ຫສນຍ ລະນຶກວັນສາກົນ ເພື່ອຢຸດຕິຄວາມຮຸນແຮງຕໍ່ແມ່ຍິງ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພຸດ, 27 ພ.ຈ 2019 12:00

​​​​​ໃນຕອນເຊົ້າ ຂອງວັນທີ 25 ພະຈິກ 2019 ຄະນະກຳມາທິການ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ (ຄກມດ) ໄດ້ຈັດກອງປະຊຸມ ລະນຶກວັນສາກົນ ເພື່ອຢຸດຕິຄວາມຮຸນແຮງຕໍ່ແມ່ຍິງ ທີ່ຫ້ອງວ່າການສຳນັກງານນາຍົກລັດຖະມົນຕີ (ຫສນຍ) ພາຍໃຕ້ການເປັນປະທານຂອງ ທ່ານ ບຸນເກີດ ສັງສົມສັກ, ລັດຖະມົນຕີປະຈຳ ສນຍ ມີບັນດາຫົວໜ້າກົມ, ຮອງກົມ ແລະ ພະນັກງານ-ລັດຖະກອນ ພາຍໃນ ຫສນຍ ເຂົ້າຮ່ວມ.
                                    
​​​ກອງປະຊຸມ ໄດ້ຮັບຟັງການເຜີຍແຜ່ຂະບວນການ ລະນຶກວັນສາກົນ ເພື່ອຢຸດຕິຄວາມຮຸນແຮງຕໍ່ແມ່ຍິງ 25 ພະຈິກ; ລາຍງານບົດສະຫຼຸບ-ການຕີລາຄາຄືນ ໃນໄລຍະ 1 ປີຜ່ານມາ ຂອງການຈັດຕັ້ງປະຕິບັດວຽກງານ ເພື່ອສົ່ງເສີມຄວາມກ້າວໜ້າຂອງແມ່ຍິງ ແລະ ແມ່-ເດັກ ຫສນຍ ປະຈຳປີ 2019 ແລະ ຜ່ານໂຄງຮ່າງແຜນດຳເນີນງານ ຄັ້ງທີ I ຂອງຄະນະກຳມາທິການ ເພື່ອຄວາມກ້າວໜ້າ ຂອງແມ່ຍິງ ແລະ ແມ່-ເດັກ ຫສນຍ ໄລຍະປີ 2021-2025 ພ້ອມທັງ ເຜີຍແຜ່ແບບແຜນວິທີຈັດສັນເວລາການຫາລາຍໄດ້ເສີມ ພາຍຫຼັງໂມງເລີກວຽກທາງລັດຖະການ ຂອງພະນັກງານ ຫສນຍ. ທັງນີ້ ກໍ່ເພື່ອເປັນການສະເຫຼີມສະຫຼອງ ວັນສາກົນຢຸດຕິຄວາມຮຸນແຮງຕໍ່ແມ່ຍິງ ແລະ ເດັກ ວັນທີ 25 ພະຈິກ ທີ່ຊາວໂລກໃຫ້ຄວາມສຳຄັນ ເພື່ອລະນຶກເຖິງ ການຕໍ່ສູ້ເພື່ອຕໍ່ຕ້ານ ການຕົກເປັນເຫຍື່ອ ຂອງຄວາມຮຸນແຮງຕໍ່ແມ່ຍິງ ຂອງສາມເອື້ອຍນ້ອງ ຕະກູນນິຣາບານ ທີ່ສາທາລະນະລັດໂດມີນີແກນ ທີ່ຖືກລອບສັງຫານ ໂດຍລະບອບຜະເດັດການທຣູກີໂລ ແລະ ລະນຶກເຖິງການສັງຫານໝູ່ນັກສຶກສາ ວິສະວະກຳຍິງ 14 ຄົນ ທີ່ນະຄອນຫຼວງ ມົງເຕອານ ປະເທດການາດາ ຍ້ອນການເຄື່ອນໄຫວ ສະໜັບສະໜູນສິດທິຂອງແມ່ຍິງ. ການເຜີຍແຜ່ດັ່ງກ່າວ ແມ່ນແນໃສ່ເຮັດໃຫ້ຜູ້ເຂົ້າຮ່ວມ ໄດ້ຮັບເຂົ້າໃຈຫຼາຍຂຶ້ນ ກ່ຽວກັບບັນຫາຄວາມຮຸນແຮງຕໍ່ແມ່ຍິງ, ຊຶ່ງເປັນສິ່ງທີ່ຮັບບໍ່ໄດ້ ແລະ ເປັນການລະເມີດສິດທິຂອງແມ່ຍິງ ກໍ່ຄື ສິດທິຂັ້ນພື້ນຖານຂອງມະນຸດ. ໃນໂອກາດດຽວກັນ, ທ່ານປະທານກອງປະຊຸມ ໄດ້ຮຽກຮ້ອງໃຫ້ຜູ້ເຂົ້າຮ່ວມ ຮ່ວມມືກັນໃນການປ້ອງກັນ ແລະ ລຶບລ້າງທຸກຮູບການ ຂອງຄວາມຮຸນແຮງໃນຄອບຄົວ ແລະ ສັງຄົມໃຫ້ໝົດໄປ, ປະກອບສ່ວນເຮັດໃຫ້ສັງຄົມລາວ ກາຍເປັນສັງຄົມ ທີ່ມີແຕ່ຄວາມສະເໝີພາບຍິງ-ຊາຍ, ປາສະຈາກການໃຊ້ຄວາມຮຸນແຮງ ເພື່ອຮັບປະກັນໃຫ້ແມ່ຍິງ ໄດ້ດຳລົງຊີວິດໃນສັງຄົມທີ່ປອດໄພ ຢ່າງແທ້ຈິງ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ