ໄຟຟ້າລາວ ມອບເງິນຊ່ວຍເຫຼືອ ເພື່ອຟື້ນຟູຊີວິດການເປັນຢູ່ຂອງປະຊາຊົນ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນພະຫັດ, 04 ຕ.ລ 2018 18:00

​​
ໃນຕອນເຊົ້າ ຂອງວັນທີ 4 ຕຸລາ 2018 ທີ່ຫ້ອງວ່າການສຳນັກງານນາຍົກລັດຖະມົນຕີ, ລັດວິສາຫະກິດໄຟຟ້າລາວ ແລະ ບໍລິສັດ ຜະລິດໄຟຟ້າລາວມະຫາຊົນ ໄດ້ນຳເງິນ ຈຳນວນ 3 ຕື້ກີບ ໄປມອບເພື່ອຊ່ວຍເຫຼືອບັນເທົາທຸກ ໃຫ້ແກ່ຜູ້ປະສົບໄພພິບັດນໍ້າຖ້ວມ ໃນຂອບເຂດທົ່ວປະເທດ ໂດຍການກ່າວມອບໂດຍ ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ ແລະ ກ່າວຮັບແມ່ນທ່ານ ເພັດ ພົມພິພັກ ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ຊຶ່ງມີພະນັກງານທີ່ກ່ຽວຂ້ອງ ຂອງສອງຝ່າຍເຂົ້າຮ່ວມ.
​ໃນໂອກາດດັ່ງກ່າວ, ທ່ານ ເພັດ ພົມພິພັກ ໄດ້ຕາງໜ້າໃຫ້ລັດຖະບານ ແລະ ປະຊາຊົນ ກ່າວສະແດງຄວາມຂອບໃຈຕໍ່ການຊ່ວຍເຫຼືອດັ່ງກ່າວ ໂດຍເຊື່ອໝັ້ນວ່າ ການປະກອບສ່ວນດັ່ງກ່າວ ຈະຊ່ວຍເຮັດໃຫ້ການຊ່ວຍເຫຼືອບັນເທົາທຸກໃຫ້ແກ່ປະຊາ ຊົນ ກໍ່ຄື ຜູ້ທີ່ປະສົບໄພພິບັດນໍ້າຖ້ວມ ນັບມື້ມີຊີວິດການເປັນຢູ່ດີຂຶ້ນຕາມລຳດັບ ໃນນັ້ນ ການນຳໃຊ້ທຶນຮ່ວງດັ່ງກ່າວ ແມ່ນເອົາໃຈໃສ່ໃຫ້ຖືກເປົ້າໝາຍ, ມີປະສິດທິຜົນ ແລະ ຮັບປະກັບຄວາມໂປ່ງໃສເປັນຢ່າງດີ.
​ໃນໂອກາດດຽວກັນ, ທ່ານ ຄຳມະນີ ອິນທິລາດ ກໍ່ໄດ້ສະແດງຄວາມເປັນຫ່ວງເປັນໄຍ ຕໍ່ສະພາບຜົນກະທົບ ຈາກໄພພິບັດນໍ້າຖ້ວມ ຕໍ່ການດຳລົງຊີວິດຂອງປະຊາຊົນ ໃນໄລຍະຜ່ານມາ. ພ້ອມທັງ ໃຫ້ຄຳໝັ້ນສັນຍາວ່າ ຕົນຈະເອົາໃຈໃສ່ຊຸກຍູ້ສົ່ງເສີມ ໃຫ້ພາກສ່ວນຕ່າງໆ ໄດ້ປະກອບສ່ວນເຂົ້າໃນການຊ່ວຍເຫຼືອ ແລະ ແກ້ໄຂໄພພິບັດ ໃຫ້ໄດ້ຮັບຜົນດີເປັນກ່າວໆ.


ແຫຼ່ງ: ກົມ​ປະ​ຊາ​ສຳ​ພັນ, ພະ​ແນກ​ໂຄ​ສະ​ນາ