ຈັດພິທີສົ່ງຊ່ຽວຊານແພດຈີນ ເດີນທາງກັບປະເທດ ຢ່າງສົມກຽດ

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນອາທິດ, 12 ມ.ສ 2020 16:00

​​​​ໃນຕອນທ່ຽງ ຂອງວັນທີ 12 ເມສາ 2020 ທີ່ ສະໜາມບິນສາກົນວັດໄຕ, ນະຄອນຫຼວງວຽງຈັນ ໄດ້ມີພິທີສົ່ງທີມຄະນະຊ່ຽວຊານແພດ ຈາກ ສປ ຈີນ ເດີນທາງກັບປະເທດ ພາຍຫຼັງສຳເລັດການປະຕິບັດໜ້າທີ່ ຊ່ວຍເຫຼືອ ສປປ ລາວ ໃນການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງເຊື້ອພະຍາດ ໂຄວິດ-19 ໃນລະຫວ່າງວັນທີ 29 ມີນາ ຫາ ວັນທີ 12 ເມສາ 2020 ໂດຍມີທ່ານ ຮສ.ດຣ. ບຸນກອງ ສີຫາວົງ, ລັດຖະມົນຕີກະຊວງສາທາລະນະສຸກ; ບັນດາທ່ານຮອງລັດຖະມົນຕີ ທີ່ຢູ່ໃນຄະນະສະເພາະກິດ, ທ່ານເອກອັກຄະລັດຖະທູດ ຈີນ ປະຈຳ ສປປ ລາວ, ພະນັກງານທີ່ກ່ຽວຂ້ອງ ແລະ ສື່ມວນຊົນ ເຂົ້າຮ່ວມ.

​​​​​​​​​ໃນໂອກາດນີ້, ທ່ານລັດຖະມົນຕີກະຊວງສາທາລະນະສຸກ ຕາງໜ້າໃຫ້ລັດຖະບານ ແຫ່ງ ສປປ ລາວ ໄດ້ມີຄຳເຫັນຕີລາຄາສູງ ຕໍ່ການຊ່ວຍເຫຼືອອັນລໍ້າຄ່າ ຂອງພັກ, ລັດ ແລະ ປະຊາຊົນຈີນ ເວົ້າລວມ, ເວົ້າສະເພາະ ກໍ່ແມ່ນທີມຄະນະຊ່ຽວຊານແພດ ຈາກ ສປ ຈີນ ທີ່ໄດ້ປະກອບສ່ວນເຫື່ອແຮງ, ສະຕິປັນຍາ, ຄວາມຮູ້ຄວາມສາມາດ ແລະ ປະສົບການຂອງຕົນ ຢ່າງເຕັມສ່ວນ ເຂົ້າໃນການປະຕິບັດວຽກງານ ໃຫ້ການຊ່ວຍເຫຼືອດ້ານການແພດ ແກ່ ສປປ ລາວ ໃນຄັ້ງນີ້ ໂດຍສະເພາະ ການແນະນຳ, ຖ່າຍທອດຄວາມຮູ້, ບົດຮຽນ ແລະ ປະສົບການ ໃຫ້ແກ່ພະນັກງານແພດ-ໝໍ ແລະ ພາກສ່ວນທີ່ກ່ຽວຂ້ອງ ຂອງ ສປປ ລາວ ເພື່ອນຳໄປໝູນໃຊ້ເຂົ້າໃນການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງເຊື້ອພະຍາດ ໂຄວິດ-19 ຕາມທິດຊີ້ນຳ ທີ່ເປັນເອກະພາບ ຂອງການນຳຂັ້ນສູງ ສປປ ລາວ ແລະ ສປ ຈີນ ບົນຈິດໃຈການພົວພັນຮ່ວມມື "ຄູ່ຮ່ວມຊະຕາກຳດຽວກັນ" ຢ່າງແທ້ຈິງ, ພ້ອມກັນນີ້ ກໍ່ຂໍໃຫ້ການພົວພັນຮ່ວມມື ລະຫວ່າງ ສປປ ລາວ ແລະ ສປ ຈີນ ຈົ່ງນັບມື້ໄດ້ຮັບການພັດທະນາ ແລະ ໝັ້ນຄົງທະນົງແກ່ນ, ອວຍພອນໃຫ້ທີມຄະນະຊ່ຽວຊານແພດ ສປ ຈີນ ເດີນທາງກັບປະເທດ ດ້ວຍຄວາມສະຫວັດດີພາບທຸກປະການ.
​​​​ໃນໂອກາດດຽວກັນ, ທ່ານເອກອັກຄະລັດຖະທູດຈີນ ປະຈຳ ສປປ ລາວ ກໍ່ໄດ້ມີຄຳເຫັນ ກ່າວຢໍ້າເຖິງສາຍພົວພັນ ແລະ ການຮ່ວມມື ລະຫວ່າງ ສປ ຈີນ ແລະ ສປປ ລາວ ໃນອາດີດ ມາຮອດປະຈຸບັນ ແມ່ນມີມູນເຊື້ອອັນດີງາມ ແລະ ໄດ້ຮັບການພັດທະນາດີຂຶ້ນຢ່າງຕໍ່ເນື່ອງ; ສະແດງຄວາມຂອບໃຈ ຕໍ່ທຸກພາກສ່ວນ ທີ່ກ່ຽວຂ້ອງ ຂອງ ສປປ ລາວ ທີ່ໄດ້ເອົາໃຈໃສ່ຕ້ອນຮັບ, ອຳນວຍຄວາມສະດວກ ແລະ ເຂົ້າຮ່ວມປະຕິບັດໜ້າທີ່ ກັບຄະນະຊ່ຽວຊານແພດ ສປ ຈີນ ໃນຄັ້ງນີ້ ເຮັດໃຫ້ມີຜົນສຳເລັດຕາມຄາດໝາຍທີ່ວາງໄວ້, ຊຶ່ງການຊ່ວຍເຫຼືອຂອງ ສປ ຈີນ ໃຫ້ແກ່ ສປປ ລາວ ຈະບໍ່ສິ້ນສຸດພຽງເທົ່ານີ້, ຍັງຈະສືບຕໍ່ພົວພັນຮ່ວມມື, ໃຫ້ການຊ່ວຍເຫຼືອ ແລະ ສະໜັບສະໜູນ ແກ່ ສປປ ລາວ ຢ່າງສຸດຄວາມສາມາດ; ສະແດງຄວາມເຊື່ອໝັ້ນວ່າ ພາຍໃຕ້ການນຳພາຂອງພັກປະຊາຊົນປະຕິວັດລາວ ກໍ່ຄືລັດຖະບານລາວ ຈະເຮັດໃຫ້ ສປປ ລາວ ສາມາດຜ່ານຜ່າຄວາມຫຍຸ້ງຍາກ ແລະ ແກ້ໄຂບັນຫາການແຜ່ລະບາດຂອງເຊື້ອພະຍາດ ໂຄວິດ-19 ຄັ້ງນີ້ ໄດ້ຢ່າງແນ່ນອນ.​

​​​​

ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ