ທ່ານ ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ເຂົ້າຮ່ວມຂະບວນການປູກຕົ້ນໄມ້

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນຈັນ, 23 ພ.ພ 2022 10:00

​​ໃນຕອນເຊົ້າ ວັນທີ 22 ພຶດສະພາ 2022 ທ່ານ ອາລຸນໄຊ ສູນນະລາດ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ພ້ອມດ້ວຍ ຄະນະບໍລິຫານງານຊາວໜຸ່ມ ຫ້ອງວ່າການສຳນັກງານນາຍົກລັດຖະມົນຕີ ໄດ້ ເຂົ້າຮ່ວມຂະບວນການປູກຕົ້ນໄມ້ ຮ່ວມກັບຄະນະບໍລິຫານງານຊາວໜຸ່ມ ກະຊວງກະສິກຳ ແລະ ປ່າໄມ້, ຕາງໜ້າຄະນະບໍລິຫານງານສູນກາງຊາວໜຸ່ມ ແລະ ບັນດາຊາວໜຸ່ມແຮກສ່ຽວ ກະຊວງ-ອົງການ ອ້ອມຂ້າງສູນກາງ ເນື່ອງໃນໂອກາດວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ວັນທີ 1 ມິຖຸນາ ຢູ່ທີ່ສູນພັດທະນາ ແລະ ບໍລິການ ດ້ານການກະເສດ ຫ້ວຍຊອນ-ຫ້ວຍຊົ້ວ, ເມືອງນາຊາຍທອງ, ນະຄອນຫຼວງວຽງຈັນ.

ການປູກຕົ້ນໄມ້ດັ່ງກ່າວ ແມ່ນການປະກອບສ່ວນເພີ່ມເນື້ອທີ່ປົກຫຸ້ມຂອງປ່າໄມ້ ໃນທົ່ວປະເທດ ໃຫ້ກວມຫຼາຍກວ່າ 70% ຕາມຄາດໝາຍ ທີ່ມະຕິກອງປະຊຸມໃຫຍ່ ຄັ້ງທີ XI ຂອງພັກ ກໍ່ຄືແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ໄດ້ກໍານົດໄວ້ ໃຫ້ປະກົດຜົນເປັນຈິງ ເວົ້າລວມ, ເວົ້າສະເພາະ ແມ່ນເພີ່ມເນື້ອທີ່ປົກຫຸ້ມສີຂຽວ ກວມອັດຕາສູງຂຶ້ນ, ສ້າງລະບົບນິເວດ ແລະ ສະພາບແວດລ້ອມທຳມະຊາດ ໃຫ້ມີຄວາມຊຸ່ມຊື່ນ, ອຸດົມສົມບູນ, ຂຽວສົດງົດງາມ, ຊ່ວຍຕ້ານ ແລະ ຫຼຸດຜ່ອນຜົນກະທົບ ຈາກໄພພິບັດທຳມະຊາດ, ພ້ອມກັນນັ້ນ ກໍ່ເປັນການສ້າງຂະບວນການ ເນື່ອງໃນໂອກາດ ວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ວັນທີ 1 ມິຖຸນາ ປີນີ້ ໃຫ້ມີຄວາມໝາຍສຳ ຄັນ, ມີຄວາມເບີກບານມ່ວນຊື່ນ, ເຮັດໃຫ້ຊາວໜຸ່ມ ກະຊວງກະສິກຳ ແລະ ປ່າໄມ້ ແລະ ບັນດາຊາວໜຸ່ມແຮກສ່ຽວ ໄດ້ມີໂອກາດສ້າງກິດຈະກຳຮ່ວມກັນ, ພົບປະແລກປ່ຽນບົດຮຽນເຊິ່ງກັນ ແລະ ກັນ ແລະ ຮັດແໜ້ນຄວາມສາມັກຄີ ໃຫ້ແໜ້ນແຟ້ນກວ່າເກົ່າ.


​​ກິດຈະກຳ ສຳລັບຂະບວນການໃນຄັ້ງນີ້, ຜູ້ເຂົ້າຮ່ວມ ໄດ້ພ້ອມກັນປູກຕົ້ນໄມ້, ຫວ່ານແນວພັນຫຍ້າ, ຢ້ຽມຢາມບັນກິດຈະກຳພາຍໃນສູນ ແລະ ມອບເຄື່ອງຊ່ວຍເຫຼືອນ້ອງນ້ອຍນັກຮຽນ ຢູ່ໂຮງຮຽນປະຖົມ ບ້ານນາຍາງ, ເມືອງນາຊາຍທອງ. ໃນໂອກາດນີ້, ທ່ານ ອາລຸນໄຊ ສູນນະລາດ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນ ຕີ ໄດ້ມີຄຳເຫັນກ່າວເນັ້ນໜັກ ໃຫ້ສູນພັດທະນາ ແລະ ບໍລິການ ດ້ານການກະເສດ ຫ້ອຍຊອນ-ຫ້ວຍຊົ້ວ ເອົາໃຈໃສ່ເສີມຂະຫຍາຍແນວຄິດປະທານ ໄກສອນ ພົມວິຫານ ໂດຍສະເພາະ ຖື 4 ແນວຄິດຕິດພັນການພັດທະນາກະສິກຳ ເພື່ອຄວາມຍືນຍົງ ແລະ ຍາວນານ ຄື: ຕິດພັນກັບການຕະຫຼາດ, ຕິດພັນວຽກງານກໍ່ສ້າງຮາກຖານ, ນໍາໃຊ້ເຕັກໂນໂລຊີ ເຂົ້າໃນການພັດທະກະສິກຳ ແລະ ຕ້ອງຕິດພັນກັບການທອງທ່ຽວ ໃນນັ້ນ ສະເພາະການກໍ່ສ້າງຮາກຖານ ຕ້ອງເສີມຂະຫຍາຍມູນ ເຊື້ອອັນດີງາມຂອງຮາກຖານ, ເຂົ້າໃຈທ່າແຮງ ແລະ ຄວາມຮຽກຮ້ອງຕ້ອງການຂອງຮາກຖານ ເພື່ອພັດທະນາຮາກຖານ ໃຫ້ມີແນວຄິດເປັນເຈົ້າຕົນເອງ, ເພິ່ງຕົນເອງ ແລະ ສ້າງຄວາມເຂັ້ມແຂງ ດ້ວຍຕົນເອງ.​
​​

ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ