ຊົມເຊີຍ ສອງທະນາຄານ ມອບເງິນຊ່ວຍເຫຼືອແກ້ໄຂບັນຫາ ໂຄວິດ-19

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນຈັນ, 04 ພ.ພ 2020 17:00

​​​ໃນຕອນບ່າຍ ຂອງວັນທີ 4 ພຶດສະພາ 2020 ທີ່ ຫ້ອງວ່າການສຳນັກງານນາຍົກລັດຖະມົນຕີ, ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງເຊື້ອພະຍາດ ໂຄວິດ-19 ໄດ້ຕາງໜ້າໃຫ້ລັດຖະບານ ຮັບເງິນຊ່ວຍເຫຼືອ ຈາກສອງພາກສ່ວນ, ໂດຍການກ່າວຮັບຂອງທ່ານ ຮສ.ດຣ. ບຸນກອງ ສີຫາວົງ, ລັດຖະມົນຕີ ກະຊວງສາທາລະນະສຸກ, ຮອງຫົວໜ້າຄະນະສະເພາະກິດ; ມີຄະນະສະເພາະກິດ ແລະ ພະນັກງານທີ່ກ່ຽວຂ້ອງ ຂອງແຕ່ລະພາກສ່ວນ ເຂົ້າຮ່ວມ.
ພາກສ່ວນທີ່ໄດ້ນຳເງິນມາມອບໃນຄັ້ງນີ້ ປະກອບມີ: 1. ທະນາຄານ ແຫ່ງ ສປປ ລາວ ມອບເງິນ ຈຳນວນ 500.000.000 ກີບ, ກ່າວມອບໂດຍທ່ານ ພຸດທະໄຊ ສີວິໄລ, ຮອງຜູ້ວ່າການທະນາຄານ ແຫ່ງ ສປປ ລາວ; 2. ທະນາຄານການຄ້າຕ່າງປະເທດລາວ ມະຫາຊົນ ມອບເງິນຈຳນວນ 500.000.000 ກີບ, ກ່າວມອບໂດຍທ່ານ ບົວວັນ ສີມະລີວົງ, ຮອງຜູ້ອຳນວຍການທະນາຄານການຄ້າຕ່າງປະເທດລາວ ມະຫາຊົນ.

​ໃນໂອກາດດັ່ງກ່າວ, ທ່ານລັດຖະມົນຕີ ກະຊວງສາທາລະນະສຸກ ໄດ້ສະແດງຄວາມຂອບໃຈ ຕໍ່ການຊ່ວຍເຫຼືອລັດຖະບານ ຂອງສອງພາກສ່ວນໃນຄັ້ງນີ້, ຊຶ່ງເປັນການປະກອບສ່ວນ ເຂົ້າໃນການແກ້ໄຂ ການແຜ່ລະບາດ ຂອງເຊື້ອພະຍາດ ໂຄວິດ-19 ຢູ່ ສປປ ລາວ, ເຖິງແມ່ນວ່າ ສະພາບການແຜ່ລະບາດ ຂອງເຊື້ອພະຍາດດັ່ງກ່າວ ຢູ່ ສປປ ລາວ ຈະມີລັກສະນະຜ່ອນຄາຍລົງ, ແຕ່ສະພາບການແຜ່ລະບາດ ຢູ່ຫຼາຍປະເທດໃນໂລກ ຍັງມີທ່າອ່ຽງເພີ່ມຂຶ້ນ ທັງການຕິດເຊື້ອ ແລະ ເສຍຊີວິດ ເຮັດໃຫ້ ສປປ ລາວ ພວກເຮົາ ຍັງມີຄວາມສ່ຽງສູງ, ຍັງຕ້ອງໄດ້ສືບຕໍ່ເຝົ້າລະວັງ, ປ້ອງກັນ ແລະ ປະຕິບັດມາດຕະການໃນຫຼາຍດ້ານ ເພື່ອກຽມພ້ອມຮັບມື ຕໍ່ສະພາບການຕ່າງໆ ທີ່ບໍ່ແນ່ນອນໃນອະນາຄົດ. ພ້ອມກັນນັ້ນ, ທ່ານຍັງໄດ້ແຈ້ງ ໃຫ້ບັນດາພາກສ່ວນ ທີ່ນຳເອົາເງິນມາມອບ ຊາບຕື່ມ ກ່ຽວກັບສະພາບການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງເຊື້ອພະຍາດ ໂຄວິດ-19 ຢູ່ ສປປ ລາວ, ລວມທັງ ຂໍ້ສະດວກ, ຂໍ້ຈຳກັດຕ່າງໆ ໃນການແກ້ໄຂ ການແຜ່ລະບາດ ຂອງເຊື້ອພະຍາດ ໂຄວິດ-19. ນອກນັ້ນ ກໍ່ຍັງໄດ້ຊີ້ນຳ ໃຫ້ແຕ່ລະພາກສ່ວນ ເອົາໃຈໃສ່ນຳພາ-ຊີ້ນຳ, ກວດກາ ແລະ ຊຸກຍູ້ ພະນັກງານພາກສ່ວນຂອງຕົນ ປ້ອງກັນພະຍາດ ກໍ່ຄື ປະຕິບັດມາດຕະການຕ່າງໆ ທີ່ລັດຖະບານ ແລະ ຄະນະສະເພາະກິດ ວາງອອກຢ່າງເຂັ້ມງວດ ເພື່ອປະກອບສ່ວນ ເຂົ້າໃນການຕ້ານ ແລະ ສະກັດກັ້ນ ການແຜ່ລະບາດ ຂອງເຊື້ອພະຍາດ ໂຄວິດ-19 ຢູ່ ສປປ ລາວ ໃຫ້ມີຜົນສຳເລັດ ຕາມຄວາມມຸ່ງມາດປາດຖະໜາ ຂອງພວກເຮົາໝົດທຸກຄົນ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ