ຄະນະຜູ້ແທນ ຫສນຍ ເຂົ້າຢ້ຽມຂໍ່ານັບ ທ່ານນາຍົກລັດຖະມົນຕີ ຫວຽດນາມ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນອັງຄານ, 13 ກ.ຍ 2022 08:00

​​

​​​​​​​ໃນຕອນແລງ ວັນທີ 9 ກັນຍາ 2022 ຄະນະຜູ້ແທນ ຫ້ອງວ່າການສຳນັກງານນາຍົກລັດຖະມົນຕີ (ຫສນຍ) ແຫ່ງ ສປປ ລາວ ນຳໂດຍທ່ານ ອາລຸນໄຊ ສູນນະລາດ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ໄດ້ເຂົ້າຢ້ຽມຂໍ່ານັບ ທ່ານ ຟ້າມ ມິງ ຈິງ, ນາຍົກລັດຖະມົນຕີ ແຫ່ງ ສສ ຫວຽດນາມ ຢູ່ທີ່ຫ້ອງວ່າການລັດຖະບານຫວຽດນາມ.

​​​​​​​ກ່ອນອື່ນ ທ່ານ ອາລຸນໄຊ ສູນນະລາດ ໄດ້ກ່າວສະແດງຄວາມຂອບໃຈ ຕໍ່ທ່ານ ນາຍົກລັດຖະມົນຕີ ທີ່ໄດ້ເສຍສະຫຼະເວລາ ໃຫ້ການຕ້ອນຮັບອັນອົບອຸ່ນ ແລະ ສະແດງຄວາມຮູ້ບຸນຄຸນ ທີ່ຍາມໃດພັກ, ລັດຖະບານ ແລະ ປະຊາຊົນຫວຽດນາມອ້າຍນ້ອງ ໄດ້ໃຫ້ການຊ່ວຍເຫຼືອ, ສະໜັບສະໜູນ ຢ່າງທັນການ ແລະ ມີປະສິດທິຜົນ ບໍ່ວ່າໃນໄລຍະກ່ອນ ກໍ່ຄືປະຈຸບັນ; ພ້ອມທັງ ໄດ້ລາຍງານໃຫ້ທ່ານ ນາຍົກລັດຖະມົນຕີ ແຫ່ງ ສສ ຫວຽດນາມ ຮັບຊາບ ກ່ຽວກັບຈຸດປະສົງ ແລະ ຜົນຂອງການເຄື່ອນໄຫວຢ້ຽມຢາມເຮັດວຽກ ຂອງຄະນະຜູ້ແທນ ຫສນຍ ລາວ ໃນຄັ້ງນີ້ ເພື່ອສືບຕໍ່ປະຕິບັດບົດບັນທຶກການຮ່ວມມື ຂອງສອງຫ້ອງວ່າການ ພາຍໃຕ້ການຊີ້ນໍາ-ນໍາພາໂດຍກົງຂອງສອງນາຍົກລັດຖະມົນຕີ; ເປັນການປະກອບສ່ວນເພີ່ມພູນຄູນສ້າງ ສາຍພົວພັນພິເສດ ແລະ ການຮ່ວມມືຮອບດ້ານ ໃນການເຂົ້າຮ່ວມຈັດຕັ້ງປະຕິບັດກິດຈະກຳ ສະເຫຼີມສະຫຼອງສອງວັນປະຫວັດສາດ ຂອງສອງຊາດ ລາວ-ຫວຽດນາມ ທັງເປັນການຂໍ່ານັບຊົມເຊີຍ ການສະເຫຼີມສະຫຼອງວັນຊາດ ຫວຽດນາມ ຄົບຮອບ 77 ປີ ທີ່ຫາກໍ່ຜ່ານພົ້ນໄປ ບໍ່ເທົ່າໃດວັນ ແລະ ເພື່ອລົງເລິກແລກປ່ຽນບົດຮຽນ ໃນການເປັນເສນາທິການໃຫ້ແກ່ລັດຖະບານ ກໍ່ຄື ທ່ານນາຍົກລັດຖະມົນຕີ. ຜ່ານການພົບປະເຮັດວຽກ, ສໍາມະນາແລກປ່ຽນບົດຮຽນຕົວຈິງ ຮ່ວມກັບ ຫລບ ຫວຽດນາມ, ສາມາດຖອດຖອນບົດຮຽນອັນໃຫຍ່ຫຼວງ ໂດຍສະເພາະ ແມ່ນການກໍາສະພາບທີ່ພົ້ນເດັ່ນຂອງຂະແໜງການ ແລະ ທ້ອງຖິ່ນ, ການປະສານງານ, ບົດຮຽນໃນການຕິດຕາມ, ຊຸກຍູ້ ການຈັດຕັ້ງປະຕິບັດບັນດານິຕິກໍາ ກໍ່ຄື ທິດຊີ້ນໍາ ແລະ ການຕົກລົງຂອງລັດຖະບານ ແລະ ທ່ານນາຍົກລັດຖະມົນຕີ ຢູ່ບັນດາຂະແໜງການ, ທ້ອງຖິ່ນ ມີຄວາມວ່ອງໄວ, ທັນການ ແລະ ທັນສະໄໝ; ເຊິ່ງທັງໝົດນັ້ນ, ລ້ວນແລ້ວແຕ່ແມ່ນການແບ່ງປັນປະສົບການ ແລະ ບົດຮຽນອັນລໍ້າຄ່າ ໃຫ້ແກ່ ຫສນຍ ເພື່ອນໍາໄປໝູນໃຊ້ເຂົ້າໃນການຈັດຕັ້ງປະຕິບັດວຽກງານຂອງຕົນ ໃຫ້ສອດຄ່ອງກັບສະພາບໃນປະຈຸບັນ. ພ້ອມດຽວກັນນີ້, ທ່ານລັດຖະມົນຕີ, ຫົວໜ້າ ຫສນຍ  ຍັງໄດ້ນໍາເອົາຄວາມຢື້ຢາມຖາມຂ່າວ ຈາກທ່ານນາຍົກລັດຖະມົນຕີ ພັນຄໍາ ວິພາວັນ ມາຍັງທ່ານ ນາຍົກລັດຖະມົນຕີ ຟາມ ມິງ ຈິງ ແລະ ຄວາມເຫັນຢືນຢັນຄືນ ຕໍ່ໝາກຜົນການຮ່ວມມືຂອງສອງປະເທດ ກໍ່ຄື ການຈັດຕັ້ງປະຕິບັດບັນດາໂຄງການ, ສັນຍາຕ່າງໆ ທີ່ການນໍາຂັ້ນສູງຂອງສອງປະເທດ ທີ່ໄດ້ຕົກລົງ ເພື່ອນໍາໄປຈັດຕັ້ງຜັນຂະຫຍາຍ ໃຫ້ມີປະສິດທິຜົນ ແລະ ມີຜົນສໍາເລັດ ຢ່າງເປັນຮູບປະທໍາ ບົນພື້ນຖານຄວາມສາມັກຄີພິເສດ ແລະ ການຮ່ວມມືຮອບດ້ານ ກໍ່ຄື ຄວາມມຸ້ງມາດປາຖະໜາ ຂອງປະຊາຊົນ ທັງສອງປະເທດ ໃນການສືບຕໍ່ເສີມຂະຫຍາຍ ແລະ ຍົກລະດັບການພົວພັນລາວ-ຫວຽດນາມ ທີ່ບໍ່ຄືໃຜ ແລະ ບໍ່ມີໃຜຄື ໃຫ້ຫັນສູ່ລວງເລິກຂຶ້ນຕື່ມ ເພື່ອຜົນປະໂຫຍດຂອງປະຊາຊົນສອງປະເທດ ຢ່າງແທ້ຈິງ; ຄຽງຄູ່ກັນນັ້ນ ກໍ່ເຫັນດີ ແລະ ເປັນເອກະພາບ ກ່ຽວກັບການສະເຫຼີມສະຫຼອງສອງວັນປະຫວັດສາດ ແລະ ການກະກຽມປິດປີສາມັກຄີ ປີ 2022; ການກະກຽມຈັດກອງປະຊຸມ ຄັ້ງທີ 45 ຂອງຄະນະກຳມະການຮ່ວມມືທະວິພາຄີ ສອງລັດຖະບານ ທີ່ ສປປ ລາວ ຈະເປັນເຈົ້າພາບໃນທ້າຍປີນີ້. 
​​​​​​​ໃນໂອກາດດຽວກັນ, ທ່ານ ຟາມ ມິງ ຈິງ ກໍ່ໄດ້ກ່າວສະແດງຄວາມຍິນດີຕ້ອນຮັບ ພ້ອມທັງ ຊົມເຊີຍ ແລະ ຕີລາຄາສູງ ຕໍ່ຄະນະຜູ້ແທນ ຫສນຍ ລາວ ທີ່ໄດ້ເດີນທາງມາເຄື່ອນໄຫວຢ້ຽມຢາມ, ເຮັດວຽກ ແລະ ແລກປ່ຽນບົດຮຽນ ຮ່ວມກັບຫ້ອງວ່າການລັດຖະບານຫວຽດນາມ ໃນຄັ້ງນີ້ ເຊິ່ງເປັນການປະກອບສ່ວນສໍາຄັນ ເຂົ້າໃນເພີ່ມພູນຄູນສ້າງສາຍພົວພັນຮ່ວມມື ຂອງສອງພັກ, ສອງລັດ ແລະ ການສະເຫຼີມສະຫຼອງປີສາມັກຄີ ເວົ້າລວມ ເວົ້າສະເພາະ ແມ່ນເພື່ອຮັດແໜ້ນການຮ່ວມມື ແລະ ຄວາມສາມັກຄີພິເສດ ຂອງສອງຫ້ອງວ່າການ. ຄຽງຄູ່ກັນນັ້ນ, ກໍ່ເຫັນດີຕາມຄໍາເຫັນລາຍງານຂອງທ່ານ ລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີ ແຫ່ງ ສປປ ລາວ; ພ້ອມທັງຖືໂອກາດນີ້ ຢືນຢັນອີກເທື່ອໜຶ່ງວ່າ ຫວຽດນາມ ແລະ ລາວ ເປັນສອງປະເທດບ້ານໃກ້ເຮືອນຄຽງ ທີ່ສະໜິດສະໜົມ ປຽບເໝືອນອ້າຍນ້ອງຮ່ວມອຸທອນດຽວກັນ, ຫ່າງກັນພຽງສາຍພູດຽວເທົ່ານັ້ນ, ຮ່ວມສາຍແມ່ນ້ຳຂອງ, ມີສາຍພົວພັນອັນເປັນມູນເຊື້ອ ແລະ ຕິດພັນກັນມາຍາວນານ. ປະຊາຊົນສອງປະເທດ ໄດ້ປຽບເໝືອນອ້າຍນ້ອງໃນຄອບຄົວດຽວກັນ, ໄດ້ມີການບິແບ່ງ, ສະໜັບສະໜູນ ແລະ ຊ່ວຍເຫຼືອເຊິ່ງກັນ ແລະ ກັນ ຢ່າງເປັນປົກກະຕິ ໃນທຸກສະຖານະການ. ພ້ອມດຽວກັນນີ້, ທ່ານນາຍົກລັດຖະມົນຕີ ກໍ່ຍັງໄດ້ແຈ້ງສະພາບພົ້ນເດັ່ນ ການພັດທະນາເສດຖະກິດ-ສັງຄົມ ໃຫ້ຄະນະຜູ້ແທນ ຫສນຍ ຮັບຊາບ; ພ້ອມທັງກ່າວຍ້ອງຍໍຊົມເຊີຍ ຕີລາຄາສູງຕໍ່ຜົນສໍາເລັດທີ່ ພັກ ແລະ ລັດຖະບານ ສປປ ລາວ ອ້າຍນ້ອງ ທີ່ສາມາດຍາດມາໄດ້ຕະຫຼອດໄລຍະຜ່ານມາ ແລະ ເຊື່ອໝັ້ນວ່າ ພາຍໃຕ້ການນໍາພາຂອງພັກ, ລັດຖະບານລາວ ຈະສາມາດຜ່ານຜ່າຂໍ້ຫຍຸ້ງຍາກນາໆປະການ ເພື່ອບັນລຸມີຜົນສໍາເລັດໃໝ່ຍິ່ງໃຫຍ່ກວ່າເກົ່າ ຕາມທີ່ໄດ້ກໍານົດຢູ່ໃນມະຕິກອງປະຊຸມໃຫຍ່ຂອງພັກ ກໍ່ຄື ແຜນພັດທະນາເສດຖະກິດ-ສັງຄົມແຫ່ງຊາດ ເພື່ອນໍາພາປະເທດຊາດຂອງຕົນ ກ້າວໜ້າຂຶ້ນໃຫ້ນັບມື້ນັບສີວິໄລ ແລະ ວັດທະນາຖາວອນ;
​​​​​​​​ໃນຕອນທ້າຍ ທ່ານນາຍົກລັດຖະມົນຕີ ຍັງໄດ້ສະເໜີໃຫ້ສອງຫ້ອງວ່າການ ຮ່ວມກັນສືບຕໍ່ຜັນຂະຫຍາຍບົດບັນທຶກ, ແຜນການ ແລະ ໂຄງການຮ່ວມມື ໃນໄລຍະປີ 2022-2023 ຂອງສອງຫ້ອງວ່າການ ໃຫ້ມີປະສິດທິຜົນ ແລະ ສຳເລັດຕາມຄາດໝາຍທີ່ວາງໄວ້; ສືບຕໍ່ປະສານງານ, ພົວພັນແລກປ່ຽນບົດຮຽນ ກ່ຽວກັບການແກ້ໄຂວຽກງານ ໂດຍສະເພາະ ຍົກສູງຄຸນນະພາບໃນການເຮັດໜ້າທີ່ ເປັນເສນາທິການ, ສັງລວມ ຊ່ວຍລັດຖະບານ ກໍ່ຄື ທ່ານນາຍົກ ລັດຖະມົນຕີ. ຄຽງຄູ່ກັນນັ້ນ, ກໍ່ໃຫ້ປະສານສົມທົບແໜ້ນກັບພາກສ່ວນກ່ຽວຂ້ອງ ເພື່ອຊຸກຍູ້, ແກ້ໄຂ ບັນດາຂໍ້ຫຍຸ້ງຍາກ, ຂໍ້ຄົງຄ້າງ, ກວດກາຄືນ ຄວາມຄືບໜ້າການຈັດຕັ້ງປະຕິບັດ ບັນດາໂຄງການຮ່ວມມື ທີ່ການນໍາຂອງສອງປະເທດ ໄດ້ຕົກລົງກັນນັ້ນ ໃຫ້ມີປະສິດທິຜົນ ແລະ ມີຜົນສໍາເລັດຕາມໄລຍະເວລາທີ່ໄດ້ກໍານົດ; ກະກຽມຄວາມພ້ອມເພື່ອຮັບປະກັນຮອບດ້ານໃຫ້ແກ່ການຢ້ຽມຢາມ ຂອງການນໍາຂັ້ນສູງ 2 ປະເທດ ຕະຫຼອດໄລຍະສະເຫຼີມສະຫຼອງປີສາມັກຄີ 2022 ນີ້; ສະເໜີໃຫ້ ສປປ ລາວ ສ້າງເງື່ອນໄຂ ແລະ ອໍານວຍຄວາມສະດວກ ໃຫ້ແກ່ນັກທຸລະກິດ ກໍ່ຄື ຜູ້ປະກອບການ ທີ່ມີເງື່ອນໄຂ ໄດ້ໄປລົງທຶນຢູ່ ສປປ ລາວ ໂດຍສະເພາະ ໃນຂົງເຂດກະສິກໍາ ຕື່ມອີກ.​​


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ