ທ່ານຫົວໜ້າ ຫສນຍ ຕ້ອນຮັບເອກອັກຄະລັດຖະທູດໄທ ປະຈຳ ສປປ ລາວ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນສຸກ, 13 ທ.ວ 2019 16:00

​ໃນຕອນເຊົ້າ ຂອງວັນທີ 13 ທັນວາ 2019 ທີ່ ຫ້ອງວ່າການສຳນັກງານນາຍົກລັດຖະມົນຕີ (ຫສນຍ)​, ທ່ານ ເພັດ ພົມພິພັກ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງທ່ານ ດຳຣົງ ໃຄ່ຄວນ, ເອກອັກຄະລັດຖະທູດ ແຫ່ງ ຣາຊະອານາຈັກໄທ ປະຈຳ ສປປ ລາວ ພ້ອມດ້ວຍຄະນະ ໃນໂອກາດ ໄດ້ຮັບໜ້າທີ່ ດຳລົງຕຳແໜ່ງເປັນເອກອັກຄະລັດຖະທູດໄທ ປະຈຳ ສປປ ລາວ ຄົນໃໝ່.

ໃນໂອກາດດັ່ງກ່າວ, ທ່ານ ເພັດ ພົມພິພັກ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ທ່ານ ດຳຣົງ ໃຄ່ຄວນ ທີ່ໄດ້ຮັບຄວາມເຊື່ອໝັ້ນ ແລະ ໄວ້ວາງໃຈ ໃຫ້ດຳລົງຕຳແໜ່ງ ເປັນເອກອັກຄະລັດຖະທູດໄທ ປະຈຳ ສປປ ລາວຄົນໃໝ່. ພ້ອມທັງ ສະແດງຄວາມເຊື່ອໝັ້ນວ່າ ທ່ານ ດຳຣົງ ໃຄ່ຄວນ ຈະສາມາດປະຕິບັດໜ້າທີ່ການທູດ ຢູ່ ສປປ ລາວ ມີຜົນສຳເລັດໃໝ່ ແລະ ໃຫຍ່ຫຼວງຂຶ້ນເປັນກ້າວໆ, ອັນເປັນການປະກອບສ່ວນ ເສີມສ້າງສາຍພົວພັນມິດຕະພາບ ແລະ ການຮ່ວມມື ຂອງສອງປະເທດ ລາວ ແລະ ໄທ ໃຫ້ນັບມື້ແໜ້ນແຟ້ນ ແລະ ເກີດດອກອອກຜົນເປັນຢ່າງດີ. ໃນໂອກາດນີ້, ທ່ານ ເພັດ ພົມພິພັກ ຍັງໄດ້ສະແດງຄວາມຂອບໃຈ ຕໍ່ການຊ່ວຍເຫຼືອ ແລະ ສະໜັບສະໜູນທາງດ້ານຕ່າງໆ ໃຫ້ແກ່ ສປປ ລາວ ໃນໄລຍະຜ່ານມາ ກໍ່ຄືປະຈຸບັນ ເປັນຕົ້ນ ການຊ່ວຍເຫຼືອ ແລະ ແກ້ໄຂໄພພິບັດທີ່ເກີດຂຶ້ນຢູ່ເມືອງສະໜາມໄຊ, ແຂວງອັດຕະປື, ການສະໜອງທຶນຮອນ ເຂົ້າໃນການກໍ່ສ້າງຂົວມິດຕະພາບ ລາວ-ໄທ ແຫ່ງທີ 5 ແລະ 6 ທີ່ ບໍລິຄຳໄຊ-ບຶງການ ແລະ ສາລະວັນ-ອຸບົນຣາຊະທານີ ຕາມລຳດັບ ແລະ ການຊ່ວຍເຫຼືອອື່ນໆ. ນອກຈາກນັ້ນ ຍັງມີຄຳເຫັນ ຈະສືບຕໍ່ໃຫ້ການຊ່ວຍເຫຼືອ ແລະ ສະໜັບສະໜູນ ການປະຕິບັດໜ້າທີ່ການທູດ ຂອງທ່ານ ດຳຣົງ ໃຄ່ຄຳ; ຈະສ້າງເງື່ອນໄຂ ໃຫ້ການນຳຂອງສອງປະເທດ ໄດ້ມີການພົບປະກັນ ແລະ ພົບປະກັບນັກທຸລະກິດ; ຈະສືບຕໍ່ສະໜັບສະໜູນ ແລະ ເພີ່ມການພົວພັນຮ່ວມມືສອງຝ່າຍ ແລະ ຫຼາຍຝ່າຍ ໃນຂົງເຂດວຽກງານຕ່າງໆ ເປັນຕົ້ນ ການຄ້າ, ການລົງທຶນ, ການທ່ອງທ່ຽວ, ການສຶກສາ ລະດັບອະຊີວະ, ການພັດທະນາສີມືແຮງງານ, ການເຊື່ອມຕໍ່ ທາງດ້ານຄົມມະນາຄົມຂົນສົ່ງ, ລວມທັງ ການສຶກສາຄົ້ນຄວ້າ ແລະ ນຳໃຊ້ທ່າແຮງ ຂອງສອງປະເທດ ເພື່ອພັດທະນາເສດຖະກິດ-ສັງຄົມ ຂອງແຕ່ລະປະເທດ ໃຫ້ມີການເຕີບໃຫຍ່ຂະຫຍາຍຕົວ ຢ່າງຕໍ່ເນື່ອງ.

​ໃນໂອກາດດຽວກັນ, ທ່ານ ດຳຣົງ ໃຄ່ຄວນ ກໍ່ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານ ເພັດ ພົມພິພັກ ໃນຄັ້ງນີ້. ພ້ອມທັງ ຕີລາຄາໝາກຜົນ ຂອງການພົວພັນຮ່ວມມື ລະຫວ່າງ ຣາຊະອານາຈັກໄທ ແລະ ສປປ ລາວ ໃນໄລຍະຜ່ານມາ, ຊຶ່ງລ້ວນແຕ່ມີບັນຍາກາດທີ່ດີ ແລະ ໄດ້ຮັບຜົນສຳເລັດໃນຫຼາຍດ້ານ. ນອກຈາກນັ້ນ ກໍ່ໄດ້ຍົກບາງບັນຫາຂຶ້ນມາສົນທະນາ ແລະ ແລກປ່ຽນ ຄວາມຄິດເຫັນເຊິ່ງກັນ ແລະ ກັນ ໂດຍສະເພາະ ແຜນການພົວພັນຮ່ວມມືກັນໃນຕໍ່ໜ້າ ໃຫ້ມີບາດ ກ້າວໃໝ່ ແລະ ເກີດປະໂຫຍດ ຕໍ່ສອງປະເທດ ຢ່າງແທ້ຈິງ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ