ຜົນສຳເລັດກອງປະຊຸມໃຫຍ່ ຄັ້ງທີ V ຂອງສະມາຊິກສະຫະພັນແມ່ຍິງ ຫສນຍ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພະຫັດ, 30 ມ.ກ 2020 18:00

​ກອງປະຊຸມໃຫຍ່ ຄັ້ງທີ V ຂອງສະມາຊິກສະຫະພັນແມ່ຍິງ ຫ້ອງວ່າການສໍານັກງານນາຍົກລັດຖະມົນຕີ (ຫສນຍ) ໄດ້ໄຂຂຶ້ນໃນຕອນເຊົ້າ ຂອງວັນທີ 30 ມັງກອນ 2020 ຢູ່ຫ້ອງປະຊຸມໃຫຍ່ຊັ້ນສອງ ຂອງຫ້ອງວ່າການສໍານັກງານນາຍົກລັດຖະມົນຕີ ແລະ ໄດ້ດໍາເນີນເປັນເວລາເຄິ່ງວັນ, ພາຍໃຕ້ການເປັນປະທານ ຂອງສະຫາຍ ນາງ ບຸນໜັກ ຫຼວງລາດ, ປະທານສະຫະພັນແມ່ຍິງ ຫສນຍ, ໃຫ້ກຽດເຂົ້າຮ່ວມ ມີສະຫາຍ ດຣ. ນາງ ອິນລາວັນ ແກ້ວບຸນພັນ, ກໍາມະການສູນພັກ, ປະທານຄະນະບໍລິຫານງານສູນກາງສະຫະພັນແມ່ຍິງ; ສະຫາຍ ປອ. ເພັດ ພົມພິພັກ, ກໍາມະການສູນກາງພັກ, ເລຂາຄະນະພັກ ຫ້ອງວ່າການສໍານັກງານນາຍົກລັດຖະມົນຕີ; ພ້ອມດ້ວຍ ແຂກຖືກເຊີນ ແລະ ສະມາຊິກສະຫະພັນແມ່ຍິງ ຫ້ອງວ່າການສໍານັກງານນາຍົກລັດຖະມົນຕີ ທັງໝົດ 151 ສະຫາຍ.

ກອງປະຊຸມຄັ້ງນີ້ ໄດ້ດໍາເນີນດ້ວຍບັນຍາກາດສ້າງສັນສາມັກຄີ, ມີຄວາມເປັນລະບຽບຮຽບຮ້ອຍດີ, ບັນດາສະຫາຍຜູ້ແທນ ກອງປະຊຸມໄດ້ຍົກສູງຄວາມຮັບຜິດຊອບ ແລະ ສະຕິປັນຍາຂອງຕົນ ເຂົ້າໃນການປະກອບຄໍາຄິດເຫັນ, ຮັບຮອງເອົາລາຍງານການເມືອງ ແລະ ບົດສໍາຫຼວດການນໍາພາລວມ ຂອງຄະນະບໍລິຫານງານສະຫະພັນແມ່ຍິງ ຫ້ອງວ່າການສໍານັກງານນາຍົກລັດຖະມົນຕີ ຊຸດເກົ່າ ໂດຍໄດ້ທົບທວນ ແລະ ສັງເກດຕີລາຄາຄືນ ຈຸດດີ, ຈຸດອ່ອນ, ສາເຫດ ແລະ ບົດຮຽນທີ່ຖອດຖອນໄດ້ ຈາກການຈັດຕັ້ງປະຕິບັດວຽກງານ ຂອງຄະນະບໍລິຫານງານ ຊຸດທີ 4 ໃນ 5 ປີຜ່ານມາ. ພ້ອມນີ້ ຍັງໄດ້ກໍານົດທິດທາງລະອຽດແຕ່ລະດ້ານ ເພື່ອຈັດຕັ້ງປະຕິບັດໃນຕໍ່ໜ້າ.
ຫຼັງຈາກນັ້ນ ກອງປະຊຸມໄດ້ປ່ອນບັດ ເພື່ອເລືອກຕັ້ງເອົາຄະນະບໍລິຫານງານສະຫະພັນແມ່ຍິງ ຫ້ອງວ່າການສຳນັກງານນາຍົກລັດຖະມົນຕີ ຊຸດໃໝ່, ຊຶ່ງມີຜູ້ລົງສະໝັກເລືອກຕັ້ງ ຈຳນວນ 12 ສະຫາຍ, ເລືອກເອົາ  07 ສະຫາຍ. ຜ່ານການເລືອກຕັ້ງ ແລະ ດຳເນີນກອງປະຊຸມຄັ້ງປະຖົມມະລຶກ ຂອງຄະນະບໍລິຫານງານສະຫະພັນແມ່ຍິງ ຫ້ອງວ່າການສຳນັກງານນາຍົກລັດຖະມົນຕີ ຊຸດທີ V ໄດ້ຕົກລົງເຫັນດີເປັນເອກະພາບ ເລືອກເອົາສະຫາຍ ນາງ ບຸນໜັກ ຫຼວງລາດ ເປັນປະທານຄະນະບໍລິຫານງານສະຫະພັນແມ່ຍິງ ຫສນຍ; ສະຫາຍ ນາງ ວິລະສະຕີ ສົມບູນຂັນ  ເປັນຮອງປະທານ, ທັງເປັນປະທານກວດກາ; ສະຫາຍ ນາງ ບຸນນະວັນ ຄົງມີໄຊ ເປັນຮອງປະທານ; ສະຫາຍ ນາງ   ສຸລິກັນ ພົົມມະຈັນ ເປັນຄະນະ, ທັງເປັນຮອງປະທານກວດກາ; ສະຫາຍ ນາງ  ສາຍລັດສະໝີ ອຸດົມຮັກ  ເປັນຄະນະ; ສະຫາຍ ນາງ   ສາຍສອນ ບຸນວິໄລ  ເປັນຄະນະ; ສະຫາຍ ນາງ ມະນີວອນ ສິມມາລາວົງ ເປັນຄະນະ.

​ໃນໂອກາດດັ່ງກ່າວ ກອງປະຊຸມເປັນກຽດຢ່າງສູງ ໄດ້ຮັບຟັງການໂອ້ລົມ ແລະ ຊີ້ນໍາ ຂອງສະຫາຍ ດຣ. ນາງ ອິນລາວັນ ແກ້ວບຸນພັນ ແລະ ສະຫາຍ ປອ. ເພັດ ພົມພິພັກ, ເຊິ່ງທັງສອງສະຫາຍ ໄດ້ສະແດງຄວາມຍ້ອງຍໍຊົມເຊີຍຕໍ່ສໍາເລັດໃນການນໍາພາ-ຊີ້ນໍາ ສະມາຊິກສະຫະພັນແມ່ຍິງຫ້ອງວ່າການສໍານັກງານນາຍົກລັດຖະມົນຕີ ໃນການປະຕິບັດໜ້າທີ່ການເມືອງຂອງຕົນ ແລະ ສາມາດຍາດໄດ້ຜົນສໍາເລັດຫຼາຍດ້ານ; ພ້ອມດຽວກັນນັ້ນ ບັນດາສະຫາຍ ຍັງໄດ້ສະແດງຄວາມເປັນຫວ່ງເປັນໄຍ ຕໍ່ກັບດ້ານອ່ອນ-ຂໍ້ຄົງຄ້າງ ແລະ ຮຽກຮ້ອງໃຫ້ຄະນະບໍລິຫານງານຊຸດໃໝ່ ຈະຕ້ອງໄດ້ສືບຕໍ່ປັບປຸງແກ້ໄຂ. ຈາກນັ້ນ, ສະຫາຍທັງສອງ ຍັງໄດ້ໃຫ້ທິດຊີ້ນໍາຕໍ່ກັບທິດທາງ ແຜນວຽກຈຸດສຸມໃນຕໍ່ໜ້າ ທີ່ຈະຕ້ອງໄດ້ສຸມໃສ່ຈັດຕັ້ງປະຕິບັດ ໃນໄລຍະ 5 ປີຕໍ່ໜ້າ ແລະ ກໍ່ເຊື່ອໝັ້ນວ່າ ຄະນະບໍລິຫານງານຊຸດໃໝ່ ຈະສືບຕໍ່ນໍາພາ-ຊີ້ນໍາ ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ V ຂອງສະມາຊິກສະຫະພັນແມ່ຍິງ ຫ້ອງວ່າການສໍານັກງານນາຍົກລັດຖະມົນຕີ ໃຫ້ມີຜົນສໍາເລັດໃໝ່ ທີ່ຍິ່ງໃຫ່ຍກວ່າເກົ່າ.​


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ