ຫສນຍ ສ້າງຂະບວນການ ແຂ່ງຂັນກິລາ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນຈັນ, 09 ພ.ຈ 2020 17:00

ໃນຕອນເຊົ້າ ວັນທີ 7 ພະຈິກ 2020 ຫ້ອງວ່າການສຳນັກງານນາຍົກລັດຖະມົນຕີ ໄດ້ສ້າງຂະບວນການ ແຂ່ງຂັນກິລາບານເຕະຊາຍ-ຍິງ ຊີງຂັນເລຂາຄະນະບໍລິຫານງານພັກ ຫ້ອງວ່າການສຳນັກງານນາຍົກລັດຖະມົນຕີ ທີ່ເດີ່ນກິລາໂຮງຮຽນ KNC ບ້ານຖິ່ນຕົມ, ເມືອງຫາດຊາຍຟອງ, ນະຄອນຫຼວງວຽງຈັນ, ໂດຍການໃຫ້ກຽດເຂົ້າຮ່ວມ ຂອງທ່ານ ເພັດ ພົມພິພັກ, ອາດີດເລຂາຄະນະພັກ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ; ມີຄະນະພັກ-ຄະນະນຳ, ພະນັກງານຫຼັກແຫຼ່ງ ແລະ ລັດຖະກອນ ທົ່ວຫ້ອງວ່າການສຳນັກງານນາຍົກລັດຖະມົນຕີ  ເຂົ້າຮ່ວມ.

ຈຸດປະສົງ ແມ່ນເພື່ອສ້າງຂະບວນການ ຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ V ຂອງອົງຄະນະພັກຫ້ອງວ່າ ການສຳນັກງານນາຍົກລັດຖະມົນຕີ ທີ່ຈະໄຂຂຶ້ນໃນຕໍ່ໜ້ານີ້ ໃຫ້ມີບັນຍາກາດຟົດຟື້ນ, ຮັດແໜ້ນຄວາມສາມັກຄີພາຍໃນຊຸກຍູ້ການເຄື່ອນໄຫວວຽກງານວິຊາສະເພາະ ໃຫ້ມີຄວາມພົ້ນເດັ່ນ, ທັງເພີ່ມໂອກາດ ໃຫ້ພະນັກງານ-ລັດຖະກອນ ໄດ້ໃກ້ຊິດຕິດແທດ, ແລກປ່ຽນຄວາມຄິດເຫັນ ເຊິ່ງກັນ ແລະ ກັນຫຼາຍຂຶ້ນ. ການແຂ່ງຂັນກິລາຄັ້ງນີ້ ໄດ້ຈັດແບ່ງເປັນ 4 ທີມປະສົມ ຈາກບັນດາກົມ ພາຍໃນ ຫສນຍ ຄື: ທີມກົມຄົ້ນຄວ້າສັງລວມ + ກົມປະຊາສຳພັນ; ທີມກົມຈັດຕັ້ງ ແລະ ພະນັກງານ + ກົມເລຂາ; ທີມກົມນິຕິກຳ + ກົມກວດກາ ແລະ ທີມກົມບໍລິຫານ, ພິທີການ ແລະ ການເງິນ + ຫໍປະຊຸມແຫ່ງຊາດ, ຊຶ່ງບັນຍາກາດການແຂ່ງຂັນ ແມ່ນເຕັມໄປດ້ວຍຄວາມຟົດຟື້ນ, ມ່ວນຊື່ນ, ນັກກິລາ ແລະ ຜູ້ຊົມ ມີຄວາມສະໜິດສະໜົມ ແລະ ເປັນກັນເອງ, ສ່ອງແສງໄດ້ ນໍ້າໃຈນັກກິລາ, ມີສາມັກຄີຮັກແພງ, ຊ່ວຍເຫຼືອເຊິ່ງກັນ ແລະ ກັນ ຢ່າງແທ້ຈິງ. 

ສຳລັບຜົນການແຂ່ງຂັນ ທິມຊາຍ ຊະນະເລີດໄດ້ຮັບຂັນລາງວັນ ຂອງເລຂາຄະນະບໍລິຫານງານພັກ ຫ້ອງວ່າການສຳນັກງານນາຍົກລັດຖະມົນຕີ ແມ່ນທີມກົມຄົ້ນຄວ້າສັງລວມ + ກົມປະຊາສຳພັນ ພາຍຫຼັງທີ່ເອົາຊະນະທິມອັນດັບສອງ ທີມກົມບໍລິຫານ ແລະ ການເງິນ + ຫໍປະຊຸມແຫ່ງຊາດ ດ້ວຍຜົນປະຕູ 3-1; ທີມອັນດັບສາມ ແມ່ນທີມກົມຈັດຕັ້ງ ແລະ ພະນັກງານ + ກົມເລຂາ ທີ່ເອົາຊະນະທີມອັນດັບສີ່ ທີມກົມກວດກາ + ກົມນິຕິກຳ ດ້ວຍຜົນປະຕູ 6-4. ນອກຈາກນັ້ນ ຍັງມີການແຂ່ງຂັນເຕະບານຍິງອີກ 1 ຄູ່ ໂດຍຈັດເປັນທີມປະສົມ ຈາກບັນດາກົມພາຍໃນ ຫສນຍ, ໂດຍແບ່ງເປັນທີມຊຸດສີຟ້າ ແລະ ຊຸດສີແດງ,  ຊຶ່ງຜົນການແຂ່ງຂັນ ແມ່ນທີມຊຸດສີຟ້າ ສາມາດເອົາຊະນະທີມຊຸດສີແດງ ດ້ວຍປະຕູ 3-1 ໂດຍການຍິງຈຸດໂທດ ຫຼັງຈາກທີ່ສະເໝີກັນ 1-1 ໃນເວລາແຂ່ງຂັນປົກກະຕິ.
 
ໃນໂອກາດກ່າວສະຫຼຸບ ຜົນການສ້າງຂະບວນການແຂ່ງຂັນກິລາ ພາຍໃນ ຫສນຍ ຄັ້ງນີ້, ທ່ານ ເພັດ ພົມພິພັກ ໄດ້ມີຄຳເຫັນ ກ່າວຍ້ອງຍໍຊົມເຊີຍ ແລະ ຕີລາຄາສູງ ຕໍ່ຄະນະຮັບຜິດຊອບສ້າງຂະບວນການ ຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ V ຂອງອົງຄະນະພັກ ຫສນຍ ແລະ 3 ອົງການຈັດຕັ້ງມະຫາຊົນ ຫສນຍ ໃນການຫ້າງຫາກະກຽມດ້ານຕ່າງໆ ລວມທັງ ການເຂົ້າຮ່ວມ ຂອງພະນັກງານທົ່ວ ຫສນຍ, ຊຶ່ງເຮັດໃຫ້ການຈັດແຂ່ງຂັນກິລາຄັ້ງນີ້ ມີຜົນສຳເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້; ພ້ອມກັນນັ້ນ ກໍ່ສະເໜີໃຫ້ສືບຕໍ່ສ້າງຂະບວນການດ້ານຕ່າງໆ ໂດຍຕິດພັນກັບການເຄື່ອນໄຫວວຽກງານວິຊາສະເພາະ ໃຫ້ມີຜົນງານພົ້ນເດັ່ນ, ມີຄວາມຕໍ່ເນື່ອງ, ສອດຄ່ອງກັບເນື້ອໃນຈິດໃຈ ການສ້າງຂະບວນການຕ້ອນຮັບວັນສຳຄັນຕ່າງໆ ຂອງຊາດ, ຂອງການຈັດຕັ້ງ ຫສນຍ ແລະ ອື່ນໆ.​


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ