ຫສນຍ ສະເຫຼີມສະຫຼອງ ວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 65 ປີ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພະຫັດ, 16 ກ.ລ 2020 17:00

​​ໃນຕອນເຊົ້າ ວັນທີ 16 ກໍລະກົດ 2020 ຫ້ອງວ່າການສຳນັກງານນາຍົກລັດຖະມົນຕີ (ຫສນຍ) ໄດ້ຈັດພິທີສະເຫຼີມສະຫຼອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 65 ປີຂຶ້ນ ທີ່ ຫໍປະຊຸມແຫ່ງຊາດ, ພາຍໃຕ້ການເປັນປະທານຂອງທ່ານ ນ. ທິບພະກອນ ຈັນທະວົງສາ, ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ ໂດຍມີ ທ່ານ Paul  Stephens ອຸປະທູດ ອົດສະຕຣາລີ ປະຈຳ ສປປ ລາວ, ຜູ້ຕາງໜ້າຈາກອົງການສະຫະປະຊາຊາດປະຈຳ ສປປ ລາວ, ບັນດາທ່ານ ຫົວໜ້າກົມ, ຮອງຫົວໜ້າກົມ ພ້ອມດ້ວຍ ພະນັກງານ ພາຍໃນ ຫສນຍ ແລະ ພະນັກງານອາວຸໂສບຳນານເພດຍິງ ຈຳນວນໜຶ່ງ ເຂົ້າຮ່ວມ. ກອງປະຊຸມໃນຄັ້ງນີ້ ແມ່ນ ໄດ້ຮັບການສະໜັບສະໜູນຈາກສະຖານທູດອົດສະຕຣາລີ ປະຈຳ ສປປ ລາວ. 

​​ການຈັດງານໃນມື້ນີ້ ແມ່ນເພື່ອສະເຫຼີມສະຫຼອງ ວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 65 ປີ ກໍ່ຄືການເຕີບໃຫຍ່ຂະຫຍາຍຕົວ ແລະ ຜົນງານການເຄື່ອນ ໄຫວຂອງອົງການຈັດຕັ້ງສະຫະພັນແມ່ຍິງລາວ ລວມທັງ ມູນເຊື້ອອັນດີງາມຂອງແມ່ຍິງລາວ ໂດຍເນື້ອໃນສຳຄັນຂອງງານ ໃນຄັ້ງນີ້ ແມ່ນເນັ້ນກ່ຽວກັບການສົ່ງເສີມຄວາມກ້າວໜ້າຂອງແມ່ຍິງ ແລະ ຄວາມສະເໝີພາບ ຍິງ-ຊາຍ. ໃນພິທີ ແມ່ນໄດ້ຮັບຟັງບັນຍາຍກ່ຽວກັບ ບົດຮຽນ ແລະ ປະສົບການຂອງປະເທດອົດສະຕາລີ ໃນການສົ່ງເສີມຄວາມກ້າວໜ້າຂອງແມ່ຍິງ, ການຈັດຕັ້ງປະຕິບັດຍຸດທະສາດການເປັນຜູ້ນຳຂອງແມ່ຍິງ ແລະ ຄວາມສະເໝີພາບ ຍິງ-ຊາຍ; ການສະໜັບສະໜູນ ສປປ ລາວ ແລະ ສະຫະພັນແມ່ຍິງລາວ ຂອງອົງການສະຫະປະຊາຊາດ ເພື່ອແມ່ຍິງ (UNWomen); ການສະໜັບສະໜູນຂອງອົງການສະຫະປະຊາຊາດ ກອງທຶນສຳລັບປະຊາກອນ (UNFPA) ດ້ານສຸຂະພາບໄວຈະເລີນພັນ, ສຸຂະພາບແມ່ຍິງ ແລະ ເດັກນ້ອຍ; ເຜີຍແຜ່ກົດໝາຍ ວ່າດ້ວຍຄວາມສະເໜີພາບ ຍິງ-ຊາຍ.
​​​ໃນຕອນທ້າຍ, ທ່ານຮອງລັດຖະມົນຕີ, ຮອງຫົວໜ້າ ຫສນຍ ກໍ່ໄດ້ໂອ້ລົມຕໍ່ຜູ້ເຂົ້າຮ່ວມ, ໃນນັ້ນ ໄດ້ເນັ້ນໜັກໃຫ້ສະມາຊິກສະຫະພັນແມ່ຍິງ ຫສນຍ ທຸກຄົນ ເອົາໃຈໃສ່ຕື່ມບາງດ້ານ ເປັນຕົ້ນ ຕ້ອງເອົາໃຈໃສ່ ຈັດຕັ້ງປະຕິບັດຄຳຂວັນ 3 ດີ ຂອງແມ່ຍິງລາວ (ພົນລະເມືອງດີ, ພັດທະນາດີ, ສ້າງຄອບຄົວດີ) ຕິດພັນກັບການປະຕິບັດຄຳຂວັນ 3 ດີ ຂອງ ຫສນຍ (ເປັນເສນາທິການທີ່ດີ, ປະສານງານທີ່ດີ ແລະ ບໍລິການຮັບໃຊ້ທີ່ດີ), ເພີ່ມທະວີຄວາມຮັບຜິດຊອບຂອງຕົນ ໃນການປະຕິບັດໜ້າທີ່ ເປັນເສນາທິການ ໃຫ້ແກ່ການນຳແຕ່ລະຂັ້ນ ແລະ ສືບຕໍ່ເອົາໃຈໃສ່ປັບປຸງແບບແຜນວິທີເຮັດວຽກຂອງຕົນ ໃຫ້ມີຄວາມເຂັ້ມແຂງຮອບດ້ານ. ພ້ອມກັນນີ້, ໃນສະພາບການທີ່ປະເທດເຮົາ ກໍ່ຄືໃນທົ່ວໂລກ ກຳລັງປະເຊີນກັບສິ່ງທ້າທາຍ ແລະ ຜົນກະທົບຈາກການລະບາດຂອງພະຍາດໂຄວິດ-19, ທ່ານ ໄດ້ຮຽກຮ້ອງຄະນະບໍລິຫານງານສະຫະພັນແມ່ຍິງ ຫສນຍ ກໍ່ຄືຄະນະນຳຂອງບັນດາກົມ ພາຍໃນ ຫສນຍ ໃຫ້ເພີ່ມທະວີການນຳພາດ້ານການເມືອງແນວຄິດ ໃຫ້ມີຄວາມອຸ່ນອ່ຽນທຸ່ນທ່ຽງ, ເຂັ້ມວຽກ, ເຂັ້ມງານ, ເຮັດວຽກຮ່ວມກັນ ໃຫ້ມີຜົນສຳເລັດ, ສ້າງຄວາມພ້ອມໃຫ້ແມ່ຍິງສາມາດຮັບມືກັບສິ່ງທ້າທາຍ ແລະ ຄວາມສ່ຽງຈາກສະພາບທີ່ຜັນແປ ໃນພາກພື້ນ ແລະ ສາກົນ ເພື່ອພ້ອມກັນຜ່ານຜ່າວິກິດການໃນຄັ້ງນີ້; ສືບຕໍ່ສ້າງຄວາມເຂັ້ມແຂງ ໃຫ້ກົງຈັກການຈັດຕັ້ງແມ່ຍິງ, ປັບປຸງແບບແຜນວິທີເຮັດວຽກ, ການປະສານງານ ແລະ ຮ່ວມມືກັບອົງການຈັດຕັ້ງມະຫາຊົນ ໃຫ້ສາມາດເຄື່ອນໄຫວໄດ້ຢ່າງຄ່ອງຕົວ ແລະ ມີປະສິດທິຜົນກວ່າເກົ່າ; ລົງໃກ້ຊິດຕິດແທດ ແລະ ເພີ່ມທະວີການເຕົ້າໂຮມຄວາມສາມັກຄີພາຍໃນ ເອື້ອຍນ້ອງແມ່ຍິງ, ຮັກແພງຊ່ວຍເຫຼືອເຊິ່ງກັນ ແລະ ກັນ ກັບອ້າຍນ້ອງຊາຍ ເພື່ອກ້າວໜ້າໄປພ້ອມກັນ; ເພີ່ມທະວີຄວາມສາມັກຄີຮ່ວມມືກັບພາຍນອກ ກໍ່ຄືກັບບັນດາຂະແໜງການອື່ນ ແລະ ການຮ່ວມມື ແລກປ່ຽນບົດຮຽນກັບຕ່າງປະເທດ; ນຳພາຕິດຕາມ, ຊຸກຍູ້ຂະບວນການເຄື່ອນໄຫວວຽກງານໃຫ້ມີຂະບວນຟົດຟື້ນ ແລະ ຊອກເຫັນໄດ້ສະມາຊິກແມ່ຍິງ ທີ່ມີຄວາມຫ້າວຫັນ, ພົ້ນເດັ່ນ; ປຸກລະດົມຊຸກຍູ້ ແລະ ເງື່ອນໄຂໃຫ້ແມ່ຍິງໄດ້ຮັບການພັດທະນາຮອບດ້ານ ແລະ ສາມາດເຂົ້າຮ່ວມ ໃນການຕັດສິນບັນຫາຢູ່ຂັ້ນຕ່າງໆ, ເອົາໃຈໃສ່ເຊີດຊູ ການອະນຸລັກຮັກສາ ແລະ ເສີມຂະຫຍາຍມູນເຊື້ອວັດທະນະທຳອັນດີງາມຂອງຊາດ ກໍ່ຄື ຂອງແມ່ຍິງລາວ ໃຫ້ຢູ່ຄູ່ກັບຊາດລາວ ແລະ ແມ່ຍິງລາວຕະຫຼອດໄປ.​


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ