ຫສນຍ ປາຖະກະຖາ ວັນສ້າງຕັ້ງກອງທັບ ຄົບຮອບ 70 ປີ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນສຸກ, 18 ມ.ກ 2019 10:00

ໃນຕອນເຊົ້າ ວັນທີ 18 ມັງກອນ 2019 ຫ້ອງວ່າການສຳນັກງານນາຍົກລັດຖະມົນຕີ (ຫສນຍ) ໄດ້ຈັດກອງປະຊຸມ ປາຖະກະຖາ ກ່ຽວກັບວັນສ້າງຕັ້ງ ກອງທັບປະຊາຊົນລາວ ຄົບຮອບ 70 ປີ (20 ມັງກອນ 1949 ຫາ 20 ມັງກອນ 2019), ໃຫ້ກຽດເຜີຍແຜ່ ໂດຍທ່ານ ພົນຈັດຕະວາ ຄຳຫອມ ແສງບົວລົມ, ວິລະຊົຍແຫ່ງຊາດ, ຮອງປະທານສະຫະພັນ ນັກຮົບເກົ່າແຫ່ງຊາດ; ມີສະມາຊິກພັກ-ພະນັກງານ ພາຍໃນ ຫສນຍ ເຂົ້າຮ່ວມ.

ຈຸດປະສົງ ເພື່ອສຶກສາອົບຮົມ ສະມາຊິກພັກ, ພະນັກງານ ໃຫ້ມີຈິດໃຈຮັກຊາດ, ຮັກລະບອບໃໝ່, ຮັກລະບອບ ປະຊາທິປະໄຕປະຊາຊົນ, ມີນໍ້າໃຈປະຕິວັດ, ມີຄວາມກະຕັນຍູຮູ້ບຸນຄຸນ ແລະ ຮໍ່າຮຽນເອົາແບບຢ່າງ ຄຸນສົມບັດສິນທຳປະຕິວັດ ຂອງບັນດາຜູ້ນຳ ແລະ ນັກຮົບປະຕິວັດຮຸ່ນກ່ອນ, ຖືເປັນໂອກາດສ້າງຂະບວນການ ຕອບບຸນແທນຄຸນ ຜູ້ທີ່ໄດ້ເສຍສະຫຼະຊີວິດ, ຜູ້ເສຍອົງຄະ, ຄອບຄົວຜູ້ມີຜົນງານ ໃນພາລະກິດຕໍ່ສູ້ກູ້ຊາດ, ປົກປັກຮັກສາ ແລະ ສ້າງສາພັດທະນາ ປະເທດຊາດ, ພ້ອມນັ້ນ ກໍ່ເພື່ອສ້າງຄວາມສາມັກຄີ ເປັນປຶກແຜ່ນ, ສ້າງສະຕິ ເປັນເຈົ້າຕົນເອງ-ເພິ່ງຕົນເອງ, ມີສະຕິລະວັງຕົວ ຕໍ່ກົນອຸບາຍມ້າງເພທຳລາຍ ຂອງອິດທິກຳລັງປໍລະປັກ ແລະ ເປັນເຈົ້າການເຂົ້າຮ່ວມ ໃນການປະຕິບັດແນວທາງ ປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຂອງພັກ, ເຮັດໃຫ້ການສະເຫຼີມສະຫຼອງ ວັນສ້າງຕັ້ງກອງທັບ ຄົບຮອບ 70 ປີ ເຕັມໄປດ້ວຍເນື້ອໃນ, ຄວາມໝາຍຄວາມສຳຄັນ ທີ່ເລິກເຊິ່ງ, ເປັນຂະບວນການ ທີ່ຟົດຟື້ນມ່ວນຊື່ນ, ສະຫງົບປອດໄພ, ມີຄວາມເປັນລະບຽບຮຽບຮ້ອຍ ແລະ ທົ່ວສັງຄົມເຂົ້າຮ່ວມຂະບວນການ ຮັກຊາດ ແລະ ພັດທະນາ ຢ່າງກວ້າງຂວາງ.
ໃນໂອກາດດັ່ງກ່າວ, ທ່ານ ພົນຈັດຕະວາ ຄຳຫອມ ແສງບົວລົມ ໄດ້ຍົກໃຫ້ເຫັນ ປະຫວັດສາດການກຳເນີດ ຂອງກອງ ທັບປະຊາຊົນລາວ ໂດຍສະເພາະ ສະພາບແວດລ້ອມ ກ່ອນການສ້າງຕັ້ງກອງທັບປະຊາຊົນລາວ, ຄວາມໝາຍຄວາມສຳຄັນ, ຜົນງານ-ໄຊຊະນະ ແລະ ການເຕີບໃຫຍ່ຂະຫຍາຍຕົວ ຂອງກອງທັບປະຊາຊົນລາວ  ໃນໄລຍະຕໍ່ສູ້ກູ້ຊາດ, ລວມທັງ ໄລຍະປະຕິ ບັດພາລະກິດ ປົກປັກຮັກສາ ແລະ ສ້າງສາພັດທະນາ ປະເທດຊາດ ຂອງກອງທັບປະຊາຊົນລາວ ໃນໄລຍະໃໝ່ ໂດຍຜ່ານຍ່ານທາງ ແຫ່ງການສ້າງຕັ້ງ, ສູ້ຮົບມີໄຊ ແລະ ເຕີບໃຫຍ່ຂະຫຍາຍຕົວ ພາຍໃຕ້ການນຳພາ ອັນປີຊາສາມາດ ແລະ ສະຫຼາດສ່ອງໃສ ຂອງພັກປະຊາຊົນ ປະຕິວັດລາວ, ຊຶ່ງກອງທັບປະຊາຊົນລາວ ໄດ້ຜ່ານຜ່າອຸປະສັກນາໆປະການ, ເຮັດສຳເລັດພາລະກຳ ປະຫວັດສາດ ທີ່ພັກ ແລະ ປະຊາຊົນ ມອບໝາຍໃຫ້ ຢ່າງມີໄຊ, ສາມາດຕີເອົາຊະນະ ຈັກກະພັດລ່າເມືອງຂຶ້ນຝລັ່ງ ແລະ ຈັກກະພັດອາເມຣິກາ ຜູ້ຮຸກຮານ ພ້ອມດ້ວຍລູກແຫຼ້ງຕີນມື ຂອງພວກເຂົາ, ສາມາດປົດປ່ອຍປະເທດຊາດ ໄດ້ຢ່າງສົມບູນ. ໃນນັ້ນ, ທ່ານໄດ້ເນັ້ນໜັກ ຍົກໃຫ້ເຫັນ ປະຫວັດມູນເຊື້ອ ອັນສະຫງ່າງາມ ຂອງກອງທັບປະຊາຊົນລາວ ໂດຍສະເພາະ ທາດແທ້, ມູນເຊື້ອຄວາມຈົງຮັກພັກດີ ຕໍ່ພັກ, ຕໍ່ປະເທດຊາດ, ຕໍ່ປະຊາຊົນ, ຕໍ່ອຸດົມການສັງຄົມນິຍົມ; ນໍ້າໃຈຕໍ່ສູ້ພິລະອາດຫານ, ເສຍສະຫຼະ, ກ້າແກ່ນ, ໜຽວແໜ້ນ, ມີໄຫວພິບ, ມີຄວາມດຸໝັ່ນຂະຫຍັນພຽນ, ມີນໍ້າໃຈປະຢັດມັດທະຍັດ, ມີຄວາມສາມັກຄີ ແລະ ມີລະບຽບວິໄນທີ່ເຂັ້ມງວດ. ດັ່ງນັ້ນ, ຜ່ານພຶກຕິກໍາຕົວຈິງ ຈາກການຕໍ່ສູ້ກູ້ຊາດ ຍືດເຍື້ອຍາວນານ ໄດ້ຢັ້ງຢືນຢ່າງຈະແຈ້ງວ່າ: ກອງທັບປະຊາຊົນລາວ ແມ່ນມາຈາກປະຊາຊົນ, ໂດຍປະຊາຊົນ ແລະ ເພື່ອປະຊາຊົນ ພາຍໃຕ້ການນຳພາເດັດຂາດ, ໂດຍກົງ ແລະ ຮອບດ້ານ ຂອງພັກ ປະຊາຊົນປະຕິວັດລາວ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ