ມອບກາເຟ ເພື່ອປະກອບສ່ວນໃນວຽກງານລວມ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນພະຫັດ, 21 ກ.ພ 2019 12:00

​ໃນຕອນເຊົ້າ ວັນທີ 20 ກຸມພາ 2019 ທີ່ຫ້ອງວ່າການ ສໍານັກງານນາຍົກລັດຖະມົນຕີ, ທ່ານ ບຸນທົງ ເທບໄກສອນ, ປະທານສະຫະກອນຜູ້ຜະລິດກາເຟ ເຂດພູພຽງບໍລິເວນ ພ້ອມດ້ວຍຄະນະ ໄດ້ນຳເອົາກາເຟສຳເລັດຮູບ, ເຄິ່ງສຳເລັດຮູບ ແລະ ເຄື່ອງຊົງກາເຟ ມອບໃຫ້ຫ້ອງວ່າການ ສໍານັກງານນາຍົກລັດຖະມົນຕີ ເພື່ອປະກອບສ່ວນຮັບໃຊ້ ກອງປະຊຸມລັດຖະບານ ສະໄໝສາມັນ ປະຈຳເດືອນ ກຸມພາ 2019 ກໍ່ຄື ກອງປະຊຸມສຳຄັນຕ່າງໆ ໃນຕໍ່ໜ້າ. ຕາງໜ້າໃຫ້ຫ້ອງວ່າການ ສໍານັກງານນາຍົກລັດຖະມົນຕີ ກ່າວຮັບ ແມ່ນທ່ານ ມະໄລທອງ ກົມມະສິດ, ຮອງຫົວໜ້າຫ້ອງວ່າການສໍານັກງານນາຍົກລັດຖະມົນຕີ, ໂດຍມີພະນັກງານ ທີ່ກ່ຽວຂ້ອງ ຂອງສອງຝ່າຍເຂົ້າຮ່ວມ.
                          
ການມອບ-ຮັບເຄື່ອງດັ່ງກ່າວ ໃນຄັ້ງນີ້ ປະກອບມີ ເຄື່ອງຊົງກາເຟໃຫຍ່ 1 ເຄື່ອງ, ເຄື່ອງຊົງກາເຟນ້ອຍ 1 ເຄື່ອງ ແລະ ກາເຟ ຈຳນວນ 40 ກິໂລກຼາມ ລວມເປັນມູນຄ່າທັງໝົດ ປະມານ 13 ລ້ານກວ່າກີບ. ໃນໂອກາດດັ່ງກ່າວ, ທ່ານ ມະໄລທອງ ກົມມະສິດ ກໍ່ໄດ້ສະແດງຄວາມຂອບໃຈຕໍ່ ສະຫະກອນຜູ້ຜະລິດກາເຟ ເຂດພູພຽງບໍລິເວນ ທີ່ໄດ້ໃຫ້ການອຸປະຖໍາໃນຄັ້ງນີ້, ຊຶ່ງໄດ້ເປັນສ່ວນໜຶ່ງ ໃນການປະ ກອບສ່ວນສໍາຄັນ ເຂົ້າໃນວຽກງານລວມຂອງລັດ, ພ້ອມທັງ ຫວັງຢ່າງຍິ່ງວ່າ ສະຫະກອນຜູ້ຜະລິດກາເຟດັ່ງກ່າວ ຈະສືບຕໍ່ປະກອບສ່ວນຊ່ວຍເຫຼືອສັງຄົມລາວ ຕື່ມອີກ.
ສະຫະກອນຜູ້ຜະລິດກາເຟ ເຂດພູພຽງບໍລິເວນ ຫຼື ເອີ້ນວ່າ ເຂດກຳເນີດຂອງກາເຟລາວ ໄດ້ຮັບການສ້າງຕັ້ງຂຶ້ນ ໃນປີ 2007, ເປັນອົງກອນທີ່ຮວບຮວມເອົາຊາວສວນ ຜູ້ປູກກາເຟທັງໝົດ ຈຳນວນ 1.855 ຄອບຄົວ, ປະກອບມີກຸ່ມຜູ້ຜະລິດ 55 ກຸ່ມຍ່ອຍ, ສະເລ່ຍຄອບຄົວໜຶ່ງ ມີເນື້ອທີ່ປູກກາເຟ ຈຳນວນ 3 ເຮັກຕາ, ປະຈຸບັນ ມີສະມາຊິກທັງໝົດ 1.093 ຄອບຄົວ, 48 ກຸ່ມຜູ້ຜະລິດ, 46 ບ້ານ ໂດຍກວມເອົາ 3 ແຂວງຄື: ສາລະວັນ, ເຊກອງ ແລະ ຈຳປາສັກ, ມີໂຮງງານ ແລະ ຫ້ອງທົດລອງ 1 ແຫ່ງ ເພື່ອເປັນຈຸດເຕົ້າໂຮມ, ເກັບຮັກສາ, ຄັດແຍກເປືອກ ແລະ ລະ ດັບຄຸນນະພາບ ຂອງເມັດກາເຟ, ຊຶ່ງປະສິດທິພາບ ຂອງໂຮງງານ ແມ່ນສາມາດຜະລິດໄດ້ 20 ໂຕນ/ມື້. ສິ່ງທີ່ເປັນຈຸດເດັ່ນ ຂອງສະຫະກອນ ແມ່ນມີຄວາມຮັບປະກັນ ຄຸນນະພາບກາເຟ ດ້ວຍເຂົາເຈົ້າເອງ ໂດຍມີການຄວບຄຸມຄຸນນະພາບ ໃນຂະບວນການຜະລິດ ທຸກຂັ້ນຕອນ ນັບແຕ່ການປູກ ຈົນເຖິງເວລາທີ່ສາມາດດື່ມໄດ້, ຊຶ່ງບໍ່ມີສະຫະກອນໃດ ໃນ ສປປ ລາວ ທີ່ຮັບປະກັນໄດ້ຄືແນວນັ້ນ, ໃນນັ້ນ ໄດ້ຮັບການຢັ້ງຢືນການຄ້າ ທີ່ເປັນທຳ ໃນປີ 2009 ພ້ອມທັງ ໄດ້ຮັບການຢັ້ງຢືນ ກະສິກຳອິນຊີ ດ້ວຍມາດຖານ ຂອງອີຢູ, ອາຊີ ແລະ ອາເມີຣິກາເໜືອ ຫຼື ການາດາ ອີກດ້ວຍ, ໝາຍວ່າ ບໍ່ມີການນຳໃຊ້ຝຸ່ນເຄມີ ແລະ ຢາປາບສັດຕູພືດ, ສິ່ງສໍາຄັນ ຍັງເປັນການປົກປັກຮັກສາ ສິ່ງແວດລ້ອມ, ເພີ່ມເນື້ອທີ່ສີຂຽວ ແລະ ສ້າງແຫຼ່ງທີ່ຢູ່ອາໄສ ຂອງສັດສາວາສິ່ງ ໄປຄຽງຄູ່ກັບ ການສ້າງເສດຖະກິດ ຂອງຄອບຄົວປະຊາຊົນ ໃນທ້ອງຖິ່ນ, ເຮັດໃຫ້ກາເຟ ມີລາຄາສູງກວ່າລາຄາກາເຟທົ່ວໄປ. ພາຍໃນສະຫະກອນ ຍັງມີການບໍລິຫານ ແບບປະຊາທິປະໄຕ, ສະມາຊິກທຸກຄອບຄົວ ມີສິດເທົ່າທຽມກັນ, ມີຄວາມໂປ່ງໃສ ແລະ ຍຸຕິທຳ, ໃນນັ້ນ ມີຄະນະບໍລິຫານ ສະຫະກອນ ທີ່ເປັນຕົວແທນ ຂອງຊາວສວນ ຈຳນວນ 8 ທ່ານ, ຊຶ່ງປະກອບດ້ວຍ ຄະນະກໍາມະການບໍລິຫານ ຈໍານວນ 5 ທ່ານ ແລະ ຄະນະກວດກາ ຈໍານວນ 3 ທ່ານ; ມີພະນັກງານ ຈຳວນ 35 ທ່ານ ທີ່ເຮັດໜ້າທີ່ຊຸກຍູ້ສົ່ງເສີມ ວຽກງານການຜະລິດກາເຟ ໃຫ້ແກ່ສະມາຊິກສະຫະກອນ ເພື່ອບັນລຸເປົ້າໝາຍການຜະລິດ, ການແປຮູບ, ການເກັບຮັກສາ, ການຕະຫຼາດ ແລະ ບັນຊີ-ການເງິນ. ນັບແຕ່ປີ 2007 ເປັນຕົ້ນມາ ແມ່ນສາມາດຜະລິດກາເຟ ຂາຍຢູ່ພາຍໃນປະເທດ ໄດ້ຈຳນວນ 57 ພັນກວ່າໂຕນ (ໝາກແດງ), ສະເພາະ ປີ 2017-2018 ແມ່ນຜະລິດໄດ້ 8.300 ໂຕນ ຫຼື 436 ຕູ້ຄອນເທນເນີ, ໃນນັ້ນ ມີກາເຟນ້ອຍ ຫຼື ກາເຟທີ່ມີຄຸນນະພາບ ແລະ ເປັນທີ່ນິຍົມ ມີເກືອບ 7 ພັນໂຕນ. ສໍາລັບຕະຫຼາດຈໍາໜ່າຍ ແມ່ນສົ່ງອອກໄປຈີນ, ເກົາຫຼີໃຕ້, ຍີ່ປຸ່ນ, ສິງກະໂປ, ອົດສະຕາລີ, ນິວຊີແລນ, ຝຣັ່ງ, ສະວິດ, ສະຫະລັດອາເມລິກາ ແລະ ອື່ນໆ. ປະຈຸບັນ ເຖິງແມ່ນວ່າສະພາບລາຄາກາເຟຈະຕົກຕໍ່າ, ແຕ່ສະຫະກອນ ຜູ້ຜະລິດກາເຟ ເຂດພູພຽງບໍລິເວນ ກໍ່ຍັງສາມາດສືບຕໍ່ຂາຍມີກຳໄລ, ເນື່ອງຈາກວ່າ ມີຕະຫຼາດຈຳໜ່າຍ ທັງພາຍໃນ ແລະ ຕ່າງປະເທດ ທີ່ໝັ້ນຄົງພໍສົມຄວນ, ຊຶ່ງຖືວ່າເປັນຕົວແບບໜຶ່ງ ທີ່ມີການບໍລິຫານຈັດການ, ລວມທັງ ການຜະລິດ ແລະ ຈໍາໜ່າຍ ທີ່ດີ ແລະ ຄວນເສີມຂະຫຍາຍບົດຮຽນໃຫ້ກວ້າງຂວາງກວ່າເກົ່າ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ