອທີ່ທໍາການຜະລິດ ໃຫ້ປະຊາຊົນໂດຍໄວ, ມອບໃຫ້ຂະແໜງສາທາລະນະສຸກ ສືບຕໍ່ເອົາໃຈໃສ່ຕິດຕາມ ແລະ ເບິ່ງແຍງສຸຂະພາບຂອງປະຊາຊົນ ຜູ້ຖືກຜົນກະທົບ ໂດຍສະເພາະ ສຸຂະພາບຈິດຂອງປະຊາຊົນ, ມອບໃຫ້ຄະນະສະ ເພາະກິດແກ້ໄຂໄພພິບັດຂັ້ນສູນກາງ ແລະ ທ້ອງຖິ່ນ ປຶກສາຫາລືກັນ ເພື່ອແຈ້ງກ່ຽວກັບຄວາມຄືບໜ້າໃນການແກ້ໄຂໄພພິບັດ ໃນແຕ່ລະໄລຍະຕໍ່ສື່ມວນຊົນ ທັງເປັນການຕອບຕ້ານ ຫາງສຽງທັບຖົມໂຈມຕີ ຂອງຜູ້ບໍ່ຫວັງດີ ທີ່ຫວັງທໍາລາຍມ້າງເພ ແລະ ສ້າງຄວາມບໍ່ສະຫງົບໃນສັງຄົມ. ສຳຄັນແມ່ນໃຫ້ເອົາໃຈໃສ່ ໃນການວາງແຜນຟື້ນຟູໄພພິບັດ ທັງໄລຍະສັ້ນ ແລະ ໄລຍະຍາວ ໃຫ້ໄດ້ຮັບຜົນດີ.
- ບົດລາຍງານກ່ຽວກັບຜົນການກວດກາ, ຕິດຕາມ ຊຸກຍູ້ການຈັດຕັ້ງປະຕິບັດຄໍາສັ່ງ ເລກທີ 15/ນຍ ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ ແລະ ກວດກາການຂຸດຄົ້ນໄມ້, ການເຄື່ອນຍ້າຍໄມ້ ແລະ ທຸລະກິດໄມ້ ໃນຂອບເຂດທົ່ວປະເທດ, ກອງປະຊຸມ ໄດ້ສັງເກດຕີລາຄາວ່າ: ຜ່ານການຈັດຕັ້ງປະຕິບັດຄໍາສັ່ງດັ່ງກ່າວ ໄດ້ເຮັດໃຫ້ສະພາບການລັກລອບຂຸດຄົ້ນ ແລະ ເຄື່ຶອນຍ້າຍໄມ້ຫຼຸດລົງຢ່າງຈະແຈ້ງ ທຽບໃສ່ເມື່ອກ່ອນ, ເຮັດໃຫ້ການຄຸ້ມຄອງລັດ, ຄຸ້ມຄອງສັງຄົມ ດ້ວຍກົດໝາຍ ໄດ້ຮັບການຈັດຕັ້ງປະຕິບັດ ເປັນຮູບປະທໍາຫຼາຍຂຶ້ນ, ເຮັດໃຫ້ບົດບາດໃນການນໍາພາ ຄຸ້ມຄອງຂອງ ພັກ-ລັດ ສູງເດັ່ນຂຶ້ນ; ຜູ້ປະກອບການຈໍານວນໜຶ່ງ ໄດ້ເອົາໃຈໃສ່ປັບປຸງໂຮງງານ, ຍົກລະດັບສີມືແຮງງານ ສາມາດສ້າງຜະລິດຕະພັນສໍາເລັດຮູບ ທີ່ເປັນການສ້າງມູນຄ່າເພີ່ມສູງຂຶ້ນ; ສາມາດເກັບກໍາໄດ້ ຈໍານວນບໍລິມາດໄມ້ທີ່ຍັງຄ້າງຢູ່ໃນສະໜາມ, ໄມ້ທີ່ໄດ້ຊື້-ຂາຍແລ້ວ ແລະ ຍັງບໍ່ໄດ້ຊື້-ຂາຍ, ກວດກາພົບເຫັນການລະເມີດຄໍາສັ່ງ ເລກທີ 15/ນຍ, ໄດ້ມີການຢຶດ ແລະ ປັບໃໝ, ປະຕິບັດວິໄນຕໍ່ຜູ້ລະເມີດ ຢ່າງເຂັ້ມງວດ ເຮັດໃຫ້ຜູ້ລະ ເມີດມີຄວາມຢ້ານກົວ ບໍ່ກ້າກະທໍາຜິດຊໍ້າອີກ. ອັນສໍາຄັນ ບາງແຂວງ ເລີ່ມມີການສ້າງເມືອງຕົວແບບໃນການຈັດຕັ້ງປະຕິບັດຄໍາສັ່ງ ເລກທີ 15/ນຍ ແລະ ປົກປັກຮັກສາປ່າໄມ້ ຄື: ເມືອງທ່າປາງທອງ, ແຂວງສະຫວັນນະເຂດ ໂດຍເລີ່ມຈາກການຈັດຕັ້ງປະຕິບັດ ກົດໝາຍ ແລະ ລະບຽບການ ໃນການຄຸ້ມຄອງປ່າໄມ້ແຕ່ລະປະເພດ ໃຫ້ເຂັ້ມງວດ, ການຄຸ້ມຄອງໂຮງງານ, ການສົ່ງຜະລິດຕະພັນໄມ້ ແລະ ອື່ນໆ ເຂົ້າສູ່ລະບຽບກົດໝາຍ. ຄຽງຄູ່ກັບຜົນສໍາເລັດ ດັ່ງກ່າວນີ້, ຍັງມີຂໍ້ຄົງຄ້າງຫຼາຍດ້ານ ທີ່ໄດ້ສືບຕໍ່ແກ້ໄຂ. ຕໍ່ບັນຫາດັ່ງກ່າວ, ກອງປະຊຸມ ໄດ້ຊີ້ນໍາໃຫ້ພາກສ່ວນທີ່ກ່ຽວຂ້ອງ ສືບຕໍ່ເອົາໃຈໃສ່ຈັດຕັ້ງປະຕິບັດຄໍາສັ່ງ ເລກທີ 15/ນຍ ຢ່າງເຂັ່ງຄັດ, ເຂັ້ມງວດ ແລະ ເດັດຂາດ, ປັບປຸງຕື່ມບັນດານິຕິກໍາທີ່ກ່ຽວຂ້ອງ ທີ່ເຫັນວ່າ ຍັງບໍ່ຄົບຖ້ວນຮັດກຸມ, ຈະແຈ້ງ ແລະ ມີຄວາມເປັນເອກະພາບ ໃນການຈັດຕັ້ງປະຕິບັດໃນຂອບເຂດທົ່ວປະເທດ. ພ້ອມດຽວກັນນີ້, ໃຫ້ຢຸດຕິການຊອກຄົ້ນເຄື່ອງປ່າຂອງດົງ ໃນຂອບເຂດທົ່ວປະເທດ.
- ກ່ຽວກັບບົດລາຍງານກ່ຽວກັບ ການສະຫຼຸບຕີລາຄາການຈັດຕັ້ງປະຕິບັດ ປີທ່ອງທ່ຽວລາວ 2018 ແລະ ແຜນການເປີດປີທ່ອງທ່ຽວ ລາວ-ຈີນ 2019, ກອງປະຊຸມ ໄດ້ຊີ້ນໍາໃຫ້ພາກສ່ວນທີ່ກ່ຽວ ຂ້ອງນໍາໄປ ປັບປຸງຕື່ມຕາມການປະກອບຄໍາເຫັນ ຂອງສະມາຊິກລັດຖະບານ ເປັນຕົ້ນ ໃນປີ 2019 ຖືເປັນປີທ່ອງທ່ຽວ ລາວ-ຈີນ ໃຫ້ທຸກຂະແໜງການ ນັບທັງ ສູນກາງ ແລະ ທ້ອງຖິ່ນ ເປັນເຈົ້າການ ແລະ ມີສ່ວນຮ່ວມໃນການສະເຫຼີມສະຫຼອງ ປິທ່ອງທ່ຽວກ່າວ. ພ້ອມດຽວກັນນັ້ນ, ໃຫ້ເອົາໃຈໃສ່ ໃນການແກ້ໄຂສິ່ງອຸດຕັນຕ່າງໆ ທີ່ເປັນອຸປະສັກໃຫ້ແກ່ນັກທ່ອງທ່ຽວ, ສໍາຄັນແມ່ນໃຫ້ເອົາໃຈໃສ່ ໃນການປົກປັກຮັກສາຮີດຄອງປະເພນີ ແລະ ສະຖານທີ່ທ່ອງທ່ຽວສໍາຄັນຕ່າງໆ ໃຫ້ມີຄວາມເປັນລະບຽບຮຽບຮ້ອຍ ແລະ ສະອາດງາມຕາ.
- ກ່ຽວກັບບົດລາຍງານກ່ຽວກັບ ຮ່າງດໍາລັດວ່າດ້ວຍການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປະຈໍາປີ 2019 ເຊິ່ງເປັນປີທີ 4 ຂອງການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016-2020) ກໍ່ຄື ມິຕິກອງປະຊຸມໃຫຍ່ ຄັ້ງທີ X ຂອງພັກ ໃຫ້ໄດ້ຮັບຜົນສໍາເລັດຕາມທິດທາງ, ຄາດໝາຍ ແລະ ມີຄວາມເປັນເອກະພາບ ໃນຂອບເຂດທົ່ວປະເທດ, ກອງປະຊຸມ ໄດ້ຊີ້ນໍາໃຫ້ພາກສ່ວນທີ່ກ່ຽວຂ້ອງນໍາໄປປັບປຸງຕື່ມ ຕາມການປະກອບຄໍາຄິດຄໍາເຫັນ ຂອງສະມາຊິກລັດຖະບານ ເປັນຕົ້ນ 1). ເອົາ ໃຈໃສ່ປັບປຸ່ງຮ່າງດໍາລັດດັ່ງກ່າວ ໃຫ້ເປັນລະບົບໃຫ້ໄປຕາມໂລຈິກ, ເປັນໂຕ່ງໂສ້ ແລະ ເພີ່ມອີກໝວດໜຶ່ງໃຫ້ກໍານົດ ມາດຕະການ ແລະ ກົນໄກການຈັດຕັ້ງປະຕິບັດ; 2). ໃຫ້ຂະແໜງການທີ່ກ່ຽວຂ້ອງ ເອົາໃຈໃສ່ໃນການສໍາຫຼວດ ແລະ ກະກຽມໃຫ້ແກ່ການສ້າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9; 3). ເອົາໃຈໃສ່ສູ້ຊົນ ໃນປີ 2019 ໃຫ້ບັນລຸຕາມຕົວເລກຄາດໝາຍ ຕາມມະຕິຂອງກອງປະຊຸມສະພາແຫ່ງຊາດ ໄດ້ພິຮັບຮອງ; 4). ເອົາໃຈໃສ່ສ້າງແຜນຍຸດທະສາດ ດ້ານພະລັງງານ ໃຫ້ສໍາເລັດຕາມແຜນ, ເອົາໃຈໃສ່ສ້າງແຜນ ການຂະຫຍາຍອຸດສາຫະກໍາການຄ້າໃຫ້ສໍາເລັດ, ປັບປຸງລາຄາໄຟຟ້າ ເພື່ອນໍາໃຊ້ເຂົ້າໃນການຂະແໜງການອຸດສາຫະກໍາ, ພ້ອມທັງເອົາໃຈໃສ່ໃນການຄຸ້ມຄອງລາ ຄານໍ້າມັນ; 5). ເອົາໃຈໃສ່ລົບລ້າງບັນດາສິ່ງກີດຂວາງ ທີ່ເປັນອຸປະສັກໃຫ້ແກ່ການທ່ອງທ່ຽວ ແລະ ການດຶງດູດການລົງທຶນ ໃຫ້ຂະແໜງການ ພິຈາລະນາລົບລ້າງການເກັບຄ່າທໍານຽມຕ່າງໆ; 6). ເອົາໃຈໃສ່ເຄັ່ງຄັດ ແລະ ເຂັ້ມງວດ ໃນການຈັດເກັບລາຍຮັບ ແລະ ຄຸ້ມຄອງລາຍຈ່າຍ ໃຫ້ດີ; 7). ເອົາໃຈໃສ່ຈັດລຽງບູລິມະສິດ ໂຄງການລົງທຶນຂອງລັດຖະບານ ໃນປີ 2019; 8). ເອົາໃຈໃສ່ປັບປຸງເຮັດໃຫ້ຕົວຊີ້ວັດການລົງທຶນ ໃຫ້ຕົວເລກເຫຼືອໜ້ອຍລົງ;
ພ້ອມດຽວກັນນັ້ນ, ກອງປະຊຸມ ຍັງໄດ້ເໜັ້ນໜັກ ເດັດຂາດບໍ່ໃຫ້ບັນດາກະຊວງ, ອົງການ ແລະ ທ້ອງຖິ່ນ ລະດົມທຶນດ້ວຍການຕັດເອົາເງິນເດືອນ ຂອງພະນັກງານລັດຖະກອນ, ທະຫານ-ຕໍາຫຼວດ ແລະ ປະຊາຊົນ ເພື່ອນໍາໃຊ້ເຂົ້າໃນການສະເຫຼີມສະຫຼອງ ວັນບຸນສໍາຄັນຕ່າງໆ
ນອກຈາກເນື້ອໃນດັ່ງກ່າວ, ກອງປະຊຸມ ໄດ້ເປັນເອກະພາບ ແລະ ຕັດສິນໃຈສູງ ເພື່ອພ້ອມກັນຈັດຕັ້ງປະຕິບັດວຽກງານຈຸດສຸມ ໃນເດືອນ ມັງກອນ 2019 ດັ່ງນີ້:
1. ໃຫ້ກະຊວງປ້ອງກັນຄວາມສະຫງົບ ສືບຕໍ່ເພີ່ມທະວີຄວາມເອົາໃຈໃສ່ ຕໍ່ວຽກງານຮັກສາຄວາມສະຫງົບຕາມຊາຍແດນ; ຄຸ້ມຄອງຄວາມເປັນລະບຽບຮຽບຮ້ອຍຂອງສັງຄົມ ໃຫ້ໜັກແໜ້ນໂດຍເລັ່ງສ້າງແຜນແມ່ບົດ ຈັດສັນລະບຽບສັງຄົມ ຕາມແຜນທີ່ໄດ້ກຳນົດ ເພື່ອເປັນທິດທາງ ໃຫ້ແກ່ການເຄື່ອນໄຫວວຽກງານດ້ານນີ້ ທັງໃນສະເພາະໜ້າ ແລະ ຍາວນານ; ຮັກສາສະຖຽນລະພາບທາງການເມືອງ ໃຫ້ໝັ້ນທ່ຽງ ໂດຍເອົາໃຈໃສ່ແກ້ໄຂ ແລະ ຕອບໂຕ້ກັບການເຄື່ອນໄຫວບໍດີ ທີ່ຫວັງແບ່ງແຍກ ແລະ ມ້າງຄວາມສາມັກຄີພາຍໃນ ຂອງພວກເຮົາ; ສືບຕໍ່ເອົາໃຈໃສ່ພິເສດໃນການແກ້ໄຂ ປະກົດການຫຍໍ້ທໍ້ທາງສັງຄົມ ເປັນຕົ້ນແມ່ນ ບັນຫາຢາເສບຕິດ, ອຸປະຕິເຫດຕາມທ້ອງຖະໜົນ, ອັກຄີໄພ ແລະ ບັນຫາອື່ນໆ ໃຫ້ກະຊວງປ້ອງກັນຄວາມສະຫງົບ ປະສານສົມທົບກັບຂະແໜງການກ່ຽວຂ້ອງ ຄົ້ນຄວ້າ ແລະ ມີແຜນປະຕິບັດ ພ້ອມທັງ ມີການສະຫຼຸບ ຜົນຂອງການແກ້ໄຂໃຫ້ປະກົດການຫຍໍ້ທໍ້ດັ່ງກ່າວ.
2. ໃຫ້ກະຊວງແຜນການ ແລະ ການລົງທຶນ, ກະຊວງການເງິນ, ບັນດາຂະແໜງການ ແລະ ອົງການປົກ ຄອງທ້ອງຖິ່ນ ຮີບຮ້ອນເຜີຍແຜ່  ແລະ ຜັນຂະຫຍາຍດໍາລັດ ວ່າດ້ວຍການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປີ 2019 ໃຫ້ເປັນບົດແນະນໍາລະອຽດຂອງຂະແໜງການ ແລະ ທ້ອງຖິ່ນຕົນ, ໃຫ້ໄດ້ຮັບຮອງ ແລະ ເລີ່ມຈັດຕັ້ງປະຕິບັດ ໂດຍໄວເລິ່ມແຕ່ເດືອນມັງກອນ 2019 ເປັນຕົ້ນໄປ.
3. ໃຫ້ກະຊວງການຕ່າງປະເທດ ສືບຕໍ່ຕິດຕາມຢ່າງໃກ້ຊິດສະພາບການພາກພື້ນ ແລະ ສາກົນ ທີ່ກຳລັງຜັນແປໄປຢ່າງສະຫຼັບຊັບຊ້ອນ ແລະ ອາດມີຜົນກະທົບ ທາງດ້ານການເມືອງ, ເສດຖະກິດ ແລະ ສັງຄົມ ຕໍ່ປະເທດເຮົາ. ໃຫ້ເອົາໃຈໃສ່ວິເຄາະວິໄຈ ແລະ ກໍານົດທັດສະນະ ໃຫ້ເໝາະສົມ ພ້ອມທັງກະກຽມປ້ອງກັນຄວາມສ່ຽງຕ່າງໆ ທີ່ອາດຈະເກີດຂຶ້ນ. ພ້ອມກັນນີ້, ກໍ່ໃຫ້ກະກຽມຮອບດ້ານ ໃຫ້ແກ່ການເຄື່ອນໄຫວວຽກງານຕ່າງປະເທດ ຂອງການນຳພັກ-ລັດ ໂດຍສະເພາະ ກອງປະຊຸມສອງກົມການເມືອງ ລາວ-ຫວຽດນາມ ແລະ ກອງປະຊຸມຄະນະກໍາມາທິການຮ່ວມມື ລາວ-ຫວຽດນາມ ທີ່ຈະຈັດຂຶ້ນໃນວັນທີ 5 ມັງກອນ 2019 ທີ່ຮ່າໂນ້ຍ ສສ ຫວຽດນາມ.
4. ໃຫ້ກະຊວງແຜນການ ແລະ ການລົງທຶນ ສົມທົບກັບພາກສວນກ່ຽວຂ້ອງ ສືບຕໍ່ຄຸ້ມຄອງເສດຖະກິດມະຫາພາກ ໃຫ້ມີສະຖຽນລະພາບ. ພ້ອມກັນນີ້, ກໍ່ໃຫ້ເປັນເຈົ້າການສົມທົບກັບກະຊວງກ່ຽວຂ້ອງ ຕິດຕາມ, ອຳນວຍຄວາມສະດວກ, ຊຸກຍູ້ ແລະ ແກ້ໄຂບັນຫາກົນໄກຂອດການລົງທຶນ ໂດຍສະເພາະ ແມ່ນການແກ້ໄຂບັນດາຕົວຊີ້ວັດ 10 ຂໍ້ ທີ່ພົວພັນກັບການຈັດອັນດັບຄວາມສະດວກ ໃນການດໍາເນີນທຸລະກິດຢູ່ ສປປ ລາວ ຕາມຄໍາສັ່ງເລກທີ 02/ນຍ ເພື່ອປັບປຸງອັນດັບຂອງປະເທດເຮົາ ໃຫ້ດີຂຶ້ນໃນປີ 2020.
5. ໃຫ້ກະຊວງຍຸຕິທໍາ ສົມທົບກັບພາກສ່ວນກ່ຽວຂ້ອງ ສືບຕໍ່ປັບປຸງກົນໄກປະສານງານ ແລະ ປະສານສົມທົບລະຫວ່າງຂະແໜງຍຸຕິທຳ, ສານ, ໄອຍະການ ແລະ ປ້ອງກັນຄວາມສະຫງົບ ເພື່ອສ້າງສະພາບແວດລ້ອມ, ຄວາມເຊື່ອໝັ້ນ ແລະ ຄວາມຊັດທາຂອງປະຊາຊົນ ໃນການດຳເນີນຂະບວນການຍຸຕິທຳ ຕາມທິດສ້າງລັດທີ່ຄຸ້ມຄອງດ້ວຍກົດໝາຍ, ຊຸກຍູ້ການຈັດຕັ້ງປະຕິບັດ ຄໍາຕັດສິນຂອງສານ ໃຫ້ມີຄວາມວ່ອງໄວ, ຖືກຕ້ອງ, ເຂັ້ມງວດ ແລະ ສັກສິດ ເພື່ອໃຫ້ສັງຄົມມີຄວາມຍຸຕິທໍາ.
6. ໃຫ້ກະຊວງແຮງງານ ແລະ ສະຫວັດດີການສັງຄົມ ສືບຕໍ່ເອົາໃຈໃສ່ວຽກງານພັດທະນາສີມືແຮງງານ ແລະ ຄຸ້ມຄອງການນຳເຂົ້າແຮງງານຕ່າງປະເທດ ໃຫ້ຖຶກກັບກົດໝາຍ ແລະ ລະບຽບການ. ພ້ອມກັນນີ້, ກໍ່ຊຸກຍູ້ການຜະລິດ ແລະ ບໍລິການ ເພື່ອສ້າງວຽກເຮັດງານທຳພາຍໃນປະເທດ, ຫຼຸດຜ່ອນການໄປຂາຍແຮງງານຂອງຄົນລາວຢູ່ຕ່າງປະເທດ ທີ່ບໍ່ຖືກກົດໝາຍ ເພື່ອຫຼີກລ້ຽງບັນຫາສັງຄົມ ທີ່ຈະເກີດຂຶ້ນຕາມພາຍຫຼັງ.
7. ໃຫ້ກະຊວງກະສິກໍາ ແລະ ປ່າໄມ້ ປະສານສົມທົບກັບພາກສ່ວນກ່ຽວຂ້ອງ ສືບຕໍ່ເອົາໃຈໃສ່ຊຸກຍູ້ການຜະລິດລະດູແລ້ງ ໃຫ້ທັນກັບລະດູການ ເປັນຕົ້ນແມ່ນການສະໜອງແນວພັນ, ການສະໜອງນ້ຳເຂົ້າໃນພື້ນທີ່ການຜະລິດ ແລະ ການຊ່ວຍເຫຼືອ ທາງດ້ານເຕັກນິກວິຊາການ ທີ່ຈຳເປັນໃຫ້ແກ່ຊາວກະສິກອນ; ສືບຕໍ່ຈັດຕັ້ງການເຝົ້າລະວັງ ແລະ ປ້ອງກັນເຊື້ອພະຍາດຕ່າງໆ ທີ່ອາດຈະເກີດຕາມລະດູການ.
8. ໃຫ້ກະຊວງຖະແຫຼງຂາວ, ວັດທະນະທໍາ ແລະ ທ່ອງທ່ຽວ ປະສານສົມທົບກັບພາກສ່ວນກ່ຽວຂ້ອງ ເອົາໃຈໃສ່ໂຄສະນາເຜີຍແຜ່ກ່ຽວກັບການເປັນເຈົ້າພາບທີ່ດີ ໃນປີທ່ອງທ່ຽວລາວ-ຈີນ ປີ 2019 ຢ່າງກວ້າງຂວາງທົ່ວເຖິງ; ໂດຍສຸມໃສ່ຄົ້ນຄວ້າ ນໍາໃຊ້ທ່າແຮງບົ່ມຊ້ອນ ທີ່ປະເທດເຮົາມີ, ປັບປຸງ ແລະ ໂຄສະນາສະຖານທີ່ທ່ອງທ່ຽວ, ປັບ ປຸງການບໍລິການໃຫ້ສະດວກວ່ອງໄວ, ແກ້ໄຂສິ່ງອັດຕັນໃຫ້ໄດ້ ແລະ ປ້ອງກັນຄວາມສຽງດ້ານຕ່າງໆ ເພື່ອດຶງດູດນັກທ່ອງທ່ຽວໃນປີ 2019 ໃຫ້ໄດ້ດີກວ່າປີຜ່ານມາ. ໃນນີ້ໃຫ້ສ້າງເງື່ອນໄຂ ທີ່ອໍານວຍຄວາມສະດວກ ຮອບດ້ານ. ພ້ອມທັງ ອະນຸລັກຮັກສາວັດທະນະທໍາ, ຮີດຄອງປະເພນີອັນດີງາມຂອງລາວເຮົາ, ຝຶກອົບຮົມໃຫ້ພະນັກງານນໍາທ່ຽວ ໃຫ້ມີຄຸນນະພາບສູງກວ່າເກົ່າ ນັບທັງສະຖານທີ່ທ່ອງທ່ຽວ ທີ່ເປັນມູນມໍລະດົກແຫ່ງສໍາຄັນຕ່າງໆ ຂອງຊາດພວກເຮົາ ໃຫ້ຢູ່ໃນສະພາບທີ່ດີຕະຫຼອດໄປ. ສິ່ງສໍາຄັນແມ່ນໃຫ້ມີຄວາມສະອາດຈົບງາມ ໃຫ້ເປັນສະຖານ ທີ່ພັກຜ່ອນທີ່ສົດໃສ.
9. ມອບໃຫ້ຄະນະກຳມະການປ້ອງກັນ ແລະ ຄູ້ມຄອງໄພພິບັດແຫ່ງຊາດ ສະຫຼຸບລະອຽດໃນການໃຊ້ຈ່າຍງົບປະມານ ແລະ ບັນດາໜ້າວຽກທີ່ເຮັດສໍາເລັດໃນໄລຍະຜ່ານມາ ອັນໃດທີ່ສາມາດຈັດຕັ້ງປະຕິບັດໄດ້, ອັນໃດທີ່ຍັງບໍ່ທັນໄດ້ມີການຈັດຕັ້ງປະຕິບັດ ແລະ ວາງແຜນທິດທາງ ໃນການດຳເນີນຈັດຕັ້ງປະຕິບັດໃນຕໍ່ໜ້າ, ໃຫ້ວ່ອງໄວທັນ, ໂດຍໃຫ້ຄະນະກຳມະການປ້ອງກັນ ແລະ ຄຸ້ມຄອງໄພພິບັດແຫ່ງຊາດເອົາໃຈໃສ່ເປັນພິເສດ ໃນການແກ້ໄຂບັນຫາຕ່າງໆ ຢູ່ເມືອງສະໜາມໄຊ ທີ່ຖືກຜົນກະທົບຈາກໄພພິບັດ ເຂື່ອນເຊປຽນ-ເຊນ້ຳນ້ອຍແຕກພັງ ໃຫ້ເຂົ້າສູ່ລະບົບ ເປັນຕົ້ນ ຄົ້ນຄ້ວາປຶກສາຫາລືກັນໂດຍໄວ ກ່ຽວກັບການອອກແບບພັດທະນາພື້ນຖານໂຄງລ່າງ, ການຈັດສັນທີ່ຢູ່ອາໃສຖາວອນ, ການຈັດສັນອາຊີບໃຫ້ປະຊາຊົນ, ກໍລະນີຫາກມີຄວາມຈໍາເປັນ ກໍອາດເອົາກຳລັງທະຫານ ແລະ ກຳລັງຊາວໜຸ່ມຊ່ວຍຕື່ມ ພ້ອມນີ້ ກໍ່ໃຫ້ເຮັດວຽກງານແນວຄິດ ແລະ ສ້າງຄວາມອົບອຸ່ນທາງດ້ານຈິດໃຈ ໃຫ້ແກ່ປະຊາຊົນ.
10. ໃຫ້ຄະນະສະເພາະກິດ ຕາມຂໍ້ຕົກລົງເລກທີ 40/ນຍ ວ່າດ້ວຍການແຕ່ງຄະນະສະເພາະກິດ ເພື່ອລົງກວດກາ ແລະ ແນະນໍາການຈັດຕັ້ງປະຕິບັດຄໍາສັ່ງເລກທີ 15/ນຍໃນຂອບເຂດທົ່ວປະເທດ ສືບຕໍ່ປະຕິບັດໜ້າທີ່ຕາມການມອບໝາຍ ສືບຕໍ່ປະຕິບັດໜ້າທີ່ ຕາມການມອບໝາຍຂອງລັດຖະບານ ແລະ ເອົາໃຈໃສ່ ຕິດຕາມ, ກວດກາ ແລະ ຊອກຮູ້ຂໍ້ມູນລະອຽດ ກ່ຽວກັບການກະທໍາຜິດຂອງຜູ້ປະກອບການ ແລະ ພະນັກງານ-ເຈົ້າໜ້າທີ່ ທີ່ມີສ່ວນກ່ຽວຂ້ອງສົມຮູ້ຮ່ວມຄິດ ໃນການລັກລອບຕັດໄມ້-ທໍາລາຍປ່າໄມ້. ພ້ອມກັນນີ້, ກໍ່ໃຫ້ທັງປະຕິບັດວິໄນ ຕໍ່ຜູ້ກະທໍາຜິດ ຢ່າງເຂັ້ມງວດ ແລະ ມີການອອກຂ່າວໂດຍຜ່ານສື່ຕ່າງໆ ໃຫ້ປະຊາຊົນຮັບຮູ້ ແລະ ຊ່ວຍເປັນຫູເປັນຕາຊ່ວຍລັດຖະບານ. ມອບໃຫ້ຂະແໜງກະສິກໍາ ແລະ ປ່າໄມ້ ປະສານສົມທົບກັບຂະແໜງການທີ່ກ່ຽວຂ້ອງ ແລະ ອົງການປົກຄອງທ້ອງຖິ່ນ ກວດກາການປະຕິບັດຄໍາສັ່ງ ໃຫ້ຢຸດຕິການຂຸດຄົ້ນເຄື່ອງປ່າຂອງດົງ ໃນຂອບເຂດທົ່ວປະເທດ ຢ່າງຂາດຕົວ.
11. ໃຫ້ກະຊວງປ້ອງກັນປະເທດ ເປັນເຈົ້າການປະສານສົມທົບກັບພາກສ່ວນກ່ຽວຂ້ອງ ການກະກຽມ ແລະ ດໍາເນີນການສະເຫຼີມສະຫຼອງ ວັນສ້າງຕັ້ງກອງທັບປະຊາຊົນປະຕິວັດລາວ ຄົບຮອບ 70 ໃຫ້ມີເນື້ອໃນ ແລະ ບັນຍາກາດ ທີ່ຟົດຟຶ້ນ. ແຕ່ໃຫ້ເອົາໃຈໃສ່ ດໍາເນີນດ້ວຍຄວາມປະຢັດ, ໃຊ້ຈ່າຍຢ່າງສົມເຫດສົມຜົນ. ຫ້າມບໍ່ໃຫ້ມີການແຜ່ ແລະ ລະດົມເງິນ ຈາກພະນັກງານທະຫານ, ຕໍາຫຼວດ ແລະ ປະຊາຊົນ ເພື່ອໃຊ້ເຂົ້າໃນການສະເຫຼີມສະຫຼອງວັນສໍາຄັນດັ່ງກ່າວ ແລະ ເລີ່ມປີ 2019 ຕໍ່ໄປຫ້າມບໍ່ໃຫ້ອົງການໃດ ແລະ ທ້ອງຖິ່ນໃດຂອງລັດຈັດການແຜ່, ລະດົມເງິນຈາກສັງຄົມ ເພື່ອເອົາໄປໃຊ້ໃນກິດຈະກຳຂອງພັກຂອງລັດ ແລະ ການເຮັດບຸນ, ເຮັດທານຕ່າງໆຕື່ມອີກ. ຖ້າມີການລະເມີດ ຈະຖືວ່າເປັນການກະທໍາຜິດລະບຽບວິໄນ.
ໃນຕອນທ້າຍ, ກອງປະຊຸມ ໄດ້ຮຽກຮ້ອງໃຫ້ພະນັກງານ, ສະມາຊິກພັກ, ລັດຖະກອນ, ທະຫານ, ຕໍາຫຼວດ, ກໍາມະກອນ, ນັກຮຽນຮູ້-ປັນຍາຊົນ, ນັກທຸລະກິດ, ຜູ້ປະກອບການ ທັງພາກລັດ ແລະ ເອກະຊົນ, ປະຊາຊົນເຜົ່າຕ່າງໆ ຈົ່ງເພີ່ມທະວີຄວາມສາມັກຄີເປັນປຶກແຜ່ນ ພ້ອມກັນຈັດຕັ້ງປະຕິບັດສອງໜ້າທີ່ຍຸດທະສາດ ຄື: ປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ໝັ້ນຄົງເຂັ້ມແຂງ.

ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ