ຫສນຍ ລະນຶກເຖິິງ ວັນສາກົນຢຸດຕິຄວາມຮຸນແຮງຕໍ່ແມ່ຍິງ ແລະ ເດັກນ້ອຍ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນສຸກ, 14 ທ.ວ 2018 17:00

​​ໃນຕອນເຊົ້າ ຂອງວັນທີ 14 ທັນວາ 2018 ຫ້ອງວ່າການສຳນັກງານນາຍົກລັດຖະມົນຕີ (ຫສນຍ) ໄດ້ຈັດກອງປະຊຸມລະນຶກເຖິິງ ວັນສາກົນຢຸດຕິຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ປະຈຳປີ 2018 (25 ພະຈິກ 2018), ໂດຍການເປັນປະທານ ຂອງທ່ານ ນ. ບຸບຜາ ເຄນວົງດາລາ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ; ມີບັນທ່ານຄະນະກົມ ແລະ ສະມາຊິກ 3 ອົງການຈັດຕັ້ງມະຫາຊົນ ພາຍໃນ ຫສນຍ ເຂົ້າຮ່ວມ.

ໃນໂອກາດດັ່ງກ່າວ, ທ່ານ ນ. ບຸບຜາ ເຄນວົງດາລາ ກໍ່ໄດ້ແຈ້ງຈຸດປະສົງ ຂອງການຈັດກອງປະຊຸມໃນຄັ້ງນີ້ ໃຫ້ຜູ້ເຂົ້າຮ່ວມໄດ້ຮັບຊາບ ໂດຍສະເພາະແມ່ນ ເພື່ອລະນຶກເຖິິງ ວັນສາກົນຢຸດຕິຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ແລະ ສະຫຼຸບຕີລາຄາປະເມີນຄືນ ການຈັດຕັ້ງປະຕິບັດວຽກງານ ສົ່ງເສີມຄວາມກ້າວໜ້າຂອງແມ່ຍິງ ແລະ ແມ່-ເດັກ ຫສນຍ ປະຈຳປີ 2018 ແລະ ຜ່ານແຜນປີ 2019. ພ້ອມດຽວກັນນັ້ນ, ກໍ່ໄດ້ຍົກໃຫ້ເຫັນ ປະຫວັດຄວາມເປັນມາ ແລະ ຄວາມໝາຍຄວາມສຳຄັນ ຂອງວັນສາກົນຢຸດຕິຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ລວມທັງ ສາເຫດຂອງຄວາມຮຸນແຮງ, ຄວາມສ່ຽງ, ຜົນກະທົບ ແລະ ໄພອັນຕະລາຍ ຂອງຄວາມຮຸນແຮງຕໍ່ແມ່ຍິງ ແລະ ເດັກນ້ອຍ, ບັນດາສະຖານທີ່ເກີດມີຄວາມຮຸນແຮງ, ສະພາບຄວາມຮຸນແຮງ ຕໍ່ແມ່ຍິງ ໃນ ສປປ ລາວ, ບົດບາດ ແລະ ລະດັບການມີສ່ວນຮ່ວມຂອງແມ່ຍິງ ໃນອົງການຈັດຕັ້ງຂອງພັກ ແລະ ລັດ ແຕ່ລະຂັ້ນ.

ໃນຕອນທ້າຍ, ທ່ານປະທານກອງປະຊຸມ ໄດ້ຮຽກຮ້ອງມາຍັງ ສະມາຊິກພັກ, ພະນັກງານ ທົ່ວ ຫສນຍ ຈົ່ງພ້ອມກັນເອົາໃຈໃສ່ ແລະ ມີສ່ວນຮ່ວມໃນວຽກງານ ການສະກັດກັ້ນ ການໃຊ້ຄວາມຮຸນແຮງ ຕໍ່ແມ່ຍິງ ແລະ ເດັກ ໃຫ້ຫຼາຍຂຶ້ນກວ່າເກົ່າ. ພ້ອມກັນນັ້ນ ກໍ່ຕ້ອງໄດ້ເອົາໃຈໃສ່ ຊຸກຍູ້ສົ່ງເສີມ ບົດບາດຄວາມສະເໝີພາບ ລະຫວ່າງ ຍິງ-ຊາຍ ໃນອົງການຈັດຕັ້ງຕ່າງໆ ໃຫ້ດີຂຶ້ນ-ຫຼາຍຂຶ້ນ, ເອື້ອຍນ້ອງແມ່ຍິງ ກໍ່ຕ້ອງໄດ້ເອົາໃຈໃສ່ເປັນເຈົ້າການບຸກບືນ ພັດທະນາຕົນເອງຢ່າງຮອບດ້ານ ໃຫ້ທຽບທັນກັບເພດຊາຍ ແລະ ມີບົດບາດສູງຂຶ້ນຢ່າງຕໍ່ເນື່ອງ ເພື່ອພ້ອມກັນ ປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ມີຄວາມຈະເລີນກ້າວໜ້າ, ສັງຄົມມີຄວາມສະຫງົບ, ສີວິໄລ ແລະ ຍຸຕິທຳ ຢ່າງແທ້ເຈິງ.

​ຕິດພັນກັບການລະນຶກເຖິງວັນສຳຄັນດັ່ງກ່າວ ແລະ ເພື່ອເປັນການສ້າງຂະບວນການ ຕ້ອນຮັບວັນສຳຄັນຕ່າງໆ ຂອງຊາດ ແລະ ກະກຽມດຳເນີນກອງປະຊຸມໃຫຍ່ ຂອງບັນດາອົງການຈັດຕັ້ງມະຫາຊົນ ພາຍໃນ ຫສນຍ, ໃນມື້ດຽວກັນ ຢູ່ພາຍໃນ ຫສນຍ ຍັງໄດ້ຈັດງານຕະຫຼາດນັດ ແລະ ພ້ອມກັນອອກກຳລັງກາຍ ເຕັ້ນເອໂລບິດ ແລະ ລາລີລາດ ຕື່ມອີກ.​


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ