ສຳມະນາ ກ່ຽວກັບການສ້າງ ແລະ ກວດການິຕິກຳ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນຈັນ, 27 ມ.ກ 2020 10:00

ຫ້ອງວ່າການສຳນັກງານນາຍົກລັດຖະມົນຕີ (ກົມນິຕິກຳ) ໄດ້ຈັດກອງປະຊຸມສຳມະນາ ກ່ຽວກັບການເພີ່ມທະວີຄວາມສາມາດໃນການສ້າງ ແລະ ກວດການິຕິກຳ (Seminar on Strength Skill of Drafting and Reviewing Legislative) ໂດຍການສະໜັບສະໜູນຈາກ ສະຖາບັນຄົ້ນຄວ້າ ແລະ ຝຶກອົບຮົມຍຸຕິທຳ ກະຊວງຍຸຕິທຳ ປະເທດຍີ່ປຸ່ນ ແລະ ອົງການຮ່ວມມືສາກົນ ຍີ່ປຸ່ນ (JICA) ຂຶ້ນໃນວັນທີ 27-28 ມັງກອນ 2020 ນີ້ທີ່ ໂຮງແຮມຄຣາວພລາຊາ, ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ບຸນເກີດ ສັງສົມສັກ, ລັດຖະມົນຕີ ປະຈຳສຳນັກງານນາຍົກລັດຖະມົນຕີ; ມີທ່ານຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຜູ້ຊີ້ນໍາກົມນິຕິກໍາ; ອາດີດປະທານ ກໍາມາທິການກົດໝາຍ ສະພາແຫ່ງຊາດ; ອາດີດຮອງລັດຖະມົນຕີ ກະຊວງຍຸຕິທຳ; ວິທະຍາກອນ ແລະ ພະນັກງານວິຊາການ ຈາກກະຊວງ/ອົງການທຽບເທົ່າ, ພ້ອມດ້ວຍ ຜູ້ຕາງໜ້າບັນດາກົມ ແລະ ຫໍປະຊຸມແຫ່ງຊາດ ທີ່ຂຶ້ນກັບຫ້ອງວ່າການສຳນັກງານນາຍົກລັດຖະມົນຕີ ເຂົ້າຮ່ວມ.​
 
ທ່ານ ບຸນເກີດ ສັງສົມສັກ, ລັດຖະມົນຕີ ປະຈຳ ສນຍ ໄດ້ກ່າວວ່າ: ກອງປະຊຸມສຳມະນາຄັ້ງນີ້ ໄດ້ຈັດຂຶ້ນໃນທ່າມກາງບັນຍາກາດ ທີ່ສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມື ລະຫວ່າງ ສອງລັດ ແລະ ປະຊາຊົນສອງຊາດ ລາວ ແລະ ຍີ່ປຸ່ນ ໄດ້ຮັບການພັດທະນາ ແລະ ຂະຫຍາຍຕົວຢ່າງຕໍ່ເນື່ອງ. ໃນຊຸມປີຜ່ານມາ, ລັດຖະບານ ຍີ່ປຸ່ນ ໄດ້ໃຫ້ການຊ່ວຍເຫຼືອແກ່ ສປປ ລາວ ໃນຫຼາຍດ້ານ ເປັນຕົ້ນ ໂຄງການຮ່ວມມືການພັດທະນາ ວິຊາການດ້ານກົດໝາຍ ແລະ ຍຸຕິທຳ, ໂຄງການພັດທະນາຊັບພະຍາກອນມະນຸດ ໃນຂົງເຂດຍຸຕິທຳ ໄລຍະທີ 1, ໄລຍະທີ 2 ແລະ ໂຄງການຮ່ວມມື ແລະ ການພັດທະນາຢ່າງຢືນຍົງ. ນອກນັ້ນ, ການສຳມະນາຄັ້ງນີ້ ຍັງເປັນການຈັດຕັ້ງຜັນຂະຫຍາຍຜົນ ການຢ້ຽມຢາມພົບປະ, ການຮ່ວມມືແລກປ່ຽນ ບົດຮຽນປະສົບການ, ທັງເປັນການເພີ່ມທະວີ ແລະ ຮັດແໜ້ນສາຍພົວພັນຮ່ວມມື, ຄວາມສາມັກຄີ ລະຫວ່າງ ຫ້ອງວ່າການ ທີ່ມີມູນເຊື້ອຊ່ວຍເຫຼືອເຊິ່ງກັນ ແລະ ກັນ ຕະຫຼອດມາ, ຊຶ່ງສະແດງອອກ ສອງຝ່າຍ ໄດ້ມີການເຄື່ອນໄຫວແລກປ່ຽນບົດຮຽນ,  ປະສົບການເຊິ່ງກັນ ແລະ ກັນ ໃນວຽກງານການເປັນເສນາທີການ, ບໍລິການ ແລະ ຮັບໃຊ້ໃຫ້ ລັດຖະບານ, ນາຍົກລັດຖະມົນຕີ ຂອງແຕ່ລະປະເທດ.

ໃນໂອກາດດຽວກັນນີ້, ນອກຈາກການແລກປ່ຽນບົດຮຽນ ປະສົບການທາງດ້ານນິຕິກຳ ແລະ ພຶດຕິກຳຕົວຈິງ ຂອງສອງປະເທດແລ້ວ, ຊ່ຽວຊານທາງດ້ານກົດໝາຍ ຂອງ ສປປ ລາວ ໄດ້ສະເໜີບົດຮຽນດ້ານການສ້າງ ແລະ ກວດກາຄວາມສອດຄ່ອງ ຂອງນິຕິກຳ ຢູ່ຂັ້ນສູນກາງ ແລະ ທ້ອງຖິ່ນ, ບົດຮຽນດ້ານລະບົບ ການບັງຄັບໃຊ້ກົດໝາຍ (ອຳນາດລັດ ນິຕິບັນຍັດ, ຕຸລາການ, ບໍລິຫານ), ບົດຮຽນດ້ານການສ້າງລັດ ທີ່ປົກຄອງດ້ວຍກົດໝາຍ ຢູ່ ສປປ ລາວ, ພ້ອມກັນນີ້ ຍັງມີຊ່ຽວຊານດ້ານກົດໝາຍ ຈາກສະຖາບັນຄົ້ນຄວ້າ ແລະ ຝຶກອົບຮົມຍຸຕິທຳ ຍີ່ປຸ່ນ, ກະຊວງຍຸຕິທໍາ ປະເທດຍີ່ປຸ່ນ ໄດ້ແລກປ່ຽນປະສົບການ, ຂໍ້ຄິດເຫັນ ແລະ ບົດຮຽນດ້ານລະບົບການສ້າງ ແລະ ກວດກາຄວາມສອດຄ່ອງນິຕິກຳ ຂອງປະເທດຍີ່ປຸ່ນ, ແລກປ່ຽນປະສົບການຈາກການຊ່ວຍເຫຼືອ ບັນດາປະເທດກຳລັງພັດທະນາ ກ່ຽວກັບ ຫົວຂໍ້ການສ້າງ ແລະ ກວດກາຄວາມສອດຄ່ອງຂອງນິຕິກຳ, ລະບົບການສຶກສາ ແລະ ເຜີຍແຜ່ກົດໝາຍຂອງປະເທດຍີ່ປຸ່ນ. ນອກນັ້ນ, ທ່ານ ປະທານກອງປະຊຸມສຳມະນາ ຍັງໄດ້ເນັ້ນໜັກ ແລະ ຮຽກຮ້ອງມາຍັງ ວິທະຍາກອນ ແລະ ສຳມະນາກອນ ຈົ່ງເອົາໃຈໃສ່ສຸມສະຕິປັນຍາ ແລະ ຍົກສູງຄວາມຮູ້ຄວາມສາມາດຂອງຕົນ ເຂົ້າໃນການແລກປ່ຽນຄຳຄິດຄຳເຫັນ, ປະສົບການ, ພຶດຕິກຳຕົວຈິງ ແລະ ຊ່ວຍເຫຼືອກັນ ເພື່ອໃຫ້ສາມາດບັນລຸເປົ້າໝາຍທີ່ໄດ້ຕັ້ງໄວ້.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ