ຫສນຍ ຈັດພິທີເຜີຍແຜ່ເຊື່ອມຊຶມເອກະສານສຳຄັນຂອງພັກ

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນອັງຄານ, 18 ຕ.ລ 2022 11:00

    ໃນຕອນເຊົ້າ ວັນທີ 12 ຕຸລາ 2022 ທີ່ຫ້ອງວ່າການສຳນັກງານນາຍົກລັດຖະມົນຕີ (ຫສນຍ) ໄດ້ຈັດພິທີປາຖະກະຖາເຜີຍແຜ່ເອກະສານສຳຄັນຂອງພັກ-ຂອງຊາດ ພາຍໃຕ້ການເປັນປະທານຂອງສະຫາຍ ຄຳລາວັນ ຈັນທະລາວັນ ຮອງເລຂາຄະນະບໍລິຫານງານພັກ, ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ໂດຍການເຂົ້າຮ່ວມຂອງບັນດາສະຫາຍ ຄະນະບໍລິຫານງານພັກ, ຄະນະພັກຮາກຖານ, ຄະນະໜ່ວຍພັກ ແລະ ສະມາຊິກພັກ ພ້ອມດ້ວຍພະນັກງານ-ລັດຖະກອນ ທົ່ວ ຫສນຍ.

  ໃນໂອກາດນີ້, ຜູ້ເຂົ້າຮ່ວມກອງປະຊຸມ ໄດ້ຮັບຟັງການເຜີຍແຜ່ເອກະສານ ກ່ຽວກັບບົດສະຫຼຸບການເຄື່ອນໄຫວວຽກງານກວດກາພັກ ແລະ ແຜນວຽກຈຸດສຸມ ຮອດທ້າຍປີ 2022 ຂອງຫ້ອງວ່າການ ສໍານັກງານນາຍົກລັດຖະມົນຕີ; ບົດສະຫຼຸບກ່ຽວກັບການລົງຕິດຕາມຊຸກຍູ້ ການຈັດຕັ້ງປະຕິບັດລະບຽບການ ແລະ ກົນໄກການເຮັດວຽກຂອງຫ້ອງວ່າ ການສໍານັກງານນາຍົກລັດຖະມົນຕີ; ບົດສະຫຼຸບຕີລາຄາ ການເຄື່ອນໄຫວວຽກງານກວດກາແຕ່ປີ 2016 ເຖິງປະຈຸບັນ ແລະ ບາງເນື້ອໃນຕົ້ນຕໍ ສໍາລັບການເຄື່ອນໄຫວແຕ່ນີ້ເຖິງປີ 2026 ສະບັບເລກທີ 192/ຄກສພ, ລົງວັນທີ 30 ມິຖຸນາ 2022 ຈາກສະຫາຍ ວີແກ້ວ ບຸບຜາວັນ ຄະນະພັກ ຫສນຍ, ຮອງປະທານກວດກາພັກ, ເລຂາໜ່ວຍພັກ, ຫົວໜ້າກົມກວດກາ ເຊິ່ງເຫັນວ່າຕະຫຼອດໄລຍະຜ່ານມາ ຄະນະພັກ-ຄະນະນໍາ ຂອງອົງຄະນະພັກຫ້ອງວ່າການສໍານັກງານນາຍົກລັດ ຖະມົນຕີ ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ແກ່ສະມາຊິກພັກ, ພະນັກງານ-ລັດຖະກອນ ໄດ້ສະແດງອອກຫຼາຍດ້ານ ໂດຍສະເພາະແມ່ນ ໄດ້ເອົາໃຈໃສ່ເຜີຍແຜ່ເຊື່ອມຊຶມແນວທາງນະໂຍບາຍ, ມະຕິ, ຄໍາສັ່ງ ແລະ ນິຕິກໍາຕ່າງໆຂອງພັກວາງອອກແຕ່ລະໄລຍະ ແລະ ເອກະສານທີ່ກ່ຽວຂ້ອງວັນສໍາຄັນຂອງຊາດ. ນອກນັ້ນ, ສະຫາຍຍັງໄດ້ຍົກໃຫ້ເຫັນວຽກງານການຈັດຕັ້້ງພັກ; ວຽກງານວິຊາສະເພາະ; ວຽກງານອົງການຈັດຕັ້ງມະຫາຊົນ ແລະ ທິດທາງແຜນການ ເຄື່ອນໄຫວວຽກງານກວດກາພັກ ຮອດທ້າຍປີ 2022 ນີ້.

    ໃນໂອກາດດຽວກັນ ສະຫາຍ ຄຳລາວັນ ຈັນທະລາວັນ ກໍຍັງໄດ້ໃຫ້ກຽດເຜີຍແຜ່ ຄໍາສັ່ງແນະນໍາຂອງຄະນະເລຂາທິການສູນກາງພັກ ສະບັບເລກທີ 169/ຄລສພ, ລົງວັນທີ 15 ສິງຫາ 2022 ວ່າດ້ວຍການເພີ່ມທະວີວຽກງານນໍາພາ-ຊີ້ນໍາ ຕໍ່ການເຄື່ອນໄຫວວຽກງານກວດກາ ແລະ ແກ້ໄຂຜົນການກວດກາ ເຊິ່ງສະຫາຍກໍ່ໄດ້ເນັ້ນໜັກ ໃຫ້ເພີ່ມທະວີການນໍາພາຊີ້ນໍາ ການຈັດຕັ້ງປະຕິບັດສ້າງການຫັນປ່ຽນໃໝ່ ຢ່າງແຂງແຮງ, ເລິກເຊິ່ງ ແລະ ຮອບດ້ານ ໃນຂົງເຂດວຽກງານກວດພັກ-ລັດ, ໃຫ້ສອດຄ່ອງກັບເນື້ອໃນຈິດໃຈຂອງມະຕິກອງປະຊຸມໃຫຍ່ ຄັ້ງທີ XI ຂອງພັກ ໂດຍຕິດພັນກັບການຜັນຂະຫຍາຍຜົນ ຂອງກອງປະຊຸມວຽກງານກວດກາທົ່ວປະເທດ ຄັ້ງທີ IV ກໍ່ຄື ການຈັດຕັ້ງປະຈັດຕັ້ງປະຕິບັດເນື້ອໃນ 02 ວາລະແຫ່ງຊາດຄື: ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການສະກັດກັ້ນ-ແກ້ໄຂ ບັນຫາຢາເສບຕິດ ເພື່ອປະກອບສ່ວນຢ່າງຕັ້ງໜ້າ ໃນການສ້າງຂະບວນການອັນແຂງແຮງ ເພື່ອແກ້ໄຂຄວາມຫຍຸ້ງຍາກດ້ານຕ່າງໆ ຄຽງຄູ່ກັບການຮັບປະກັນການນໍາພາອັນເຂັ້ມແຂງ ແລະ ເຄື່ອນໄຫວຢ່າງມີປະສິດທິພາບ, ມີປະສິດທິຜົນ ຂອງທົ່ວລະບົບການເມືອງຢູ່ແຕ່ລະຂັ້ນ. ພ້ອມດຽວກັນນີ້, ສະຫາຍ ປະທານກອງປະຊຸມ ຍັງໄດ້ມີຄຳເຫັນຮຽກຮ້ອງ ໃຫ້ຜູ້ທີ່ເຂົ້າຮ່ວມກອງປະຊຸມຄັ້ງນີ້ ຈົ່ງພ້ອມກັນເອົາໃຈໃສ່ເຊື່ອມຊຶມ, ເຄົາລົບ ແລະ ປະຕິບັດໜ້າທີ່ ຕາມແນວທາງນະໂຍບາຍຂອງພັກ, ລັດຖະທໍາມະນູນ, ກົດໝາຍ, ລະບຽບການຂອງລັດ ແລະ ບັນດາເອກະສານສຳຄັນຂອງພັກຢ່າງເລິກເຊິ່ງ ເພື່ອນໍາໄປຈັດຕັ້ງປະຕິບັດ ເຂົ້າໃນວຽກງານວິຊາສະເພາະຕົວຈິງຂອງຕົນ ແລະ ວຽກງານທີ່ຖືກມອບໝາຍ ດ້ວຍຄວາມຮັບຜິດຊອບສູງ ໂດຍສະເພາະວຽກງານເສນາທິການ, ວຽກງານປະສານງານ ແລະ ວຽກງານບໍລິການຮັບໃຊ້ ໃຫ້ແກ່ການນຳ ໃຫ້ມີປະສິດທິພາບ ແລະ ປະສິດທິຜົນດີຍິ່ງໆຂຶ້ນ.


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ