ທ່ານຮອງຫົວໜ້າ ຫສນຍ ເຄື່ອນໄຫວຢ້ຽມຢາມແຂວງອຸດົມໄຊ

ຜູ້ຂຽນ: ​ອາ​ນິ​ຄົມ ວົ​ງເດືອນ

ວັນຈັນ, 04 ມິ.ນ 2019 16:00

ຄະນະນໍາ ຫ້ອງວ່າການສໍານັກງານນາຍົກ ລັດຖະມົນຕີ (ຫສນຍ) ນໍາໂດຍ ທ່ານ ປອ. ນ ວຽງສະຫວັນ ດວງສະ ຫວັນ ຮອງຫົວໜ້າ ຫສນຍ ພ້ອມດ້ວຍຄະນະ ໄດ້ເຂົ້າຢ້ຽມຢາມ ແລະ ພົບປະ ທ່ານ ປອ. ຄໍາພັນ ເຜີຍຍະວົງ ເຈົ້າແຂວງໆອຸດົມໄຊ, ໃນຕອນເຊົ້າວັນທີ 4 ມີນາ 2019 ຢູ່ຫ້ອງຮັບແຂກ ຫ້ອງວ່າການປົກຄອງແຂວງ ໃນໂອກາດ ມາຈັດກອງປະຊຸມຝຶກອົບຮົມ ວຽກງານການເປັນເສນາທິການ, ວຽກງານບໍລິຫານຮັບໃຊ້, ວຽກງານໂຄສະນາ ແລະ ວຽກງານໄອທີ ຢູ່ແຂວງອຸດົມໄຊ.
                               
ໃນໂອກາດນີ້, ທ່ານ ປອ. ຄໍາພັນ ເຜີຍຍະວົງ ໄດ້ແຈ້ງໃຫ້ຮູ້ສະພາບ ການພັດທະນາ ເສດຖະກິດ-ສັງຄົມ ຂອງແຂວງອຸດົມໄຊ ໂດຍຫຍໍ້ ນັບແຕ່ນີ້ຮອດປີ 2020, 2025 ແລະ 2030 ຈະສ້າງແຂວງອຸດົມໄຊ ໃຫ້ມີຄວາມເຂັ້ມແຂງ ທາງດ້ານວຽກງານປ້ອງກັນຊາດ-ປ້ອງກັນຄວາມສະຫງົບ, ເປັນສູນກາງທາງດ້ານ ເສດຖະກິດ, ການສຶກສາ ແລະ ກິລາ, ສາທາລະນະສຸກ, ການທ່ອງທ່ຽວ, ການບໍລິການ ທາງຜ່ານຂອງບັນດາແຂວງພາກເໜືອ ດ້ວຍການເປີດກວ້າງ ແລະ ດຶງດູດການລົງທຶນ ຈາກນັກລົງທຶນ ທັງພາຍໃນ ແລະ ຕ່າງປະເທດ ເຂົ້າມາມີສ່ວນຮ່ວມ ພັດທະນາວຽກງານແຕ່ລະດ້ານ ໃຫ້ຫຼາຍຂຶ້ນ. ທ່ານເຈົ້າແຂວງອຸດົມໄຊ ຍັງໄດ້ສະແດງຄວາມຂອບໃຈ ຕໍ່ຄະນະນໍາ ຫສນຍ ທີ່ມາຈັດກອງປະຊູມ ຝຶກອົບຮົມໃນຄັ້ງນີ້ ເປັນການປະກອບສ່ວນ ສ້າງຄວາມເຂັ້ມແຂງ ໃຫ້ບຸກຄະລາກອນ ຫ້ອງວ່າການແຂວງ ແລະ ພາກສ່ວນຕ່າງໆ ພາຍໃນແຂວງ ເພື່ອເປັນເສນາທິການ ໃຫ້ແກ່ການນໍາ ຂອງແຂວງ ໄດ້ຢ່າງມີປະສິດທິພາບ ແລະ ປະສິດທິຜົນ.
ທ່ານ ປອ. ນ ວຽງສະຫວັນ ດວງສະຫວັນ ໄດ້ສະແດງຄວາມຂອບໃຈ ຕໍ່ທ່ານເຈົ້າແຂວງໆອຸດົມໄຊ ທີ່ໄດ້ສະຫຼະເວລາອັນມີຄ່າ ໃຫ້ການຕ້ອນຮັບ ໃນຄັ້ງນີ້ ພ້ອມທັງ ແຈ້ງຈຸດປະສົງ ການເດີນທາງມາຢ້ຽມຢາມ ແລະ ເຮັດວຽກ ຢູ່ແຂວງອຸດົມໄຊ ໃຫ້ທ່ານເຈົ້າແຂວງ ໄດ້ຮັບຊາບໂດຍຫຍໍ້, ອວຍພອນໃຫ້ທ່ານເຈົ້າແຂວງ ມີສຸຂະພາບແຂງແຮງ ແລະ ປະສົບຜົນສໍາເລັດ ໃນໜ້າທີ່ວຽກງານ ທຸກປະການ, ສືບຕໍ່ຊີ້ນໍານໍາພາ ການພັດທະນາ ເສດຖະກິດ-ສັງຄົມ ຂອງແຂວງ ໃຫ້ຂະຫຍາຍຕົວ ຢ່າງຕໍ່ເນື່ອງ ແລະ ມີຄວາມໝັ້ນທ່ຽງ ຕາມຄາດໝາຍ ທີ່ແຂວງວາງໄວ້.​
 
ຕອນທ້າຍ, ຫ້ອງວ່າການສໍານັກງານ ນາຍົກລັດຖະມົນຕີ ຍັງໄດ້ມອບຄອມພິວເຕີ ຈໍານວນ 07 ຊຸດ ທີ່ໄດ້ຮັບການສະໜັບສະໜູນ ຈາກບໍລິສັດ ວິສາວະກໍາກໍ່ສ້າງ ຈີນ ຫຼື CSCEC ຈໍານວນ 05 ຊຸດ ແລະ ບໍລິສັດ ຫົວເວີຍ ເຕັກໂນໂລຊີ ຈໍາກັດຜູ້ດຽວ ຈໍານວນ 02 ຊຸດ ມອບໃຫ້ຫ້ອງວ່າການ ປົກຄອງແຂວງອຸດົມໄຊ ເພື່ອນໍາໃຊ້ເຂົ້າໃນວຽກງານວິຊາສະເພາະ ຕື່ມອີກ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ