ຜົນສໍາເລັດກອງປະຊຸມໃຫຍ່ ຊປປລ ຫສນຍ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນຈັນ, 03 ກ.ພ 2020 10:00

ກອງປະຊຸມໃຫຍ່ ຊາວໜຸ່ມປະຊາຊົນປະຕິວັດລາວ ຫ້ອງວ່າການສໍານັກງານນາຍົກລັດຖະມົນຕີ (ຊປປລ ຫສນຍ) ຄັ້ງທີ VI ໄດ້ໄຂຂຶ້ນຢ່າງເປັນທາງການ ໃນເວລາ 08:00  ໂມງ ຂອງວັນທີ 31 ມັງກອນ 2020 ແລະ ດໍາເນີນໄປເປັນເວລາໜຶ່ງວັນ ທີ່ຫ້ອງວ່າການສໍານັກງານນາຍົກລັດຖະມົນຕີ ໂດຍການເປັນປະທານ ຂອງສະຫາຍ ຄົມສັນ ໄຊຍະສານ, ເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວ ຫສນຍ ແລະ ໃຫ້ກຽດເຂົ້າຮ່ວມ ມີສະຫາຍ ເພັດ ພົມພິພັກ, ກຳມະການສູນກາງພັກ, ເລຂາຄະນະພັກ ຫສນຍ; ສະຫາຍ ອາລຸນໄຊ ສູນນະລາດ, ກຳມະການສຳຮອງສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ; ຜູ້ແທນສົມບູນ ແລະ ແຂກຖືກເຊີນເຂົ້າຮ່ວມທັງໝົດ ຈໍານວນ 248 ສະຫາຍ, ໃນນັ້ນ ມີຜູ້ແທນສົມບູນ ຈຳນວນ 201 ສະຫາຍ.

ກອງປະຊຸມ ໄດ້ດໍາເນີນໄປດ້ວຍບັນຍາກາດອັນຟົດຟື້ນ, ສ້າງສັນ, ບັນດາສະຫາຍ ທີ່ເຂົ້າຮ່ວມກອງປະຊຸມ ໄດ້ຍົກສູງຄວາມຮັບຜິດຊອບ, ປະຕິບັດຕາມລະບຽບວິໄນ ແລະ ສຸມສະຕິປັນຍາຂອງຕົນ ເຂົ້າໃນການຄົ້ນຄວ້າປະກອບຄໍາເຫັນ ຕໍ່ລາຍງານການເມືອງ ຢ່າງກົງໄປກົງມາ ແລະ ໄດ້ເປັນເອກະພາບສູງ ຮັບຮອງເອົາບັນດາເນື້ອໃນສໍາຄັນ ຄື:
ກອງປະຊຸມ ໄດ້ຮັບຮອງເອົາລາຍງານການເມືອງ ແລະ ບົດສໍາຫຼວດການນໍາພາລວມ ຂອງຄະນະບໍລິຫານງານຊາວໜຸ່ມຫ້ອງວ່າການສໍານັກງງານນາຍົກລັດຖະມົນຕີ ຕະຫຼອດໄລຍະ 5 ປີຜ່ານມາ ທີ່ສະເໜີໂດຍ ສະຫາຍ ຄົມສັນ ໄຊຍະສານ, ເລຂາຄະນະບໍລິຫານງານຊາວໜຸ່ມປະຊາຊົນ ປະຕິວັດລາວ ຫສນຍ ຊຸດທີ V ແລະ ສະຫາຍ ສົມຄວນ ມາສຸວັນ, ຮອງເລຂາ, ປະທານກວດກາຄະນະບໍລິຫານງານຊາວໜຸ່ມປະຊາຊົນ ປະຕິວັດລາວ ຫສນຍ ຊຸດທີ V. ຊຶ່ງລາຍງານການເມືອງ ແລະ ບົດສໍາຫຼວດດັ່ງກ່າວ ໄດ້ຕີລາຄາສູງ ຕໍ່ໝາກຜົນຂອງການປະຕິບັດໜ້າທີ່ການ ເມືອງ ຂອງຄະນະບໍລິຫານງານຊຸດທີ V ດ້ວຍຄວາມຮັບຜິດຊອບ ແລະ ມີປະສິດທິຜົນສູງ ພ້ອມທັງຍົກໃຫ້ເຫັນດ້ານດີ, ດ້ານອ່ອນ ແລະ ຂໍ້ຄົງຄ້າງ ທີ່ຈະຕ້ອງໄດ້ພ້ອມກັນສືບຕໍ່ແກ້ໄຂ ດ້ວຍການກໍານົດຄາດໝາຍສູ້ຊົນ, ທິດທາງ ໜ້າທີ່ໃນ 5 ປີຕໍ່ໜ້າ ຢ່າງລະອຽດ ແລະ ຊັດເຈນ ໂດຍສະເພາະ ດ້ານທິດທາງລວມ: ສຶກສາອົບຮົມ ຄຸນທາດການເມືອງ ແລະ ປູກຈິດສໍານຶກ ໃຫ້ສະມາຊິກຊາວໜຸ່ມ ມີຄຸນສົມບັດ ສິນທໍາປະຕິວັດ, ມີນໍ້າໃຈຮັກຊາດ, ຮັກລະບອບປະຊາທິປະໄຕ ປະຊາຊົນ, ຮູ້ປົກປັກຮັກສາ ແລະ ເສີມຂະຫຍາຍມູນເຊື້ອວັດທະນະທໍາອັນດີງາມ ແລະ ກາຍເປັນຜູ້ສືບທອດທີ່ດີ ຂອງຊາດ; ປຸກລະດົມ ເຕົ້າໂຮມຄວາມສາມັກຄີຊາວໜຸ່ມລາວ ເປັນປຶກແຜ່ນ ແລະ ປະຕິບັດອຸດົມການ ຂອງພັກ ໃນການສ້າງສັງຄົມສາມັກຄີປອງດອງ, ປະຊາທິປະໄຕ, ສີວິໄລ ແລະ ຍຸຕິທໍາ; ນໍາພາການຈັດຕັ້ງ ແລະ ການເຄື່ອນໄຫວ ຂອງຊາວໜຸ່ມ ພາຍໃຕ້ການຊີ້ນໍາຮອບດ້ານ ຂອງພັກປະຊາຊົນປະຕິວັດລາວ; ສົ່ງເສີມການຄົ້ນຄວ້າປະດິດສ້າງໃໝ່ ຂອງຊາວໜຸ່ມລາວ ເຂົ້າໃນການພັດທະນາອົງການຈັດຕັ້ງ ແລະ ປະເທດຊາດ;ນໍາໃຊ້ໝາກຜົນ ຂອງການຄົ້ນຄວ້າວິທະຍາສາດ ແລະ ເຕັກໂນໂລຊີໃໝ່ ເຂົ້າໃນການປະຕິບັດໜ້າທີ່ວຽກງານ ໃຫ້ມີປະສິດທິຜົນສູງ. ດ້ານຄາດໝາຍສູ້ຊົນ: ສະມາຊິກຊາວໜຸ່ມ ຫຼາຍກວ່າ 80% ຕ້ອງເປັນເຈົ້າການເຂົ້າຮ່ວມຮັບຟັງການເຊື່ອມຊຶມ ແລະ ເຜີຍແຜ່ເອກະສານຕ່າງໆ ໃນວັນສໍາຄັນຂອງຊາດ ທີ່ຫ້ອງວ່າການສໍານັກງານນາຍົກລັດຖະ ມົນຕີ ຈັດຂຶ້ນແຕ່ລະຄັ້ງ ຢ່າງສຸດກົກສຸດປາຍ; ສ້າງສະມາຊິກຊາວໜຸ່ມໃຫ້ກາຍເປັນມະຫາຊົນກ້າວໜ້າ ແລະ ໄດ້ເຂົ້າເປັນສະມາຊິກພັກ ໃຫ້ໄດ້ 16 ສະຫາຍ ຕໍ່ປີ ແລະ ສະເໜີສ້າງສະມາຊິກຊາວໜຸ່ມ ໃຫ້ໄດ້ເຂົ້າຢູ່ໃນເປົ້າໝາຍສືບທອດຕໍາແໜ່ງລັດ ໃຫ້ຫຼາຍຂຶ້ນ ຕາມສັດສ່ວນ ລຸ້ນອາວຸໂສ, ກາງ ແລະ ໜຸ່ມ; ສ້າງລະບົບແລກປ່ຽນຂໍ້ມູນຂ່າວສານພາຍໃນ ແລະ ມີກິດຈະກໍາຮ່ວມກັນ ຢ່າງໜ້ອຍ ໄຕມາດລະຄັ້ງ ຕິດພັນກັບການຈັດຕັ້ງຜັນຂະຫຍາຍ ຂະບວນການຮັກຊາດ-ພັດທະນາ, ຄໍາຂວັນ 3 ດີ ຂອງຫ້ອງວ່າການສໍານັກງານນາຍົກລັດຖະມົນຕີ ແລະ ຂໍ້ແຂ່ງຂັນ 4 ບຸກ ຂອງຊາວໜຸ່ມ ພ້ອມທັງ ມີການຈັດການຍ້ອງຍໍຜົນງານປະຈໍາແຕ່ລະປີ; ເພີ່ມທະວີການພົວພັນ-ຮ່ວມມື ແລກປ່ຽນບົດ ຮຽນກັບບັນດາຊາວໜຸ່ມກະຊວງ, ອົງການ, ນະຄອນ ຫຼວງ, ແຂວງ ແລະ ພົບປະແລກປ່ຽນກັບຊາວໜຸ່ມແຮກສ່ຽວ ປີລະ 2 ຄັ້ງ; ສ້າງ ແລະ ຈັດຕັ້ງປະຕິບັດຂໍໍ້ແຂ່ງຂັນ 4 ບຸກ ໂດຍມີການສະຫຼຸບຖອດຖອນບົດຮຽນ ແລະ ເຊີນຄະນະຮັບຜິດຊອບຂອງສູນກາງຊາວໜຸ່ມປະຊາຊົນ ປະຕິວັດລາວ ຕິດຕາມປະເມີນຜົນ ປະຈໍາແຕ່ລະປີ;ສ້າງກິດຈະກໍາຊ່ວຍເຫຼືອສັງຄົມ ຫຼື ລະດົມອຸປະກອນການຮຽນ ໄປຊ່ວຍບັນດາເຍົາວະຊົນ ແລະ ປະຊາຊົນ ຢູ່ຊົນນະບົດ ໃຫ້ໄດ້ຢ່າງໜ້ອຍ ປີລະ 1 ຄັ້ງ.
ໃນໂອກາດດຽວກັນ, ກອງປະຊຸມ ໄດ້ຮັບຟັງການປະກອບຄໍາເຫັນ ດ້ວຍບັນຍາກາດອັນຟົດຟື້ນ ແລະ ສ້າງສັນ ຈາກອົງການສະຫະພັນກໍາມະບານ ແລະ ສະຫະພັນແມ່ຍິງ ຫ້ອງວ່າການສໍານັກງງານນາຍົກລັດຖະມົນຕີ ແລະ 4 ໜ່ວຍຊາວໜຸ່ມ ພ້ອມທັງ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະບໍລິຫານງານຊາວໜຸ່ມປະຊາຊົນປະຕິວັດລາວ ຫ້ອງວ່າການສໍານັກງງານນາຍົກລັດຖະມົນຕີ ຊຸດໃໝ່ (ຊຸດທີ VI) ບົນພື້ນຖານຄວາມຖືກຕ້ອງ, ມີປະຊາທິປະໄຕ, ສອດຄ່ອງກັບເງື່ອນໄຂ ແລະ ມາດຖານທີ່ກໍານົດໄວ້, ຊຶ່ງມີຜູ້ສະໝັກເລືອກຕັ້ງ 16 ສະຫາຍ (ຍິງ 3 ສະຫາຍ) ແລະ ເລືອກເອົາ 13 ສະຫາຍ. ຜ່ານການເລືອກຕັ້ງ ແລະ ດຳເນີນກອງປະຊຸມຄັ້ງປະຖົມມະລຶກ ຂອງຄະນະບໍລິຫານງານຊາວໜຸ່ມປະຊາຊົນປະຕິວັດລາວ ຫສນຍ ຊຸດທີ VI ໄດ້ເປັນເອກະສັນກັນ ເລືອກເອົາເລຂາ, ຮອງເລຂາ, ຄະນະປະຈໍາ, ປະທານ ແລະ ຮອງປະທານກວດກາ ຄື: ເລືອກເອົາ ສະຫາຍ ສົມຄວນ ມາສຸວັນ ເປັນເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວ ຫສນຍ; ເລືອກເອົາສະຫາຍ ຄອນສະໄໝ ສີສຸພັນທອງ, ສະຫາຍ ນ. ຄຳສັ້ນ ສິດທິວໍລະດາ ແລະ ສະຫາຍ ແສງສະຖິດ ວິຈິດລາສີ ເປັນຮອງເລຂາ; ເລືອກເອົາສະຫາຍ ສົມຄວນ ມາສຸວັນ, ສະຫາຍ ຄອນສະໄໝ ສີສຸພັນທອງ, ສະຫາຍ ນ. ຄຳສັ້ນ ສິດທິວໍລະດາ, ສະຫາຍ ແສງສະຖິດ ວິຈິດລາສີ ແລະ ສະຫາຍ ຊາຍຄຳ ພຸດທະວົງ ເປັນຄະນະປະຈໍາ; ເລືອກເອົາສະຫາຍ ຄອນສະໄໝ ສີສຸພັນທອງ ເປັນປະທານກວດກາ, ສະຫາຍ ໂຈມ ຂະທຸມພົມ ແລະ ສະຫາຍ ນ. ສົມອຸລາ ລໍວັນໄຊ ເປັນຮອງປະທານກວດກາ. ພ້ອມດຽວກັນນີ້ ກອງປະຊຸມຄັ້ງປະຖົມມະລຶກ ຍັງໄດ້ຄັດເລືອກເອົາຜູ້ແທນສົມບູນ ຕຳນວນ 3 ສະຫາຍ ແລະ ສຳຮອງ ຈຳນວນ 1 ສະຫາຍ ເພື່ອກະກຽມເຂົ້າຮ່ວມກອງປະຊຸມໃຫຍ່ ຜູ້ແທນຊາວໜຸ່ມປະຊາຊົນປະຕິວັດລາວ ທົ່ວປະເທດ ຄັ້ງທີ VIII.

ໃນຕອນທ້າຍ, ກອງປະຊຸມ ໄດ້ເປັນກຽດຢ່າງສູງ ຮັບຟັງການໂອ້ລົມຈາກ ສະຫາຍ ເພັດ ພົມພິພັກ ແລະ ສະຫາຍ ອາລຸນໄຊ ສູນນະລາດ, ຊຶ່ງທັງສອງສະຫາຍ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ທີ່ຄະນະບໍລິຫານງານຊາວໜຸ່ມປະຊາຊົນ ປະຕິວັດລາວ ຂອງຫ້ອງວ່າການສໍານັກງານນາຍົກລັດຖະມົນຕີ ສາມາດຍາດມາໄດ້. ພ້ອມກັນນັ້ນ ໄດ້ສະແດງຄວາມເປັນຫ່ວງເປັນໄຍ ແລະ ໃຫ້ທິດຊີ້ນໍາບາງບັນຫາຕົ້ນຕໍ ກ່ຽວກັບການປະຕິບັດວຽກງານຈຸດສຸມ ຂອງຄະນະບໍລິຫານງານຊາວໜຸ່ມ ຊຸດໃໝ່ ກໍ່ຄືສະມາຊິກຊາວໜຸ່ມທົ່ວຫ້ອງວ່າການສໍານັກງານນາຍົກລັດຖະ ມົນຕີ ໃນຕໍ່ໜ້າ ເປັນຕົ້ນ: ໃຫ້ຄະນະຊາວໜຸ່ມທຸກຂັ້ນ ສືບຕໍ່ສຶກສາອົບຮົມການເມືອງ-ແນວຄິດ, ເຕົ້າໂຮມຄວາມສາມັກຄີໃນຖັນແຖວສະມາຊິກຊາວໜຸ່ມ ທົ່ວ ຫສນຍ ແລະ ຮັບຮູ້ເຊື່ອມຊຶມ ຕໍ່ແນວທາງນະໂຍບາຍຂອງພັກ-ລັດ, ລັດຖະທໍາມະນູນ, ກົດໝາຍ, ມະຕິຄໍາສັ່ງລະບຽບການຕ່າງໆ ໃນແຕ່ລະໄລຍະ; ເຕົ້າໂຮມສະຕິປັນຍາຂອງຊາວໜຸ່ມ ເຂົ້າຮ່ວມໃນການຈັດຕັ້ງປະຕິບັດພາລະບົດບາດໜ້າທີ່ສໍາຄັນ ຂອງ ຫສນຍ ໃນການເປັນເສນາທິການທີ່ດີໃຫ້ແກ່ການນໍາ ແລະ ທັງເປັນການຈັດຕັ້ງປະຕິບັດແຜນພັດທະນາຊາວໜຸ່ມລາວ ໃຫ້ບັນລຸຜົນສໍາເລັດຕາມຄາດໝາຍ; ເອົາໃຈໃສ່ປຸກລະດົມ, ເຕົ້າໂຮມກໍາລັງແຮງຂອງຊາວໜຸ່ມ ເຂົ້າຮ່ວມເຄື່ອນໄຫວໃນທຸກຂະບວນການ ເພື່ອຂໍ່ານັບຮັບຕ້ອນວັນສໍາຄັນຕ່າງໆຂອງຊາດ ແລະ ການກະກຽມດໍາເນີນກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ VIII; ສືບຕໍ່ນໍາພາການປະຕິບັດຄໍາຂວັນ 4 ບຸກ ຂອງຊາວໜຸ່ມປະຊາຊົນປະຕິວັດລາວ ຕິດພັນກັບການປະຕິບັດຄໍາຂວັນ 3 ດີ ຂອງຫ້ອງວ່າການສໍານັກງານນາຍົກລັດຖະມົນຕີ ແລະ ຂະບວນການແຂ່ງຂັນຮັກຊາດ ແລະ ພັດທະນາ ໃຫ້ພົ້ນເດັ່ນກວ່າເກົ່າ; ສືບຕໍ່ຄົ້ນຄວ້າ, ຮໍ່າຮຽນຫຼາຍຂຶ້ນຕື່ມ ເພື່ອເຮັດແນວໃດ ໃຫ້ທິດທາງຄາດໝາຍທີ່ວາງອອກນັ້ນ ກາຍເປັນຮູບປະທໍາ, ຕ້ອງໄດ້ສືບຕໍ່ບຸກບືນຕົວ ໃຫ້ສາມາດເຄື່ອນໄຫວໄດ້ຢ່າງຄ່ອງຕົວ ແລະ ໃຫ້ທັນກັບຍຸກສະໄໝ ເປັນຕົ້ນການເຂົ້າເຖິງຂໍ້ມູນຂ່າວສານ, ການເຮັດວຽກມີວິທະຍາສາດ ນໍາໃຊ້ເຕັກໂນໂລຊີ ທີ່ທັນສະໄໝ, ແກ້ໄຂບັນ ຫາ ແລະ ເຮັດໜ້າທີ່ວຽກງານໃຫ້ວ່ອງໄວທັນການ ແລະ ຖືກທິດ, ຍາດແຍ່ງເອົາກາລະໂອກາດ ແລະ ຮັບມືສິ່ງທ້າທາຍຄວາມສ່ຽງຕ່າງໆ ທີ່ອາດເກີດຂຶ້ນຈາກການຮ່ວມມື ແລະ ເຊື່ອມໂຍງກັບພາກພື້ນ ແລະ ສາກົນ; ເອົາໃຈໃສ່ເຜີຍແຜ່ຜົນສໍາເລັດຂອງກອງປະຊຸມໃຫຍ່ ຊາວໜຸ່ມປະຊາຊົນປະຕິວັດລາວ ຫສນຍ ຄັ້ງທີ VI ໃຫ້ກວ້າງຂວາງທົ່ວເຖິງ, ຈັດຕັ້ງເຊື່ອມຊຶມໃຫ້ເລິກເຊິ່ງ ເພື່ອໃຫ້ສະມາຊິກຊາວໜຸ່ມແຕ່ລະຂັ້ນ ຜັນຂະຫຍາຍມະຕິ, ຜັນຂະຫຍາຍເນື້ອໃນຈິດໃຈຂອງກອງປະຊຸມໃຫຍ່ ໃຫ້ເປັນແຜນວຽກລະອຽດ ໃນແຕ່ລະໄລຍະ.
​ອັນສຳຄັນ, ກອງປະຊຸມ ຮຽກຮ້ອງໃຫ້ສະມາຊິກຊາວໜຸ່ມ ຫສນຍ ທຸກສະຫາຍ ຈົ່ງໄດ້ເຊີດຊູສະຕິ ໃນການສ້າງຕົນເອງໃຫ້ມີຄວາມກ້າວໜ້າ, ເຂັ້ມແຂງ ແລະ ຍົກສູງຄວາມຮັບຜິດຊອບການເມືອງ ເຂົ້າໃນຂະບວນການ ຈັດຕັ້ງປະຕິບັດຂໍ້ແຂ່ງຂັນ “ຮັກຊາດ ແລະ ພັດທະນາ” ກໍ່ຄື ຄໍາຂວັນ “3 ດີ” ຂອງຫ້ອງວ່າການສໍານັກງານນາຍົກລັດ ຖະມົນຕີ ຕິດພັນກັບຄໍາຂວັນ “4 ບຸກ” ຂອງຊາວໜຸ່ມປະຊາຊົນປະຕິວັດລາວ ເພື່ອສ້າງຊາວໜຸ່ມຫ້ອງວ່າການສໍານັກງານນາຍົກລັດຖະມົນຕີ ໃຫ້ປອດໃສ, ໜັກແໜ້ນ ແລະ ເຂັ້ມແຂງ, ປະກອບສ່ວນເຂົ້າໃນພາລະກິດປົກປັກຮັກ ສາ ແລະ ສ້າງສາປະເທດຊາດ ໃຫ້ມີຄວາມສະຫງົບ ແລະ ຈະເລີນສີວິໄລ ຢ່າງບໍ່ຢຸດຢັ້ງ. 


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ