ຖະແຫຼງຂ່າວຂອງທ່ານນາຍົກລັດຖະມົນຕີ ຕໍ່ອຸປະຕິເຫດການແຕກຫັກຂອງເຂື່ອນກັ້ນນໍ້າ ແຫ່ງທີ 3 ເຊປ່ຽນ-ເຊນໍ້ານ້ອຍ ໃນວັນທີ 23 ກໍລະກົດ 2018

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພຸດ, 25 ກ.ລ 2018 19:00

​​​​​​​​

ສະພາບທີ່ເກີດຂຶ້ນເລີ່ມກາງຄືນ ຂອງວັນທີ 23 ກໍລະກົດ 2018 ຢູ່ເມືອງສະໜາມໄຊ ແຂວງອັດຕະປື ທີ່ຂ້າພະເຈົ້າ ໄດ້ລົງໄປກວດກາເບິ່ງສະພາບພໍສັງລວມໄດ້ ດັ່ງນີ້:
ຜົນກະທົບຈາກໄພນ້ຳຖ້ວມຄັ້ງນີ້ ແມ່ນຮ້າຍແຮງ ແລະ ໃຫຍ່ຫຼວງ, ອາດຈະເວົ້າໄດ້ວ່າເປັນຄັ້ງທຳອິດໃນຮອບຫຼາຍສິບປີກໍ່ວ່າໄດ້. ສາຍເຫດກໍ່ແມ່ນຝົນຕົກໜັກຕິດຕໍ່ກັນຫຼາຍວັນ, ປະລິມານນ້ຳຂຶ້ນສູງຫຼາຍ, ເຮັດໃຫ້ອ່າງເກັບນ້ຳສຳຮອງຂອງເຂື່ອນໄຟຟ້າ ເຊປ່ຽນ-ເຊນໍ້ານ້ອຍ ຮັບນ້ຳບໍ່ໄດ້ເລີຍແຕກ ເຂື່ອນແຕກນ້ຳສຸລົງມາສູ່ລຸ່ມຂອງບ້ານເຮືອນປະຊາຊົນຢ່າງກະທັນຫັນ, ປະຊາຊົນຫຼົບໄປຢູ່ທີ່ສູງບໍ່ທັນ ເຮັດໃຫ້ບ້ານເຮືອນຈົມຢູ່ໃຕ້ນ້ຳ, ກະແສນ້ຳໄຫຼແຮງພັດເອົາເຮືອນ ພ້ອມດ້ວຍຄົນໄປຕາມກະແສນ້ຳ.
ປະຊາຊົນຈຳນວນໜຶ່ງຫາຍສາບສູນ ປະຈຸບັນຍັງສະຫຼຸບຈຳນວນບໍ່ທັນໄດ້ໝົດ ວ່າມີຈັກຄົນແທ້.
ສ່ວນປະຊາຊົນທີ່ຫຼົບໄພຢູ່ເທິງຫຼັງຄາເຮືອນ, ເທິງຕົ້ນໄມ້ໃຫຍ່ ລໍຖ້າການຊ່ວຍເຫຼືອນັ້ນ ຕອນແລງຂອງວັນທີ່ 24 ກໍລະກົດ 2018 ນີ້ ເຖິງເວລາ 19:00 ໂມງ ໄດ້ກອບກູ້ເອົາມາໄດ້ໝົດແລ້ວ, ໄດ້ເອົາເຂົາເຈົ້າມາໄວ້ຢູ່ຫ້ອງການປົກຄອງເມືອງ, ໂຮງຮຽນຢູ່ເທດສະບານເມືອງ ແລະ ຢູ່ທີ່ສູງ ແລະ ປອດໄພໝົດແລ້ວ...ໜ່ວຍກູ້ໄພ ໄດ້ດຳເນີນການກວດກາ, ລົງທະບຽນ ແລະ ກວດສຸຂະພາບ, ຈັດສັນທີ່ຢູ່ອາໄສຊົ່ວຄາວ, ຊ່ວຍບັນເທົາທຸກດ້ວຍເຄື່ອງນຸຸ່ງຫົ່ມອາຫານ, ຢາປົວພະຍາດ ໄດ້ໃນລະດັບຕົ້ນ ລໍຖ້ານ້ຳລົງ, ຈຶ່ງສືບຕໍ່ຊ່ອຍປະຊາຊົນຕໍ່ໄປ.
1. ຈຳນວນຜູ້ທີ່ຂາດ ທີ່ຢູ່ອາໄສ ມີເຖິງ 587 ຄອບຄົວ ແລະ 3,060 ຄົນ, ຜູ້ສູນຫາຍມີເຖິງ 131 ຄົນນັ້ນ, ທາງຄະນະກຳມະການກູ້ໄພ ຈາກສູນກາງ, ທ້ອງຖິ່ນ ກຳລັງຖືກຜົນກະທົບ 13 ບ້ານ ເພາະນໍ້າຈາກຈຸດຖືກຜົນກະທົບທໍາອິດນັ້ນ ໄດ້ຫຼຸດລະດັບລົງ ແຕ່ປະລິມານນໍ້າຊໍ້າພັດກໍາລັງໄຫຼເທລົງ 5-6 ບ້ານທາງໃຕ້ຕື່ມອີກ. (ໜ່ວຍງານທີ່ປະຈໍາພື້ນທີ່ຈະສືບຕໍ່ໄປກອບກູ້ຕໍ່ໄປ ແລະ ຊ່ວຍເຫຼືຕໍ່ໄປ) .
2. ລັດຖະບານ ໄດ້ປະຊຸມກັນດ່ວນຕື່ມອີກ ໃນຕອນບ່າຍມື້ນີ້ ແລະ ໄດ້ຕົກລົງ ສ້າງຕັ້ງຄະນະສະເພາະກິດຂຶ້ນ ໂດຍມອບໝາຍໃຫ້ ຮອງນາຍົກ ສອນໄຊ ສີພັນດອນ, ເປັນຫົວໜ້າຄະນະ, ປະກອບດ້ວຍພາກສ່ວນທີ່ກ່ຽວຂ້ອງ ແລະ ແຂວງອັດຕະປື, ເມືອງສະໜາມໄຊ ເພື່ອສືບຕໍ່ແກ້ໄຂ:
- ມີທັງໄລຍະສະເພາະໜ້າ ແລະ ໄລຍະຍາວ.
ຄະນະສະເພາະກິດນີ້ ຈະໄດ້ປະເມີນຜົນເສຍຫາຍ, ທັງຊອກຫາສາຍເຫດ ທີ່ພາໃຫ້ເກີດອຸປະຕິເຫດການແຕກຫັກຂອງອ່າງເກັບນໍ້າດັ່ງກ່າວ ຮ່ວມກັບບໍລິສັດ ທີ່ໄດ້ຮັບການສໍາປະທານ ກວດກາຄວາມຮັບຜິດຊອບ ແລະ ພັນທະຂອງແຕ່ລະຝ່າຍ ໃນການແກ້ໄຂເຫດການ ໃນຄັ້ງນີ້.
3. ຂ້າພະເຈົ້າ ໄດ້ຕິດຕາມຢ່າງໃກ້ຊິດ ໃນການດໍາເນີນການແກ້ໄຂ...ໃນຄັ້ງນີ້ ແລະ ໄດ້ລົງກວດກາຊີ້ນໍາດ້ວຍຕົນເອງ ໃນພື້ນທີ່ຕົວຈິງ ແລະ ຂໍສະແດງຄວາມຮູ້ບຸນຄຸນ ແລະ ຂອບໃຈ ຕໍ່ການຊ່ວຍເຫຼືອຂອງທຸກພາກສ່ວນ ດ້ວຍນໍ້າໃສໃຈຈິງ, ດ້ວຍຄວາມເປັນຫ່ວງຂອງປະຊາຊົນລາວ ທີ່ມີຕໍ່ປະຊາຊົນ ຜູ້ຖືກເຄາະຮ້າຍໃນຄັ້ງນີ້ ແລະ ຂ້າພະເຈົ້າ ຕາງໜ້າໃຫ້ລັດຖະບານ ແລະ ປະຊາຊົນລາວຂໍຂອບໃຈຢ່າງຈິງໃຈຕໍ່ການສະແດງຄວາມເຫັນໃຈ ແລະ ສະແດງເຈດຈໍານົງ ໃຫ້ການຊ່ວຍເຫຼືອຈາກລັດຖະບານ ແລະ ປະຊາຊົນປະເທດເພື່ອມິດ ແລະ ອົງການຈັດຕັ້ງສາກົນໃນຄັ້ງນີ້...ສິ່ງດັ່ງກ່າວ ໄດ້ສ້າງກໍາລັງແຮງ ແລະ ກໍາລັງໃຈໃຫ້ແກ່ຜູ້ປະສົບເຄາະຮ້າຍ ໃນຄັ້ງນີ້ ເພື່ອສາມາດເຮັດໃຫ້ສະພາບຟື້ນຟູ ເຂົ້າສູ່ຄວາມເປັນປົກກະຕິໂດຍໄວ.
4. ຂ້າພະເຈົ້າ ຂໍຮຽກຮ້ອງໃຫ້ເພື່ອນຮ່ວມຊາດໃນທົ່ວປະເທດ ແລະ ພີ່ນ້ອງລາວໃນຕ່າງປະເທດ ຈົງໄດ້ເອົາໃຈຊ່ວຍເພື່ອແກ້ໄຂເຫດການຄັ້ງນີ້. ຂ້າພະເຈົ້າ ມີຄວາມເຊື່ອໝັ້ນວ່າເຫດການດັ່ງກ່າວນີ້ ຈະໄດ້ຮັບການແກ້ ໄຂ ແລະ ສະພາບການຈະກ້າວເຂົ້າສູ່ຄວາມເປັນປົກກະຕິໂດຍໄວ.
ຂ້າພະເຈົ້າ ຂໍໃຫ້ທຸກຄົນມີສະຕິ ຕໍ່ຂ່າວຄາວທີ່ອອກມາ ແລະ ຈະອອກມາໃນຕໍ່ໜ້າ ເພື່ອບໍ່ໃຫ້ເປັນການສ້າງຄວາມເຂົ້າໃຈຜິດເຂວໄປຕ່າງໆນາໆ ແລະ ສຸມກຳລັງແຮງ, ກຳລັງຊັບ, ກຳລັງໃຈຂອງພວກເຮົາທຸກຄົນ ເພື່ອຊ່ວຍກັນໃຫ້ສະພາບກັບມາສູ່ປົກກະຕິໂດຍໄວ.
5. ຂ້າພະເຈົ້າ ຂໍໃຫ້ພີ່ນ້ອງປະຊາຊົນ ແຕ່ເໜືອຮອດໃຕ້ ສືບຕໍ່ຕິດຕາມສະພາບດິນຟ້າອາກາດ ທີ່ມີການປ່ຽນແປງຢູ່ຕະຫລອດເວລານີ້ ແລະ ມີສະຕິລະວັງຕົວໄວ້ຢູ່ສະເໝີ ເພື່ອກຽມຮັບມື ກັບສະຖານະການທີ່ຈະເກີດຂຶ້ນຂອງໄພທຳມະຊາດ ແຕ່ລະຄັ້ງ ເພື່ອຫລີກຫລ້ຽງຄວາມເສຍຫາຍ,
ຂ້າພະເຈົ້າ ຂໍມອບໝາຍໃຫ້ຄະນະພັກ, ອໍານາດການປົກຄອງ ແລະ ທຸກໜ່ວຍງານ ນັບທັງຢູ່ສູນກາງ ແລະ ທ້ອງຖິ່ນ ຈົ່ງນຳພາປະຊາຊົນດ້ວຍຄວາມຮັບຜິດຊອບສູງໃນການເຕືອນສະຕິ, ນໍາພາກະກຽມຮັບມື ຫລີກລ່ຽງຜົນກະທົບ ແລະ ເມື່ອມີເຫດເກີດຂຶ້ນ ຕ້ອງມີແຜນປະຕິບັດງານຮັບມືຢ່າງມີປະສິດທິຜົນ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ
ຂ່າວອື່ນໆ