ກຸ່ມບໍລິສັດ ດວງຈະເລີນ ມອບເຄື່ອງຊ່ວຍເຫຼືອປ້ອງກັນພະຍາດ ໂຄວິດ-19

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພຸດ, 01 ກ.ລ 2020 18:00

ໃນຕອນເຊົ້າ ຂອງວັນທີ 1 ກໍລະກົດ 2020 ທີ່ ຫ້ອງວ່າການສຳນັກງານນາຍົກລັດຖະມົນຕີ ໄດ້ມີພິທີມອບ-ຮັບເຄື່ອງຊ່ວຍເຫຼືອ ດ້ານການແພດ (ຜ້າອັດປາກ-ດັງ) ຈາກກຸ່ມບໍລິສັດ ດວງຈະເລີນ ພັດທະນາກໍ່ສ້າງ ຈຳກັດ ແລະ ຄູ່ຮ່ວມຈາກປະເທດຈີນ ໃຫ້ແກ່ລັດຖະບານ ກໍ່ຄືຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງພະຍາດ ໂຄວິດ-19 ເພື່ອນຳໄປແຈກຢາຍ ໃຫ້ບັນດາກະຊວງ ແລະ ແຂວງ ຈຳນວນໜຶ່ງ.

ເຄື່ອງທີ່ນຳມາມອບຊ່ວຍເຫຼືອໃນຄັ້ງນີ້ ມີຜ້າອັດປາກ-ດັງ N95 ຈຳນວນ 100.000 ອັນ ລວມເປັນມູນຄ່າ ປະມານ 309.000 ໂດລາສະຫະລັດ, ກ່າວມອບໂດຍທ່ານ ນາງ ອາຊິງ ສີລາຊາ, ຮອງປະທານ ກຸ່ມບໍລິສັດ ດວງຈະເລີນ ພັດທະນາກໍ່ສ້າງ ຈຳກັດ ແລະ ຕາງໜ້າໃຫ້ຄະນະສະເພາະກິດ ກ່າວຮັບໂດຍທ່ານ ນາງ ທິບພະກອນ ຈັນທະວົງສາ, ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຮອງຫົວໜ້າກອງເລຂາ ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງພະຍາດ ໂຄວິດ-19.
​ໃນໂອກາດນີ້, ທ່ານ ນາງ ທິບພະກອນ ຈັນທະວົງສາ ໄດ້ກ່າວສະແດງຄວາມຂອບໃຈ ແລະ ຊົມເຊີຍ ຕໍ່ກຸ່ມບໍລິສັດ ທີ່ໄດ້ນຳເອົາເຄື່ອງມາມອບຊ່ວຍເຫຼືອ ໃນຄັ້ງນີ້, ຊິຶ່ງເປັນການປະກອບສ່ວນອັນສຳຄັນ ເຂົ້າໃນການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງພະຍາດ ໂຄວິດ-19 ໃຫ້ມີຄວາມຮັບປະກັນຫຼາຍຂຶ້ນ.


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ