ຫສນຍ ປະຕິບັດກິດຈະກຳໂຄງການ NPCA

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນຈັນ, 21 ມ.ກ 2019 10:00

ໃນວັນທີ 21 ມັງກອນ 2019 ທີ່ເມືອງບົວລະພາ, ແຂວງຄຳມ່ວນ; ຄະນະຮັບຜິດຊອບ ຄຸ້ມຄອງໂຄງການ "ຜະລິດ ສື່ ເພື່ອສະໜອງ ໃຫ້ແກ່ການນໍາ ກ່ຽວກັບການຄຸ້ມຄອງ ປ່າສະຫງວນ ແລະ ສັດນໍ້າ-ສັດປ່າ (NPCA)" ຂອງຫ້ອງວ່າການ ສໍານັກງານນາຍົກລັດຖະມົນຕີ (ຫສນຍ) ທີ່ໄດ້ຮັບທຶນສະໜັບສະໜູນ ຈາກທະນາຄານໂລກ, ໂດຍຜ່ານກອງທຶນປົກປັກຮັກສາ ສິ່ງແວດລ້ອມ ໄດ້ເປີດກອງປະຊຸມສຳມະນາ ແລກປ່ຽນບົດຮຽນ ແລະ ຂໍ້ມູນຂ່າວສານ ຮັບໃຊ້ການນຳ ກ່ຽວກັບການຄຸ້ມຄອງ ປ່າສະຫງວນແຫ່ງຊາດ ຫີນໜາມໜໍ່ ຕິດພັບກັບ ການພັດທະນາເສດຖະກິດ-ສັງຄົມ ແບບຍືນຍົງ. ພາຍໃຕ້ການເປັນປະທານ ຂອງ ທ່ານ ປອ. ນ. ວຽງສະຫວັນ ດວງສະຫວັນ, ຮອງຫົວໜ້າຫ້ອງວ່າການ ສໍານັກງານນາຍົກລັດຖະມົນຕີ, ຜູ້ຊີ້ນຳໂຄງການ; ມີ ທ່ານ ປອ. ແກ້ວອຸດອນ ບຸດສິງຂອນ ເຈົ້າເມືອງໆບົວລະພາ, ຄະນະຮັບຜິດຊອບ ຄຸ້ມຄອງໂຄງການ, ຜູ້ຕາງໜ້າ ຈາກ: ບັນດາກົມ ພາຍໃນ ຫສນຍ, ກະຊວງກ່ຽວຂ້ອງ, ແຂວງຄຳມ່ວນ, ເມືອງບົວລະພາ ພ້ອມດ້ວຍ ວິທະຍາກອນຮັບເຊີນ ຈາກສູນກາງ ແລະ ທ້ອງຖິ່ນ ຕະຫຼອດຮອດ ພາກສ່ວນທີ່ກ່ຽວຂ້ອງ ເຂົ້າຮ່ວມ.​

ໃນໂອກາດ ກ່າວເປີດກອງປະຊຸມ, ທ່ານ ປອ. ນ. ວຽງສະຫວັນ ດວງສະຫວັນ ໄດ້ສະເໜີໃຫ້ຜູ້ເຂົ້າຮ່ວມ ໄດ້ຮັບຮູ້ ກ່ຽວກັບພາລະບົບບາດ ແລະ ໜ້າທີ່ ຂອງ ຫສນຍ ກໍ່ຄື ແຕ່ລະກົມ ພາຍໃນ ຫສນຍ ໂດຍສະເພາະ ການເຮັດໜ້າທີ່ເປັນເສນາທິການ ໃຫ້ແກ່ທ່ານນາຍົກ-ຮອງນາຍົກລັດຖະມົນຕີ ແລະ ລັດຖະບານ, ເປັນຜູ້ປະສານງານ ກັບພາກສ່ວນຕ່າງໆ ໃນການພົວພັນ ແລະ ແກ້ໄຂວຽກງານ, ເຮັດໜ້າທີ່ບໍລິການຮັບໃຊ້ ໂດຍສະເພາະ ການບໍລິການຂໍ້ມູນຂ່າວສານ ໃຫ້ສັງຄົມ ທັງພາຍໃນ ແລະ ຕ່າງປະເທດ ໄດ້ຮັບຮູ້, ເຂົ້າໃຈ ແລະ ນໍາໄປຈັດຕັ້ງຜັນຂະຫຍາຍ ເຂົ້າສູ່ຂົງເຂດວຽກງານຕົວຈິງ ຢ່າງຖືກຕ້ອງ, ແທດຕົວຈິງ ແລະ ເກີດດອກອອກຜົນ. ອັນສຳຄັນ ແມ່ນໄດ້ນຳສະເໜີຮູ້ ກ່ຽວກັບຈຸດປະສົງ, ລະດັບຄາດໝາຍ ຂອງການຈັດກອງປະຊຸມສຳມະນາ ແລະ ເຄື່ອນໄຫວເຮັດວຽກ ຢູ່ເມືອງບົວລະພາ ໃນຄັ້ງນີ້ ລວມທັງ ສະພາບລວມ ຂອງໂຄງການຜະລິດສື່ ເພື່ອສະໜອງໃຫ້ແກ່ການນຳ ກ່ຽວກັບການຄຸ້ມຄອງ ປ່າສະຫງວນ ແລະ ສັດນໍ້າ-ສັດປ່າ. ຊຶ່ງຈຸດປະສົງຫຼັກ ຂອງການເຄື່ອນ ໄຫວກິດຈະກຳຄັ້ງນີ້ ແມ່ນເພື່ອຖອດ ຖອນບົດຮຽນ ແລະ ແລກປ່ຽນຂໍ້ມູນຂ່າວສານ, ການເກັບກຳຂໍ້ມູນ ແລະ ໂຄສະນາເຜີຍແຜ່ ແນວທາງນະໂຍບາຍ ຂອງພັກ, ລະບຽບກົດໝາຍ ຂອງລັດ ກ່ຽວກັບ ວຽກງານການຄຸ້ມຄອງ ປ່າສະຫງວນ ແລະ ສັດນໍ້າ-ສັດປ່າ ກໍ່ຄື ການຄຸ້ມຄອງ ແລະ ພັດທະນາປ່າສະຫງວນແຫ່ງຊາດ ຫີນໜາມໜໍ່ ໂດຍຕິດພັນກັບ ການຊຸກຍູ້ສົ່ງເສີມການພັດທະນາ ເສດຖະກິດ-ສັງຄົມ, ການທ່ອງທ່ຽວ, ການປົກປັກຮັກສາ ຊີວະນາໆພັນ  ໃນເຂດປ່າສະຫງວນແຫ່ງຊາດ ຫີນໜາມໜໍ່ ໃຫ້ມີຄວາມຍືນຍົງ, ສາມາດປະກອບສ່ວນ ເຂົ້າໃນການປັບປຸງຊີວິດຂ ອງປະຊາຊົນທ້ອງຖິ່ນ ໃຫ້ນັບມື້ດີຂຶ້ນເປັນກ້າວໆ. ຊຶ່ງການເຄື່ອນໄຫວເຮັດວຽກຄັ້ງນີ້, ຜູ້ເຂົ້າຮ່ວມ ຈະໄດ້ຮັບຟັງການນຳສະເໜີຄວາມຮູ້ ກ່ຽວກັບວຽກງານ ການຄຸ້ມຄອງປ່າສະຫງວນ ແລະ ສັດນໍ້າ-ສັດປ່າ ໃນຂອບເຂດທົ່ວປະເທດ ແລະ ປ່າສະຫງວນແຫ່ງຊາດ ຫີນໜາມໜໍ່; ຄວາມຮູ້ ກ່ຽວກັບຂັ້ນຕອນ ການນຳສະເໜີ, ຄວາມໜາຍຄວາມສຳຄັນ ຂອງການກ້າວ ເປັນມໍລະດົມໂລກ ທາງທຳມະຊາດ ຂອງປ່າສະຫງວນແຫ່ງຊາດ ຫີນໜາມໜໍ່ ທີ່ກຳລັງດຳເນີນການຢູ່ ໃນປະຈຸບັນ; ນອກຈາກນັ້ນ, ກໍ່ຍັງຈະໄດ້ແລກປ່ຽນຂໍ້ມູນ ລະຫວ່າງ ສູນກາງ ແລະ ທ້ອງຖິ່ນ, ລົງພື້ນທີ່ຕົວຈິງ ເພື່ອເກັບກຳຂໍ້ມູນ, ຖ່າຍພາບ, ຖ່າຍວີດີໂອ, ຢ້ຽມຢາມ ແລະ ສຳພາດເອົາຂໍ້ມູນ ເພື່ອນຳໄປເຜີຍແຜ່ຜ່ານສື່ຕ່າງໆ ໃຫ້ສັງຄົມໄດ້ຮັບຊາບ ກ່ຽວກັບສະພາບການພັດທະນາ ກໍ່ຄື ສະພາບຄວາມເປັນຈິງຂອງທ້ອງຖິ່ນ.
ຕອນທ້າຍ, ທ່ານປະທານກອງປະຊຸມ ໄດ້ຮຽກຮ້ອງໃຫ້ຜູ້ເຂົ້າຮ່ວມ ຈົ່ງພ້ອມກັນເອົາໃຈໃສ່ ຕິດຕາມຮັບຟັງ ການບັນຍາຍ ຂອງວິທະຍາກອນ ພ້ອມທັງ ແລກປ່ຽນບົດຮຽນ ເຊິ່ງກັນ ແລະ ກັນ, ເພື່ອເຮັດໃຫ້ການປະຕິບັດ ກິດຈະກຳ ໃນຄັ້ງນີ້ ໄດ້ຮັບຜົນສຳເລັດ ຢ່າງຈົບງາມ ແລະ ສາມາດນໍາເອົາ ຜົນສຳເລັດດັ່ງກ່າວ ໄປໝູນໃຊ້ເຂົ້າໃນວຽກງານວິຊາສະເພາະ ຂອງຕົນ ໃຫ້ມີປະສິດທິຜົນສູງ.
ການເຄື່ອນໄຫວກິດຈະກຳຄັ້ງນີ້ ແມ່ນດຳເນີນໃນໄລຍະວັນທີ 20-26 ມັງກອນ 2018.​​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ