ບໍລິສັດ IHC ມອບເຄື່ອງຊ່ວຍເຫຼືອ ປ້ອງກັນ COVID-19

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພຸດ, 25 ມິ.ນ 2020 18:00


​​​ໃນຕອນແລງ ຂອງວັນທີ 25 ມີນາ 2020 ທີ່ ຫ້ອງວ່າການສຳນັກງານນາຍົກລັດຖະມົນຕີ, ບໍລິສັດທີ່ປຶກສາ ດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈຳກັດຜູ້ດຽວ (IHC) ໄດ້ນຳເອົາເຄື່ອງໃຊ້ປ້ອງກັນເຊື້ອພະຍາດ COVID-19 ມາມອບໃຫ້ຫ້ອງວ່າການສຳນັກງານນາຍົກລັດຖະມົນຕີ ເພື່ອນຳໄປຊ່ວຍເຫຼືອທ້ອງຖິ່ນ ກໍ່ຄືພາກສ່ວນທີ່ປະຕິບັດວຽກງານທີ່ມີຄວາມສ່ຽງ ຕໍ່ການຕິດເຊື້ອພະຍາດ ແລະ ຍັງມີຄວາມຂາດເຂີນເຄື່ອງໃຊ້ດັ່ງກ່າວ.
​​​ເຄື່ອງທີ່ນຳມາມອບໃນຄັ້ງນີ້ ປະກອບມີຜ້າອັດປາກອະນາໄມ ຈຳນວນ 8 ແກັດ, ລວມທັງໝົດ 20.000 ອັນ ແລະ ເຄື່ອງວັດແທກອຸນຫະພູມຮ່າງກາຍຄົນ ຈຳນວນ 2 ເຄື່ອງ, ຊຶ່ງກ່າວມອບເຄື່ອງດັ່ງກ່າວ ແມ່ນທ່ານ ຢ້ຽນ ຢົງ, ຮອງປະທານບໍລິສັດ IHC ແລະ ກ່າວຮັບ ແມ່ນທ່ານ ມະໄລທອງ ກົມມະສິດ, ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ໂດຍມີພະນັກງານທີ່ກ່ຽວຂ້ອງ ຂອງສອງຝ່າຍ ເຂົ້າຮ່ວມ.
​​​​ໃນໂອກາດດັ່ງກ່າວ, ທ່ານ ມະໄລທອງ ກົມມະສິດ ໄດ້ສະແດງຄວາມຂອບໃຈ ຕໍ່ບໍລິສັດ ທີ່ນຳເອົາເຄື່ອງມາມອບຊ່ວຍເຫຼືອ ແລະ ຫ້ອງວ່າການສຳນັກງານນາຍົກລັດຖະມົນຕີ ຈະນຳເອົາເຄື່ອງດັ່ງກ່າວ ໄປມອບໃຫ້ພາກສ່ວນທີ່ກ່ຽວຂ້ອງ ຕາມຈຸດປະສົງ ແລະ ເປົ້າໝາຍ ຂອງການຊ່ວຍເຫຼືອ ໃນຄັ້ງນີ້.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ