ຜົນຂອງກອງປະຊຸມລັດຖະບານສະໄໝສາມັນ ປະຈໍາເດືອນ ສິງຫາ 2018

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນສຸກ, 24 ສ.ຫ 2018 14:00

​​​​​​​

        - ປະຊາຊົນລາວບັນດາເຜົ່າ ທີ່ນັບຖື ແລະ ຮັກແພງ.
- ບັນດາສື່ມວນຊົນທັງຫຼາຍ.

ຂ້າພະເຈົ້າ ຕາງໜ້າໃຫ້ລັດຖະບານ ຂໍສະເໜີຜົນຂອງກອງປະຊຸມລັດຖະບານສະໄໝສາມັນ ປະຈໍາເດືອນ ສິງຫາ 2018, ເຊິ່ງກອງປະຊຸມ ໄດ້ຈັ້ດຂຶ້ນ ໃນຕອນເຊົ້າວັນທີ 22 ແລະ ປິດລົງໃນວັນທີ 23 ສິງຫາ 2018 ໂດຍການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ.
I. ກອງປະຊຸມ ໄດ້ສັງເກດຕີລາຄາ ກ່ຽວກັບສະພາບການຕ້ານໄພນໍ້າຖ້ວມ ໃນທົ່ວປະເທດ, ເປັນຕົ້ນແມ່ນ ການແກ້ໄຂໄພພິບັດ ຢູ່ເມືອງສະໜາມໄຊ, ແຂວງອັດຕະປື.
ກອງປະຊຸມ ໄດ້ສັງເກດຕີລາຄາວ່າ ແຕ່ກາງເດືອນ ກໍລະກົດ ເຖິງກາງເດືອນ ສິງຫາ 2018 ພະຍຸເຊີນຕີນ ແລະ ເບປິນກາ ໄດ້ພັດຜ່ານເຂົ້າ ສປປ ລາວ ໄດ້ເຮັດໃຫ້ຫຼາຍແຂວງເກີດໄພນໍ້າຖ້ວມ ແລະ ດິນເຈື່ອນ ສົ່ງຜົນກະທົບໂດຍກົງຕໍ່ປະຊາຊົນ ຢູ່ໃນ 14 ແຂວງ ແລະ ນະຄອນຫຼວງວຽງຈັນ, 80 ເມືອງ, 1.438 ບ້ານ, ໄດ້ສ້າງຄວາມເສຍຫາຍຕໍ່ພື້ນຖານໂຄງລ່າງ ເສດຖະກິດ-ສັງຄົມ ເປັນຕົ້ນ ເສັ້ນທາງ, ຂົວ, ພື້ນທີ່ການຜະລິດກະສິກໍາ, ແຫຼ່ງນໍ້າກິນ ນໍ້າໃຊ້, ໂຮງຮຽນ, ໂຮງໝໍ, ໄຟຟ້າ...ສໍາລັບມູນຄ່າຄວາມເສຍຫາຍທັງໝົດ ແມ່ນຍັງຢູ່ໃນໄລຍະເກັບກໍາຂໍ້ມູນ ຈິ່ງຍັງບໍ່ທັນສາມາດປະເມີນຜົນໄດ້ເທື່ອ. ຮ້າຍແຮງກວ່າໝູ່ ແມ່ນກໍລະນີໄພພິບັດຄູກັນນໍ້າຂອງສັນເຂື່ອນ ໄຟຟ້າເຊປຽນ-ເຊນໍ້ານ້ອຍແຕກ ຢູ່ເມືອງສະໜາມໄຊ, ແຂວງອັດຕະປື ເຊິ່ງໄດ້ກໍ່ຄວາມເສຍຫາຍຢ່າງໃຫຍ່ຫຼວງ ໜັກໜ່ວງ ຕໍ່ປະຊາຊົນ ໃນເຂດດັ່ງກ່າວ.
ຕໍ່ບັນຫາດັ່ງກ່າວ, ກອງປະຊຸມ ໄດ້ຊີ້ນໍາໃຫ້ທຸກກະຊວງ, ອົງການ ແລະ ອໍານາດການປົກຄອງທ້ອງ ຖິ່ນທຸກຂັ້ນ ຕ້ອງເພີ່ມທະວີຄວາມຮັບຜິດຊອບ ແລະ ເປັນເຈົ້າການແກ້ໄຂດັ່ງນີ້:
1. ສໍາລັບການແກ້ໄຂບັນຫາໄພພິບັດທີ່ເມືອງສະໜາມໄຊ, ແຂວງອັດຕະປື ແມ່ນໃຫ້ຄະນະສະ ເພາະກິດເພື່ອແກ້ໄຂໄພພິບັດລະດັບຊາດ ເອົາໃຈໃສ່ໃນການປັບປຸງວຽກງານບໍລິຫານ, ຈັດການ, ໃຫ້ແຕ່ງຕັ້ງພະນັກງານຈາກຂະແໜງການທີ່ກ່ຽວຂ້ອງ ລົງໄປປະຈໍາຢູ່ພາກສະໜາມເປັນແຕ່ລະມື້ ເພື່ອແກ້ໄຂບັນຫາຕ່າງໆໃຫ້ທັນການ ໂດຍແບ່ງຄວາມຮັບຜິດຊອບຢ່າງຈະແຈ້ງ, ສ່ວນບັນຫາໃດທີ່ແກ້ໄຂບໍ່ໄດ້ ແມ່ນໃຫ້ຄົ້ນ ຄວ້າປຶກສາຫາລື ແລະ ຕົກລົງກັນຈັດຕັ້ງປະຕິບັດ ຢ່າງເປັນເອກະພາບ. ສິ່ງສໍາຄັນ ຕ້ອງມີລະບົບການລາຍງານຂັ້ນເທິງ ກໍ່ຄື ລັດຖະບານ ຢ່າງເປັນປົກກະຕິ. ສໍາລັບການນໍາໃຊ້ເງິນ ແລະ ເຄື່ອງຊ່ວຍເຫຼືອຕ່າງໆນັ້ນ, ຕ້ອງຮັບປະກັນໃຫ້ຖືກຕ້ອງ ແລະ ໄປເຖິງເປົ້າໝາຍ, ມີຄວາມໂປ່ງໃສ, ສາມາດກວດສອບໄດ້. ພ້ອມດຽວກັນນັ້ນ, ໃຫ້ສຸມທຸກກໍາລັງເຂົ້າໃສ່ການສ້າງທີ່ຢູ່ອາໄສ ຂອງປະຊາຊົນທີ່ໄດ້ຮັບຜົນກະທົບ ໃຫ້ສໍາເລັດໂດຍໄວ ເພາະໄລຍະນີ້ແມ່ນ ລະດູຝົນ; ຕໍ່ບັນຫາອຸທົກກະໄພຄູກັນນໍ້າເຊປຽນ-ເຊນໍ້ານ້ອຍແຕກ ໃນຄັ້ງນີ້ ດ້ວຍຄວາມເປັນຫ່ວງເປັນໃຍຂອງລັດຖະບານ ຈຶ່ງໄດ້ແຕ່ງຕັ້ງຄະນະສືບສວນ-ສອບສວນຂຶ້ນ ໂດຍໄດ້ສົມທົບກັບຄະນະຊ່ຽວຊານຈາກສາກົນ ເພື່ອສຶກສາ, ຄົ້ນຄວ້າ ແລະ ເກັບກໍາຂໍ້ມູນຕ່າງໆ ຫາສາຍເຫດຂອງການແຕກຫັກ ຢ່າງພາວະວິໄສ ຖືກຕ້ອງກັບຄວາມເປັນຈິງ.
2. ສໍາລັບການແກ້ໄຂໄພນໍ້າຖ້ວມ ທີ່ເກີດຂຶ້ນໃນທົ່ວປະເທດ, ກ່ອນອື່ນໝົດ ຮັບປະກັນຄວາມປອດໄພທາງດ້ານຊີວິດ ແລະ ຊັບສິນຂອງປະຊາຊົນ ຖືເອົາເປັນວຽກບູລິມະສິດ ໃນການເຄື່ອນຍ້າຍ ແລະ ອົບພະຍົບປະຊາຊົນ ບ່ອນຖືກນໍ້າຖ້ວມ ມາຢູ່ບ່ອນທີ່ປອດໄພ ເພື່ອຫຼີກລ້ຽງການເສຍຊີວິດ ແລະ ເສຍຫາຍຊັບສິນ. ພາຍຫຼັງນໍ້າລົງແລ້ວ ຕ້ອງມີການວາງແຜນລະອຽດ, ຊັດເຈນ ຟື້ນຟູການຜະລິດ ແລະ ຊີວິດການເປັນຢູ່ຂອງປະຊາຊົນ ໃຫ້ກັບມາເປັນປົກກະຕິໂດຍໄວ; ເອົາໃຈໃສ່ ໃນການແຈກຢາຍເຄື່ອງຊ່ວຍເຫຼືອບັນເທົາທຸກ ໃຫ້ໄປເຖິງປະຊາຊົນຢ່າງແທ້ຈິງ ແລະ ທັນການ. ພ້ອມດຽວກັນນັ້ນ, ຕ້ອງເດັດດ່ຽວ ບໍ່ໃຫ້ສວຍໂອກາດ ນໍາເຄື່ອງທີ່ຫຼົບຫຼີກພາສີ ມາປົນເປກັບເຄື່ອງຊ່ວຍເຫຼືອ;
ໃນໂອກາດນີ້, ລັດຖະບານ ແຫ່ງ ສປປ ລາວ ຂໍສະແດງຄວາມຮູ້ບຸນຄຸນເປັນຢ່າງຍິ່ງ ແລະ ຂອບໃຈຢ່າງຈິງໃຈ ໄປຍັງບັນດາປະເທດເພື່ອນມິດ, ອົງການຈັດຕັ້ງສາກົນ, ອົງການຈັດຕັ້ງທາງສັງຄົມ, ມູນນິທິຕ່າງໆ ແລະ ປະຊາຊົນ ບັນດາປະເທດເພື່ອນມິດ ທີ່ໄດ້ສະໜັບສະໜູນ ຊ່ວຍເຫຼືອທາງດ້ານຈິດໃຈ, ການເງິນ, ວັດຖຸສິ່ງຂອງ ແລະ ກໍາລັງຄົນ ໃຫ້ແກ່ປະຊາຊົນທີ່ຖືກໄພພິບັດຢູ່ເມືອງສະໜາມໄຊ, ແຂວງອັດຕະປື. ພິເສດ ລັດຖະບານ ຂໍສະແດງຄວາມຍ້ອງຍໍຊົມເຊີຍ ຕໍ່ກໍາລັງປະກອບອາວຸດ ທັງສູນກາງ ແລະ ທ້ອງຖິ່ນ ທີ່ໄດ້ເປັນເຈົ້າການເຂົ້າຮ່ວມແກ້ໄຂ ໄພພິບັດຢູ່ເມືອງ ສະໜາມໄຊ, ຊົມເຊີຍບັນດາອົງການຈັດຕັ້ງ ທັງພາກລັດ ແລະ ເອກະຊົນ ລວມທັງ ປະຊາຊົນລາວບັນດາເຜົ່າທົ່ວປະເທດ ທີ່ໄດ້ມີຄວາມເປັນຫ່ວງເປັນໄຍ, ປຸ້ມລຸມຄວາມສາມັກຄີ ແລະ ສຸມທຸກກໍາລັງ ບໍ່ວ່າຈະເປັນເຫື່ອແຮງ ແລະ ເຄື່ອງຊ່ວຍເຫຼືອຕ່າງໆ ເພື່ອຊ່ວຍເຫຼືອປະຊາຊົນ ຜູ້ທີ່ຖືກຜົນກະທົບ ຢູ່ເມືອງສະໜາມໄຊ, ແຂວງອັດຕະປື ກໍ່ຄື ທົ່ວປະເທດ. ຊົມເຊີຍສື່ມວນຊົນ ທັງພາກລັດ ແລະ ເອກະຊົນ ພາຍໃນ ແລະ ຕ່າງປະເທດ ທີ່ໄດ້ອອກຂ່າວຢ່າງທັນເວລາ ຖືກກັບເຫດການຄວາມເປັນຈິງ ໃນການແກ້ໄຂໄພພິບັດຢູ່ ເມືອງສະໜາມໄຊ, ແຂວງອັດຕະປື.
II. ກອງປະຊຸມ ໄດ້ສັງເກດຕີລາຄາການຈັດຕັ້ງປະຕິບັດ ວຽກງານຈຸດສຸມໃນເດືອນ ສິງຫາ 2018 ດັ່ງນີ້:
1. ລັດຖະບານ ໄດ້ຕິດຕາມຢ່າງຈົດຈໍ່, ຊີ້ນໍາຢ່າງໃກ້ສິດ ແລະ ລະດົມທຸກກໍາລັງແຮງທົ່ວສັງຄົມ ໃນການແກ້ໄຂບັນຫາໄພພິບັດຢູ່ແຂວງອັດຕະປື ໂດຍສະເພາະເມືອງສະໜາມໄຊ ແລະ ຕ້ານໄພນໍ້າຖ້ວມໃນຂອບເຂດທົ່ວປະເທດ, ພ້ອມກັນນີ້, ກໍ່ໄດ້ສືບຕໍ່ເອົາໃຈໃສ່ ວຽກງານພັດທະນາເສດຖະກິດ-ສັງຄົມ, ຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ ເຮັດໃຫ້ສະພາບໂດຍລວມເປັນປົກກະຕິ ຢ່າງຕໍ່ເນື່ອງ.
2. ພາຍໃຕ້ການເປັນປະທານຂອງທ່ານນາຍົກລັດຖະມົນຕີ ລັດຖະບານ ໄດ້ຈັດຕັ້ງສໍາມະນາລະດົມຄວາມເຫັນ ກ່ຽວກັບການສ້າງແຜນງົບປະມານແຫ່ງລັດ ປີ 2019 ໃຫ້ແທດກັບຕົວຈິງ, ໄດ້ຕີລາຄາຢ່າງເລິກເຊິ່ງ ສະພາວະຄວາມເປັນຈິງ ໃນການສ້າງແຜນງົບປະມານແຫ່ງລັດ ໄລຍະທີ່ຜ່ານມາ ຈາກນັ້ນ ໄດ້ເປັນເອກະພາບສູງ ການສ້າງແຜນງົບປະມານປີ 2019 ນີ້ ຕ້ອງຄາດຄະເນລາຍຮັບງົບປະມານ ຈາກຖານລາຍຮັບທີ່ມີຕົວຕົນ, ຈໍາກັດລາຍຈ່າຍທີ່ບໍ່ຈໍາເປັນ ແລະ ບໍ່ອະນຸຍາດ ໃຫ້ສ້າງໂຄງການທີ່ບໍ່ມີງົບປະມານຮອງຮັບ.
3. ໄດ້ດໍາເນີນກອງປະຊຸມນາຍົກ-ຮອງນາຍົກລັດຖະມົນຕີ ເພື່ອພິຈາລະນາຫຼາຍບັນຫາທີ່ສໍາຄັນ ເປັນຕົ້ນແມ່ນ: ການອອກວິຊາແບບອອນລາຍ; ການຄຸ້ມຄອງການຍົກຍ້າຍຕັ້ງພູມລໍາເນົາ ຕາມລໍາພັງໃຈ ແລະ ການສ້າງຄອບຄົວບໍ່ຖືກກົດໝາຍ ແລະ ລະບຽບການ; ການສະເໜີຂໍສືບຕໍ່ກິດຈະການ ໂຮງງານຜະລິດແຮ່ຫາຍາກ ຢູ່ເຂດນິຄົມອຸດສາຫະກໍາ ຫຼັກ 21; ການແກ້ໄຂໜີ້ສິນບ້ວງໄພພິບັດໃນໄລຍະຜ່ານມາ ແລະ ທິດທາງການແກ້ໄຂຜົນກະທົບຈາກໄພທໍາມະຊາດ ຕາມເສັ້ນທາງຫຼວງແຫ່ງຊາດ ແລະ ບັນຫາອື່ນໆ.
4. ລັດຖະບານ ໄດ້ພິຈາລະນາ ແລະ ອອກນິຕິກໍາໃຕ້ກົດໝາຍ ຈໍານວນໜຶ່ງ ເປັນຕົ້ນແມ່ນ ຂໍ້ຕົກລົງ ວ່າດ້ວຍການແຕ່ງຕັ້ງຄະນະສະເພາະກິດ ແກ້ໄຂໄພພິບັດລະດັບຊາດ; ແຕ່ງຕັ້ງຄະນະກໍາມະການອໍານວຍຄວາມສະດວກ ທາງດ້ານການຄ້າ; ແຕ່ງຕັ້ງຄະນະສືບສວນ-ສອບສວນ ສາເຫດຂອງຄູກັນນໍ້າຂອງເຂື່ອນໄຟ ຟ້າເຊປ່ຽນ-ເຊນໍ້ານ້ອຍແຕກພັງ; ແຕ່ງຕັ້ງຄະນະກວດກາຄວາມຮັບຜິດຊອບ ຂອງບຸກຄົນ ທີ່ຕິດພັນກັບ ສາເຫດຂອງຄູກັນນໍ້າຂອງເຂື່ອນໄຟຟ້າ ເຊປ່ຽນ-ເຊນໍ້ານ້ອຍ ແຕກພັງ; ແຕ່ງຕັ້ງຄະນະກໍາມະການແຫ່ງຊາດ ເພື່ອຄຸ້ມຄອງອາຫານ ແລະ ຢາ; ແຕ່ງຕັ້ງຄະນະຊີ້ນໍາລະດັບຊາດ ໂຄງການ ຮ່ວມມືຄົ້ນຄວ້າດ້ານນະໂຍບາຍ ກ່ຽວກັບການສ້າງສະຖຽນລະພາບ ດ້ານການເງິນ ໃນ ສປປ ລາວ ແລະ ແກ້ໄຂຄໍາສະເໜີ ຂອງບັນດາຂະແໜງການ, ທ້ອງຖິ່ນ, ນິຕິບຸກຄົນ ແລະ ບຸກຄົນ ເຊິ່ງໄດ້ອອກເປັນແຈ້ງການທັງໝົດ 295 ສະບັບ.
ທັງໝົດເຫຼົ່ານັ້ນ, ໄດ້ສືບຕໍ່ເຮັດໃຫ້ປະເທດຊາດ ມີສະຖຽນລະພາບທາງດ້ານເມືອງ, ເສດຖະກິດ-ສັງຄົມ ໄດ້ຮັບການພັດທະນາຢ່າງຕໍ່ເນື່ອງ, ສັງຄົມມີຄວາມສະຫງົບໂດຍພື້ນຖານ, ຊີວິດການເປັນຢູ່ຂອງປະຊາຊົນບັນດາເຜົ່າ ເປັນຕົ້ນ: ບ່ອນຖືກໄພພິບັດ ໄດ້ຮັບການປົວແປງຟື້ນຟູ.
III. ກອງປະຊຸມ ໄດ້ພິຈາລະນາ ແລະ ເຫັນດີດ້ານຫຼັກການຮັບຮອງ ເອົາຮ່າງກົດໝາຍສ້າງໃໝ່ ແລະ ປັບປຸງຈໍານວນ 05 ສະບັບ; ຮ່າງດໍາລັດ ຈໍານວນ 02 ສະບັບ ຄື:
1). ຮ່າງກົດໝາຍ ວ່າດ້ວຍລາຍເຊັນເອເລັກໂຕນິກ;
2). ຮ່າງກົດໝາຍ ວ່າດ້ວຍປະກັນສຸຂະພາບ;
3). ຮ່າງກົດໝາຍ ວ່າດ້ວຍການລົດໄຟ;
4). ຮ່າງກົດໝາຍ ວ່າດ້ວຍທະນາຄານທຸລະກິດ;
5). ຮ່າງປະມວນກົດໝາຍແພ່ງ;
6). ດຳລັດ ວ່າດ້ວຍການຄຸ້ມຄອງ ແລະ ນໍາໃຊ້ຕາປະທັບ;
7). ດໍາລັດ ວ່າດ້ວຍການຄຸ້ມຄອງດ່ານຊາຍແດນ.
ຕໍ່ບັນດານິຕິກໍາດັ່ງກ່າວ, ກອງປະຊຸມ ໄດ້ຊີ້ນໍາໃຫ້ພາກສ່ວນທີ່ກ່ຽວຂ້ອງ ນໍາໄປປັບປຸງຕາມການປະກອບຄໍາເຫັນ ຂອງສະມາຊິກລັດຖະບານ ໃຫ້ມີເນື້ອໃນ ຈະແຈ້ງ, ສອດຄ່ອງ, ກົມກຽວ ແລະ ຮັດກຸມ ເພື່ອໃຫ້ທັນນໍາສະເໜີ ຕໍ່ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ 8.
IV. ກອງປະຊຸມ ໄດ້ເປັນເອກະພາບສູງ ແລະ ຕັດສິນໃຈ ພ້ອມກັນຈັດຕັ້ງປະຕິບັດວຽກຈຸດສຸມ ໃນເດືອນກັນຍາ 2018 ດັ່ງນີ້:
1. ໃຫ້ອົງການນໍາທຸກໆກະຊວງ, ອົງການທຽບເທົ່າກະຊວງ ແລະ ທຸກແຂວງ, ນະຄອນຫຼວງ ໃນທົ່ວປະເທດ ຈົ່ງເພີ່ມທະວີຄວາມຮັບຜິດຊອບ ຕໍ່ການຈັດຕັ້ງປະຕິບັດ ຄຳສັ່ງຂອງຄະນະເລຂາທິ ການສູນກາງພັກ ສະບັບເລກທີ 06/ຄລສມ, ລົງວັນທີ 16 ສິງຫາ 2018 ກ່ຽວກັບການນໍາພາ-ຊີ້ນຳການປ້ອງກັນ ແລະ ຮັບມືໄພພິບັດທຳມະຊາດ ໃຫ້ເກີດດອກອອກຜົນເປັນຈິງ; ລັດຖະບານ ມອບໃຫ້ຄະນະສະເພາະກິດ ແກ້ໄຂໄພພິບັດລະດັບຊາດ ສົມທົບ ກັບທຸກພາກສ່ວນທີ່ກ່ຽວຂ້ອງ ເອົາໃຈໃສ່ການຄຸ້ມຄອງ, ການບໍລິຫານ-ຈັດການແກ້ໄຂໄພພິບັດ, ຊ່ວຍເຫຼືອປະຊາຊົນ, ຟື້ນຟູຊີວິດການເປັນຂອງປະຊາຊົນ ແລະ ຄຸ້ມຄອງ-ນໍາໃຊ້ເຄື່ອງບັນເທົາທຸກ, ອຸປະກອນ ແລະ ງົບປະມານຢ່າງມີປະສິດທິພາບ, ປະສິດທິຜົນ, ທົ່ວເຖິງ ແລະ ໂປ່ງໃສ, ຖືກຕ້ອງຕາມຈິດໃຈຊີ້ນໍາ ຂອງກອງປະຊຸມລັດຖະບານ ສະໄໝວິສາມັນໃນຕົ້ນເດືອນ ສິງຫາ 2018 ກ່ຽວກັບການແກ້ໄຂໄພພິບັດຢູ່ເມືອງ ສະໜາມໄຊ, ແຂວງອັດຕະປື ດັ່ງນີ້:
- ໃຫ້ຄະນະສະເພາະກິດ ແກ້ໄຂໄພພິບັດລະດັບຊາດ ເອົາໃຈໃສ່ຄຸ້ມຄອງ ການຮັບເອົາການຊ່ວຍເຫຼືອ ແລະ ແຈກຢາຍເຄື່ອງບັນເທົາທຸກ ໃຫ້ແກ່ຜູ້ປະສົບໄພໃຫ້ເປັນລະບົບ; ປະສານສົມທົບກັບຂະແໜງການ ທີ່ກ່ຽວຂ້ອງ ເພື່ອ ຈໍາກັດຊ່ອງຫວ່າງ, ການສວຍໂອກາດລັກລອບນໍາເຂົ້າ ແລະ ແຈກຢາຍເຄື່ອງບໍລິຈາກທີ່ບໍ່ຖືກຕ້ອງ ແລະ ບໍ່ຖືກຕາມເປົ້າໝາຍ;
- ໃຫ້ປັບປຸງຄະນະຮັບຜິດຊອບ ວາງແຜນຟື້ນຟູຫຼັງໄພພິບັດໃຫ້ແທດກັບຕົວຈິງຕື່ມ ໂດຍມີຜູ້ຕາງໜ້າຈາກກະຊວງໂຍທາທິການ ແລະ ຂົນສົ່ງ ເປັນຫົວໜ້າ, ກະຊວງແຜນການ ແລະ ການລົງທຶນ, ກະຊວງກະສິກໍາ ແລະ ປ່າໄມ້, ກະຊວງປ້ອງກັນປະເທດ, ກະຊວງສຶກສາທິການ ແລະ ກິລາ, ກະຊວງສາທາລະນະສຸກ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ ແລະ ລົງໄປສໍາຫຼວດ, ວາງແຜນ ແລະ ລົງມືປະຕິບັດປະຈໍາຢູ່ສະໜາມ;
- ໃຫ້ແຕ່ລະຂະແໜງການ ໂດຍສະເພາະ ຂະແໜງໂຍທາທິການ ແລະ ຂົນສົ່ງ, ກະສິກໍາ ແລະ ປ່າໄມ້, ສຶກສາທິການ ແລະ ກິລາ, ສາທາລະນະສຸກ ແລະ ພາກສ່ວນກ່ຽວຂ້ອງ ເອົາໃຈໃສ່ຊີ້ນໍາ ແລະ ມອບໝາຍໃຫ້ພາກສ່ວນທີ່ກ່ຽວຂ້ອງຂອງຕົນ ໄປປະຈໍາ ແລະ ເຮັດຕາມພາລະບົດບາດຂອງຕົນ ເພື່ອຊ່ວຍເຫຼືອແຂວງອັດຕະປື ໃນການແກ້ໄຂໄພພິບັດ ແລະ ຟື້ນຟູຫຼັງໄພພິບັດໃຫ້ແທດຕົວຈິງ, ທັນການ ແລະ ໜັກແໜ້ນກວ່າເກົ່າ;
- ໃຫ້ສືບຕໍ່ເລັ່ງປະຕິບັດການສືບສວນ-ສອບສວນ ຫາສາເຫດຂອງຄູກັນນ້ຳ ຂອງເຂື່ອນແຕກພັງໃນຄັ້ງນີ້ ຢ່າງລະອຽດຮອບຄອບ ແລະ ໂປ່ງໃສທີ່ສຸດ ເພື່ອໃຫ້ໄດ້ຂໍ້ມູນ, ຂໍ້ສະຫຼຸບ ທີ່ບໍ່ສາມາດໂຕ້ແຍ່ງໄດ້. ພ້ອມນີ້ ກໍ່ສືບຕໍ່ເກັບກຳເອກະສານຂໍ້ມູນ ແລະ ຫຼັກຖານຕ່າງໆ ທີ່ຈະເປັນປະໂຫຍດ ແລະ ເປັນພື້ນຖານ ໃຫ້ແກ່ການສືບສວນ-ສອບສວນ ໃນຄັ້ງນີ້;
- ໃຫ້ກະຊວງພະລັງງານ ແລະ ບໍ່ແຮ່ ຮີບຮ້ອນຄົ້ນຄວ້າສ້າງຕັ້ງໜ່ວຍງານຮັບຜິດຊອບ ສຶກສາຄົ້ນ ຄວ້າຄວາມປອດໄພຂອງເຂື່ອນ ໂດຍເຊີນນັກຊ່ຽວຊານສາກົນເຂົ້າຮ່ວມນຳ ແລະ ໃຫ້ດຳເນີນການກວດກາສະພາບໂຄງ ການເຂື່ອນໄຟຟ້າ ທັງໝົດຢູ່ໃນ ສປປ ລາວ ເປັນຕົ້ນ ແມ່ນໂຄງການທີ່ໄດ້ດຳເນີນງານແລ້ວ ແລະ ກຳລັງກໍ່ສ້າງຢູ່. ເພື່ອໃຫ້ວຽກງານດັ່ງກ່າວ ດໍາເນີນໄປໄດ້ຢ່າງມີປະສິດທິຜົນ;
2. ໃຫ້ຂະແໜງການ ແລະ ທ້ອງຖິ່ນ ໃນຂອບເຂດທົ່ວປະເທດ ເອົາໃຈໃສ່ວຽກງານຕິດຕາມກວດກາ, ແຈ້ງສະພາບດິນຟ້າອາກາດ ທີ່ຈະມີຜົນກະທົບຕໍ່ການດຳລົງຊີວິດ ແລະ ການຜະລິດ, ດຳເນີນທຸລະກິດ ແລະ ການບໍລິການຂອງສັງຄົມ ໃຫ້ທົ່ວເຖິງທັນເວລາ ໃຫ້ຄະນະສະເພາະກິດ ເພື່ອປ້ອງກັນ ແລະ ຄຸ້ມຄອງໄພພິບັດແຫ່ງຊາດ ຕິດຕາມສະພາບນ້ຳຖ້ວມ ແລະ ຢູ່ໃນທ່າກຽມພ້ອມ ເມື່ອມີສະພາບນ້ຳຖ້ວມເກີດຂຶ້ນ ຢູ່ບ່ອນໃດກໍ່ໃຫ້ຮີບຮ້ອນ ປະສານກັບພາກສ່ວນກ່ຽວຂ້ອງ ຊ່ວຍເຫຼືອປະຊາຊົນ ໃຫ້ມີຄວາມປອດໄພທາງດ້ານຊີວິດ ແລະ ຊັບສິນ, ທັງວາງແຜນຟື້ນຟູພາຍ ຫຼັງນ້ຳຖ້ວມໄດ້ຫຼຸດລົງ ຫຼື ພາຍຫຼັງນໍ້າຖ້ວມ ເພື່ອໃຫ້ສະພາບກັບຄືນສູ່ປົກກະຕິໂດຍໄວ.
3. ໃຫ້ບັນດາບັນດາກະຊວງ ແລະ ພາກສ່ວນທີ່ກ່ຽວຂ້ອງ ເປັນເຈົ້າການ ແລະ ຮັບຜິດຊອບຈັດຕັ້ງປະຕິບັດຄຳສັ່ງ ສະບັບເລກທີ 12/ນຍ, ລົງວັນທີ 23 ສິງຫາ 2018 ຂອງນາຍົກລັດຖະມົນຕີ ວ່າດ້ວຍການຈັດຕັ້ງປະຕິບັດ 8 ມາດຕະການຊຸກຍູ້ເສດຖະກິດ ໃຫ້ມີປະສິດທິຜົນ, ເຊິ່ງຄໍາສັ່ງດັ່ງກ່າວ ໄດ້ລະບຸລະອຽດ ເຖິງຄວາມຮັບຜິດຊອບ ຂອງບັນດາຂະແໜງການສູນກາງ.
4. ໃຫ້ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ເປັນເຈົ້າການປະສານສົມທົບກັບ ກະຊວງປ້ອງກັນຄວາມສະຫງົບ, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ແລະ ພາກສ່ວນກ່ຽວຂ້ອງ ຕິດຕາມການເຜີຍແຜ່ ແລະ ໂຄສະນາຜ່ານສື່ສັງຄົມອອນລາຍ ທີ່ຂັດກັບດໍາລັດວ່າດ້ວຍການຄຸ້ມຄອງ ຂໍ້ມູນຂ່າວສານ ຜ່ານອິນເຕີເນັດ (ສະບັບເລກທີ 327/ລບ, ລົງວັນທີ 16 ກັນຍາ 2014) ເພື່ອແກ້ໄຂໃຫ້ທັນເວລາ.
5. ໃຫ້ກະຊວງອຸດສາຫະກໍາ ແລະ ການຄ້າ ເປັນເຈົ້າການສົມທົບກັບພາກສ່ວນກ່ຽວຂ້ອງ ໃນການຄຸ້ມຄອງລາຄາສິນຄ້າໃນທ້ອງຕະຫຼາດ ບໍ່ໃຫ້ມີການສວຍໂອກາດຂຶ້ນລາຄາສິນຄ້າ ໃນໄລຍະທີ່ມີ ນໍ້າຖ້ວມຢູ່ໃນຂອບເຂດທົ່ວປະເທດ ເປັນຕົ້ນ ແມ່ນເຄື່ອງອຸປະໂພກ-ບໍລິໂພກທີ່ຈຳເປັນ ເພື່ອບໍ່ໃຫ້ກະທົບ ຕໍ່ຊີວິດການເປັນຢູ່ຂອງປະຊາຊົນ.
6. ໃຫ້ກະຊວງສຶກສາທິການ ແລະ ກິລາ ເປັນເຈົ້າການສົມທົບກັບພາກສ່ວນກ່ຽວຂ້ອງ ກະກຽມຄວາມພ້ອມໃນການເປີດສົກຮຽນໃໝ່ ເພື່ອຮັບປະກັນບໍ່ໃຫ້ມີສະພາບຫຍໍ້ທໍ້ ແລະ ຫາງສຽງກ່ຽວກັບການສອບເສັງ ແລະ ຄັດເລືອກນັກຮຽນ ເຂົ້າຮຽນຕໍ່ຢູ່ບັນດາສະຖາບັນການສຶກສາຕ່າງໆ ໃນຂອບເຂດທົ່ວປະເທດ ໃຫ້ຖືກຕ້ອງ, ໂປ່ງໃສ.
7. ໃຫ້ບັນດາກະຊວງ ແລະ ອົງການທຽບເທົ່າກະຊວງ ເປັນເຈົ້າການກະກຽມບັນດາຮ່າງກົດໝາຍ ແລະ ເອກະສານທີ່ຈະລາຍງານຕໍ່ກອງປະຊຸມສະພາແຫ່ງຊາດ ສະໄໝສາມັນ ເທື່ອທີ 6 ໃຫ້ມີເນື້ອໃນຮອບຄອບຮັດກຸມ ແລະ ມີຄວາມເປັນເອກະພາບ ເພື່ອກຽມລາຍງານ ແລະ ອະທິບາຍຊີ້ແຈງຕໍ່ສະພາແຫ່ງຊາດ ດ້ວຍຄວາມຮັບຜິດຊອບ ແລະ ຄຸນນະພາບສູງ.
ໃນຕອນທ້າຍ, ກອງປະຊຸມ ໄດ້ຂໍຮຽກຮ້ອງມາຍັງພະນັກງານ, ສະມາຊິກພັກ, ທະ​ການ, ຕໍ່ຫຼວດ, ພະ​ນັກ​ງານ-ລັດຖະກອນ, ກໍາມະກອນ, ນັກຮຽນຮູ້ປັນຍາຊົນ, ປະຊາຊົນບັນດາເຜົ່າ, ຊັ້ນຄົນຕ່າງໆ, ຊາວຕ່າງດ້າວຜູ້ບໍ່ມີສັນຊາດ ທີ່ດຳລົງຊີ ວິດຢູ່ລາວ, ນັກທຸລະກິດ ພາກລັດ ແລະ ເອກະຊົນ ລວມທັງ ນັກທຸລະກິດຕ່າງປະເທດ ທີ່ມາລົງທຶນຢູ່ລາວ ຈົ່ງພ້ອມກັນເຊີດຊູນໍ້າໃຈເປັນເຈົ້າປະເທດຊາດ, ສາມັກຄີ ເປັນຈິດໜຶ່ງໃຈດຽວ, ເດັດດ່ຽວຜ່ານຜ່າອຸປະສັກຕ່າງໆ, ສູ້ຊົນເຂົ້າຮ່ວມຈັດຕັ້ງປະຕິບັດວຽກງານສໍາຄັນຕ່າງໆ ທີ່ລັດຖະບານວາງອອກ ໃຫ້ປະກົດຜົນເປັນຈິງ ເພື່ອຜົນປະໂຫຍດຂອງຊາດ, ຂອງປະຊາຊົນ ແລະ ຂອງພວກເຮົາໝົດທຸກຄົນ. ພ້ອມກັນນີ້, ໃຫ້ຍົກສູງສະຕິລະວັງຕົວ ຕໍ່ຜູ້ບໍ່ຫວັງດີ, ເພີ່ມທະວີຄວາມສາມັກຄີ ເ​ປັນຈິດໜຶ່ງໃຈດຽວ, ເດັດດ່ຽວຕ້ານກົນ ອຸບາຍໂດຍສັນຕິ ຂອງອິດທິກໍາລັງປໍລະປັກ ໃນທຸກຮູບແບບ, ບໍ່ຖືກກົນອຸບາຍແບ່ງແຍກ, ຍຸແຍ່ ໃສ່ຮ້າຍປ້າຍສີຂອງພວກຄົນບໍ່ດີ ຢູ່ພາຍໃນ ແລະ ຕ່າງປະເທດ ໂດຍຜ່ານສື່ສັງຄົມອອນລາຍຕ່າງໆ.

ແຫຼ່ງ: ຫ້ອງວ່າ​ການ​ສຳ​ນັກ​ງານ​ນາ​ຍົກ​ລັດ​ຖະ​ມົນ​ຕີ
ຂ່າວອື່ນໆ