ທ່ານຫົວໜ້າ ຫສນຍ ຕ້ອນຮັບທ່ານທູດຍີ່ປຸ່ນຢ້ຽມອຳລາ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນຈັນ, 05 ສ.ຫ 2019 12:00

ໃນຕອນບ່າຍ ຂອງວັນທີ 5 ສິງຫາ 2019 ທີ່ ຫ້ອງວ່າການສຳນັກງານນາຍົກລັດຖະມົນຕີ (ຫສນຍ), ທ່ານ ເພັດ ພົມພິພັກ, ລັດຖະມົນຕີ, ຫົວໜ້າຫ້ອງວ່າການ ສຳນັກງານນາຍົກລັດຖະມົນຕີ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ້ານັບອຳລາ ຂອງທ່ານ ທາເຄຊິ ຮິຄິຮາຣະ (Takeshi Hikihara) ເອກອັກຄະລັດຖະທູດຍີ່ປຸ່ນ ປະຈໍາ ສປປ ລາວ ໃນໂອກາດສິ້ນສຸດວາລະ ການດຳລົງຕຳແໜ່ງ ເອກອັກຄະລັດຖະທູດປະຈຳ  ສປປ ລາວ.​

ໃນໂອກາດດັ່ງກ່າວ, ທ່ານ ເພັດ ພົມພິພັກ ໄດ້ກ່າວສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງ ຕໍ່ຜົນງານຕະຫຼອດໄລຍະ ການມາດຳລົງຕຳແໜ່ງເອກອັກຄະລັດຖະທູດ ຢູ່ ສປປ ລາວ ຂອງທ່ານ Takeshi Hikihara, ຊຶ່ງເຫັນວ່າ ມີຜົນສຳເລັດໃນຫຼາຍດ້ານ ເປັນຕົ້ນ ໄດ້ປະກອບສ່ວນຊຸກຍູ້ນັກລົງທຶນຍີ່ປຸ່ນ ມາລົງທຶນຢູ່ ສປປ ລາວ ເພີ່ມຂຶ້ນໃນແຕ່ລະປີ; ໄດ້ໃຫ້ການຊ່ວຍເຫຼືອແກ່ ສປປ ລາວ ທາງດ້ານຕ່າງໆ ເຊັ່ນ: ທຶນຮອນ, ເຕັກນິກວິຊາການ ກໍ່ຄື ການພັດທະນາພື້ນຖານໂຄງລ່າງ (ປັບປຸງ-ຂະຫຍາຍສະໜາມບິນ, ກໍ່ສ້າງຂົວ, ເສັ້ນທາງ...), ການສຶກສາ, ສາທາລະນະສຸກ, ກະສິກຳ, ການພັດທະນາຊົນນະບົດ, ການພັດທະນາຊັບພະຍາກອນມະນຸດ ແລະ ອື່ນໆ  ລວມທັງ ການສ້າງເງື່ອນໄຂ ແລະ ອຳນວຍຄວາມສະດວກ ໃຫ້ແກ່ການນຳຂັ້ນສູງ ຂອງສອງປະເທດ ລາວ ແລະ ຍີ່ປຸ່ນ ໄດ້ແລກປ່ຽນການຢ້ຽມຢາມເຊິ່ງກັນ ແລະ ກັນຫຼາຍຂຶ້ນ. ທັງໝົດເຫຼົ່ານັ້ນ, ລ້ວນແລ້ວແຕ່ໄດ້ຮັບຜົນສຳເລັດ ແລະ ມີປະສິດທິຜົນ ເປັນຢ່າງດີ, ສາມາດປະກອບສ່ວນ ເຮັດໃຫ້ການພົວພັນຮ່ວມມື ຂອງສອງປະເທດ ນັບມື້ເຕີບໃຫຍ່ເຂັ້ມແຂງ, ຂະຫຍາຍຕົວ ແລະ ເກີດດອກອອກຜົນເປັນກ້າວໆ. ພ້ອມດຽວກັນນັ້ນ, ທ່ານ ເພັດ ພົມພິພັກ ຍັງໄດ້ກ່າວອວຍພອນໃຫ້ທ່ານ Takeshi Hikihara ຈົ່ງມີສຸຂະພາບແຂງແຮງ, ປະສົບຜົນສຳເລັດ ໃນການປະຕິບັດໜ້າທີ່ວຽກງານ ທີ່ໄດ້ຮັບມອບໝາຍໃໝ່ ແລະ ມີກຽດ.
ໃນໂອກາດດຽວກັນ, ທ່ານ Takeshi Hikihara ກໍ່ໄດ້ສະແດງຄວາມຂອບໃຈ ຕໍ່ການຕ້ອນຮັບ ຂອງທ່ານ ເພັດ ພົມພິພັກ ໃນຄັ້ງນີ້ ກໍ່ຄື ການສະໜັບສະໜູນ, ຊ່ວຍເຫຼືອ ແລະ ການອຳນວຍຄວາມສະດວກໃນດ້ານຕ່າງໆ ຂອງລັດຖະບານ ແລະ ພາກສ່ວນທີ່ກ່ຽວຂ້ອງ ຂອງ ສປປ ລາວ ເຮັດໃຫ້ການຈັດຕັ້ງປະຕິບັດວຽກງານການທູດ ຕະຫຼອດໄລຍະ 3 ປີກວ່າທີ່ຜ່ານມາ ມີຜົນສຳເລັດເປັນຢ່າງດີ. ພ້ອມກັນນັ້ນ ກໍ່ໄດ້ໃຫ້ຄຳໝັ້ນສັນຍາວ່າ ພາຍຫຼັງໄປປະຕິບັດໜ້າທີ່ວຽກງານໃໝ່ແລ້ວ ກໍ່ຈະສືບຕໍ່ຊຸກຍູ້ ແລະ ສະໜັບສະໜູນ ການຈັດຕັ້ງປະຕິບັດວຽກງານຕ່າງໆ ທີ່ມີສ່ວນກ່ຽວຂ້ອງກັບ ສປປ ລາວ ຢ່າງສຸດຄວາມສາມາດຂອງຕົນ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ