ເປີດຝຶກອົບຮົມກ່ຽວກັບການສ້າງຂີດຄວາມສາມາດ ແລະ ຄວາມຊໍານານ ໃຫ້ແກ່ພະນັກງານ ທົ່ວ ຫສນຍ

ຜູ້ຂຽນ: ອານິຄົມ ວົງເດືອນ

ວັນພຸດ, 31 ຕ.ລ 2018 12:00

   

   ໃນຕອນເຊົ້າຂອງວັນທີ 30 ຕຸລາ 2018 ຢູ່ທີ່ ຫ້ອງວ່າການສໍານັກງານນາຍົກລັດຖະມົນຕີ, ໄດ້ຈັດຝຶກອົບຮົມການສ້າງຂີດຄວາມສາມາດ ແລະ ຄວາມຊໍານານ ໃຫ້ແກ່ພະນັກງານ-ລັດຖະກອນ ທົ່ວຫ້ອງວ່າການສໍານັກງານ ນາຍົກລັດຖະມົນຕີ. ໂດຍການເປັນປະທານຂອງ ທ່ານ ສົມສະນິດ ສຸວັນນະລາດ ຮອງລັດຖະມົນຕີ, ຮອງຫົວໜ້າຫ້ອງວ່າການສໍານັກງານນາຍົກລັດຖະມົນຕີ, ມີບັນດາທ່ານຮອງຫົວໜ້າ ຫ້ອງວ່າການສໍານັກງານນາຍົກລັດຖະ ມົນຕີ, ບັນດາທ່ານຫົວໜ້າກົມ-ຮອງຫົວໜ້າກົມ, ບັນດາເລຂາການນໍາ ພ້ອມດ້ວຍພະນັກງານພາຍໃນ ຫ້ອງວ່າການສໍານັກງານນາຍົກລັດຖະມົນຕີ ເຂົ້າຮ່ວມຢ່າງພ້ອມພຽງ.

 ໂອກາດກ່າວເປີດພິທີຝຶກອົບຮົມ ໃນຄັ້ງນີ້, ທ່ານ ສົມສະນິດ ສຸວັນນະລາດ ໄດ້ກ່າວວ່າ: ຈຸດປະສົງຂອງກອງປະຊຸມໃນຄັ້ງນີ້, ເພື່ອສ້າງຄວາມເຂັ້ມແຂງໃຫ້ແກ່ ພະນັກງານ-ລັດຖະກອນ ທົ່ວຫ້ອງວ່າການສໍານັກງານນາຍົກລັດ ຖະມົນຕີເວົ້າລວມ, ເວົ້າສະເພາະ ການຫັນວຽກງານຫ້ອງວ່າການສໍານັກງານນາຍົກລັດຖະມົນຕີ ເປັນທັນສະໄໝ ເປັນຕົ້ນແມ່ນ ວຽກງານການເປັນເສນາທິການ ຄົ້ນຄວ້າ; ສະໜອງຂໍ້ມູນຂ່າວສານ ແລະ ການບໍລິການຮັບ ໃຊ້ໃຫ້ແກ່ການນໍາ ເພື່ອຫັນວຽກງານດັ່ງກ່າວໄປສູ່ຄວາມທັນສະໄໝ, ວ່ອງໄວ, ຮັບປະກັນໄດ້ຄວາມລັບ, ໂປ່ງໃສ ແລະ ສາມາດກວດສອບໄດ້. ນອກນັ້ນ, ຍັງຈະເປັນການເຊີດຊູຄວາມສາມາດພະນັກງານ-ລັດຖະກອນ ພາຍໃນ ຫສນຍ ແລະ ກາຍເປັນຊ່ຽວຊານ ເທື່ອລະກ້າວ. ພ້ອມດຽວກັນນີ້, ທ່ານ ສົມສະນິດ ສຸວັນນະລາດ ຍັງໄດ້ເນັ້ນໜັກໃຫ້ຜູ້ເຂົ້າຮ່ວມຝຶກອົບຮົມ ໃນຄັ້ງນີ້ ຈົ່ງຍົງສູງສະຕິຄວາມຮັບຜິດຊອບຂອງຕົນເອງ ໃນການເຂົ້າຮ່ວມ, ເອົາໃຈໃສ່ ໃນການຄົ້ນຄວ້າ, ຮໍ່າຮຽນ ແລະ ສົນທະນາແລກປ່ຽນບົດຮຽນເຊິ່ງກັນ ແລະ ກັນ ເພື່ອເຮັດໃຫ້ການຝຶກອົບຮົມ ໃນຄັ້ງນີ້ ບັນລຸຕາມຈຸດປະສົງ ແລະ ລະດັບຄາດໝາຍທີ່ວາງໄວ້.

   ສໍາລັບເອກະສານທີ່ນໍາມາຝຶກອົບຮົມໃນຄັ້ງນີ້ ປະກອບມີ 4 ເອກະສານສໍາຄັນ ຄື: (1). ການນໍາໃຊ້ ແລະ ຄຸ້ມຄອງ ຈົດໝາຍເອເລັກໂຕຣນິກ; (2). ການນໍາໃຊ້ ແລະ ຄຸ້ມຄອງລະບົບຈໍລະຈອນເອກະສານ; (3). ການບັນ ນາທິການເອກະສານຜ່ານ Microsoft Office Word 2010 ແລະ (4). ການແກ້ໄຂບັນຫາຄອມພິວເຕີເຄື່ອຄ່າຍພື້ນຖານ.


ແຫຼ່ງ: ຫ້ອງວ່າ​ການ​ສຳ​ນັກ​ງານ​ນາ​ຍົກ​ລັດ​ຖະ​ມົນ​ຕີ