ກອງປະຊຸມປຶກສາຫາລື ວຽກງານສາຍດ່ວນ ແລະ ວຽກຫັນເປັນລັດຖະບານ ເອເລັກໂຕຣນິກ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນສຸກ, 29 ພ.ຈ 2019 17:00

​​ໃນຕອນເຊົ້າຂອງວັນທີ 28 ພະຈິກ 2019 ຢູ່ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ ໄດ້ຈັດກອງປະຊຸມ ປຶກ ສາຫາລື ແລະ ຖອດຖອນບົດຮຽນວຽກງານສາຍດ່ວນ ປີ 2019 ຂອງຄະນະຮັບຜິດຊອບສາຍດ່ວນລັດຖະບານ ແລະ ກອງປະຊຸມ ຄັ້ງປະຖົມມະເລິກຂອງຄະນະຮັບຜິດຊອບຫັນເປັນລັດຖະບານ ເອເລັກໂຕຣນິກ, ໂດຍການເປັນປະທານຂອງ ທ່ານ ປອ. ເພັດ ພົມພິພັກ ລັດຖະມົນຕີ, ຫົວໜ້າຫ້ອງວ່າການສໍານັກງານາຍົກລັດຖະມົນຕີ, ມີທ່ານຮອງລັດຖະມົນຕີ, ຮອງຫົວໜ້າຫ້ອງວ່າການສໍານັກງານາຍົກລັດຖະມົນຕີ, ບັນດາຄະນະຮັບຜິດຊອບສາຍດ່ວນ ແລະ ຄະນະຮັບຜິດຊອບຫັນເປັນລັດຖະບານ ເອເລັກໂຕຣນິກທີ່ມາຈາກບັນດາຂະແໜງ ສູນກາງ ແລະ ທ້ອງຖິ່ນ ພ້ອມດ້ວຍພະນັກງານທີ່ກ່ຽວຂ້ອງ ເຂົ້າຮ່ວມ.
 
ໂອກາດດັ່ງກ່າວ, ທ່ານ ປອ ເພັດ ພົມພິພັກ ໄດ້ກ່າວມີຄໍາເຫັນຕໍ່ກອງປະຊຸມ ວ່າ: ສາຍດ່ວນຂອງລັດຖະບານ 1516 ສ້າງຕັ້ງຂຶ້ນ ແລະ ໄດ້ເປີດນໍາໃຊ້ຢ່າງເປັນທາງການ ໃນວັນທີ 14 ພະຈິກ 2016 ເພື່ອຮັບຟັງຄຳຄິດຄຳເຫັນ, ຄຳສະ ເໜີ, ຫາງສຽງສັງຄົມຂອງບຸກຄົນ ແລະ ນິຕິບຸກຄົນ. ນັບຕັ້ງແຕ່ເປີດດຳເນີນການມາ, ໄດ້ມີປະຊາຊົນ ໂທເຂົ້າຫາສາຍດ່ວນເປັນຈຳນວນຫຼາຍ, ຫ້ອງວ່າການສຳນັກງານນາຍົກລັດຖະມົນຕີ ກໍ່ໄດ້ສັງລວມສະເໜີ, ຄຳຖາມຕ່າງໆ ສົ່ງໃຫ້ບັນດາຂະແໜງການ ແລະ ທ້ອງຖິ່ນ ເພື່ອກວດກາຄືນ, ຖ້າບໍ່ມີຄວາມຈິງ ກໍ່ຊີ້ແຈງອະທິບາຍ ໃຫ້ປະຊາຊົນເຂົ້າ ແລະ ຖ້າມີຄວາມຈິງ ກໍ່ຄົ້ນຄວ້າແກ້ໄຂ ແລ້ວແຈ້ງມາໃຫ້ສຳນັກງານນາຍົກລັດຖະມົນຕີຊາບ ເພື່ອເອົາຄຳຕອບຂຶ້ນເວັບໄຊຂອງລັດຖະບານ. ສາຍດ່ວນຂອງລັດຖະບານ ໄດ້ເປັນອີກຊ່ອງທາງໜຶ່ງທີ່ເຮັດໃຫ້ລັດຖະບານ ແລະ ປະຊາຊົນ ໄດ້ໃກ້ຊິດກັນຫຼາຍຂຶ້ນ, ຂໍ້ມູນຂ່າວສານກໍ່ເຊື່ອມຈອດກັນດີຂຶ້ນກວ່າເກົ່າ, ປະຊາຊົນໄດ້ມີໂອກາດສະເໜີຄໍາຄິດເຫັນ, ສົ່ງຂໍ້ສະເໜີໃຫ້ລັດຖະບານ ແລະ ໄດ້ຮັບຊາບການແກ້ໄຂບັນຫາຕ່າງໆ ຂອງລັດຖະບານ. ອັນສໍາຄັນ ລັດຖະບານ ກໍ່ຄື ຂະແໜງການ ແລະ ທ້ອງຖິ່ນ ແມ່ນໄດ້ຮັບຮູ້ບັນຫາຕົວຈິງທີ່ເກີດຂຶ້ນໃນສັງຄົມ ໃນແຕ່ລະໄລຍະ. ນອກຈາກນີ້ ວຽກງານສາຍດ່ວນຂອງລັດຖະບານ ຍັງຕິດພັນກັບຫາງສຽງສັງຄົມ ທີ່ຜ່ານສື່ສັງຄົມອອນລາຍ ຊຶ່ງຫຼາຍບັນຫາໄດ້ສົ່ງຜົນກະທົບ ຕໍ່ພາບພົດບົດບາດຂອງລັດຖະບານ ກໍ່ຄືຂະແໜງການຂັ້ນສູນກາງ ແລະ ທ້ອງຖິ່ນ, ຄວາມເປັນລະບຽບຮຽບຮ້ອຍ ແລະ ຄວາມປອດໄພຂອງສັງຄົມ ຖ້າບໍ່ໄດ້ຮັບການແກ້ໄຂທັນກັບສະພາບການ. ສະນັ້ນ, ຈຶ່ງເຫັນໄດ້ວ່າ ວຽກງານສາຍດ່ວນ ແມ່ນວຽກງານທີ່ສຳຄັນ ແລະ ມີຄວາມຈຳເປັນ ທີ່ຊ່ວຍສະໜອງຂໍ້ມູນແກ່ລັດຖະບານ ແລະ ນຳເອົາຂໍ້ສະເໜີດັ່ງກ່າວ ເພື່ອກວດກາຄືນການປະຕິບັດວຽກງານຂອງຕົນ ແລະ ປັບປຸງແກ້ໄຂໃຫ້ດີຂຶ້ນ ເພື່ອຮັບປະກັນການບໍລິການຮັບໃຊ້ປະຊາຊົນ ຢ່າງມີປະສິດທິຜົນ.
ສໍາລັບວຽກງານການຫັນເປັນລັດຖະບານ ເອເລັກໂຕຣນິກ ເປັນນະໂຍບາຍຂອງລັດຖະບານ ໃນການຫັນເປັນທັນສະໄໝ, ຊຶ່ງເຫັນວ່າ ມີຄວາມຈຳເປັນ ແລະ ສຳຄັນຫຼາຍ ເພາະມັນຈະຊ່ວຍເພີ່ມປະສິດທິພາບ ແລະ ປະສິດທິຜົນ ຂອງການບໍລິຫານວຽກງານຂອງລັດຖະບານ ເວົ້າລວມ, ເວົ້າສະເພາະ ກໍ່ແມ່ນຢູ່ໃນແຕ່ລະຂະແໜງການຂອງພາກລັດ ໃຫ້ມີຄວາມວ່ອງໄວ, ປະຢັດໄດ້ທາງດ້ານເວລາ ແລະ ງົບປະມານ, ທັງສາມາດຕິດຕາມກວດກາໄດ້. ອັນສໍາຄັນ ຫຼາຍປະເທດແມ່ນໄດ້ນຳໃຊ້ແລ້ວ. ຜ່ານມາ ພັກ ແລະ ລັດຖະບານ ກໍ່ໄດ້ມີຄວາມເອົາໃຈໃສ່ຊຸກຍູ້ສົ່ງເສີມ, ໃຫ້ມີການຄົ້ນຄວ້າ, ພັດທະນາ ນໍາໃຊ້ເຕັກໂນໂລຊີສື່ສານຂໍ້ມູນຂ່າວສານ ເຂົ້າໃນວຽກງານຂອງພັກ, ຂອງລັດ ມາໂດຍຕະຫຼອດ, ມາຮອດກອງປະຊຸມໃຫຍ່ ຄັ້ງທີ X ຂອງພັກ, ພັກ ແລະ ລັດຖະບານ ຈຶ່ງໄດ້ຕົກລົງສ້າງຕັ້ງ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ, ກະຊວງວິທະຍາສາດ ແລະ ເຕັກໂນໂລຊີ ຂຶ້ນ ເພື່ອເຮັດໜ້າທີ່ໃນການຄຸ້ມຄອງ, ຄົ້ນຄວ້າ ແລະ ພັດທະນາ ກ່ຽວກັບເຕັກໂນໂລຊີສື່ສານຂໍ້ມູນຂ່າວສານ ເຊິ່ງມີໜ້າທີ່, ພາລະບົດບາດສະເພາະຂອງໃຜລາວ. ສັງລວມແລ້ວ, ໄລຍະຜ່ານມາເຫັນວ່າ ພວກເຮົາໄດ້ມີການພັດທະນານໍາໃຊ້ ICT ເຂົ້າໃນວຽກງານຂອງແຕ່ລະຂະແໜງການຢ່າງກວ້າງຂວາງ, ແຕ່ຍັງເປັນການພັດທະນາໄປຕາມເປົ້າໝາຍຂອງຂະແໜງການເປັນສ່ວນໃຫຍ່ ບໍ່ທັນລວມສູນ, ເຮັດໃຜເຮັດລາວ ແລະ ເຮັດໃຫ້ການພັດທະນາດັ່ງກ່າວມີຄວາມຫຍຸ້ງຍາກ ໃນການເຊື່ອມໂຍງເຂົ້າກັນໄດ້, ເຊິ່ງເຫັນວ່າຍັງເປັນຂອດໜຶ່ງທີ່ທ້າທາຍ ສໍາລັບການຫັນເປັນລັດຖະບານ ເອເລັກໂຕຣນິກ ຂອງພວກເຮົາ.
​ພ້ອມດຽວກັນນີ້, ຜູ້ເຂົ້າຮ່ວມກອງປະຊຸມ ໄດ້ພ້ອມກັນກັນຍົກສູງຄວາມຮັບຜິດຊອບຂອງຕົນ ໃນການປະກອບຄຳຄິດຄຳເຫັນ ຢ່າງມີຈຸດສຸມ ແລະ ດໍາເນີນດ້ວຍບັນຍາກາດຟົດຟື້ນສ້າງສັນ ເພື່ອພ້ອມກັນແກ້ໄຂຂໍ້ຄົງຄ້າງໃນໄລຍະຜ່ານມາ, ກຳນົດວິທີການ ແລະ ກົນໄກການເຮັດວຽກ, ການປະສານງານ ໃນຕໍ່ໜ້າ ທີ່ມີປະສິດທິຜົນກວ່າເກົ່າ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ