ຖະແຫຼງຂ່າວຂອງໂຄສົກລັດຖະບານ ກ່ຽວກັບຜົນກອງປະຊຸມລັດຖະບານເປີດກວ້າງ ຄັ້ງທີ II ປີ 2018

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພະຫັດ, 20 ກ.ຍ 2018 11:00

​​
     - ສື່ມວນຊົນທີ່ຮັກແພງ !
     - ປະຊາຊົນຊັ້ນຄົນ ແລະ ເຜົ່າຕ່າງໆທີ່ຮັກແພງ !

ດັ່ງທີ່ສື່ມວນຊົນໄດ້ອອກຂ່າວໄປແລ້ວ, ປະຕິບັດຕາມກົດໝາຍວ່າດ້ວຍລັດຖະບານ ແລະ ແຜນດໍາເນີນງານຂອງລັດຖະບານ ຊຸດທີ 8, ກອງປະຊຸມລັດຖະບານເປີດກວ້າງ ເທື່ອທີ່ 2 ປີ 2018 ໄດ້ເປີດຂຶ້ນໃນວັນທີ 17 ແລະ ປິດລົງໃນວັນທີ 18 ກັນຍາ 2018 ຢູ່ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ໂດຍມີບັນດາທ່ານຮອງນາຍົກລັດຖະ ມົນຕີ, ສະມາຊິກລັດຖະບານ, ເຈົ້າຄອງນະຄອນຫຼວງວຽງຈັນ, ເຈົ້າແຂວງທົ່ວປະເທດ, ຜູ້ຕາງໜ້າອົງການ ຈັດຕັ້ງພັກ, ສະພາແຫ່ງຊາດ, ສານປະຊາຊົນສູງສຸດ, ອົງການໄອຍະການປະຊາຊົນສູງສຸດ, ສູນກາງແນວລາວສ້າງຊາດ, ສະຫະພັນນັກຮົບເກົ່າແຫ່ງຊາດ, ອົງການຈັດຕັ້ງມະຫາຊົນຂັ້ນສູນກາງ ພ້ອມດ້ວຍແຂກຖືກເຊີນ ເຂົ້າຮ່ວມຢ່າງພ້ອມພຽງ. 
ກອງປະຊຸມລັດຖະບານເປີດກວ້າງ ຄັ້ງນີ້ ໄດ້ພ້ອມກັນສຸມໃສ່ພິຈາລະນາ ປະກອບຄໍາເຫັນເຂົ້າໃສ່ ເນື້ອໃນທີ່ສໍາຄັນ ດັ່ງນີ້:
     1. ສັງເກດຕີລາຄາສະພາບການແກ້ໄຂໄພພິບັດທໍາມະຊາດ ທີ່ເກີດຂຶ້ນທົ່ວປະເທດ ໃນມໍ່ໆນີ້. 
     2. ສະຫຼຸບຕີລາຄາການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ 8 ເດືອນຕົ້ນປີ, ຄາດຄະເນໝົດປີ 2018 ແລະ ທິດທາງແຜນປີ 2019.
     3. ສະຫຼຸບຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ກາງສະໄໝ ແລະ ກະກຽມສ້າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX.
     ກ່ຽວກັບສະພາບການແກ້ໄຂໄພພິບັດທໍາມະຊາດ:
    ກອງປະຊຸມ ໄດ້ຮັບຟັງການລາຍງານຂອງທ່ານ ຄໍາແພງ ໄຊສົມແພງ, ລັດຖະມົນຕີກະຊວງແຮງງານ, ສະຫວັດດີການສັງຄົມ, ປະທານຄະນະກໍາການປ້ອງກັນ ແລະ ຄວບຄຸມໄພພິບັດແຫ່ງຊາດ. ຫຼັງຈາກນັ້ນ ກອງປະຊຸມ ກໍໄດ້ປຶກສາຫາລື ແລະ ເປັນເອກະພາບ ກ່ຽວກັບທິດທາງໃນການແກ້ໄຂ ແລະ ຟື້ນຟູໄພພິບັດດັ່ງນີ້:
     1. ໃຫ້ຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດ ປັບປຸງຄືນບົດສະຫຼຸບຜົນເສຍຫາຍຈາກໄພພິບັດ ໃນທົ່ວປະເທດ ໃຫ້ແທດກັບຕົວຈິງ; ສ່ວນເມືອງສະໜາມໄຊ ແມ່ນໃຫ້ຄະນະປະເມີນຜົນເສຍຫາຍ ແລະ ຟື້ນຟູ ຮີບຮ້ອນປະເມີນຜົນເສຍຫາຍໃຫ້ສຳເລັດໂດຍໄວ, ຈາກນັ້ນ ໃຫ້ວາງທິດທາງແກ້ໄຂ ໃນສະເພາະໜ້າ ແລະ ຍາວນານ. ພ້ອມກັນນີ້. ໃຫ້ຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດ ລາຍງານຕົວເລກຜູ້ສູນຫາຍ ຢູ່ເມືອງສະໜາມໄຊ ຢ່າງເປັນທາງການ ເພື່ອໃຫ້ລັດຖະບານ ພິຈາລະນາຮັບຮອງ.
      2. ໃຫ້ບັນດາຂະແໜງການ ແລະ ທ້ອງຖິ່ນກະກຽມ ແລະ ສ້າງເງື່ອນໄຂເອື້ອອໍານວຍເພື່ອກຽມຜະລິດລະດູແລ້ງ ທົດແທນຜົນຫາຍ ຈາກໄພນໍ້າຖ້ວມ ໂດຍມອບໃຫ້: 
     - ກະຊວງການເງິນ ສົມທົບກັບກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ຄົ້ນຄວ້າກ່ຽວກັບການຜ່ອນຜັນ ຫລື ໂຈະການເກັບພາສີທີ່ດິນ ໃນເຂດທີ່ເກີດໄພພິບັດ.
     - ກະຊວງພະລັງງານ ແລະ ບໍ່ແຮ່ ຄົ້ນຄວ້າກ່ຽວກັບ ນະໂຍບາຍຫຼຸດຜ່ອນລາຄາກະແສໄຟຟ້າ ໃນການຜະລິດລະດູແລ້ງ ເພື່ອທົດແທນຕົ້ນທຶນຂອງການຜະລິດສິນຄ້າທົດແທນເຂດຖືກນ້ຳຖ້ວມ.
    - ກະຊວງການເງິນ ຄົ້ນຄວ້າກ່ຽວກັບ ການນຳໃຊ້ງົບປະມານສຸກເສີນ ເພື່ອແກ້ໄຂໄພພິບັດ ໃຫ້ມີປະສິດທິຜົນ ແລະ ທັນກັບສະພາບການ,  ພ້ອມທັງຄົ້ນຄວ້າ ນະໂຍບາຍ ຫຼຸດອັດຕາພາສີ, ອາກອນ ໃນການນຳເຂົ້າ ປັດໃຈການຜະລິດເຊັ່ນ: ຝຸ່ນ, ປຸ໋ຍ, ແນວພັນພືດ ແລະ ສັດ. 
     - ກະຊວງກະສິກຳ ແລະ ປ່າໄມ້ ຄົ້ນຄວ້າ ແລະ ກຽມສະໜັບສະໜູນ ແລະ ຊ່ວຍເຫຼືອພິເສດ ໃນເຂດໄດ້ຮັບຜົນກະທົບຈາກໄພພິບັດ ເປັນຕົ້ນແມ່ນ ການສະໜອງນໍ້າໃຫ້ແກ່ເຂດຜະລິດໃນລະດູແລ້ງ, ການສະ ໜັບສະໜູນ ທາງດ້ານສັດຕະວະແພດ, ການປາບປາມສັດຕູພືດ, ການໃຫ້ຄວາມຮູ້ທາງດ້ານເຕັກນິກວິຊາການ. ພ້ອມກັນນີ້, ກໍ່ໃຫ້ຄົ້ນຄວ້າກຳນົດເງື່ອນໄຂລະອຽດ ເພື່ອເປັນປັດໃຈກະຕຸກຊຸກຍູ້ ໃນການເຮັດນາແຊງ, ປູກພືດ ແລະ ລ້ຽງສັດ ເພື່ອໃຫ້ການຊຸກຍູ້ ແລະ ສະໜັບສະໜູນ ໃນແຕ່ລະດ້ານ, ພ້ອມທັງຄົ້ນຄວ້າກ່ຽວກັບງົບປະມານ ທີ່ຈະນຳໃຊ້ເຂົ້າໃນບັນດາວຽກງານດັ່ງກ່າວ ເພື່ອສະເໜີຄວາມຕ້ອງການຢ່າງລະອຽດຈະແຈ້ງ.
     3. ໃຫ້ກະຊວງໂຍທາທິການ ແລະ ຂົນສົ່ງ ຮີບຮ້ອນກວດກາ, ປະເມີນ ແລະ ແກ້ໄຂບັນຫາການຄົມມະນາຄົມ, ຂົນສົ່ງ ໃຫ້ໄວ, ທັນກັບສະພາບການ ຮັບປະກັນບໍ່ໃຫ້ເສັ້ນທາງຫຼວງແຫ່ງຊາດ ຖືກຕັດຂາດ. ການແກ້ໄຂສຸກເສີນ ຕ້ອງບົນພື້ນຖານການປະຢັດ ແລະ ສົມເຫດສົມຜົນ, ລະດົມທຸກກຳລັງແຮງຂອງສັງຄົມ ແລະ ປະຊາຊົນ ມີສ່ວນຮ່ວມໃນການແກ້ໄຂ ໃຫ້ສາມາດສັນຈອນໄປ-ມາໄດ້ ສະດວກ ໃນສະເພາະໜ້າ. ຈາກນັ້ນ, ຈຶ່ງຄົ້ນຄວ້າໃນການສ້າງແຜນແກ້ໄຂຍາວນານ ໃຫ້ສອດຄອ່ງກັບຄວາມອາດສາມາດທາງດ້ານງົບປະມານ ແລະ ສະພາບການຕົວຈິງຕໍ່ໄປ.
     4. ໃຫ້ກະຊວງແຜນການ ແລະ ການລົງທຶນ, ກະຊວງການເງິນ ແລະ ກະຊວງໂຍທາທິການ ແລະ ຂົນສົ່ງ ປະສານສົມທົບ ວາງແຜນຈັດສັນງົບປະມານ ບູລິມະສິດ ສຸມໃສ່ຊຳລະໃຫ້ບໍລິສັດ ແກ້ໄຂສຸກເສີນ ບັນດາເສັ້ນທາງ ໃນແຂວງຕ່າງໆ ທີ່ເກີດອຸທົກກະໄພ ໃນປີ 2018-2019. ພ້ອມກັນນັ້ນ, ກໍ່ໃຫ້ຄົ້ນຄວ້າຊອກຫາງົບປະມານ ເພື່ອແກ້ໄຂໜີ້ສິນຄ້າງຊໍາລະ ແຕ່ປີ 2010 ຈົນຮອດປະຈຸບັນ, ໃນນັ້ນ ໃຫ້ກວດກາຄືນການໄລ່ລຽງມູນຄ່າຂອງບັນດາໂຄງການຕ່າງໆ ທີ່ໄດ້ຮັບການຈັດຕັ້ງປະຕິບັດໃຫ້ຖືກຕ້ອງກັບຄວາມເປັນຈິງ ພ້ອມທັງປ້ອງກັນບໍ່ໃຫ້ມີໂຄງການນອກແຜນ ແລະ ຮັບປະກັນການສ້ອມແປງ ໃຫ້ໄດ້ຄຸນນະພາບຕາມມາດຕະຖານ-ເຕັກນິກ. ພ້ອມກັນນີ້ ກໍໃຫ້ບັນດາກະຊວງ ລົງສົມທົບກັບ ແຂວງຕ່າງໆ ເພື່ອຮ່ວມກັນຄົ້ນຄວ້າ ແລະ ກໍານົດຄວາມຮັບຜິດຊອບ ອັນໃດຈະມອບໃຫ້ແຂວງແກ້ໄຂ, ອັນໃດແມ່ນຄວາມຮັບຜິດຊອບຂອງກະຊວງກ່ຽວຂ້ອງ. 
      5. ໃຫ້ກະຊວງການເງິນ ແລະ ທະນາຄານແຫ່ງ ສປປ ລາວ ປຶກສາຫາລືກັນລະອຽດ ກ່ຽວກັບການປັບປຸງກອງທຶນ SMEs, ທະນາຄານສົ່ງເສີມກະສິກຳ ແລະ ທະນາຄານພັດທະນາລາວ ເພື່ອສ້າງເງື່ອນໄຂໃຫ້ກອງທຶນ ແລະ ສະຖາບັນການເງິນດັ່ງກ່າວ ໃຫ້ມີຄວາມສາມາດສະໜອງສິນເຊື່ອ ໃນໄລຍະເກີດ ແລະ ການຟື້ນຟູອຸທົກກະໄພ, ແນໃສ່ຖືເອົາວິກິດການດັ່ງກ່າວ ເປັນການປັບປຸງປ່ຽນແປງ ໂດຍໃຫ້ເຮັດເປັນແຜນລະອຽດສະເໜີລັດຖະບານ. 
     6. ໃຫ້ກະຊວງສຶກສາທິການ ແລະ ກິລາ ເອົາໃຈໃສ່ກວດກາ ແລະ ຊຸກຍູ້ຊ່ວຍເຫຼືອບັນດາໂຮງຮຽນ ທີ່ໄດ້ຮັບຜົນກະທົບໃນຊ່ວງເວລານໍ້າຖ້ວມ ໃຫ້ສາມາດສືບຕໍ່ການຮຽນ-ການສອນ ໃຫ້ເປັນປົກກະຕິ ແລະ ທັນກັບແຜນສົກຮຽນ. 
     7. ໃຫ້ກະຊວງສາທາລະນະສຸກ ເອົາໃຈໃສ່ກວດກາ ການລະບາດຂອງພະຍາດ ທີ່ອາດຈະເກີດຂຶ້ນຫຼັງນ້ຳຖ້ວມ, ເດັດຂາດບໍ່ໃຫ້ເກີດມີພະຍາດລະບາດຮ້າຍແຮງເກີດຂຶ້ນ ອັນຈະສົ່ງຜົນກະທົບເພີ່ມເຕີມ ຕໍ່ການພັດທະນາເສດຖະກິດ-ສັງຄົມ, ການທ່ອງທ່ຽວ ແລະ ຄວາມເຊື່ອໝັ້ນຂອງສາກົນ ຕໍ່ກັບປະເທດເຮົາ.
     8. ກະຊວງພະລັງງານ ແລະ ບໍ່ແຮ່ ເອົາໃຈໃສ່ຕິດຕາມການບໍລິຫານນ້ຳ, ຈັດການນ້ຳ ຢູ່ເຂື່ອນຕ່າງໆ, ໂດຍໃຫ້ຈັດເວນຍາມຕະຫຼອດ 24 ຊົ່ວໂມງ. ສຳລັບບັນດາເຂື່ອນ ທີ່ມີຄວາມຫຼໍ່ແຫຼມ ແມ່ນຕ້ອງເຝົ້າລະວັງ ກໍລະນີມີສະພາບພົ້ນເດັ່ນ ກໍໃຫ້ຮີບຮ້ອນລາຍງານ ແລະ ແກ້ໄຂໃຫ້ທັນກັບສະພາບການ.
     9. ໃຫ້ບັນດາແຂວງ ໃຫ້ຢຸດຕິການອະນຸມັດການພັດທະນາເຂື່ອນໄຟຟ້າຂະໜາດນ້ອຍໄວ້ກ່ອນ. ສ່ວນໂຄງການທີ່ໄດ້ຮັບອະນຸຍາດໃຫ້ເລີ່ມກໍ່ສ້າງຜ່ານມາ ກໍ່ໃຫ້ກວດກາຄືນການສໍາຫລວດ, ອອກແບບ ແລະ ກໍ່ສ້າງ ເພື່ອປ້ອງກັນບໍ່ໃຫ້ເກີດໄພພິບັດຂຶ້ນອີກ. ຫາກໂຄງການໃດບໍ່ຮັບປະກັນທາງດ້ານເຕັກນິກ, ກໍ່ໃຫ້ໂຈະການກໍ່ສ້າງທັນທີ.  
(ລາຍລະອຽດຈະໄດ້ມີການຖະແຫຼງສະເພາະ ໃນວັນທີ 19 ກັນຍາ 2018)
     ສຳລັບການສະຫຼຸບການຈັດຕັ້ງປະຕິບັດ ແຜນພັດທະນາເສດຖະກິດສັງຄົມ ແລະ ແຜນງົບປະມານແຫ່ງລັດ 8 ເດືອນຕົ້ນປີ ແລະ ໝົດປີ 2018; ການສະຫຼຸບຕີລາຄາການຈັດຕັ້ງປະຕິບັດ ແຜນພັດທະ ນາເສດຖະກິດ-ສັງຄົມແຫ່ງຊາດ 5 ປີ ກາງສະໄໝ ແລະການພັດທະນາເສດຖະກິດ-ສັງຄົມ 5 ປີ ຄັ້ງທີ IX ນັ້ນ, ກອງປະຊຸມກໍ່ໄດ້ສະຫຼູບຕີລາຄາວ່າ: ເຖິງວ່າການຈັດຕັ້ງປະຕິບັດຕົວເລກຄາດໝາຍຕ່າງໆອາດຈະບໍ່ບັນ ລຸຕາມຄາດໝາຍທີ່ກຳນົດໄວ້, ແຕ່ໂດຍລວມເສດຖະກິດມະພາພາກຂອງພວກເຮົາ ຍັງຢູ່ໃນທ່າຂະຫຍາຍ ຕົວ, ປະເທດຊາດ ຍັງມີສະຖຽນລະພາບການເມືອງດີ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ.
     ທ້າຍສຸດນີ້ີ, ຂ້າພະເຈົ້າ ໃນນາມໂຄສົກລັດຖະບານ  ຂໍຮຽກຮ້ອງມາຍັງພະນັກງານ, ສະມາ ຊິກພັກ, ລັດຖະກອນ, ກໍາມະກອນ, ນັກຮຽນຮູ້ປັນຍາຊົນ, ປະຊາຊົນບັນດາເຜົ່າ, ຊັ້ນຄົນຕ່າງໆ, ຊາວຕ່າງດ້າວຜູ້ບໍ່ມີສັນຊາດ ທີ່ດຳລົງຊີວິດຢູ່ລາວ, ນັກທຸລະກິດ ພາກລັດ ແລະ ເອກະຊົນ ລວມທັງ ນັກທຸລະກິດຕ່າງປະເທດ ທີ່ມາລົງທຶນຢູ່ລາວ ຈົ່ງພ້ອມກັນເຊີດຊູນໍ້າໃຈເປັນເຈົ້າປະເທດຊາດ, ສາມັກຄີເປັນຈິດໜຶ່ງໃຈດຽວ, ເດັດ ດ່ຽວຜ່ານຜ່າອຸປະສັກຕ່າງໆ, ສູ້ຊົນເຂົ້າຮ່ວມຈັດຕັ້ງປະຕິບັດວຽກງານສໍາຄັນຕ່າງໆ ທີ່ລັດຖະບານວາງອອກໃຫ້ປະກົດຜົນເປັນຈິງ ເພື່ອຜົນປະໂຫຍດຂອງຊາດ, ຂອງປະຊາຊົນ ແລະ ຂອງພວກເຮົາໝົດທຸກຄົນ. ພ້ອມກັນນີ້, ໃຫ້ຍົກສູງສະຕິລະວັງຕົວ ຕໍ່ຜູ້ບໍ່ຫວັງດີ, ເພີ່ມທະວີຄວາມສາມັກຄີ ເປັນຈິດໜຶ່ງໃຈດຽວ, ເດັດດ່ຽວຕ້ານກົນອຸບາຍໂດຍສັນຕິ ຂອງອິດທິກໍາລັງປໍລະປັກ ໃນທຸກຮູບແບບ, ບໍ່ຖືກກົນອຸບາຍແບ່ງແຍກ, ຍຸແຍ່ໃສ່ຮ້າຍປ້າຍສີຂອງພວກຄົນບໍ່ດີ ຢູ່ພາຍໃນ ແລະ ຕ່າງປະເທດ ໂດຍຜ່ານຮູບແບບຕ່າງໆ. 

ຂໍຂອບໃຈ


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ
ຂ່າວອື່ນໆ