ຫສນຍ ເປີດຊຸດຝຶກອົບຮົມ ວຽກງານການຄຸ້ມຄອງຂໍ້ມູນລັດຖະກອນ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພະຫັດ, 24 ກ.ຍ 2020 17:00

​​​​ໃນຕອນເຊົ້າ ຂອງວັນທີ 24 ກັນຍາ 2020 ຫ້ອງວ່າການສໍານັກງານນາຍົກລັດຖະມົນຕີ (ຫສນຍ) ໄດ້ຈັດພິທີເປີດຊຸດຝຶກອົບຮົມ ວຽກງານການຄຸ້ມຄອງຂໍ້ມູນລັດຖະກອນ ຂອງຫ້ອງວ່າການສຳນັກງານນາຍົກລັດຖະມົນຕີ, ໂດຍການເປັນປະທານກ່າວເປີດຂອງ ທ່ານ ນາງ ທິບພະກອນ ຈັນທະວົງສາ, ຮອງລັດຖະມົນຕີ, ຮອງຫົວໜ້າ ຫສນຍ; ມີ ທ່ານ ຄົມສັນ ໄຊຍະສານ, ຫົວໜ້າກົມຈັດຕັ້ງ ແລະ ພະນັກງານ ຫສນຍ; ວິທະຍາກອນຈາກ ກະຊວງພາຍໃນ ແລະ ສຳມະນາກອນ ຈຳນວນ 24 ທ່ານ ທີ່ເຮັດວຽກກ່ຽວກັບ ການຄຸ້ມຄອງພະນັກງານ-ລັດຖະກອນ ຈາກບັນດາກົມ ທີ່ຂຶ້ນກັບ ຫສນຍ ເຂົ້າຮ່ວມ, ຊຶ່ງຊຸດຝຶກອົບຮົມຄັ້ງນີ້ ຈະໄດ້ດຳເນີນເປັນເວລາ 2 ວັນ ແຕ່ວັນທີ 24-25 ກັນຍາ 2020.

​ຈຸດປະສົງ ຂອງການຈັດຊຸດຝຶກອົບຮົມໃນຄັ້ງນີ້ ແມ່ນເພື່ອແນະນຳ, ອະທິບາຍໃຫ້ພະນັກງານ-ລັດຖະກອນ ທີ່ຮັບຜິດຊອບຂໍ້ມຸູນລັດຖະກອນ ຂອງຕົນ ໄດ້ຮັບຮູ້ ແລະ ເຂົ້າໃຈ ໜ້າທີ່, ຂັ້ນຕອນ ການຄຸ້ມຄອງ ຢ່າງເປັນເອກະພາບ; ເພື່ອສ້າງຄວາມເຂັ້ມແຂງ ກ່ຽວກັບການເກັບກຳຂໍ້ມູນຂອງລັດຖະກອນ ໃຫ້ເປັນລະບົບ ແລະ ຖືກຕ້ອງຕາມລະບຽບການ; ເພື່ອເຮັດໃຫ້ຜູ້ທີ່ຮັບຜິດຊອບ ວຽກງານຄຸ້ມຄອງວຽກງານລັດຖະກອນ ຂອງແຕ່ລະພາກສ່ວນ ສາມາດເຂົ້າເຖິງແຫຼ່ງຂໍ້ມູນໄດ້ຢ່າງສະດວກ, ວ່ອງໄວ ແລະ ທັນການ; ນອກນັ້ນ ຍັງເຮັດໃຫ້ລະບົບການຄຸ້ມຄອງລັດຖະກອນ ໃນໄລຍະໃໝ່ມີຄຸນນະພາບສູງ, ເປັນລະບົບລວມສູນ, ທັງເຮັດໃຫ້ພະນັກງານ-ລັດຖະກອນ ຜູ້ຮັບຜິດຊອບວຽກງານການຄຸ້ມຄອງຂໍ້ມູນລັດຖະກອນ ມີຄວາມຮູ້ຄວາມສາມາດ ແລະ ສາມາດນຳໃຊ້ເຕັກໂນໂລຊີ-ຂໍ້ມູນຂ່າວສານ ທີ່ທັນສະໄໝ ເຂົ້າມາບໍລິຫານ ແລະ ການຄຸ້ມຄອງ ລັດຖະກອນ ໃຫ້ມີຄວາມສະດວກ, ວ່ອງໄວ, ໂປ່ງໃສ ແລະ ຊັດເຈນ.
​​ໃນໂອກາດກ່າວເປີດ, ທ່ານ ນາງ ທິບພະກອນ ຈັນທະວົງສາ ໄດ້ຍົກໃຫ້ເຫັນຄວາມສຳຄັນ ຂອງການຈັດຝຶກອົບຮົມ ກໍ່ຄືເນື້ອໃນທີ່ໄດ້ນຳມະສຳມະນາໃນຄັ້ງນີ້ ໃຫ້ຜູ້ເຂົ້າຮ່ວມໄດ້ຮັບຊາບ. ພ້ອມກັນນັ້ນ ກໍ່ມີຄຳເຫັນເນັ້ນໜັກ ໃຫ້ສຳມະນາກອນທັງໝົດ ຈົ່ງເອົາໃຈໃສ່ຄົ້ນຄວ້າ ແລະ ຖອດຖອນແລກປ່ຽນບົດຮຽນນຳບັນດາວິທະຍາກອນ ແລະ ສຳມະນາກອນດ້ວຍກັນ ເຮັດໃຫ້ບັນຫາຕ່າງໆ ມີຄວາມກະຈ່າງແຈ້ງ, ມີຄວາມຮັບຮູ້ ແລະ ເຂົ້າໃຈຢ່າງຖືກຕ້ອງ, ສາມາດນຳໄປຈັດຕັ້ງຜັນຂະຫຍາຍ ໃນວຽກງານຕົວຈິງ ໃຫ້ເກີດດອກອອກຜົນ; ເອົາໃຈໃສ່ປະຕິບັດລະບຽບ ຂອງການຝຶກອົບຮົມ ໂດຍສະເພາະ ການເຂົ້າຮ່ວມ, ການປະຕິບັດໂມງເວລາ, ການນຳໃຊ້ອຸປະກອນຕ່າງໆ ໃຫ້ສົມເຫດສົມຜົນ ແລະ ມີຄວາມເປັນເອກະພາບກັນ, ປະກອບສ່ວນເຮັດໃຫ້ຊຸດຝຶກອົບຮົມໃນຄັ້ງນີ້ ໃຫ້ໄດ້ຮັບຜົນສຳເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້ ຢ່າງຈົບງາມ.


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ