ຫສນຍ ເປີດຊຸດຝຶກອົບຮົມ ທິດສະດີການເມືອງ-ການປົກຄອງ ຊຸດທີ VII

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນສຸກ, 16 ກ.ຍ 2022 18:00

 

​​​​​​​ໃນຕອນບ່າຍ ວັນທີ 16 ກັນຍາ 2022 ຫ້ອງວ່າການສໍານັກງານນາຍົກລັດຖະມົນຕີ (ຫສນຍ) ໄດ້ເປີດຊຸດຝຶກອົບຮົມ ບຳລຸງທິດສະດີ ການເມືອງ-ການປົກຄອງ ໄລຍະ 45 ວັນ ຊຸດທີ VII ໃຫ້ແກ່ສະມາຊິກພັກ, ພະນັກງານ ພາຍໃນ ຫສນຍ, ໂດຍການໃຫ້ກຽດເຂົ້າຮ່ວມພິທີເປີດ ຂອງສະຫາຍ ຄຳລາວັນ ຈັນທະລາວັນ, ຮອງເລຂາຄະນະພັກ, ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ; ມີຜູ້ຕາງໜ້າຈາກ ສະຖາບັນການເມືອງ-ການປົກຄອງແຫ່ງຊາດ, ບັນດາສະຫາຍ ຕາງໜ້າຄະນະພັກຮາກຖານ, ຄະນະໜ່ວຍພັກຮາກຖານ, ອົງການຈັດຕັ້ງມະຫາຊົນ ແລະ ສຳມະນາກອນ ພາຍໃນ ຫສນຍ ເຂົ້າຮ່ວມ.
​​​​​​​ຈຸດປະສົງຂອງການຝຶກອົບຮົມ ແມ່ນເພື່ອຍົກລະດັບຄວາມຮູ້ ທາງດ້ານທິດສະດີ ການເມືອງ-ການປົກຄອງ ໃຫ້ແກ່ສະ ມາຊິກພັກ, ພະນັກງານຫຼັກແຫຼ່ງ, ໂດຍສະເພາະ ແມ່ນພະນັກງານທີ່ຢູ່ໃນແຜນກຳນົດກໍ່ສ້າງ ພະນັກງານນໍາພາ-ຄຸ້ມຄອງ ຂອງຫ້ອງວ່າການສຳນັກງານນາຍົກລັດຖະມົນຕີ ໃຫ້ມີຄວາມໜັກແໜ້ນ ເລິກເຊິ່ງ, ມີທັດສະນະຫຼັກໝັ້ນຊົນຊັ້ນ, ມີຄຸນສົມບັດສິນທຳປະຕິວັດ, ມີຄວາມເຊື່ອໝັ້ນຕໍ່ການນຳພາຂອງພັກ, ມີແບບແຜນດຳລົງຊີວິດປອດໃສ, ມີແບບແຜນການນໍາພາ, ແບບແບບວິທີເຮັດວຽກທີ່ຖືກຕ້ອງ ສອດຄ່ອງກັບແນວທາງ-ນະໂຍບາຍ ຂອງພັກ; ກົດໝາຍ, ລະບຽບການຂອງລັດ;  ທັງເປັນເຄື່ອງມືທີ່ສໍາຄັນ, ຮັບປະກັນມາດຖານເງື່ອນໄຂ ຂອງສະມາຊິກພັກ-ພະນັກງານ ເພື່ອກໍ່ສ້າງເປັນພະນັກງານສືບທອດ ປ່ຽນແທນ ໃນຕໍ່ໜ້າ. 
​​​​​​​ເນື້ອໃນ ແລະ ບົດຮຽນ ທີ່ຈະນຳເຂົ້າໃນການຝຶກອົບຮົມ ຄັ້ງນີ້ ປະກອບມີ 5 ວິຊາ ຄື: ວິຊາ ປັດຊະຍາ ມາກ-ເລນິນ; ວິຊາ ເສດຖະສາດການເມືອງ; ວິຊາ ລັດທິສັງຄົມນິຍົມວິທະຍາສາດ; ວິຊາ ບໍລິຫານສາດ; ແລະ ວິຊາ ກໍ່ສ້າງພັກ ໂດຍແມ່ນອາຈານຈາກ ສະຖາບັນການເມືອງ-ການປົກຄອງແຫ່ງຊາດ ເປັນຜູ້ຂຶ້ນຫ້ອງສິດສອນ, ເຊິ່ງມີສຳມະນາກອນ ເຂົ້າຮ່ວມທັງໝົດ 40 ສະຫາຍ, ຊຶ່ງຈະເລີ່ມດໍາເນີນການຝຶກອົບຮົມ ໃນວັນທີ 19 ກັນຍາ 2022 ເປັນຕົ້ນໄປ.​
​​​​​​​​ໃນໂອກາດກ່າວເປີດພິທີຝຶກອົບຮົມ, ສະຫາຍ ຄຳລາວັນ ຈັນທະລາວັນ ໄດ້ກ່າວບາງຕອນວ່າ: ບັ້ນຝຶກອົບຮົມຄັ້ງນີ້ ມີຄວາມໝາຍຄວາມສຳຄັນຫຼາຍ ເພາະເປັນການຈັດຕັ້ງປະຕິບັດ ມະຕິກອງປະຊຸມໃຫ່ຍຄັ້ງທີ V ຂອງອົງຄະນະພັກ ຫສນຍ, ແຜນພັດທະນາວຽກງານວິຊາສະເພາະ ໃນໄລຍະ 5 ປີ ຂອງ ຫສນຍ ແລະ ແຜນຍຸດທະສາດ ການພັດທະນາບຸກຄະລາກອນ ໄລຍະ 10 ປີ (2020-2030) ທີ່ຫາກໍ່ເຊັນຮັບຮອງ; ທັງເປັນການສົ່ງເສີມຍົກລະດັບ ແລະ ພັດທະນາບຸກຄະລາກອນຂອງ ຫສນຍ ໃຫ້ມີຄວາມຮູ້ທາງດ້ານທິດສະດີ-ການເມືອງ, ມີຄຸນນະພາບ ໃນການບໍລິຫານວຽກງານ ຢູ່ແຕ່ລະຂັ້ນ ໃຫ້ທົ່ວເຖິງ ທັງເປັນການຈັດຕັ້ງປະຕິບັດແຜນການຝຶກອົບຮົມ ພາຍໃນ ຫສນຍ ໃຫ້ສຳເລັດຕາມແຜນການທີ່ວາງໄວ້. ພ້ອມດຽວກັນນັ້ນ, ສະຫາຍ ຍັງໄດ້ຮຽກ ຮ້ອງໃຫ້ຄະນະຮັບຜິດຊອບຝຶກອົບຮົມ ແລະ ສຳມະນາກອນທຸກສະຫາຍ ຈົ່ງຍົກສູງຄວາມຮັບຜິດຊອບຂອງຕົນ ເອົາໃຈໃສ່ຮັບຟັງ ຍາດແຍ່ງເອົາບົດຮຽນຄວາມຮູ້ ຈາກອາຈານ ແລະ ເປັນເຈົ້າການປະກອບສ່ວນ ໃນການແລກປ່ຽນບົດຮຽນ ເພື່ອສາມາດນໍາມາ ໝູນໃຊ້ເຂົ້າໃນໜ້າທີ່ວຽກງານຂອງຕົນ. ສິ່ງສໍາຄັນ ແມ່ນໃຫ້ເອົາໃຈໃສ່ປະຕິບັດກົດລະບຽບໃນການຮຽນ, ການສອນ ຢ່າງເຄັ່ງຄັດ ເພື່ອເຮັດໃຫ້ຊຸດຝຶກອົບຮົມໃນຄັ້ງນີ້ ປະສົບຜົນສໍາເລັດ ຕາມຄາດໝາຍທີ່ໄດ້ກໍານົດໄວ້.


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ