ຫສນຍ ປະກາດການຈັດຕັ້ງ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພຸດ, 29 ກ.ລ 2020 14:00

ໃນຕອນເຊົ້າ ຂອງວັນທີ 29 ກໍລະກົດ 2020 ຫ້ອງວ່າການສຳນັກງານນາຍົກລັດຖະມົນຕີ (ຫສນຍ) ໄດ້ຈັດພິທີປະກາດການຈັດຕັ້ງ, ພາຍໃຕ້ການເປັນປະທານ ຂອງທ່ານ ເພັດ ພົມພິພັກ, ລັດຖະ ມົນຕີ, ຫົວໜ້າ ຫສນຍ; ມີບັນດາທ່ານ ຄະນະກົມ ແລະ ພະນັກງານ-ລັດຖະກອນ ພາຍໃນ ຫສນຍ ທັງໝົດ ເຂົ້າຮ່ວມ.

ການປະກາດການຈັດຕັ້ງຄັ້ງນີ້, ທ່ານ ຄົມສັນ ໄຊຍະສານ, ຫົວໜ້າກົມຈັດຕັ້ງ ແລະ ພະນັກງານ ຫສນຍ ໄດ້ຂຶ້ນຜ່ານບັນດາເອກະສານ ຄື: ຄຳສັ່ງຂອງນາຍົກລັດຖະມົນຕີ ຍົກຍ້າຍທ່ານ ຮສ.ປອ. ລິນຄຳ ດວງສະຫວັນ, ຫົວໜ້າກົມຄົ້ນຄວ້າ-ສັງລວມ ໄປຮັບໜ້າທີ່ໃໝ່ ຢູ່ກະຊວງກະສິກຳ ແລະ ປ່າໄມ້; ຜ່ານດຳລັດຂອງນາຍົກລັດຖະມົນຕີ ແຕ່ງຕັ້ງທ່ານ ສະຖິດ ເພັດສິງເລືອງ ເປັນຫົວໜ້າກົມຄົ້ນຄວ້າ-ສັງ ລວມ; ຜ່ານຂໍ້ຕົກລົງ ຂອງລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ຄື: ອະນຸມັດໃຫ້ທ່ານ ຄຳຜອງ ແສງປະເສີດ, ຮອງຫົວໜ້າກົມນິຕິກຳ ອອກພັກການ ຮັບອຸດໜູນບຳນານ ນັບແຕ່ວັນທີ 1 ກໍລະກົດ ເປັນຕົ້ນໄປ; ຍົກຍ້າຍທ່ານ ຮສ.ປອ. ໂພສີ ຈັນມິ່ງ, ຮອງຫົວໜ້າກົມເລຂາ ໄປປະກອບສ່ວນວຽກງານ ຢູ່ກະຊວງສຶກສາທິການ ແລະ ກິລາ; ແຕ່ງຕັ້ງທ່ານ ສີສູນໄທ ແກ້ວໂພໄຊ, ຮອງຫົວໜ້າກົມ, ເລຂາປະຈຳທ່ານນາຍົກລັດຖະມົນຕີ ເປັນຮັກສາການຫົວໜ້າກົມເລຂາ ຫສນຍ.​
ໃນຕອນທ້າຍ, ທ່ານປະທານກອງປະຊຸມ ໄດ້ໃຫ້ກຽດໂອ້ລົມຕໍ່ພິທີ, ກ່ອນອື່ນ ທ່ານໄດ້ກ່າວຍ້ອງຍໍຊົມເຊີຍ ຕໍ່ຜົນສຳເລັດ ກໍ່ຄືຜົນງານ, ຄວາມຮັບຜິດຊອບ, ຄວາມເປັນແບບຢ່າງ ແລະ ອື່ນໆ ຂອງບັນດາທ່ານ ທີ່ໄດ້ຮັບການປະກາດການຈັດຕັ້ງໃນຄັ້ງນີ້. ພ້ອມກັນນັ້ນ, ຍັງໄດ້ໃຫ້ທິດຊີ້ນຳ ຕໍ່ບັນດາສະຫາຍ ທີ່ໄດ້ຮັບການປະກາດລາຍຊື່ ໃນການແຕ່ງຕັ້ງ, ສັບຊ້ອນ ແລະ ຍົກຍ້າຍ ຈົ່ງຍົກສູງຄວາມຮັບ ຜິດຊອບ ຕໍ່ໜ້າທີ່ໜ້າທີ່ການເມືອງ-ໜ້າທີ່ວຽກງານ, ສຸມສະຕິປັນຍາ ແລະ ຄວາມຮູ້ຄວາມສາມາດຂອງຕົນ ປະຕິບັດໜ້າທີ່ ທີ່ການຈັດຕັ້ງມອບໝາຍ ໃຫ້ມີຜົນສຳເລັດເປັນຢ່າງດີ, ທັງມີການມອບ-ຮັບວຽກໃຫ້ກັນ ແລະ ກັນ ເປັນລາຍລັກອັກສອນ, ມີການປຶກສາຫາລື ແລະ ສົ່ງຂ່າວເຊິ່ງກັນ ແລະ ກັນຄັກແນ່; ສືບຕໍ່ບຸກບືນ, ຖອດຖອນບົດຮຽນ ແລະ ຝຶກຝົນຫຼໍ່ຫຼອມຕົນເອງ ໃຫ້ມີຄວາມຮູ້ຄວາມສາມາດ, ມີຄຸນສົມບັດສິນທຳປະຕິວັດ ແລະ ມີຄວາມກ້າວໜ້າຢູ່ສະເໝີ; ໃຫ້ບັນດາກົມ ເອົາໃຈໃສ່ເຮັດວຽກງານການເມືອງແນວຄິດ ກັບພະນັກງານ-ລັດຖະກອນ ທີ່ຢູ່ໃນຄວາມຮັບຜິດຊອບຂອງຕົນ ໃຫ້ມີຄວາມອຸ່ນອຽນທຸ່ນທ່ຽງ, ມີຄວາມຮັບຜິດຊອບສູງ ຕໍ່ວຽກງານ, ມີຄວາມສາມັກຄີກັນແໜ້ນແຟ້ນ, ມີການຊ່ວຍເຫຼືອເຊິ່ງກັນ ແລະ ກັນ, ມີຄວາມຮັບຮູ້ ແລະ ເຂົ້າໃຈຢ່າງຖືກຕ້ອງ ຕໍ່ແນວທາງຂອງພັກ, ນະໂຍບາຍຂອງລັດ ແລະ ເຂົ້າຮ່ວມຈັດຕັ້ງປະຕິບັດ ໃຫ້ເກີດດອກອອກຜົນ; ພະນັກງານ-ລັດຖະກອນທັງໝົດ ຈົ່ງເປັນເຈົ້າການ ປະຕິບັດບັນດາມາດຕະການ ທີ່ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງພະຍາດ ໂຄວິດ-19 ວາງອອກ ໃນແຕ່ລະໄລຍະ ຢ່າງເຂັ້ມງວດ, ພ້ອມກັນນັ້ນ ກໍ່ຕ້ອງໄດ້ສຶກສາອົບຮົມຄອບຄົວ-ລູກຫຼານຂອງຕົນ ໃຫ້ມີຄວາມລະມັດລະວັງ ແລະ ເຂົ້າຮ່ວມ ປ້ອງກັນການແຜ່ລະບາດຂອງເຊື້ອພະຍາດຕ່າງໆ ເປັນຢ່າງດີ; ໃຫ້ບັນດາທ່ານ ທີ່ໄດ້ຮັບການແຕ່ງຕັ້ງ ແລະ ຊັບຊ້ອນ ພາຍໃນ ຫສນຍ ຈົ່ງປັບປຸງແບບແຜນວິທີເຮັດວຽກ, ປັບປຸງວຽກງານຂອງກົມ ໃຫ້ດີຂຶ້ນກວ່າເກົ່າ, ມີການຮ່ວມດຳເນີນຊີວິດ ໃຫ້ເປັນປົກກະຕິ, ຮັບປະກັນໄດ້ປະສິດທິພາບ ແລະ ປະສິດທິຜົນ ໂດຍສະເພາະ ຄວາມວ່ອງໄວ, ທັນສະໄໝ, ປອດໄພ, ໂປ່ງໃສ ແລະ ຍຸຕິທຳ; ໃຫ້ບັນດາອານຸກຳມະການ ທີ່ຮັບຜິດຊອບກະກຽມກອງປະຊຸມໃຫຍ່ ຜູ້ແທນອົງຄະນະພັກ ຫສນຍ ຄັ້ງທີ v ກະກຽມທາງດ້ານຕ່າງໆ ຕາມການມອບໝາຍ ໃຫ້ມີຜົນສຳເລັດ ໂດຍສະເພາະ ດ້ານເນື້ອໃນ ແລະ ບຸກຄະລາກອນ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ