ຫສນຍ ເປີດຝຶກອົບຮົມວຽກງານກວດກາ ພັກ-ລັດ

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນພະຫັດ, 19 ພ.ພ 2022 12:00

     ໃນຕອນເຊົ້າຂອງວັນທີ 18 ພຶດສະພາ 2022 ຫ້ອງວ່າການສຳນັກງານນາຍົກລັດຖະມົນຕີ ໄດ້ເປີດການຝຶກອົບຮົມວຽກງານກວດກາພັກ ແລະ ກວດກາລັດ, ໂດຍການໃຫ້ກຽດເຂົ້າຮ່ວມກ່າວເປີດຂອງ ສະຫາຍ ນາງ ທິບພະກອນ ຈັນທະວົງສາ, ຄະນະປະຈໍາພັກ, ປະທານກວດກາພັກ, ຮອງລັດຖະມົນຕີ, ຮອງຫົວໜ້າຫ້ອງວ່າການສໍານັກງານນາຍົກ ລັດຖະມົນຕີ, ມີບັນດາສະຫາຍຕາງໜ້າຄະນະພັກຮາກຖານ ແລະ ໜ່ວຍພັກ, ຜູ້ກວດກາຂອງຄະນະພັກຮາກຖານ, ໜ່ວຍພັກ, ອົງການຈັດຕັ້ງມະຫາຊົນ ແລະ ພະນັກງານກົມກວດກາ ຂອງຫ້ອງວ່າການສໍານັກງານນາຍົກລັດຖະມົນຕີ ເຂົ້າຮ່ວມ.


   ຈຸດປະສົງຂອງການຈັດຝຶກອົບຮົມໃນຄັ້ງນີ້ ແມ່ນເພື່ອຍົກສູງວຽກງານກວດກາພາຍໃນຫ້ອງວ່າການສຳນັກງານນາຍົກລັດຖະມົນຕີ ກໍ່ຄື ຍົກສູງຄຸນນະພາບຄວາມເປັນມືອາຊີບຂອງພະນັກງານທີ່ເຮັດວຽກງານກວດກາ ແລະ ການເປັນເສນາທິການ ໃຫ້ຄະນະພັກ, ຄະນະນຳ ຫສນຍ ໃນຖານະເປັນເຈົ້າພະນັກງານ ກວດກາ-ກວດການ ໃຫ້ມີຄວາມຖືກຕ້ອງ ແລະ ສອດຄ່ອງ ກັບມະຕິ, ຄຳສັ່ງ, ກົດໝາຍ ແລະ ລະບຽບການຕ່າງໆຂອງ ພັກ ແລະ ລັດ ກຳນົດໄວ້. ການຝຶກອົບຮົມຄັ້ງນີ້ ຈະດຳເນີນແຕ່ວັນທີ  18-31 ພຶດສະພາ 2022 ເຊິ່ງຈະໄດ້ເນັ້ນໜັກກ່ຽວກັບວຽກງານກວດກາພັກ ແລະ ກວດກາລັດ, ວຽກງານຕ້ານ ແລະ ສະກັດກັ້ນການສໍ້ລາດບັງຫຼວງ ແລະ ວຽກງານໜ່ວຍພັກປອດໃສເຂັ້ມແຂງໜັກແໜ້ນ ເພື່ອໃຫ້ພະນັກງານມີທັກສະ, ເຕັກນິກທີ່ເປັນພື້ນຖານ ໃນການປະຕິບັດໜ້າທີ່ວຽກງານກວດກາ. ເພື່ອເຮັດໃຫ້ການຝຶກອົບຮົມຄັ້ງນີ້ ໄດ້ດຳເນີນ ແລະ ສຳເລັດຕາມແຜນການ ທີ່ວາງໄວ້, ທ່ານປະທານກອງປະຊຸມ ໄດ້ຮຽກຮ້ອງໃຫ້ຜູ້ເຂົ້າຮ່ວມຝຶກອົບຮົມ ຈົ່ງພ້ອມກັນເອົາໃຈໃສ່ ແລະ ເປັນເຈົ້າການ ໃນການເຂົ້າຮ່ວມການຝຶກອົບຮົມໃນຄັ້ງນີ້ ດ້ວຍຄວາມຮັບຜິດຊອບສູງ, ສຸມສະຕິປັນຍາ ເຂົ້າໃນການແລກປ່ຽນບົດຮຽນ ກັບບັນດາຄູ-ອາຈານຢ່າງສ້າງສັນ, ສິ່ງສໍາຄັນ ແມ່ນໃຫ້ເອົາໃຈໃສ່ຖອດຖອນບົດຮຽນ ທີ່ໄດ້ຈາກການຝຶກອົບຮົມໃນຄັ້ງນີ້ ໄປໝູນໃຊ້ເຂົ້າໃນການປະຕິບັດ ໜ້າທີ່ວຽກງານຕົວຈິງຂອງຕົນ ໃຫ້ມີປະສິດທິຜົນ ສູງຂຶ້ນກວ່າເກົ່າ.


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ