ທະນາຄານ ເອັສທີ ມອບລົດຈັກ 10 ໃຫ້ແກ່ລັດຖະບານ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນສຸກ, 10 ມ.ສ 2020 18:00

​​​ໃນຕອນບ່າຍ ຂອງວັນທີ 10 ເມສາ 2020 ທີ່ ຫ້ອງວ່າການສຳນັກງານນາຍົກລັດຖະມົນຕີ, ທະນາຄານ ເອັສທີ ຈຳກັດ ໄດ້ນຳເອົາລົດຈັກຍີ່ຫໍ້ HAOJUE NK150 ຈຳນວນ 10 ຄັນ ລວມມູນຄ່າທັງໝົດ 175.000.000 ກີບ ມອບໃຫ້ລັດຖະບານ ເພື່ອປະກອບສ່ວນນຳໃຊ້ເຂົ້າໃນ ການເຄື່ອນໄຫວວຽກງານຕ່າງໆ ຂອງລັດຖະບານ..
​​ຕາງໜ້າໃຫ້ລັດຖະບານ ກ່າວຮັບໂດຍທ່ານ ປອ. ເພັດ ພົມພິພັກ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ແລະ ກ່າວມອບໂດຍ ທ່ານ ຈິຣັດຊະຍຸດ ອຳຍົງ, ຜູ້ອຳນວຍການໃຫຍ່ ທະນາຄານ ເອັສທີ ຈຳກັດ, ຊຶ່ງມີພະນັກງານທີ່ກ່ຽວຂ້ອງຂອງ ຫ້ອງວ່າການສຳນັກງານນາຍົກລັດຖະມົນຕີ ແລະ ທະນາຄານ ເອັສທີ ຈຳກັດ ເຂົ້າຮ່ວມ.

​​​ໃນໂອກາດດັ່ງກ່າວ, ທ່ານ ປອ. ເພັດ ພົມພິພັກ ໄດ້ສະແດງຄວາມຂອບໃຈ ຕໍ່ຜູ້ອຳນວຍການໃຫຍ່ ກໍ່ຄືທະນາຄານ ເອັສທີ ຈຳກັດ ທີ່ໄດ້ນຳເອົາພາຫະນະ ມາມອບຊ່ວຍເຫຼືອລັດຖະບານ ເພື່ອປະກອບສ່ວນນຳໃຊ້ເຂົ້າໃນ ການເຄື່ອນໄຫວວຽກງານຕ່າງໆ ຂອງລັດຖະບານ ເປັນຕົ້ນ ວຽກງານຊາຍແດນ, ວຽກງານພັດທະນາຊົນນະບົດ, ການເຄື່ອນໄຫວວຽກ ຢູ່ເຂດທີ່ຍັງມີຄວາມຫຍຸ້ງຍາກ ຫ່າງໄກສອກຫຼີກ..., ພ້ອມທັງ ແຈ້ງສະພາບການຈັດຕັ້ງປະຕິບັດວຽກງານຕ່າງໆ ຂອງລັດຖະບານ ໃນປະຈຸບັນ, ໂດຍສະເພາະ ການປະຕິບັດວຽກງານປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງເຊື້ອພະຍາດໂຄວິດ 19 ຢູ່ ສປປ ລາວ ໃຫ້ຜູ້ອຳນວຍການໃຫຍ່ ທະນາຄານ ເອັສທີ ຈຳກັດ ແລະ ຄະນະ ໄດ້ຮັບຊາບ; ນອກນັ້ນ, ທ່ານ ປອ. ເພັດ ພົມພິພັກ ຍັງໄດ້ໃຫ້ຮູ້ຕື່ມວ່າ ຈະນຳເອົາລົດດັ່ງກ່າວ ໄປນຳໃຊ້ໃຫ້ແທດເໝາະ, ສອດຄ່ອງກັບຄວາມຮຽກຮ້ອງຕ້ອງການ ຂອງວຽກງານຕົວຈິງ, ເກີດປະໂຫຍດສູງສຸດ ແລະ ສາມາດນຳໃຊ້ໄດ້ຍາວນານ.​


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ