ທ່ານເອກອັກຄະລັດຖະທູດອົດສະຕາລີ ເຂົ້າຢ້ຽມອຳລາ

ຜູ້ຂຽນ: ອານິຄົມ ວົງເດືອນ

ວັນສຸກ, 06 ພ.ຈ 2020 13:00

    ໃນຕອນເຊົ້າ ວັນທີ 5 ພະຈິກ 2020 ທີ່ ຫ້ອງວ່າການສໍານັກງານນາຍົກລັດຖະມົນຕີ, ທ່ານ ປອ. ເພັດ ພົມພິພັກ,  ລັດຖະມົນຕີ, ຫົວໜ້າຫ້ອງວ່າການ ສໍານັກງານນາຍົກລັດຖະມົນຕີ ໄດ້ໃຫ້ກຽດຕ້ອນຮັບ ການເຂົ້າຢ້ຽມອໍາລາ ຂອງ ທ່ານ ຊ໋ອງ ເບີນາດ ຄາຣາສໂກ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ອົດສະຕຣາລີ ປະຈໍາ ສປປ ລາວ ໃນໂອກາດ ສໍາເລັດການປະຕິບັດໜ້າທີ່ການທູດ ຢູ່ ສປປ ລາວ.

     ໃນໂອກາດນີ້, ທ່ານ ປອ. ເພັດ ພົມພິພັກ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ຜົນສໍາເລັດໃນການປະຕິບັດໜ້າທີ່ການທູດ ຢູ່ ສປປ ລາວ ຕະຫຼອດໄລຍະ 3 ປີ ຜ່ານມາ ຂອງ ທ່ານ ຊ໋ອງ ເບີນາດ ຄາຣາສໂກ, ຊຶ່ງໄດ້ປະກອບສ່ວນອັນສໍາຄັນ ເຂົ້າໃນການເສີມສ້າງສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ອົດສະຕຣາລີ, ລວມທັງ ການພັດທະນາເສດຖະກິດ-ສັງຄົມ ຂອງ ສປປ ລາວ ໃຫ້ຂະຫຍາຍຕົວຍິ່ງໆຂຶ້ນ. ໃນນັ້ນ, ຜົນງານອັນພົ້ນເດັ່ນ ແມ່ນການປະກອບສ່ວນຊຸກຍູ້ການຊ່ວຍເຫຼືອທາງການເພື່ອການພັດທະນາ (ODA) ຂອງອົດສະຕຣາລີ ແກ່ ສປປ ລາວ ໃນແຕ່ລະປີ, ລວມທັງ ການຊ່ວຍເຫຼືອແກ່ ສປປ ລາວ ເພື່ອແກ້ໄຂຜົນກະທົບ ຈາກໄພພິບັດນໍ້າຖ້ວມ ຢູ່ບັນດາແຂວງພາກກາງ ແລະ ພາກໃຕ້, ພິເສດ ແມ່ນການຊ່ວຍເຫຼືອລັດຖະບານລາວ ໃນການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19, ການຊ່ວຍເຫຼືອດ້ານການສຶກສາ ແລະ ສາທາລະນະສຸກ, ການດຶງດູດນັກລົງທຶນອົສຕຣາລີ ມາລົງທຶນ ຢູ່ ສປປ ລາວ, ການປັບປຸງບັນຍາການຂອງການດຳເນີນທຸລະກິດ ຢູ່ ສປປ ລາວ, ລວມທັງການປະກອບສ່ວນ ຊຸກຍູ້ ແລະ ອໍານວຍຄວາມສະດວກໃນການແລກປ່ຽນ ການຢ້ຽມຢາມ ຂອງການນໍາຂັ້ນສູງຂອງສອງປະເທດ ມີຜົນສຳເລັດຕາມຈຸດປະສົງ ແລະ ຄາດໝາຍທີ່ວາງໄວ້ ຢ່າງຈົບງາມ.

     ໃນໂອກາດນີ້, ທ່ານ ຊ໋ອງ ເບີນາດ ຄາຣາສໂກ ກໍ່ໄດ້ສະແດງຄວາມຂອບໃຈຢ່າງຈິງໃຈ ຕໍ່ລັດຖະບານ ແລະ ປະຊາຊົນລາວ, ໂດຍສະເພາະ ຫ້ອງວ່າການສໍານັກງານນາຍົກລັດຖະມົນຕີ ທີ່ໄດ້ອໍານວຍຄວາມສະດວກ ໃຫ້ແກ່ການ ເຄື່ອນໄຫວປະຕິບັດໜ້າທີ່ການທູດ ຂອງຕົນ ຢູ່ ສປປ ລາວ ມີຜົນສຳເລັດເປັນຢ່າງດີ. ນອກນັ້ນ, ທ່ານ ຍັງໄດ້ຢືນຢັນຈະສືບຕໍ່ປະກອບສ່ວນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ຂອງສອງປະເທດ ອົດສະຕຣາລີ-ລາວ ໃຫ້ນັບມື້ນັບຈະເລີນງອກງາມຍິ່ງໆຂຶ້ນ ໃນອະນາຄົດ. ຄຽງຄູ່ກັນນັ້ນ, ສອງຝ່າຍ ຍັງໄດ້ປຶກສາຫາລືກັນ ກ່ຽວກັບການສືບຕໍ່ຊ່ວຍເຫຼືອ ຂອງລັດຖະບານອົດສະຕຣາລີ ໃຫ້ແກ່ ອາຊຽນ ກໍ່ຄື ສປປ ລາວ ໃນວຽກງານປ້ອງກັນ ແລະ ແກ້ໄຂການລະບາດພະຍາດໂຄວິດ-19 ຕື່ມອີກ.



ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ