ທ່ານລັດຖະມົນຕີ, ຫົວໜ້າ ຫສນຍ ເຄື່ອນໄຫວ ຕິດຕາມຊຸກຍູ້ວຽກງານ ຢູ່ແຂວງ ຈໍາປາສັກ

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນພຸດ, 31 ສ.ຫ 2022 11:00


    ໃນວັນທີ 29 ສິງຫາ 2022 ທີ່ຜ່ານມາ, ທ່ານ ອາລຸນໄຊ ສູນນະລາດ, ລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີ (ຫສນຍ) ພ້ອມດ້ວຍຄະນະ ໄດ້ເຄື່ອນໄຫວຕິດຕາມ, ຊຸກຍູ້ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ຢູ່ແຂວງຈໍາປາສັກ ໂດຍການຕ້ອນຮັບ ຂອງທ່ານ ໂສມ ບຸດຕະກຸນ, ຮອງເຈົ້າແຂວງໆຈໍາປາສັກ, ມີບັນດາທ່ານການນໍາຂອງແຂວງ, ການນໍາຂອງນະຄອນ, ເມືອງ ພ້ອມດ້ວຍບັນດາພະແນກການອ້ອມຂ້າງພາຍໃນແຂວງ ເຂົ້າຮ່ວມ.

    ໃນໂອກາດນີ້ ທ່ານ ລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີ ກໍ່ໄດ້ແຈ້ງຈຸດປະສົງ ໃຫ້ບັນດາຜູ້ເຂົ້າຮ່ວມກອງປະຊຸມ ຮັບຊາບ ເປັນຕົ້ນ ເພື່ອຕິດຕາມ, ກວດກາ ແລະ ຊຸກຍູ້ວຽກງານ ຄຸ້ມຄອງບໍລິຫານລັດ ຕາມກົດໝາຍ, ນິຕິກຳຕ່າງໆ ຂອງລັດຖະບານ, ແຜນພັດທະນາເສດຖະກິດ-ສັງຄົມ; ການຈັດຕັ້ງປະຕິບັດແຜນດຳເນີນງານ ແລະ ການຊີ້ນຳຂອງທ່ານ ນາຍົກລັດຖະມົນຕີ ແລະ ບັນດາທ່ານຮອງນາຍົກລັດຖະມົນຕີ; ຊຸກຍູ້ ແລະ ແລກປ່ຽນບົດຮຽນການຍົກສູງຄຸນນະພາບວຽກງານເສນາທິການໃນໄລຍະໃໝ່ ໃຫ້ເດັດຂາດ, ໂປ່ງໃສ ແລະ ມີຫຼັກວິຊາການ (ເປັນມືອາຊີບ); ລົງຕິດຕາມ ຊຸກຍູ້ບາງສະຖານທີ່ຕົວຈິງ ພາຍໃນແຂວງຈໍານວນໜຶ່ງ.

    ໃນໂອກາດດຽວກັນ, ທ່ານລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີ ພ້ອມດ້ວຍຄະນະ ໄດ້ຮັບຟັງການລາຍງານ ການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມ 6 ເດືອນຕົ້ນປີ ແລະ ທິດທາງ 6 ເດືອນ ທ້າຍປີ 2022 ຂອງແຂວງຈໍາປາສັກ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ ໂດຍຍົກໃຫ້ເຫັນບາງຄາດໝາຍ ແຜນພັດທະນາເສດຖະກິດ-ສັງຄົມ ໂດຍສະເພາະ ແມ່ນການສົ່ງເສີມການຜະລິດ ເພື່ອທົດແທນການນໍາເຂົ້າ ແລະ ການຜະລິດເປັນສິນຄ້າສົ່ງອອກ ເພື່ອສ້າງຖານລາຍຮັບທີ່ເຂັ້ມແຂງ, ຍືນຍົງ, ໂຄງການສົ່ງເສີມການຕະຫຼາດ ແລະ ຈໍາໜ່າຍສິນຄ້າ, ໂຄງການຂະຫຍາຍຕະໜ່າງຕະຫຼາດ, ຮ້ານຄ້າທັນສະໄໝ, ເກັບຊື້ ແລະ ຈໍລະຈອນສິນຄ້າ, ການຊຸກຍູ້ສົ່ງເສີມໂຄງການພະລັງງານໄຟຟ້າ ທີ່ມີປະສິດທິຜົນ, ພັດທະນາໂຄງການຜະລິດພະລັງງານໄຟຟ້າ (ພະລັງງານນໍ້າ ໄຟຟ້າພະລັງງານລົມ, ໄຟຟ້າແສງອາທິດ ແລະ ໄຟຟ້າຊີວະພາບ) ເພື່ອຕອບສະໜອງຄວາມຕ້ອງການພະລັງງານທີ່ເພີ່ມຂຶ້ນ ແລະ ເພື່ອທົດແທນການນຳເຂົ້າພະລັງງານ ຈາກປະເທດເພື່ອນບ້ານ. ສໍາລັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແຂວງໄດ້ຜັນຂະຫຍາຍເປັນແຜນການ, ແຜນງານ ໃນ 5 ວຽກຈຸດສຸມ ຄື: ສ້າງຄວາມຮັບຮູ້ໃນທົ່ວສັງຄົມ ໂດຍການສຶກສາອົບຮົມ, ໂຄສະນາເຜີຍແຜ່ກົດໝາຍ ແລະ ຜົນຮ້ານຂອງຢາເສບຕິດ; ວຽກງານປັບປຸງການຈັດຕັ້ງ ແລະ ຍົກລະດັບຄວາມສາມາດ ໃນການເຄື່ອນໄຫວເຮັດໜ້າທີ່ການເມືອງ ຂອງອົງການສືບສວນ-ສອບສວນ ແລະ ພາກສ່ວນທີ່ກ່ຽວຂ້ອງ ຕໍ່ການແກ້ໄຂບັນຫາຢາເສບຕິດ; ວຽກງານປະສິດທິພາບ ທາງດ້ານການຄຸ້ມຄອງຊີ້ນໍາການຈັດຕັ້ງປະຕິບັດຮອບດ້ານ ໃນການແກ້ໄຂບັນຫາຢາເສບຕິດ; ວຽກງານປັບປຸງຂີດຄວາມສາມາດ ໃນການເຮັດໜ້າທີ່ຂອງລະບົບການເມືອງແຕ່ລະຊັ້ນ ເພື່ອນໍາພາ-ຊີ້ນໍາແກ້ໄຂບັນຫາຢາເສບຕິດ ທີ່ເກີດຂຶ້ນຢູ່ໃນຄວາມຮັບຜິດຊອບຂອງຕົນ ແລະ ວຽກງານພົວພັນຮ່ວມມືກັບຕ່າງປະເທດ ແລະ ທິດທາງແຜນການຈັດຕັ້ງປະຕິບັດ ວຽກງານຈຸດສຸມໃນຕໍ່ໜ້າ.

ຕອນທ້າຍກອງປະຊຸມ, ທ່ານ ລັດຖະມົນຕີ ຫົວໜ້າຫ້ອງວ່າການສໍານັກງານນາຍົກລັດຖະມົນຕີ ກໍໄດ້ມີຄໍາເຫັນແລກປ່ຽນກັບຄະນະພັກ-ຄະນະນໍາອົງການປົກຄອງແຂວງ, ເນື້ອໃນສໍາຄັນ ທ່ານໄດ້ມີຄໍາເຫັນສະເໜີຄະນະພັກ, ຄະນະນໍາ ອົງການປົກຄອງແຂວງ ພິຈາລະນາ ເປັນຕົ້ນ ການເພີ່ມທະວີວຽກງານການຕ່າງປະເທດ, ການຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມຊາຍແດນ; ເອົາໃຈໃສ່ການຊຸກຍູ້ສົ່ງເສີມ ການຈັດເກັບລາຍຮັບງົບປະມານແຫ່ງລັດ ໃຫ້ໄດ້ຕາມແຜນການທີ່ວາງໄວ້, ຄຸ້ມຄອງລາຍຈ່າຍ ມີການຕິດຕາມກວດກາຢ່າງເຂັ້ມງວດ, ຖືກຕ້ອງ, ສອດຄ່ອງກັບກົດໝາຍ, ລະບຽບການ ທີ່ກໍານົດອອກ; ເອົາໃຈໃສ່ດຶງດູດການລົງທຶນ ທັງພາຍໃນ ແລະ ຕ່າງປະເທດ ໃຫ້ນັບມື້ນັບເພີ່ມຂຶ້ນ, ເອົາໃຈໃສ່ຕິດຕາມກວດກາ ການຈັດຕັ້ງປະຕິບັດວຽກງານ 3 ສ້າງ ຢູ່ທ້ອງຖິ່ນຮາກຖານ ທີ່ເຫັນວ່າເຮັດບໍ່ທັນໄດ້ດີ ແລະ ສືບຕໍ່ເອົາໃຈໃສ່ຕິດຕາມ, ເຝົ້າລະວັງພະຍາດຕາມລະດູການ ແລະ ການແຜ່ລະບາດຂອງພະຍາດໂຄວິດ-19 ພາຍຫຼັງທີ່ມີການເປີດປະເທດ, ທັງນີ້ ກໍເພື່ອເຮັດໃຫ້ການພັດທະນາເສດຖະກິດ-ສັງຄົມ ພາຍໃນແຂວງ ສືບຕໍ່ໄດ້ຮັບການຂະຫຍາຍຕົວຂຶ້ນໄປເລື້ອຍໆ.

   ໃນໂອກາດເຄື່ອນໄຫວເຮັດວຽກຢູ່ແຂວງ ຈໍາປາສັກຄັ້ງນີ້ ທ່ານລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີ ພ້ອມດ້ວຍຄະນະ ຍັງໄດ້ລົງຕິດຕາມສະພາບການຈັດຕັ້ງປະຕິບັດວຽກງານຕົວຈິງ ຢູ່ດ່ານສາກົນໜອງນົກຂຽນ, ດ່ານສາກົນວັງເຕົ່າ, ໄປພົບປະກອງຮ້ອຍປ້ອງກັນຊາຍແດນ 526 ແລະ ໂຄງການພັດທະນາມະຫານະທີ ສີທັນດອນ ຕື່ມອີກ.


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ