ຫ້ອງວ່າການສຳນັກງານນາຍົກລັດຖະມົນຕີ ປະກາດການຈັດຕັ້ງ

ຜູ້ຂຽນ: ​ວັນ​ທອງ ລັດ​ຕະ​ນະ​ວິ​ໄລ

ວັນຈັນ, 10 ທ.ວ 2018 11:00

​​ໃນຕອນບ່າຍ ຂອງວັນທີ 7 ທັນວາ 2018 ຫ້ອງວ່າການສຳນັກງານນາຍົກລັດຖະມົນຕີ (ຫສນຍ) ໄດ້ຈັດກອງປະຊຸມ ປະກາດການຈັດຕັ້ງພາຍໃນ ຫສນຍ ຂຶ້ນ, ພາຍໃຕ້ການເປັນປະທານ ຂອງທ່ານ ເພັດ ພົມພິພັກ, ລັດຖະມົນຕີ, ຫົວໜ້າ ຫສນຍ, ມີບັນດາທ່ານຮອງຫົວໜ້າ ຫສນຍ, ຄະນະກົມ ພ້ອມດ້ວຍ ພະນັກງານ-ລັດຖະກອນ ພາຍໃນ ຫສນຍ ເຂົ້າຮ່ວມ.

 ໃນໂອກາດດັ່ງກ່າວ, ທ່ານ ຄົມສັນ ໄຊຍະສານ ຮັກສາການຫົວໜ້າກົມຈັດຕັ້ງ-ພະນັກງານ ຫສນຍ ໄດ້ຂຶ້ນຜ່ານດຳລັດຂອງນາຍົກລັດຖະມົນຕີ ສະບັບເລກທີ 343/ນຍ; ເລກທີ 344 ແລະ ເລກທີ 345 ລົງວັນທີ  08  ພະຈິກ 2018 ວ່າດ້ວຍການແຕ່ງຕັ້ງ ທ່ານ ຄົມສັນ ໄຊຍະສານ ເປັນຫົວໜ້າກົມຈັດຕັ້ງ-ພະນັກງານ; ທ່ານ ບຸນເພັງ ວົງໜໍ່ບຸນທຳ ເປັນຫົວໜ້າກົມນິຕິກຳ; ທ່ານ ສະຖິດ ເພັດສິງເລືອງ ເປັນຫົວໜ້າກົມເລຂາ ຫ້ອງວ່າການສຳນັກງານນາຍົກລັດຖະມົນຕີ ຕາມລຳດັບ ແລະ ຜ່ານຂໍ້ຕົກລົງ ຂອງທ່ານລັດຖະມົນຕີ, ຫົວໜ້າ ຫສນຍ ສະບັບເລກທີ 1052/ຫສນຍ, ລົງວັນທີ 5 ທັນວາ 2018 ວ່າດ້ວຍການແຕ່ງຕັ້ງ ທ່ານ ຮສ.ປອ ໂພສີ ຈັນມິ່ງ ເປັນຮອງຫົວໜ້າກົມເລຂາ ຫ້ອງວ່າການສຳນັກງານນາຍົກລັດຖະມົນຕີ.
ໃນໂອກາດດຽວກັນ, ທ່ານ ເພັດ ພົມພິພັກ ໄດ້ໃຫ້ກຽດມີຄຳເຫັນໂອ້ລົມ ຕໍ່ກອງປະຊຸມ ໂດຍໄດ້ກ່າວຍ້ອງຍໍຊົມເຊີຍ ແລະ ຕີລາລາສູງຕໍ່ບັນດາທ່ານ ທີ່ໄດ້ຮັບການແຕ່ງຕັ້ງ ແລະ ຮັບໜ້າທີ່ໃໝ່ໃນຄັ້ງນີ້. ອັນສຳຄັນ, ທ່ານໄດ້ເນັ້ນໜັກ ໃຫ້ສະມາຊິກພັກ-ພະນັກງານຫຼັກແຫຼ່ງ ພາຍໃນ ຫສນຍ ຈົ່ງພ້ອມກັນສຸມໃສ່ລົງເລິກ ຈັດຕັ້ງປະຕິບັດວຽກງານ ການເມືອງແນວຄິດ ດ້ວຍຄວາມເປັນເອກະພາບ, ສືບຕໍ່ປັບປຸງຕຳແໜ່ງງານ ໃຫ້ມີປະສິດທິພາບ ແລະ ປະສິດທິຜົນ; ສຸມໃສ່ກະກຽມດຳເນີນກອງປະຊຸມໃຫຍ່ຄັ້ງທີ V ຂອງອົງຄະນະພັກ ຫ້ອງວ່າການສຳນັກງານນາຍົກລັດຖະມົນຕີ ໃຫ້ໄດ້ຮັບຜົນສຳເລັດຢ່າງຈົບງາມ; ພ້ອມດຽວກັນນັ້ນ, ກໍ່ໃຫ້ເອົາໃຈໃສ່ປັບປຸງແບບແຜນວິທີເຮັດວຽກ ໃນຂົງເຂດວຽກງານທີ່ຕົນຮັບຜິດຊອບ ໃຫ້ມີຄຸນນະພາບສູງ, ມີຄວາມໂປ່ງໃສ ແລະ ສືບຕໍ່ນຳພາແນວຄິດ ຂອງພະນັກງານ ໃຫ້ມີຄວາມອຸ່ນອ່ຽນ, ທຸ່ນທ່ຽງ, ມີຄວາມສາມັກຄີ ຊ່ວຍເຫຼືອເຊິ່ງກັນ ແລະ ກັນ.


ແຫຼ່ງ: ຫ້ອງວ່າ​ການ​ສຳ​ນັກ​ງານ​ນາ​ຍົກ​ລັດ​ຖະ​ມົນ​ຕີ