ມອບພາຫະນະ ໃຫ້ກອງບັນຊາການທະຫານແຂວງ ຈຳປາສັກ ແລະ ອັດຕະປື

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພະຫັດ, 16 ກ.ລ 2020 16:00

​ທ່ານ ຄຳລາວັນ ຈັນທະລາວັນ, ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ ຕາງໜ້າໃຫ້ລັດຖະບານ ໄດ້ນຳເອົາລົດຈັກສະເກມ ໄປມອບໃຫ້ ກອງບັນຊາການທະຫານແຂວງຈຳປາສັກ ຈຳນວນ 7 ຄັນ ລວມມູນຄ່າ 135 ລ້ານກີບ ແລະ ກອງບັນຊາການທະຫານແຂວງອັດຕະປື ຈຳນວນ 8 ຄັນ ລວມມູນຄ່າ 150 ລ້ານກີບ.

ພິທີມອບລົດດັ່ງກ່າວ ໃຫ້ກອງບັນຊາການທະຫານແຂວງຈຳປາສັກ ໄດ້ຈັດຂຶ້ນໃນວັນທີ 15 ກໍລະກົດ 2020 ທີ່ ກອງບັນຊາການທະຫານແຂວງຈຳປາສັກ, ຊຶ່ງກ່າວຮັບໂດຍທ່ານ ພັນເອກ ຄຳແຫວນ ຈະເລີນວົງ, ຫົວໜ້າການເມືອງ ກອງບັນຊາການທະຫານແຂວງຈຳປາສັກ. ສຳລັບພິທີມອບລົດ ໃຫ້ກອງບັນຊາການທະຫານແຂວງອັດຕະປື ໄດ້ຈັດຂຶ້ນໃນວັນທີ 16 ກໍລະກົດ 2020 ທີ່ ກອງບັນຊາການທະຫານແຂວງອັດຕະປື, ຊຶ່ງກ່າວຮັບໂດຍທ່ານ ພັນເອກ ໂຊກໄຊ ພິມມະລາ, ຫົວໜ້າການເມືອງ ກອງບັນຊາການທະຫານແຂວງອັດຕະປື.
ໃນໂອກາດມອບລົດໃຫ້ກອງບັນຊາການທະຫານແຕ່ລະແຂວງ, ທ່ານ ຄຳລາວັນ ຈັນທະລາວັນ ໄດ້ມີຄຳເຫັນບາງຕອນວ່າ: ການນໍາເອົາລົດຈັກສະເກມ ມາມອບໃຫ້ໃນຄັ້ງນີ້ ແມ່ນຍ້ອນເຫັນໄດ້ຄວາມສຳຄັນ ແລະ ຄວາມຮຽກຮ້ອງຕ້ອງການ ຂອງໜ້າທີ່ວຽກງານຕົວຈິງຂອງທ້ອງຖິ່ນ, ໂດຍມອບໃຫ້ເພື່ອນໍາໃຊ້ເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບຂອງແຂວງ ເວົ້າລວມ, ເວົ້າສະເພາະ ແມ່ນນໍາໃຊ້ເຂົ້າໃນວຽກງານວິຊາສະເພາະຂອງຕົນ ເພື່ອປົກປັກຮັກ ສາເຂດນໍ້າແດນດິນ ອັນຄົບຖ້ວນຂອງຊາດໄວ້ໃຫ້ໝັ້ນຄົງ, ຮັບປະກັນໄດ້ຄວາມສະຫງົບ, ປອດໄພ, ເຮັດໃຫ້ປະຊາຊົນບັນດາເຜົ່າ ມີຄວາມອຸ່ນອຽນທຸ່ນທ່ຽງ, ມີຄວາມປອດໄພໃນການທຳມາຫາກິນ, ພັດທະນາຊີວິດການເປັນຢູ່ຂອງຄອບຄົວ ແລະ ປະກອບສ່ວນເຂົ້າໃນການສ້າງສາພັດທະນາທ້ອງຖິ່ນຂອງຕົນ ກໍ່ຄືປະເທດຊາດ ໃຫ້ຈະເລີນຮຸ່ງເຮືອງຂຶ້ນເລື້ອຍໆ. ນອກນັ້ນ, ທ່ານ ຄໍາລາວັນ ຈັນທະລາວັນ ຍັງໄດ້ຍົກໃຫ້ເຫັນ ສະພາບການທີ່ພົ້ນເດັ່ນ ຂອງພາກພື້ນ ແລະ ສາກົນ ໃນປະຈຸບັນ ແລະ ທ່າອ່ຽງໃນອະນາຄົດ ໂດຍມີການຝັນແປຢ່າງສະຫຼັບຊັບຊ້ອນ ແລະ ທ້າທາຍທົດສອບຫຼາຍປະການ, ອັນໄດ້ສົ່ງຜົນກະທົບຕໍ່ປະເທດຂອງພວກເຮົາເຊັ່ນດຽວກັນ, ສະນັ້ນ ພວກເຮົາຕ້ອງໄດ້ເອົາໃຈໃສ່ຕິດຕາມ ເຝົ້າລະວັງ ຢ່າງໃກ້ຊິດ ແລະ ເປັນເຈົ້າການກຽມຄວາມພ້ອມ ເພື່ອຮັບມືຕໍ່ສະພາບການຕ່າງໆ ທີ່ອາດເກີດຂຶ້ນຢູ່ສະເໝີ, ລວມທັງ ສະພາບການແຜ່ລະບາດຂອງເຊື້ອພະຍາດໂຄວິດ 19 ທີ່ຍັງສືບຕໍ່ມີການແຜ່ລະບາດໃນທົ່ວໂລກ ອັນສ້າງຄວາມເສຍຫາຍທັງຊີວິດ ແລະ ຊັບສິນເປັນຈໍານວນຫຼວງຫຼາຍ.
ໃນໂອກາດດຽວກັນ, ທ່ານ ພັນເອກ ຄຳແຫວນ ຈະເລີນວົງ ແລະ ທ່ານ ພັນເອກ ໂຊກໄຊ ພິມມະລາ ກໍ່ໄດ້ຕາງໜ້າໃຫ້ກອງບັນຊາການທະຫານແຂວງຂອງຕົນ ກ່າວສະແດງຄວາມຂອບໃຈຕໍ່ພັກ ແລະ ລັດຖະບານ ທີ່ຍາມໃດກໍ່ໄດ້ເອົາໃຈໃສ່, ມີຄວາມເປັນຫ່ວງເປັນໄຍ ແລະ ໃຫ້ຄວາມສໍາຄັນຕໍ່ວຽກງານ ປ້ອງກັນຊາດ-ປ້ອງກັນຄວາມສະຫົງບ ຢ່າງສະ ເໝີຕົ້ນສະເໝີປາຍ, ຊຶ່ງການມອບລົດຈັກສະເກມ ໃຫ້ແກ່ກອງບັນຊາການທະຫານແຂວງ ໃນຄັ້ງນີ້ ຍັງເປັນການປຸກລະດົມ, ຊຸກຍູ້ ແລະ ໃຫ້ກຳລັງໃຈອັນໃຫຍ່ຫຼວງ ແກ່ອ້າຍນ້ອງ ນາຍ ແລະ ພົນທະຫານ ທີ່ກຳລັງປະຕິບັດໜ້າທີ່ວຽກງານຂອງຕົນ. ກອງບັນຊາການທະຫານແຂວງ ຈະນໍາໃຊ້ພາຫະນະດັ່ງກ່າວ ໃຫ້ຖືກຕ້ອງຕາມເປົ້າໝາຍ ແລະ ເກີດປະສິດທິຜົນ, ມີການຄຸ້ມຄອງ-ປົກປັກຮັກສາ ໃຫ້ສາມາດນຳໃຊ້ໄດ້ຍາວນານ. ນອກນັ້ນ ກໍ່ຈະສືບຕໍ່ຝຶກຝົນຫຼໍ່ຫຼອມຕົນເອງ ເພື່ອໃຫ້ກາຍເປັນກົມກອງທີ່ໜັກແໜ້ນ, ເຂັ້ມແຂງ, ມີການພັດທະນາຢ່າງບໍ່ຢຸດຢັ້ງ ແລະ ກາຍເປັນທີ່ເພິ່ງຂອງປະຊາຊົນ ຢ່າງແທ້ຈິງ.
​ສໍາລັບລົດຈັກສະເກມ ທີ່ນໍາມາມອບໃນຄັ້ງນີ້ ແມ່ນໄດ້ຮັບການສະໜັບສະໜູນ ແລະ ອຸບປະຖໍາຈາກ ທະນາ ຄານ ເອສທີ ຈໍາກັດ ແລະ ບໍລິສັດ ຄູນໄຊພັດທະນາກໍ່ສ້າງຈໍາກັດ.​


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ