ທ່ານ ລັດຖະມົນຕີ ປະຈຳ ສນຍ ເຂົ້າຮ່ວມພິທີເປີດຈຸດຄ່ຽນຖ່າຍສິນຄ້າ ຜ່ານດ່ານສາກົນລານຕຸ້ຍ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນສຸກ, 05 ກ.ພ 2021 17:00

​ໃນວັນທີ 3 ກຸມພາ 2021 ທ່ານ ສຈ.ປອ. ຈະເລີນ ເຢຽປາວເຮີ, ລັດຖະມົນຕີປະຈຳສຳນັກງານນາຍົກລັດຖະ ມົນຕີ ແລະ ທ່ານ ຄຳຜອຍ ວັນນະສານ, ເຈົ້າແຂວງຜົ້ງສາລີ ພ້ອມດ້ວຍຄະນະ ໄດ້ໃຫ້ກຽດເຂົ້າຮ່ວມພິທີເປີດບໍລິສັດ ຕົ່ງ ກໍ່ສ້າງ ແລະ ບໍລິການ ສາງຝາກສິນຄ້າ, ຄ່ຽນຖ່າຍສິນຄ້າ ແລະ ທ່ອງທ່ຽວຄົບວົງຈອນ ຈຳກັດຜູ້ດຽວ ທີ່ບ້ານຊຽງສ້ຽວ, ເມືອງຍອດອູ, ແຂວງຜົ້ງສາລີ ເພື່ອບໍລິການການຂົນສົ່ງສິນຄ້າ ທີ່ເຂົ້າ-ອອກ ຜ່ານດ່ານສາກົນລານຕຸ້ຍ.
​ໃນພິທີ, ທ່ານ ອຸນຈັງ ຈັນຕະພົມ ໄດ້ຕາງໜ້າບໍລິສັດ ຂຶ້ນລາຍງານ ສະພາບການກໍ່ສ້າງກິດຈະການຂອງບໍລິສັດ ວ່າ: ໂຄງການກໍ່ສ້າງສະຖານທີ່ຄ່ຽນຖ່າຍສິນຄ້າ, ພັກລົດສິນຄ້າ, ສາງຝາກສິນຄ້າ ແລະ ກິດຈະການທ່ອງທ່ຽວຄົບວົງຈອນ ໄດ້ເຊັນສັນຍາກໍ່ສ້າງ ໃນເດືອນກໍລະກົດ 2018 ລະຫວ່າງ ອົງການປົກຄອງແຂວງຜົ້ງສາລີ ຕາງໜ້າໂດຍພະແນກແຜນການ ແລະ  ການລົງທຶນ ແລະ ບໍລິສັດ ຕົ່ງກໍ່ສ້າງ ແລະ ບໍລິການສາງຝາກສິນຄ້າ, ຄ່ຽນຖ່າຍສິນຄ້າ, ພັກລົດສິນຄ້າ ແລະ ທ່ອງທ່ຽວຄົບວົງຈອນຈຳກັດຜູ້ດຽວ. ພ້ອມກັນນັ້ນ ໃນເດືອນສິງຫາ 2020 ກະຊວງການເງິນ ກໍ່ໄດ້ອອກຂໍ້ຕົກລົງ ວ່າດ້ວຍການອະນຸຍາດສ້າງຕັ້ງສະຖານທີ່ພັກລົດສິນຄ້າ ແລະ ສາງເກັບສິນຄ້າ; ໃນເດືອນຕຸລາ 2020  ກົມພາສີ, ກະຊວງການເງິນ ກໍ່ໄດ້ອອກຂໍ້ຕົກລົງ ວ່າດ້ວຍການກຳນົດເລກລະຫັດໜ່ວຍງານຄູ້ມຄອງ ແລະ ບໍລິຫານວຽກງານພາສີ ຢູ່ສະຖານທີ່ພັກລົດສິນຄ້າ ແລະ ສາງເກັບສິນຄ້າ, ຊຶ່ງນັບແຕ່ມື້ເຊັນສັນຍາກໍ່ສ້າງ ຮອດປະຈຸບັນ ການກໍ່ສ້າງໂຄງລ່າງພື້ນຖານຕ່າງໆ ແມ່ນສຳເລັດໂດຍພື້ນຖານ ເປັນຕົ້ນ ການບຸກເບີກ-ດຸດປັບພື້ນທີ່, ການປູຫີນໜີບແໜ້ນ, ການກໍ່ສ້າງເດີ່ນພັກລົດ, ການກໍ່ສ້າງຈຸດຄ່ຽນຖ່າຍສິນຄ້າໃນຮົ່ມ ແລະ ກາງແຈ້ງ, ການກໍ່ສ້າງສາງຝາກສິນຄ້າ, ກໍ່ສ້າງຫ້ອງການເຮັດວຽກຂອງບໍລິສັດ, ຫ້ອງການພາສີ, ຫ້ອງການກະສີກຳ, ເຮືອນນອນຂອງພະນັກງານບໍລິສັດ, ພະນັກງານພາສີ, ພະນັກ ງານກະສີກຳ; ການຕິດຕັ້ງຊິງຊັ່ງ, ຕິດຕັ້ງປ້າຍບໍລິສັດ, ປ້າຍຫ້ອງການ, ຕິດຕັ້ງຄອມພິວເຕີ, ຕິດຕັ້ງລະບົບອະຊິກຸດະ (ASYCUDA) ເພື່ອເຊື່ອມຕໍ່ຖານຂໍ້ມູນໃຫຍ່, ຕິດຕັ້ງລະບົບຮັກສາຄວາມປອດໄພ, ລ້ອມຮົ້ວອ້ອມສຳນັກງານ ແລະ ອື່ນໆ. ມາຮອດປະຈຸບັນ ບໍລິສັດ ໄດ້ລົງທຶນໄປແລ້ວ 17 ຕື້້ກວ່າກີບ ໂດຍນຳໃຊ້ເຂົ້າໃນການກໍ່ສ້າງພື້ນຖານໂຄງລ່າງ ແລະ ຊົດເຊີຍຜົນກະທົບຕໍ່ປະຊາຊົນ ເປັນຕົ້ນ ທີ່ດິນ, ເຄື່ອງປູກຂອງຝັງ, ທີ່ຢູ່ອາໄສ ແລະ ອື່ນໆ. ສຳລັບແຜນການໃນຕໍ່ໜ້າ ແມ່ນຈະສືບຕໍ່ພັດທະນາໂຄງລ່າງພື້ນຖານ ແລະ ຂອດບໍລິການດ້ານຕ່າງໆ ໃຫ້ເປັນລະບົບຄົບຊຸດ, ພຽງພໍ, ວ່ອງໄວ, ທັນສະໄໝ ແລະ ສາມາດຕອບສະໜອງຄວາມຕ້ອງການຂອງສັງຄົມ ຫຼາຍຂຶ້ນ ເປັນຕົ້ນ ໂຄງລ່າງພື້ນຖານ ການບໍລິການສາງຝາກສິນຄ້າ, ຈຸດພັກລົດ-ຄ່ຽນຖ່າຍສິນຄ້າ, ການແຈ້ງພາສີ ແລະ ອື່ນໆ ລວມທັງ ໂຄງລ່າງພື້ນຖານດ້ານທ່ອງທ່ຽວ ໃຫ້ຄົບວົງຈອນ.
 
 ເພື່ອອຳນວຍຄວາມສະດວກ ທາງດ້ານພາສີ, ການຄ້າ, ການລົງທຶນ, ການເຊື່ອມໂຍງກັບສາກົນ, ແນໃສ່ປົກປ້ອງຜົນປະໂຫຍດ ຂອງຜູ້ປະກອບການ, ປະກອບສ່ວນ ເຂົ້າໃນການພັດທະນາເສດຖະກິດ-ສັງຄົມຂອງຊາດ ເວົ້າລວມ, ເວົ້າສະເພາະ ແຂວງຜົ້ງສາລີ, ທ່ານ ບຸນເພັງ ສຸພັດທອນ ຫົວໜ້າກອງພາສີເຂດ 2 ໄດ້ຕາງໜ້າໃຫ້ຂະແໜງພາສີ ຂຶ້ນມີຄຳເຫັນ ສະເໜີແນະຕໍ່ພິທີ ກໍ່ຄືພາກສ່ວນທີ່ກ່ຽວຂ້ອງ ເອົາໃຈໃສ່ບາງບັນຫາ ເປັນຕົ້ນ ບໍລິສັດ ຕ້ອງໄດ້ສຶກສາຄົ້ນຄວ້າຢ່າງລະອຽດ ແລະ ເລິກເຊິ່ງ ກ່ຽວກັບກົດໝາຍ ວ່າດ້ວຍພາສີ ແລະ ນິຕິກຳອື່ນໆ ທີ່ກ່ຽວຂ້ອງກັບການສົ່ງອອກ ແລະ ນຳເຂົ້າສິນຄ້າ ເພື່ອຄວາມສະດວກ ແລະ ວ່ອງໄວ ໃນການບໍລິການ ຜູ້ທີ່ຈະມາໃຊ້ບໍລິການສາງ ແລະ ອື່ນໆ; ບໍລິສັດ ຍັງຕ້ອງໄດ້ສືບຕໍ່ປັບປຸງລະບຽບການພາຍໃນ ໃຫ້ມີຄວາມລະອຽດ, ຈະແຈ້ງ ແລະ ຮັດກຸມຕື່ມ; ຈະຕ້ອງໄດ້ປະສານງານຢ່າງກົມ ກຽວ ກັບພາກສ່ວນ ແລະ ຂະແໜງການທີ່ກ່ຽວຂ້ອງ ເພື່ອອຳນວຍຄວາມສະດວກ ໃຫ້ແກ່ວຽກງານການບໍລິການ; ຍົກລະດັບຄວາມຮູ້ຄວາມສາມາດ ຂອງພະນັກງານ ພາຍໃນບໍລິສັດ ໂດຍສະເພາະ ດ້ານວຽກງານໄອທີ ກໍ່ຄືລະບົບແຈ້ງພາສີ ດ້ວຍລະບົບເອກເລັກໂຕນິກ ໂດຍການຈັດຝຶກອົບຮົມວຽກງານດັ່ງກ່າວ ຮ່ວມກັບຂະແໜງການພາສີ; ເຈົ້າໜ້າທີ່ພາສີ ແລະ ເຈົ້າໜ້າທີ່ຂະແໜງການທີ່ກ່ຽວຂ້ອງພາຍໃນດ່ານສາກົນລານຕຸ້ຍ ກໍ່ຕ້ອງໃຫ້ການຮ່ວມມື ແລະ ອຳນວຍຄວາມສະດວກ ໃຫ້ແກ່ບໍລິສັດ ໃນການດຳເນີນກິດຈະການ; ບັນດາຜູ້ປະກອບການ ທີ່ມີຈຸດປະສົງ ຕ້ອງການດຳເນີນກິດຈະ ການສົ່ງອອກ ແລະ ນຳເຂົ້າສິນຄ້າ ຜ່ານດ່ານສາກົນລານຕຸ້ຍ ກໍ່ຕ້ອງໄດ້ຜ່ານການບໍລິການຂອງສາງ ຢ່າງຖືກຕ້ອງຕາມລະບຽບກົດໝາຍ ຢ່າງເຂັ້ມງວດ.
 
ໃນໂອກາດດຽວກັນ, ທ່ານ ເຈົ້າແຂວງຜົ້ງສາລີ ໄດ້ໃຫ້ກຽດມີຄຳເຫັນຕີລາຄາວ່າ ການເປີດນຳໃຊ້ໂຄງການນີ້ ຈະປະກອບສ່ວນສ້າງສິ່ງອຳນວຍຄວາມສະດວກ ໃຫ້ແກ່ການຄ້າ, ການລົງທຶນ, ການບໍລິການຂົນສົ່ງ, ການທ່ອງທ່ຽວ, ການພັກຜ່ອນຢ່ອນອາລົມ ແລະ ຈະສ້າງວຽກເຮັດງານທຳ ໃຫ້ແກ່ປະຊາຊົນທ້ອງຖິ່ນ ກໍ່ຄືແຂວງຜົ້ງສາລີ ຫຼາຍສົມຄວນ, ທັງຈະກາຍເປັນຖານສ້າງລາຍຮັບ ເຂົ້າງົບປະມານຂອງລັດ ທີ່ໝັ້ນຄົງ ແລະ ຍາວນານ, ຊຶ່ງຜົນສຳເລັດດັ່ງກ່າວນີ້ ແມ່ນຕອບສະໜອງຕາມແນວທາງນະໂຍບາຍ ທີ່ພັກ ແລະ ລັດເຮົາວາງອອກ ໃຫ້ປະກົດຜົນເປັນຈິງ ໂດຍສະເພາະ ຄວາມເອົາໃຈໃສ່ ແລະ ຖືສຳຄັນ ໃນການຊຸກຍູ້ສົ່ງເສີມການລົງທຶນ ຂອງພາກເອກະຊົນ ພາຍໃນ ແລະ ຕ່າງປະເທດ ດ້ວຍພຶດຕິກຳຕ່າງໆ ເປັນຕົ້ນ ໄດ້ປຸກລະດົມຂົນຂວາຍ ແລະ ຍາດແຍ່ງເອົາການລົງທຶນ, ໄດ້ສ້າງ ແລະ ປັບປຸງນິຕິກຳຕ່າງໆ ເພື່ອຮັບໃຊ້ວຽກງານ ນັບມື້ມີຄວາມຄົບຖ້ວນ, ຮັດກຸມ, ມີຄວາມສະດວກ, ວ່ອງໄວ, ໂປ່ງໃສ ແລະ ນຳເອົາຜົນປະໂຫຍດ ມາໃຫ້ປະເທດຊາດ ແລະ ປະຊາຊົນ ນັບມື້ຫຼາຍຂຶ້ນ.
 
ເພື່ອເຮັດໃຫ້ໂຄງການດັ່ງກ່າວ ສືບຕໍ່ໄດ້ຮັບການພັດທະນາຕາມແຜນການ, ຕາມບົດວິພາກເສດຖະກິດ-ເຕັກ ນິກ, ຕາມສັນຍາ, ທັງມີຄວາມສະຫງົບ ແລະ ເກີດຜົນປະໂຫຍດສູງສຸດ ຕໍ່ປະຊາຊົນ, ຜູ້ລົງທຶນ ແລະ ປະເທດຊາດ, ທ່ານ ເຈົ້າແຂວງຜົ້ງສາລີ ຍັງໄດ້ມີຄຳເຫັນ ເນັ້ນໜັກ ໃຫ້ເອົາໃຈໃສ່ຕື່ມບາງດ້ານ ເປັນຕົ້ນ ໃຫ້ທຸກພາກສ່ວນ ຖືສຳຄັນ ແລະ ພ້ອມກັນປຸກລະດົມ ຍາດແຍ່ງເອົາການລົງທຶນ ມາພັດທະນາທ້ອງຖິ່ນ ແລະ ປະເທດຊາດຂອງຕົນ ໃຫ້ນັບມື້ຫຼາຍຂື້ນ, ພ້ອມທັງ ເປັນເຈົ້າການ ປັບປຸງສິ່ງອຳນວຍຄວາມສະດວກ ໃຫ້ແກ່ການລົງທຶນ ທີ່ຕິດພັນກັບຂົງເຂດວຽກງານທີ່ຕົນເອງຮັບຜິດຊອບ ໃຫ້ສູງຂຶ້ນຕື່ມ; ກວດກາຄືນ ເນື້ອໃນສັນຍາ ໂດຍສະເພາະ ການແບ່ງຄວາມຮັບຜິດຊອບ ຂອງແຕ່ລະຝ່າຍ; ກວດກາຄືນ ບົດວິພາກເສດ ຖະກິດ-ເຕັກນິກ ໃຫ້ລະອຽດ ເພື່ອປະຕິບັດໃຫ້ຖືກຕ້ອງ ແລະ ມີຜົນສຳເລັດ; ເຈົ້າໜ້າທີ່ ທີ່ກ່ຽວຂ້ອງ ສືບຕໍ່ໃຫ້ການຮ່ວມມື ໃນການຈັດຕັ້ງປະຕິບັດໂຄງການ ກໍ່ຄືການປັບປຸງຂອດການບໍລິການຕ່າງໆ ໃຫ້ຖືກ ຕ້ອງຕາມນະໂຍບາຍ ແລະ ລະບຽບການ ທີ່ວາງອອກ; ອົງການປົກຄອງເມືອງຍອດອູ ສືບຕໍ່ສຶກສາອົບຮົມ ໃຫ້ປະຊາຊົນ ຮັບຮູ້ ແລະ ເຂົ້າໃຈ ຕໍ່ກັບຈຸດປະສົງ ແລະ ເປົ້າໝາຍ ຂອງໂຄງການ ໃຫ້ກວ້າງຂວາງ, ເລິກເຊິ່ງ ແລະ ໃຫ້ການສະໜັບສະໜູນ ຕໍ່ການປະຕິບັດໂຄງການ ໃຫ້ມີຄວາມສະຫງົບ ແລະ ໄດ້ຮັບຜົນປະໂຫຍດ ແລະ ສຳເລັດ ຕາມຈຸດປະສົງ ແລະ ເປົ້າໝາຍຂອງໂຄງການ; ປະຊາຊົນ ບັນດາບ້ານເປົ້າໝາຍ ໃນເຂດໂຄງການ ກໍ່ຕ້ອງໃຫ້ການຮ່ວມມື, ໃຫ້ການສະໜັບສະໜູນຊ່ວຍເຫຼືອ ໃນການສືບຕໍ່ປະຕິບັດໂຄງການ, ອັນສຳຄັນ ແມ່ນຫຼີກລ່ຽງແນວຄິດອິດສາບັງບຽດ, ພ້ອມນັ້ນ ກໍ່ໃຫ້ສືບ ຕໍ່ປົກປັກຮັກສາປ່າໄມ້ ແລະ ຊີວະນາໆພັນ ໃຫ້ຄົງຢູ່, ສວຍສົດງົດງາມ ເພື່ອດຶງດູດການລົງທຶນ ແລະ ການທ່ອງທ່ຽວ ເຮັດໃຫ້ປະຊາຊົນ ແລະ ບໍລິສັດ ຜູ້ລົງທຶນ ໄດ້ຮັບຜົນປະໂຫຍດຮ່ວມກັນ; ສະເໜີພາກ ສ່ວນທຸລະກິດ ໃຫ້ການຮ່ວມມືຊ່ວຍເຫຼືອເຊິ່ງກັນ ແລະ ກັນ ໂດຍສະເພາະ ບົດຮຽນ ແລະ ປະສົບການ ເພື່ອພ້ອມກັນກ້າວໜ້າ ໄປພ້ອມໆກັນ; ສະເໜີພາກສ່ວນກ່ຽວຂ້ອງ ໂຄສະນາເຜີຍແຜ່ ຂໍ້ມູນຂ່າວສານ ກ່ຽວກັບໂຄງການ ເພື່ອໃຫ້ຜູ້ປະກອບການ ແລະ ສັງຄົມ ໄດ້ຮັບຮູ້, ເຂົ້າໃຈ ແລະ ປະຕິບັດລະບຽບການ ໃນການໃຊ້ບໍລິການ ໂຄງການດັ່ງກ່າວ ຢ່າງຫຼວງຫຼາຍ ແລະ ມີຄວາມເປັນລະບຽບຮຽບຮ້ອຍດີ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ