ຫສນຍ ເຜີຍແຜ່ເຊື່ອມຊືມມະຕິສຳຄັນຂອງສູນກາງພັກ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພະຫັດ, 31 ມ.ກ 2019 18:00

​​ໃນວັນທີ 30-31 ມັງກອນ 2018 ຫ້ອງວ່າການສໍານັກງານ ນາຍົກລັດຖະມົນຕີ (ຫສນຍ) ໄດ້ຈັດກອງປະຊຸມ ເຜີຍແຜ່ເຊື່ອມຊຶມມະຕິ ຄັ້ງທີ 7 ຂອງຄະນະບໍລິຫານງານ ສູນກາງພັກ ສະໄໝທີ X ແລະ ເປີດຂະບວນການແຂ່ງຂັນ ກໍ່ສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ, ໂດຍການເປັນປະທານ ຂອງສະຫາຍ ເພັດ ພົມພິພັກ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ, ຫົວໜ້າຫ້ອງວ່າການສຳນັກງານ ນາຍົກລັດຖະມົນຕີ; ບັນດາສະຫາຍຄະນະພັກ, ຄະນະນຳ, ສະມາຊິກພັກ, ພະນັກງານ ພາຍໃນຫ້ອງວ່າການສຳນັກງານ ນາຍົກລັດຖະມົນຕີ ທັງໝົດ ເຂົ້າຮ່ວມ.

​​ຈຸດປະສົງ ແມ່ນເພື່ອເຮັດໃຫ້ສະມາຊິກພັກ, ພະນັກງານ ທົ່ວ ຫສນຍ ໄດ້ຮັບຮູ້, ເຊື່ອມຊືມ ຕໍ່ເນື້ອໃນຈິດໃຈ  ຂອງມະຕິ ຄັ້ງທີ 7 ຂອງຄະນະບໍລິຫານງານ ສູນກາງພັກ ສະໄໝທີ X; ມະຕິຂອງຄະນະບໍລິຫານງານ ສູນກາງພັກ ເລກທີ 56/ຄບສພ, ລົງວັນທີ 19 ທັນວາ 2018 ວ່າດ້ວຍການປັບປຸງ ຮາກຖານການເມືອງ ຂອງລະບອບປະຊາທິປະໄຕ ປະຊາຊົນ ໃຫ້ເຂັ້ມແຂງ ແລະ ໜັກແໜ້ນ; ມະຕິຂອງຄະນະບໍລິຫານງານ ສູນກາງພັກ ເລກທີ 57/ຄບສພ, ລົງວັນທີ 19 ທັນວາ 2018 ວ່າດ້ວຍການເພີ່ມທະວີ ການນໍາພາແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງ ຂອງການຄຸ້ມຄອງມະຫາພາກ ລວມທັງ ບາງບັນຫາ ທີ່ຜູ້ເຂົ້າຮ່ວມ ໄດ້ຍົກຂຶ້ນມານຳສະເໜີ ໃນກອງປະຊຸມຄັ້ງນີ້.  ອັນສຳຄັນ ແມ່ນສາມາດນຳເອົາເນື້ອໃນຈິດໃຈ ຂອງບັນດາເອກະສານ ກໍ່ຄື ເນື້ອໃນຈິດໃຈ ຂອງກອງປະຊຸມຄັ້ງນີ້ ໄປຈັດຕັ້ງຜັນຂະຫຍາຍ ໃນຂົງເຂດວຽກງານຕົວຈິງ ໃຫ້ມີຄວາມເປັນເອກະພາບ, ເປັນລະບົບ, ມີຄວາມໂປ່ງໃສ, ຖືກຕ້ອງຕາມລະບຽບຫຼັກການ, ມີປະສິດທິພາບ ແລະ ປະສິດທິຜົນສູງ, ເຮັດໃຫ້ຮາກຖານພັກ ແລະ ການຈັດຕັ້ງຂອງຕົນ ມີຄວາມປອດໄສ, ເຂັ້ມແຂງ, ໜັກແໜ້ນ, ສາມາດປະກອບສ່ວນ ເຂົ້າໃນການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມແຫ່ງຊາດ ໃຫ້ມີຜົນສຳເລັດ ຕາມຄາດໝາຍທີ່ວາງໄວ້. ນອກນັ້ນ ກໍ່ຍັງເປັນການເປີດ ຂະບວນການແຂ່ງຂັນ ການກໍ່ສ້າງໜ່ວຍພັກ ພາຍໃນ ຫສນຍ ມີຄວາມປອດໃສ, ເຂັ້ມແຂງ, ໜັກແໜ້ນ ໃຫ້ເປັນໄປຕາມທິດທາງ ແລະ ບັນລຸຕາມຄາດໝາຍທີ່ວາງໄວ້.
                        
​​ການເຜີຍແຜ່ເຊື່ອມຊືມ ເອກະສານສຳຄັນ ຂອງສູນກາງພັກ ຄັ້ງນີ້, ສະຫາຍ ຈະເລີນ ເຍຍປາວເຮີ, ກຳມະການສູນກາງພັກ, ລັດຖະມົນຕີປະຈຳສຳນັກງານ ນາຍົກລັດຖະມົນຕີ ໄດ້ໃຫ້ກຽດເຜີຍແຜ່ ມະຕິຂອງຄະນະບໍລິຫານງານ ສູນກາງພັກ ເລກທີ 56/ຄບສພ, ລົງວັນທີ 19 ທັນວາ 2018 ວ່າດ້ວຍການປັບປຸງ ຮາກຖານການເມືອງ ຂອງລະບອບປະຊາທິປະໄຕ ປະຊາຊົນ ໃຫ້ເຂັ້ມແຂງ ແລະ ໜັກແໜ້ນ ແລະ ສະຫາຍ ເພັດ ພົມພິພັກ ໄດ້ໃຫ້ກຽດເຜີຍແຜ່ ມະຕິຂອງຄະນະບໍລິຫານງານ ສູນກາງພັກ ເລກທີ 57/ຄບສພ, ລົງວັນທີ 19 ທັນວາ 2018 ວ່າດ້ວຍການເພີ່ມທະວີ ການນໍາພາແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງ ຂອງການຄຸ້ມຄອງມະຫາພາກ.
​​ໃນໂອກາດ ກ່າວເປີດກອງປະຊຸມ, ສະຫາຍ ເພັດ ພົມພິພັກ ຍັງໄດ້ຍົກໃຫ້ເຫັນ ຄວາມໝາຍຄວາມສຳຄັນ ຂອງການຈັດຕັ້ງເຜີຍແຜ່ເຊື່ອມຊືມ ເອກະສານສຳຄັນຂອງພັກໃນຄັ້ງນີ້, ພ້ອມທັງ ຮຽກຮ້ອງໃຫ້ສະມາຊິກພັກ-ພະນັກງານ ພາຍໃນ ຫສນຍ​ ຈົ່ງພ້ອມກັນເອົາໃຈໃສ່ເຂົ້າຮ່ວມ, ຮັບຟັງ, ຄົ້ນຄວ້າ ແລະ ປະກອບຄຳຄິດເຫັນ ຕໍ່ບັນຫາທີ່ຄວນເສີມຂະຫຍາຍ, ບັນຫາທີ່ຕ້ອງໄດ້ເອົາໃຈໃສ່ ປັບປຸງແກ້ໄຂ ແລະ ອື່ນໆ ຢ່າງພາວະວິໄສ, ສ້າງສັນ, ຖືກຕ້ອງ ແລະ ແທດເໝາະກັບຕົວຈິງ. ອັນສຳຄັນ ແມ່ນໃຫ້ມີຄວາມເຂົ້າໃຈ ຢ່າງເລິກເຊິ່ງ, ເປັນເອກະພາບ, ຈະແຈ້ງ ແລະ ກ້າວໄປເຖິງການບຸກທະລຸປັບປຸງແກ້ໄຂ ບັນຫາຍັງເປັນຈຸດອ່ອນ ແລະ ຄົງຄ້າງຮ່ວມກັນ ໃຫ້ມີການຫັນປ່ຽນ ໄປສູ່ປະລິມານ ແລະ ຄຸນນະພາບໃໝ່ທີ່ດີຂຶ້ນກວ່າເກົ່າ, ໂດຍເລີ່ມຈາກຕົວບຸກຄົນ ໄປຮອດການຈັດຕັ້ງແຕ່ລະຂັ້ນ ໃຫ້ເກີດດອກອອກຜົນ. ລວມທັງ ການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ ໃຫ້ເປັນຄວາມຮັບຜິດຊອບ ຂອງທົ່ວປວງຊົນຢ່າງຮອບດ້ານ, ຖືກທິດຖືກທາງ, ເຕີບໃຫຍ່ຂະຫຍາຍຕົວ ຕາມທິດມີຄຸນນະພາບ ເຂັ້ມແຂງ, ໜັກແໜ້ນ ແລະ ຍືນຍົງ ຢ່າງແທ້ຈິງ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ