ຫສນຍ ເປີດຊຸດຝຶກອົບຮົມວຽກງານກໍ່ສ້າງ ແລະ ປ້ອງກັນພັກ-ພະນັກງານ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນພຸດ, 19 ກ.ພ 2020 18:00

​ໃນຕອນເຊົ້າຂອງວັນທີ 19 ກຸມພາ 2020 ຫ້ອງວ່າການສໍານັກງານນາຍົກລັດຖະມົນຕີ (ຫສນຍ) ໄດ້ຈັດພິທີເປີດຊຸດຝຶກອົບຮົມວຽກງານກໍ່ສ້າງ ແລະ ປ້ອງກັນພັກ-ພະນັກງານ ຊຸດທີ I, ໂດຍການເປັນປະທານ ກ່າວເປີດກອງປະຊຸມຂອງສະຫາຍ ຄຳລາວັນ ຈັນທະລາວັນ, ຄະນະປະຈຳພັກ, ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ; ມີບັນດາສະຫາຍເລຂາຄະນະພັກຮາກຖານ, ເລຂາໜ່ວຍພັກ, ຜູ້ຕາງໜ້າສາມອົງການຈັດຕັ້ງມະຫາຊົນ ພາຍໃນ ຫສນຍ, ພ້ອມດ້ວຍ ວິທະຍາກອນຈາກຄະນະຈັດຕັ້ງສູນກາງພັກ ແລະ ສຳມະນາກອນ ເຂົ້າຮ່ວມ.

​ຈຸດປະສົງ ຂອງການຈັດຊຸດຝຶກອົບຮົມໃນຄັ້ງນີ້ ແມ່ນເພື່ອແນະນຳ, ອະທິບາຍໃຫ້ສະມາຊິກພັກ ແລະ ພະນັກ ງານ-ລັດຖະກອນ ທີ່ຮັບຜິດຊອບວຽກພັກ-ພະນັກງານ ຢູ່ແຕ່ລະກົມ ໄດ້ຮູ້ ແລະ ເຂົ້າໃຈ ວຽກງານກໍ່ສ້າງ ແລະ ປ້ອງກັນພັກ-ພະນັກງານ; ເພື່ອສ້າງຄວາມເຂັ້ມແຂງ ກ່ຽວກັບວຽກງານພັກ-ພະນັກງານ; ເພື່ອເຮັດໃຫ້ການປະຕິບັດໜ້າທີ່ວຽກງານ ຕາມພາລະບົດບາດໃນແຕ່ລະຂັ້ນ ມີຄວາມສອດຄ່ອງ ແລະ ຄວາມເປັນເອກະພາບກັນ ໂດຍສະເພາະ ການເປັນເສນາທິການທີ່ດີໃຫ້ແກ່ຂັ້ນເທິງ.
​ສຳລັບເນື້້ອໃນ ທີ່ນຳມາຝຶກອົບຮົມ ໃນຄັ້ງນີ້ ປະກອບມີ 5 ຫົວຂໍ້ຫຼັກ ຄື: ວຽກງານຄຸ້ມຄອງ ແລະ ລະບຽບການຍົກຍ້າຍຮ່ວມຊີວິດພັກ; ວຽກງານຂະຫຍາຍພັກໃນໄລຍະໃໝ່; ຍົກສູງຄຸນນະພາບ ການຈັດຕັ້ງພັກໃຫ້ປອດໄສ, ເຂັ້ມແຂງ, ໜັກແໜ້ນ; ການຕີລາຄາຄຸນນະພາບ, ການແບ່ງປະເພດສະມາຊິກພັກ ແລະ ໜ່ວຍພັກ; ພື້ນຖານກ່ຽວກັບການປ້ອງກັນພັກ ແລະ ພະນັກງານ. ຊຸດຝຶກອົບຮົມຄັ້ງນີ້ ຈະໄດ້ດຳເນີນເປັນເວລາ 3 ວັນ ຕັ້ງແຕ່ວັນທີ 19-21 ກຸມພາ 2020 ໂດຍມີສຳມະນາກອນ ຈຳນວນ 43 ສະຫາຍ, ຊຶ່ງແມ່ນຮອງເລຂາໜ່ວຍພັກ, ຜູ້ກວດກາໜ່ວຍພັກ ຂອງຄະນະພັກຮາກຖານ, ໜ່ວຍພັກຮາກຖານ, ໜ່ວຍພັກຂຶ້ນກັບຮາກຖານ ແລະ ພະນັກງານ ທີ່ເຮັດວຽກງານຈັດຕັ້ງ-ພະນັກງານ.
​​ໃນໂອກາດກ່າວເປີດກອງປະຊຸມຄັ້ງນີ້, ສະຫາຍ ຄຳລາວັນ ຈັນທະລາວັນ ຍັງໄດ້ຍົກໃຫ້ເຫັນຄວາມສຳຄັນຂອງ ການຈັດຝຶກອົບຮົມວຽກງານດັ່ງກ່າວ ໃນຄັ້ງນີ້ວ່າ: ເປັນການສົ່ງເສີມຍົກລະດັບ ແລະ ພັດທະນາບຸກຄະລາກອນ ທີ່ຮັບຜິດຊອບວຽກງານພັກ-ພະນັກງານ ໃນແຕ່ລະໜ່ວຍພັກ ຂອງບັນດາກົມ ແລະ ຫໍປະຊຸມແຫ່ງຊາດ ໃຫ້ມີຄວາມຮູ້ ແລະ ຄວາມເຂົ້າໃຈ ທີ່ຖືກຕ້ອງ ໃນການປະຕິບັດວຽກງານ. ພ້ອມກັນນັ້ນ ກໍ່ເພື່ອໃຫ້ສະມາຊິກພັກ-ພະນັກງານ ຫສນຍ ສາມາດນຳໃຊ້ທິດສະດີພື້ນຖານ ໃນແຕ່ລະດ້ານຂອງເອກະສານ ທີ່ໄດ້ຮັບການຝຶກອົບຮົມຄັ້ງນີ້ ແລະ ສາມາດນຳໄປຈັດຕັ້ງຜັນຂະຫຍາຍ ເຂົ້າໃນວຽກງານຕົວຈິງທີ່ຕົນເອງຮັບຜິດຊອບໃຫ້ມີປະສິດທິພາບ, ປະສິດທິຜົນ, ສຳເລັດຕາມແຜນ ການທີ່ວາງໄວ້. ໃນຕອນທ້າຍ, ສະຫາຍປະທານກອງປະຊຸມ ໄດ້ຮຽກຮ້ອງໃຫ້ນັກສຳມະນາກອນທຸກສະຫາຍ ຈົ່ງຍົກສູງຄວາມຮັບຜິດຊອບຂອງຕົນ ພ້ອມກັນເອົາໃຈໃສ່ ແລະ ເປັນເຈົ້າການ ໃນການເຂົ້າຮ່ວມຊຸດຝຶກອົບຮົມວຽກງານກໍ່ສ້າງພັກ ແລະ ປ້ອງກັນພັກ-ພະນັກງານ ຂອງຫ້ອງວ່າການສຳນັກງານນາຍົກລັດຖະມົນຕີ ໃຫ້ໄດ້ຮັບຜົນສຳເລັດຕາມຈຸດປະສົງ ແລະ ລະດັບຄາດໝາຍ ທີ່ວາງໄວ້ຢ່າງຈົບງາມ.​


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ