ສະຫະພັນແມ່ຍິງ ຫສນຍ ຖອດຖອນບົດຮຽນທີ່ເມືອງນາກາຍ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນສຸກ, 14 ມິ.ຖ 2019 11:00

ໃນລະຫວ່າງວັນທີ 11-14 ມິຖຸນາ 2019 ຄະນະສະຫະພັນແມ່ຍິງ ຫ້ອງວ່າການ ສໍານັກງານນາຍົກລັດຖະມົນ ຕີ ນຳໂດຍທ່ານ ປອ.ນ. ວຽງສະຫວັນ ດວງສະຫວັນ ຄະນະພັກ, ຮອງຫົວໜ້າຫ້ອງວ່າການສຳນັກງານ ນາຍົກລັດຖະມົນຕີ, ຜູ້ຊີ້ນຳວຽກງານສະຫະພັນແມ່ຍິງ ຫສນຍ; ໄດ້ໄປຢ້ຽມຢາມ ແລະ ເຄື່ອນໄຫວຖອດຖອນບົດຮຽນ ກ່ຽວກັບວຽກງານແມ່ຍິງ ກັບການພັດທະນາ ແລະ ອະນຸລັກປ່າສະຫງວນແຫ່ງຊາດ ເຂດນາກາຍ-ນໍ້າເທີນ ຢູ່ເມືອງນາກາຍ, ແຂວງຄຳມ່ວນ; ໂດຍໄດ້ຮັບການຕ້ອນຮັ ບຈາກການນຳຂອງເມືອງນາກາຍ; ຄະນະສະຫະພັນແມ່ຍິງ ເມືອງນາກາຍ ແລະ ພາກທີ່ກ່ຽວຂ້ອງ ຂອງເມືອງດັ່ງກ່າວ ຢ່າງອົບອຸ່ນ.
ຈຸດປະສົງ ຂອງການເຄື່ອນໄຫວ ຄັ້ງນີ້ ເພື່ອສ້າງຂະບວນການຕ້ອນຮັບ ກອງປະຊຸມໃຫຍ່ຄັ້ງທີ V ຂອງສະຫະພັນແມ່ຍິງ ຫ້ອງວ່າການສຳນັກງານ ນາຍົກລັດຖະມົນຕີ ໃຫ້ເປັນຂະບວນການຟົດຟື້ນ, ມີເນື້ອໃນເລິກເຊິ່ງ ແລະ ນຳໄປໝູນໃຊ້ ໃຫ້ເກີດດອກອອກຜົນ; ເພື່ອເຮັດໃຫ້ເອື້ອຍນ້ອງແມ່ຍິງ ຫສນຍ ມີຄວາມຮັບຮູ້ ແລະ ເຂົ້າໃຈ ຕໍ່ສະພາບການພັດທະນາ ແລະ ປົກປັກຮັກສາ ປ່າສະຫງວນແຫ່ງຊາດ ນາກາຍ-ນໍ້າເທີນ ຫຼາຍຂຶ້ນ, ທັງເຫັນໄດ້ບົດບາດ ແລະ ຄວາມສຳຄັນ ຂອງປ່າສະຫງວນດັ່ງກ່າວ ຕໍ່ການພັດທະນາເສດຖະກິດ-ສັງຄົມ ຂອງທ້ອງຖິ່ນ ກໍ່ຄື ປະເທດຊາດ; ເພື່ອເຮັດໃຫ້ເອື້ອຍນ້ອງແມ່ຍິງ ຫສນຍ ແລະ ແມ່ຍິງຂັ້ນທ້ອງຖິ່ນ ໄດ້ຖອດຖອນແລກ ປ່ຽນບົດຮຽນ ເຊິ່ງກັນ ແລະ ກັນ ໃນການຈັດຕັ້ງປະຕິບັດ ວຽກງານແມ່ຍິງຕົວຈິງ ແລະ ສາມາດນຳໄປໝູນໃຊ້ ໃນຂົງເຂດວຽກງານທີ່ຕົນເອງ ຮັບຜິດຊອບ ໃຫ້ເກີດປະໂຫຍດສູງສຸດ; ເພື່ອສ້າງຂອດການປະສານງານ ແລະ ການພົວພັນສາມັກຄີ ລະຫວ່າງ ສູນກາງ ແລະ ທ້ອງຖິ່ນ ກໍ່ຄື ຫສນຍ ແລະ ເມືອງນາກາຍ ມີຄວາມກົມກຽວ, ແໜ້ນແຟ້ນ, ເປັນຂະບວນການຟົດຟື້ນ ແລະ ມ່ວນຊື່ນ.
 
ການເຄື່ອນໄຫວ ແລກປ່ຽນບົດຮຽນ ທີ່ເມືອງນາກາຍ ໃນຄັ້ງນີ້ ໄດ້ມີຂຶ້ນທີ່ສະໂມສອນ ຂອງເມືອງດັ່ງກ່າວ, ໂດຍ ການກ່າວຕ້ອນຮັບ ແລະ ລາຍງານ ກ່ຽວກັບສະພາບ ການຈັດຕັ້ງປະຕິບັດ ວຽກງານແມ່ຍິງ ຂອງເມືອງນາກາຍ ຈາກທ່ານ ນ. ບົວກາ ແກ້ວມະນີ ຄະນະປະຈຳພັກເມືອງ, ຫົວໜ້າຄະນະຈັດຕັ້ງເມືອງ, ຜູ້ຊີ້ນຳວຽກງານ ອົງການຈັດຕັ້ງມະຫາຊົນ ເມືອງນາງກາຍ ແລະ ທ່ານ ນ. ນາລີ ເລືອງຈັນທະລາດ ກຳມະການພັກເມືອງ, ປະທານສະຫະພັນແມ່ຍິງ ເມືອງນາກາຍ, ຊຶ່ງເຫັນວ່າ: ຫ້ອງການສະຫະພັນແມ່ຍິງ ເມືອງນາກາຍ ແມ່ນໜຶ່ງໃນ 8 ຫ້ອງການ ທີ່ຂຶ້ນກັບຫ້ອງວ່າການ ປົກຄອງເມືອງນາກາຍ, ເປັນອົງການຈັດຕັ້ງມະຫາຊົນ ທຽບເທົ່າກັບ ບັນດາອົງການ ແລະ ຂະແໜງການອື່ນ ອ້ອມຂ້າງເມືອງ, ເຮັດໜ້າທີ່ເປັນເສນາທິການ ກ່ຽວກັບ ວຽກງານແມ່ຍິງ ໃຫ້ແກ່ຄະນະພັກເມືອງ, ມີສາຍຕັ້ງຂຶ້ນກັບສະຫະພັນແມ່ຍິງແຂວງຄຳມ່ວນ ໂດຍກົງ, ຫ້ອງການສະຫະພັນແມ່ຍິງ ເມືອງນາກາຍ ມີພະນັກງານ-ລັດຖະກອນ 6 ທ່ານ ແລະ ອາສາສະໝັກ 3 ທ່ານ. ທົ່ວເມືອງນາກາຍ ມີໜ່ວຍສະຫະພັນແມ່ຍິງ ອ້ອມຂ້າງ 13 ໜ່ວຍ ແລະ 1 ໜ່ວຍຮາກຖານ, ມີ 31 ຮາກຖານບ້ານ, ມີຄະນະບໍລິຫານສະຫະພັນແມ່ຍິງເມືອງ 21 ສະຫາຍ, ມີຄະນະສະຫະພັນແມ່ຍິງ ແຕ່ລະຂັ້ນ 174 ສະຫາຍ, ມີແມ່ຍິງໃນເກນອາຍຸເຂົ້າເປັນສະມາຊິກສະຫະພັນແມ່ຍິງທັງໝົດ 10.083 ສະຫາຍ, ໃນນັ້ນ ເປັນສະມາຊິກສະຫະພັນແມ່ຍິງ ຈຳນວນ 3.225 ສະຫາຍ. ທົ່ວເມືອງ ມີພະນັກງານ-ລັດຖະກອນ ເພດຍິງທັງໝົດ 222 ສະຫາຍ, ປະກອບເຂົ້າໃນຕຳແໜ່ງບໍລິຫານລັດ ຄື: ເປັນສະມາຊິກສະພາ ຂັ້ນແຂວງ 1 ສະຫາຍ, ເປັນຄະນະຫ້ອງການ 9 ສະຫາຍ, ຫົວໜ້າ-ຮອງຫົວໜ້າໜ່ວຍງານ 37 ສະຫາຍ, ເປັນຜູ້ອຳນວຍການ-ຮອງຜູ້ອຳນວຍການໂຮງຮຽນ-ໂຮງໝໍ 14 ສະຫາຍ, ເປັນຮອງນາຍບ້ານ 4 ສະຫາຍ. ດ້ານຕຳແໜງພັກ: ເປັນຄະນະປະຈຳພັກເມືອງ 1ສະຫາຍ, ກຳມະການພັກເມືອງ 2 ສະຫາຍ, ມີສະມາຊິກພັກ ເພດຍິງທັງໝົດ 266 ສະຫາຍ, ສົມບູນ 231 ສະຫາຍ ແລະ ສຳຮອງ 35 ສະຫາຍ.
 
ຕິດພັນກັບ ການຖອດຖອນແລກປ່ຽນບົດຮຽນ ທາງດ້ານທິດສະດີແລ້ວ, ເພື່ອໃຫ້ເຫັນພາກ ການຈັດຕັ້ງປະຕິບັດ ວຽກງານຕົວຈິງ, ຄະນະສະຫະພັນແມ່ຍິງເມືອງນາກາຍ ຍັງໄດ້ນໍາພາຄະນະສະຫະພັນແມ່ຍິງ ຫສນຍ ໄປຢ້ຽມຢາມ ແລະ ແລກປ່ຽນບົດຮຽນ ຢູ່ສະຖານທີ່ສຳຄັນ ແລະ ພົ້ນເດັ່ນ ຂອງເມືອງນາກາຍຈຳນວນໜຶ່ງ ເປັນຕົ້ນ ຂີ່ເຮືອຊົມອ່າງ ນໍ້າ-ນໍ້າເທີນ 2; ຮ້ານວາງສະແດງ ແລະ ຈຳໜ່າຍຜະລິດຕະພັນຊາວບ້ານ ຂອງສະຫະພັນແມ່ຍິງ ເມືອງນາກາຍ; ສູນກະສິກຳສະຫະກອນ ບ້ານສົບຄຳ; ກຸ່ມຫັດຖະກໍາຕໍ່າແຜ່ນ ຄຸ້ມສົບເຮ້ຍ; ກອງຄຸ້ມຄອງ ອຸດທິຍານແຫ່ງຊາດ ນາກາຍ-ນໍ້າເທີນ 2; ຄອບຄົວຕົວແບບປູກຜັກປອດສານພິດ; ສູນປະຊາສຳພັນ ໂຄງການເຂື່ອນໄຟຟ້ານໍ້າເທີນ 2; ເຮືອນຈັກໄຟຟ້າ ເຂື່ອນໄຟຟ້ານໍ້າເທີນ 2.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ