ທ່ານ ລັດຖະມົນຕີປະຈຳ ສນຍ ຕ້ອນຮັບເອກອັກຄະລັດຖະທູດ ອົດສະຕຣາລີ ຢ້ຽມອຳລາ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນຈັນ, 28 ກ.ຍ 2020 15:00

ໃນຕອນເຊົ້າ ຂອງວັນທີ 24 ກັນຍາ 2020 ທີ່ ຫ້ອງວ່າການສຳນັກງານນາຍົກລັດຖະມົນຕີ, ທ່ານ ປອ. ນາງ ສຸວັນເພັງ ບຸບຜານຸວົງ, ລັດຖະມົນຕີປະຈຳສຳນັກງານນາຍົກ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບອຳລາ ຂອງທ່ານ Jean-Bernard Carrasco, ເອກອັກຄະລັດຖະທູດ ອົດສະຕຣາລີ ປະຈຳ ສປປ ລາວ ໃນໂອກາດສຳເລັດການປະຕິບັດໜ້າທີ່ການທູດ ຢູ່ ສປປ ລາວ ໃນໄລຍະປີ 2018-2020. 

ໃນໂອກາດດັ່ງກ່າວ, ທ່ານ ປອ. ນາງ ສຸວັນເພັງ ບຸບຜານຸວົງ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ຜົນສຳເລັດ ໃນການປະຕິບັດໜ້າທີ່ການທູດ ຢູ່ ສປປ ລາວ ຂອງທ່ານ Jean-Bernard Carasco, ຊຶ່ງໄດ້ປະກອບສ່ວນເພີ່ມພູນຄູນສ້າງ ສາຍພົວພັນ ແລະ ການຮ່ວມມື ລະຫວ່າງ ສປປ ລາວ ແລະ ອົດສະຕຣາລີ ນັບມື້ແໜ້ນແຟ້ນ ແລະ ເຕີບໃຫຍ່ຂະຫຍາຍຕົວ ເປັນກ້າວໆ ເວົ້າລວມ, ເວົ້າສະເພາະ ແມ່ນສະແດງຄວາມຂອບໃຈ ຕໍ່ການອຳນວຍຄວາມສະດວກ, ສະໜັບສະໜູນ ແລະ ໃຫ້ຊ່ວຍເຫຼືອ ແກ່ ສປປ ລາວ ໃນຫຼາຍດ້ານ ຂອງທ່ານເອກອັກຄະລັດຖະທູດ ກໍ່ຄືລັດຖະບານ ແຫ່ງ ອົດສະຕຣາລີ ໃນໄລຍະຜ່ານມາ ໂດຍສະເພາະ ການສ້າງນິຕິກຳ ໃນຂົງເຂດພະລັງງານ ແລະ ບໍ່ແຮ່, ການສະໜອງຂໍ້ມູນຂ່າວສານ, ການຊ່ວຍເຫຼືອຂອງຊ່ຽວຊານ, ການຊ່ວຍເຫຼືອແກ້ໄຂການແຜ່ລະບາດ ຂອງພະຍາດ ໂຄວິດ-19 ແລະ ອື່ນໆ. ນອກຈາກນັ້ນ ຍັງໄດ້ສະເໜີ ຂໍການຮ່ວມມືກັບລັດຖະບານອົດສະຕຣາລີ ໃນການແລກປ່ຽນນັກສຶກສາ ລາວ-ອົດສະຕຣາລີ ໃຫ້ຫຼາຍຂຶ້ນ. ໃນຕອນທ້າຍ ກໍ່ໄດ້ອວຍພອນ ໃຫ້ທ່ານເອກອັກຄະລັດຖະທູດ ເດີນທາງກັບປະເທດດ້ວຍຄວາມສະຫວັດດີພາບ ແລະ ສືບຕໍ່ປະຕິບັດສຳເລັດໜ້າທີ່ໃໝ່ ທີ່ຈະໄດ້ຮັບການມອບໝາຍ ໃນຕໍ່ໜ້າ ໃຫ້ໄດ້ຮັບຜົນສຳເລັດເປັນຢ່າງດີ.
ໃນໂອກາດດຽວກັນ, ທ່ານເອກຄະລັດຖະທູດ ໄດ້ສະແດງຄວາມຂອບໃຈ ຕໍ່ທ່ານລັດຖະມົນຕີປະຈຳສຳນັກງານນາຍົກ ທີ່ໄດ້ໃຫ້ກຽດຕ້ອນຮັບຢ່າງອົບອຸ່ນ ໃນຄັ້ງນີ້, ລວມທັງ ການພົວພັນ, ການອຳ ນວຍຄວາມສະດວກ ແລະ ຊ່ວຍເຫຼືອ ຕະຫຼອດໄລຍະທີ່ປະຕິບັດໜ້າທີ່ການທູດ ຢູ່ ສປປ ລາວ ຂອງທ່ານເອກຄະລັດຖະທູດ ເຮັດໃຫ້ມີຜົນສຳເລັດຕາມຄາດໝາຍທີ່ວາງໄວ້.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ