ຫສນຍ ແລະ ແຂວງສາລະວັນ ພົບປະແລກປ່ຽນບົດຮຽນ ເພື່ອຍົກສູງຄຸນນະພາບ ວຽກງານເສນາທິການ ໃນໄລຍະໃໝ່

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພະຫັດ, 19 ພ.ພ 2022 10:00

​ ໃນຕອນເຊົ້າວັນທີ 18 ພຶດສະພາ 2022 ຢູ່ຫ້ອງວ່າການສໍານັກງານນາຍົກລັດຖະມົນຕີ ໄດ້ມີການພົບປະແລກປ່ຽນບົດຮຽນ ກ່ຽວກັບວຽກງານເສນາທິການ ລະຫວ່າງ ຫ້ອງວ່າການສຳນັກງານນາຍົກລັດຖະມົນຕີ (ຫສນຍ) ແລະ ແຂວງສາລະວັນ, ເຊິ່ງ ຫສນຍ ນໍາໂດຍທ່ານ ຮສ.ປອ. ສົມກຽດ ພະສີ, ຮອງລັດຖະມົນຕີ, ຮອງຫົວໜ້າ ຫສນຍ ແລະ ແຂວງສາລະວັນ ນຳໂດຍທ່ານ ພູທົງ ຄຳມະນີວົງ, ຮອງເຈົ້າແຂວງໆສາລະວັນ; ມີທ່ານຫົວໜ້າຫ້ອງວ່າການແຂວງ, ເຈົ້າເມືອງ ແລະ ຫົວໜ້າພະແນກການ ທີ່ກ່ຽວຂ້ອງຂອງແຂວງສາລະວັນ, ບັນດາທ່ານ ຄະນະກົມ ແລະ ຄະນະພະແນກທີ່ກ່ຽວຂ້ອງ ພາຍໃນ ຫສນຍ ເຂົ້າຮ່ວມ ຢ່າງພ້ອມພຽງ.

ໃນໂອກາດນີ້, ທ່ານ ຮສ.ປອ. ສົມກຽດ ພະສີ ຕາງໜ້າຫ້ອງວ່າການສຳນັກງານນາຍົກລັດຖະມົນຕີ ໄດ້ກ່າວສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງ ຕໍ່ການເດີນທາງມາພົບປະແລກປ່ຽນບົດຮຽນ ກ່ຽວກັບວຽກງານເປັນເສນາທິການໃຫ້ການນຳ ຮ່ວມກັບ ຫສນຍ ໃນຄັ້ງນີ້, ລວມທັງ ບັນດາຜົນສຳເລັດ ທີ່ທາງແຂວງ ສາມາດປະຕິບັດໄດ້ ໃນໄລຍະຜ່ານມາ, ເຊິ່ງການມາເຮັດວຽກດັ່ງກ່າວ ຍັງໄດ້ນຳເອົາວຽກງານສຳຄັນ ທີ່ຢູ່ໃນຄວາມຮັບຜິດຊອບຂອງທ້ອງຖິ່ນຕົນ ໂດຍສະເພາະ ວຽກງານທີ່ຕ້ອງໄດ້ສືບຕໍ່ແກ້ໄຂ ແລະ ພັດທະນາໃຫ້ດີຂຶ້ນ ນຳມາສະເໜີປຶກສາຫາລືແລກປ່ຽນຄຳຄິດເຫັນເຊິ່ງກັນ ແລະ ກັນ ເພື່ອຄົ້ນຄວ້າວິທີການແກ້ໄຂທີ່ເໝາະສົມ ແລະ ເກີດປະໂຫຍດສູງສຸດ ແກ່ປະເທດຊາດ ແລະ ປະຊາຊົນ ເວົ້າລວມ, ເວົ້າສະເພາະ ແມ່ນຄວາມພະຍາຍາມ ໃນການປັບປຸງ ແລະ ພັດທະນາ ວຽກງານເສນາທິການ ແລະ ການບໍລິການຮັບໃຊ້ຂັ້ນເທິງ ແລະ ປະຊາຊົນ ພາຍໃນແຂວງ ສາລະວັນ ໃຫ້ມີປະສິດທິພາບ ແລະ ປະສິດ ທິຜົນສູງຂຶ້ນກວ່າເກົ່າ ເປັນກ້າວໆ.​
ໃນໂອກາດດຽວກັນ, ທ່ານ ພູທົງ ຄຳມະນີວົງ ຕາງໜ້າອົງການປົກຄອງແຂວງສາລະວັນ ໄດ້ລາຍງານໃຫ້ຊາບ ກ່ຽວກັບສະພາບການພັດທະນາເສດຖະກິດ-ສັງຄົມ ຂອງແຂວງ ເວົ້າລວມ, ເວົ້າສະເພາະ ແມ່ນການປະຕິບັດພາລະບົດບາດ ການເປັນເສນາທິການ ໃຫ້ແກ່ຂັ້ນເທິງ ໃນດ້ານຕ່າງໆ ເປັນຕົ້ນ ການຄົ້ນຄວ້າ, ການລາຍງານ, ການປະສານງານ, ການປະຕິບັດແຜນງານ, ແຜນການ, ໂຄງການ ແລະ ອື່ນໆ ທີ່ອົງການປົກຄອງແຂວງ ຈັດຕັ້ງປະຕິບັດຕົວຈິງ ແລ້ວພົບຄວາມຫຍຸ້ງຍາກ, ລວມທັງ ສະພາບຄວາມຮຽກຮ້ອງຕ້ອງການ ໃນການພັດທະນາດ້ານຕ່າງໆ ເພື່ອເປັນພື້ນຖານອັນສຳຄັນ ແລະ ເອື້ອອຳນວຍ ໃຫ້ແກ່ພັດທະນາເສດຖະກິດ-ສັງຄົມຂອງແຂວງ ຂະຫຍາຍຕົວຢ່າງຕໍ່ເນື່ອງ ແລະ ໜັກແໜ້ນ ເປັນກ້າວໆ. ນອກຈາກນັ້ນ, ບັນດາທ່ານ ຫົວໜ້າພະແນກການຂອງແຂວງ ກໍ່ໄດ້ມີຄຳເຫັນແລກປ່ຽນ ຕໍ່ຂົງເຂດວຽກງານ ທີ່ຕິດພັນກັບຂະແໜງການຂອງຕົນຮັບຜິດຊອບ ຕື່ມອີກ.  

ການພົບປະແລກປ່ຽນຄຳຄິດເຫັນ ເຊິ່ງກັນ ແລະ ກັນ ລະຫວ່າງ ຫສນຍ ກັບ ແຂວງສາລະວັນ ໃນຄັ້ງນີ້ ແມ່ນ ການຜັນຂະຫຍາຍ ແລະ ຈັດຕັ້ງປະຕິບັດກົນໄກການພົວພັນ ລະຫວ່າງ ກະຊວງ ແລະ ອົງການທຽບເທົ່າຂັ້ນສູນກາງ ກັບອົງການປົກຄອງທ້ອງຖິ່ນ ຕາມທີ່ໄດ້ກຳນົດໄວ້ ໃນມາດຕາ 8 ຂອງ ຂໍ້ຕົກລົງ ສະບັບເລກທີ 41/ນຍ, ລົງວັນທີ 30 ເມສາ 2021 ວ່າດ້ວຍລະບຽບການ ແລະ ກົນໄກການເຮັດວຽກ ຂອງລັດຖະບານ ຊຸດທີ IX ເພື່ອແລກປ່ຽນຂໍ້ມູນຂ່າວສານ, ຊຸກຍູ້, ຕິດຕາມຄວາມຄືບໜ້າ ການຈັດຕັ້ງປະຕິບັດ ແຜນງານ, ແຜນການ ແລະ ນິຕິກຳ ຂອງລັດຖະບານ ແລະ ນາຍົກລັດຖະມົນຕີ ທີ່ປະກາດໃຊ້ແລ້ວ ໃຫ້ໄດ້ຮັບຜົນສຳເລັດ ຕາມຄາດໝາຍທີ່ກຳນົດໄວ້.
                   
ພາບ ແລະ ຂ່າວ: ກົມປະຊາສຳພັນ ຫສນຍ

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ