ຫສນຍ ເປີດຊຸດຝຶກອົບຮົມລັດຖະກອນຕໍາແໜ່ງບໍລິຫານ ປະເພດ 5 ຊຸດທີ III

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພຸດ, 29 ກ.ລ 2020 14:00

​ໃນຕອນເຊົ້າ ຂອງວັນທີ 29 ກໍລະກົດ 2020 ຫ້ອງວ່າການສໍານັກງານນາຍົກລັດຖະມົນຕີ (ຫສນຍ) ໄດ້ຈັດພິທີເປີດຊຸດຝຶກອົບຮົມ ລັດຖະກອນຕໍາແໜ່ງບໍລິຫານ ປະເພດ 5 ຊຸດທີ III, ໂດຍການເປັນປະທານກ່າວເປີດຂອງທ່ານທ່ານ ຄົມສັນ ໄຊຍະສານ, ຫົວໜ້າກົມຈັດຕັ້ງ ແລະ ພະນັກງານ ຫສນຍ; ມີວິທະຍາກອນຈາກມະຫາວິທະຍາໄລແຫ່ງຊາດ, ຫສນຍ ແລະ ສູນກາງສະຫະພັນແມ່ຍິງລາວ ພ້ອມດ້ວຍ ສຳມະນາກອນ ເຂົ້າຮ່ວມ.

ຈຸດປະສົງ ຂອງການຈັດຊຸດຝຶກອົບຮົມໃນຄັ້ງນີ້ ແມ່ນເພື່ອຈັດຕັ້ງປະຕິບັດ ດຳລັດຂອງນາຍົກລັດຖະມົນຕີ ສະບັບເລກທີ 294/ລບ, ລົງວັນທີ 4 ກັນຍາ 2017 ວ່າດ້ວຍການຝຶກອົບຮົມ ແລະ ພັດທະນາພະນັກງານ-ລັດຖະກອນ ແນໃສ່ເຮັດໃຫ້ລັດຖະກອນ ຜູ້ທີ່ໄດ້ຮັບຕໍາແໜ່ງບໍລິຫານ ປະເພດ 5 ໄດ້ຮັບການຍົກລະດັບ, ເສີມຂະຫຍາຍຄວາມຮູ້, ຄວາມສາມາດ ແລະ ທັດສະນະຄະຕິແນວຄິດໃຫ້ດີຂຶ້ນ, ທັງເປັນການປັບປຸງ ການປະຕິບັດໜ້າທີ່ວຽກງານພະນັກງານ ໃຫ້ມີປະສິດທິພາບ ແລະ ປະສິດທິຜົນສູງຂຶ້ນ ໂດຍສະເພາະ ການປະຕິບັດພາລະບົດບາດ ແລະ ຄວາມຮັບຜິດຊອບຂອງຕົນ ໃນແຕ່ລະຂັ້ນ ໃຫ້ມີຄວາມສອດຄ່ອງ, ເປັນເອກະພາບກັນ, ຮັບປະກັນ ການເປັນເສນາທິການທີ່ດີ ໃຫ້ແກ່ຂັ້ນເທິງ.

ສຳລັບເນື້້ອໃນ ທີ່ນຳມາຝຶກອົບຮົມ ໃນຄັ້ງນີ້ ປະກອບມີ 7 ຫົວຂໍ້ຫຼັກ ຄື: 1. ການສົ່ງເສີມຄວາມຮູ້ຄວາມສາ ມາດດ້ານການນໍາພາ ແລະ ຄຸ້ມຄອງ; 2. ເຕັກນິກການບໍລິຫານ; 3. ການສ້າງທີມງານ ແລະ ບົດບາດຂອງທີມງານ; 4. ການສົ່ງເສີມບົດບາດຍິງຊາຍ; 5. ພາວະການເປັນຜູ້ນໍາ; 6. ຄວາມຮູ້ພື້ຖານກ່ຽວກັບການປົກຄອງ; 7. ຈັນຍາບັນຂອງລັດຖະກອນ. ຊຸດຝຶກອົບຮົມຄັ້ງນີ້ ຈະໄດ້ດຳເນີນເປັນເວລາ 3 ວັນ ຕັ້ງແຕ່ວັນທີ 29-31 ກໍລະກົດ 2020 ໂດຍມີສຳມະນາກອນ ຈຳນວນ 29 ທ່ານ.

​​ໃນໂອກາດກ່າວເປີດກອງປະຊຸມຄັ້ງນີ້, ທ່ານ ຄົມສັນ ໄຊຍະສານ ໄດ້ຍົກໃຫ້ເຫັນຄວາມສຳຄັນ ຂອງການຈັດຝຶກອົບຮົມ ກໍ່ຄືເນື້ອໃນທີ່ໄດ້ນຳມະສຳມະນາໃນຄັ້ງນີ້ ໃຫ້ຜູ້ເຂົ້າຮ່ວມ ໄດ້ຮັບຊາບ. ພ້ອມ ກັນ ນັ້ນ ກໍ່ເນັ້ນໜັກ ໃຫ້ສຳມະນາກອນທັງໝົດ ຈົ່ງເອົາໃຈໃສ່ຄົ້ນຄວ້າ ແລະ ຖອດຖອນແລກປ່ຽນບົດຮຽນ ນຳບັນດາວິທະຍາກອນ ແລະ ສຳມະນາກອນດ້ວຍກັນ ເຮັດໃຫ້ບັນຫາຕ່າງໆ ມີຄວາມກະຈ່າງແຈ້ງ, ມີຄວາມຮັບຮູ້ ແລະ ເຂົ້າໃຈຢ່າງຖືກຕ້ອງ, ສາມາດນຳໄປຕັ້ງຕັ້ງຜັນຂະຫຍາຍ ໃນວຽກງານຕົວຈິງ ໃຫ້ເກີດດອກອອກຜົນ; ເອົາໃຈໃສ່ ປະຕິບັດລະບຽບໃນການຝຶກອົບຮົມ ໂດຍສະເພາະ ການເຂົ້າຮ່ວມ, ການປະຕິບັດໂມງເວລາ, ການນຳໃຊ້ອຸປະກອນຕ່າງໆ ໃຫ້ສົມເຫດສົມຜົນ ແລະ ມີຄວາມເປັນເອກະພາບກັນ, ປະກອບສ່ວນ ເຮັດໃຫ້ ຊຸດ ຝຶກ ອົບຮົມໃນຄັ້ງນີ້ ໃຫ້ໄດ້ຮັບ ຜົນ ສຳ ເລັດ ຕາມຈຸດປະສົງ ແລະ ລະດັບຄາດໝາຍທີ່ວາງໄວ້ ຢ່າງ ຈົບງາມ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ