ຫສນຍ ຈັດກອງປະຊຸມປາຖະກະຖາ ກ່ຽວກັບວັນສ້າງຕັ້ງເມືອງວຽງໄຊ

ຜູ້ຂຽນ: ຂ່າວ: ວັນ​ທອງ ລັດ​ຕະ​ນະ​ວິ​ໄລ; ພາບ: ວຸດທິສັກ ໂຄດຕະວົງ

ວັນອັງຄານ, 13 ພ.ຈ 2018 12:00

​​​​​​ໃນຕອນເຊົ້າ ຂອງວັນທີ 13 ພະຈິກ 2018 ຫ້ອງວ່າການສຳນັກງານນາຍົກລັດຖະມົນຕີ (ຫສນຍ) ໄດ້ຈັດກອງປະຊຸມປາຖະກະຖາ ກ່ຽວກັບວັນສ້າງຕັ້ງເມືອງວຽງໄຊ, ແຂວງຫົວພັນ ຖານທີ່ໜັ້ນຂອງການປະຕິວັດ ຄົບຮອບ 50 ປີ, ໂດຍການໃຫ້ກຽດປາຖະກະຖາ ຂອງສະຫາຍ ເພັດ ພົມພິພັກ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ; ມີຄະນະພັກ ຫສນຍ, ຄະນະພັກຮາກຖານ, ຄະນະໜ່ວຍພັກ ແລະ ສະມາຊິກພັກ-ພະນັກງານ ພາຍໃນຫ້ອງວ່າການສຳນັກງານນາຍົກລັດຖະມົນຕີ ທັງໝົດເຂົ້າຮ່ວມ.

​​ຈຸດປະສົງ ຂອງການປາຖະກະຖາ ໃນຄັ້ງນີ້ ແມ່ນເພື່ອເຮັດໃຫ້ສະມາຊິກພັກ-ພະນັກງານ ພາຍໃນຫ້ອງວ່າການສຳນັກ ງານນາຍົກລັດຖະມົນຕີ ໄດ້ຮັບຮູ້, ເຊື່ອມຊືມ ກ່ຽວກັບປະຫວັດ, ມູນເຊື້ອ, ຄວາມໝາຍຄວາມສຳຄັນ ຂອງເມືອງວຽງໄຊ ກໍ່ຄືມູນເຊື້ອອັນປີຊາສາມາດ, ຄວາມສະຫຼາດສ່ອງໃສ ຂອງພັກປະຊາຊົນປະຕິວັດລາວ ໃນການນຳພາການປະຕິວັດ, ທັງເປັນການລະນຶກຈົດຈຳລໍ້່ລຶກ ໄຊຊະນະອັນຍິ່ງໃຫຍ່ ຂອງກອງທັບ ແລະ ປະຊາຊົນລາວບັນດາເຜົ່າ ຕະຫຼອດຮອດ ຜົນງານອັນລໍ້າເລີດ, ຄວາມເປັນແບບຢ່າງ ທາງດ້ານຄຸນສົມບັດສິນທຳປະຕິວັດ ແລະ ຄຸນງາມຄວາມດີອັນໃຫຍ່ຫຼວງ ຂອງການນຳຮຸ່ນກ່ອນ ໂດຍສະເພາະ ປະທານ ໄກສອນ ພົມວິຫານ ແລະ ຜູ້ນຳຄົນອື່ນໆ ທີ່ໄດ້ນຳພາ ພາລະກິດປະຕິວັດຕໍ່ສູ້ປົດປ່ອຍຊາດ ແລະ ສ້າງເມືອງວຽງໄຊ ເປັນຖານທີ່ໝັ້ນຂອງການປະຕິວັດ ອັນແຂງແກ່ນ ເພື່ອເຮັດສຳເລັດການປະຕິວັດຊາດ ປະຊາທິປະໄຕ ນຳເອົາປະເທດຊາດ ກ້າວຂຶ້ນສູ່ສັງກາດໃໝ່. ພ້ອມກັນນັ້ນ ກໍ່ຍັງເປັນການເສີມຂະຫຍາຍ ມູນເຊື້ອພິລະອາດຫານ, ຄວາມສາມັກຄີປອງດອງ, ນໍ້າໃຈປະຢັດມັດທະຍັດ ແລະ ມູນເຊື້ອດຸໝັ້່ນຂະຫຍັນພຽນ ໃນການອອກແຮງງານ ຂອງປວງຊົນລາວທັງຊາດ ເພື່ອປັບປຸງຊີວິດການເປັນຢູ່ ແລະ ປະຕິບັດພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ກ້າວສູ່ຈຸດໝາຍທີ່ກຳນົດໄວ້ຢ່າງມີໄຊ.
​​​ຄຽງຄູ່ກັບການປາຖະກະຖາ ກ່ຽວກັບວັນສ້າງຕັ້ງເມືອງວຽງໄຊ, ຜູ້ເຂົ້າຮ່ວມ ຍັງໄດ້ຮັບຟັງການເຜີຍແຜ່ເຊື່ອມຊຶມ ບົດແນະນຳ ກ່ຽວກັບການດຳເນີນຊີວິດການເມືອງພາຍໃນພັກ ເພື່ອກ້າວເຂົ້າສູ່ກອງປະຊຸມໃຫຍ່ 3 ຂັ້ນ ຈາກສະຫາຍ ເພັດ ພົມພິພັກ ຕື່ມອີກ, ຊຶ່ງສະຫາຍໄດ້ອະທິບາຍ ທາງດ້ານເນື້ອໃນ ທີ່ຈະດຳເນີນການສຳຫຼວດຕີລາຄາ ການນຳພາລວມຂອງຄະນະພັກ, ບຸກຄົນໃນຄະ ນະພັກ ແລະ ສະມາຊິກພັກ; ຂັ້ນຕອນ ແລະ ວິທີການດຳເນີນ ແລະ ວິທີການຈັດຕັ້ງປະຕິບັດ. ທັງນີ້ ກໍ່ເພື່ອແນໃສ່ສຳຫຼວດກວດກາ ຕີລາຄາຄວາມຮັບຜິດຊອບລວມ ຂອງການຈັດຕັ້ງພັກ, ຂອງຄະນະພັກ ແລະ ຄວາມຮັບຜິດຊອບຂອງຄະນະພັກ, ສະມາຊິກພັກແຕ່ລະສະຫາຍ ໂດຍຊອກໃຫ້ເຫັນດ້ານດີ, ຜົນງານ, ດ້ານອ່ອນ, ຂໍຄົງຄ້າງ ໃນການນຳພາລວມ ຂອງຄະນະບໍລິຫານງານພັກແຕ່ລະຂັ້ນ. ທັງເປັນການສືບຕໍ່ຜັນຂະຫຍາຍຜົນ ຂອງການດຳເນີນຊີວິດການ ເມືອງປັບປຸງປົວແປງພັກ ປີ 2017, ແກ້ໄຂຈຸດອ່ອນຂໍ້ຄົງຄ້າງ ໃນການນຳພາຂອງຄະນະພັກ ແລະ ສະມາຊິກພັກ ເພື່ອປັບປຸງປົວແປງພັກ ໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ, ສາມາດຍົກສູງບົດບາດ ແລະ ຄວາມສາມາດນຳພາຂອງພັກ, ປັບປຸງກໍ່ສ້າງພັກ ໃຫ້ໜັກແໜ້ນທາງດ້ານການເມືອງ, ເປັນເອກະພາບທາງດ້ານແນວຄິດ, ເຂັ້ມແຂງທາງດ້ານການຈັດຕັ້ງ ແລະ ມີແບບແຜນນຳພາຖືກຕ້ອງ-ເຂັ້ມງວດ. ພ້ອມກັນນັ້ນ ກໍ່ເພື່ອເປັນບ່ອນອີງ ໃຫ້ແກ່ການເລືອກເຟັ້ນບຸກຄະລະກອນຜູ້ທີ່ດີເດັ່ນ ປະກອບເຂົ້າໃນຄະນະພັກຊຸດໃໝ່ ໃຫ້ໄດ້ຕາມມາດຕະ ຖານ, ຖືກຕ້ອງຕາມກົດລະບຽບຂອງພັກ. ພາຍຫຼັງດຳເນີນຊີວິດການ ເມືອງແລ້ວ ຕ້ອງເຮັດໃຫ້ການຈັດຕັ້ງພັກ, ຄະນະພັກ, ສະມາຊິກພັກ ມີການຫັນປ່ຽນຢ່າງຕັ້ໜ້າ, ຍົກສູງຄວາມສາມາດໃນການນຳພາ, ຄວາມເປັນແບບຢ່າງ, ມີຄວາມສາມັກຄີເປັນເອກະພາບ ຂອງຄະນະພັກ ແລະ ສະມາຊິກພັກ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ