ການນຳ ຫສນຍ ໂອ້ລົມພະນັກງານຫຼັກແຫຼ່ງແຂວງຫົວພັນ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນອັງຄານ, 07 ກ.ລ 2020 13:00

​ໃນວັນທີ 1 ກໍລະກົດ 2020 ທ່ານ ເພັດ ພົມພິພັກ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ໄດ້ໂອ້ລົມພະນັກງານຫຼັກແຫຼ່ງ ຂອງແຂວງຫົວພັນ ຢູ່ຫ້ອງປະຊຸມຫ້ອງວ່າການປົກຄອງແຂວງ. ເຂົ້າຮ່ວມຮັບຟັງມີທ່ານ ຄຳຜີວ ວົງສະຫວັນ, ປະທານແນວລາວສ້າງຊາດແຂວງ; ມີບັນດາທ່ານຄະນະປະຈຳພັກແຂວງ, ຫົວໜ້າ- ຮອງຫົວໜ້າພະແນກການອ້ອມຂ້າງແຂວງ ພ້ອມດ້ວຍພະນັກງານຫ້ອງວ່າການປົກຄອງແຂວງ ເຂົ້າຮ່ວມ.
     

ທ່ານ ພູໂຊນ ທຳມະວິໄຊ, ຮອງເຈົ້າແຂວງໆຫົວພັນ ໄດ້ລາຍງານຫຍໍ້ກ່ຽວກັບ ສະພາບການພັດທະນາເສດຖະກິດ-ສັງຄົມຂອງແຂວງ ໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2020, ໂດຍລວມເຫັນວ່າ ທົ່ວແຂວງຫົວພັນ ສືບຕໍ່ມີຄວາມໜັກແໜ້ນທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ, ປະຊາຊົນຍູທ່າງທຳມາຫາກິນ ແລະ ມີການພັດທະນາດີຂື້ນເລື້ອຍໆ; ໄລຍະ 5 ເດືອນຜ່ານມາສາມາດເກັບລາຍຮັບງົບປະມານໄດ້ທັງໝົດ 38,12 ຕື້ກີບ ທຽບໃສ່ແຜນການປີປະຕິບັດໄດ້ 29,6% ແລະ ຂົງເຂດວຽກງານອື່ນໆ ກໍ່ເຫັນວ່າມີການເຄື່ອນໄຫວເປັນຂະບວນຟົດຟື້ນ. ແຕ່ເຖິງຢ່າງໃດກໍ່ຕາມ ເຫັນວ່າບັນດາຄາດໝາຍຈໍານວນໜື່ງ ຍັງບໍ່ທັນບັນລຸ ຍ້ອນພົບຄວາມຫຍຸ້ງຍາກດ້ານງົບປະມານ ບວກກັບສະພາບການແຜ່ລະບາດຂອງພະຍາດອັກເສບປອດ ໂຄວິດ 19. ສໍາລັບທິດທາງແຜນການຈຸດສຸມ 6 ເດືອນທ້າຍປີ 2020 ແຂວງຫົວພັນຈະໄດ້ສືບຕໍ່ຜັນຂະຫຍາຍ ແລະ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ສູ້ຊົນໃຫ້ບັນລຸຕາມຄາດໝາຍທີ່ວາງໄວ້. 
ໃນໂອກາດນີ້, ທ່ານຫົວໜ້າຫ້ອງວ່າການສຳນັກງານາຍົກລັດຖະມົນຕີ ກໍ່ໄດ້ໂອ້ລົມຕໍ່ຜູ້ເຂົ້າຮ່ວມ ໃນນັ້ນ ໄດ້ເນັ້ນໜັກໃຫ້ການນຳແຂວງຫົວພັນ ເອົາໃຈໃສ່ໃນຫຼາຍດ້ານ ເປັນຕົ້ນ: ຄົ້ນຄວ້າຊຸກຍູ້ການລົງທຶນຂອງພາກລັດ, ພາກເອກະຊົນ ເຂົ້າໃນການຜະລິດສິນຄ້າຢູ່ພາຍໃນແຂວງ ໃຫ້ແຂງແຮງ, ເຮັດໃຫ້ແຂວງມີແຫຼ່ງລາຍຮັບເພີ່ມຂື້ນ, ພ້ອມທັງ ສຸມໃສ່ຊຸກຍູ້ການຜະລິດກະສິກຳ ການປູກຝັງ-ລ້ຽງສັດ ເພື່ອເປັນສິນຄ້າໃຫ້ຫຼາຍຂື້ນ ແລະ ສືບຕໍ່ແກ້ໄຂຜົນກະທົບຈາກໂຄວິດ 19 ດ້ວຍການຫັນປ່ຽນເຂົ້າສູ່ການດຳລົງຊີວິດປົກກະຕິແບບໃໝ່, ຮູ້ປະຢັດການໃຊ້ຈ່າຍ, ຕ້ານການຟູມເຟື່ອຍ, ຕ້ານແນວຄິດຄ່ານິຍົມທີ່ບໍ່ຖືກຕ້ອງ, ພ້ອມກັນສືບຕໍ່ປັບປຸງແບບແຜນດຳເນີນຊີວິດ ເພື່ອເຂົ້າສູ່ການດຳເນີນກອງປະຊຸມໃຫຍ່ຂອງອົງຄະນະພັກແຂວງ. ໃນຕອນທ້າຍ, ທ່ານ ເພັດ ພົມພິພັກ ຍັງໄດ້ເນັ້ນໜັກໃຫ້ ຫ້ອງວ່າການແຂວງຫົວພັນ ເອົາໃຈໃສ່ປັບປຸງແບບແຜນວິທີເຮັດວຽກຮອບດ້ານຂອງຕົນ ໂດຍຫັນສູ່ລະບົບທັນສະໄໝ, ນຳໃຊ້ເຕັກໂນໂລຊີໃໝ່ ເພື່ອສາມາດເຮັດສຳເລັດໜ້າທີ່ ການເປັນເສນາທິການ ໃຫ້ແກ່ການນຳແຂວງ ໄດ້ຢ່າງຖືກຕ້ອງ, ຄ່ອງແຄ້ວ ແລະ ມີປະສິດທິຜົນສູງ, ສາມາດຕອບສະໜອງ ຄວາມຮຽກຮ້ອງຕ້ອງການ ຂອງໜ້າທີ່ວຽກງານ ໃນປະຈຸບັນ ກໍ່ຄືທ່າອ່ຽງໃນຕໍ່ໜ້າ ແລະ ຍາວນານ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ